Sang Hunyo 1947, nag-abot sa Freetown ang tatlo ka naggradwar sa Watchtower Bible School of Gilead nga sanday Charles Fitzpatrick, George Richardson, kag Hubert Gresham. Sila ang una nga mga misyonero nga nag-abot, kag madamo pa sang ulihi ang nagsunod.

Nakita sang mga misyonero nga handa gid ang mga kauturan sa pagbantala, pero kinahanglan pa sila buligan nga mangin mas epektibo nga mga manunudlo. (Mat. 28:20) Gani gintudluan sila sang mga misyonero sa pagtatap sa mga interesado kag pagdumala sing pagtuon sa Biblia. Gintudluan man sila sing bag-o nga mga instruksion parte sa organisasyon kag sa mga miting sa kongregasyon. May ginhiwat man nga publiko nga miting sa Wilberforce Memorial Hall. Nalipay gid ang mga misyonero kay 450 ang nagtambong! Sang ulihi, ginsugdan nila ang semanal nga Magazine Day. Ini nga paghanas nagpalig-on sa kongregasyon kag nakabulig sa ila pag-uswag sang ulihi.

Sa pihak nga bahin, nabudlayan ang mga misyonero sa klima. Ang report sang sanga sang 1948 nagasiling: “Mabudlay gid ang klima sa Sierra Leone. Ang tig-ululan nagalawig sing anom ka bulan, kag mabunok gid kag sigesige ang ulan. Kon kaisa nagaulan sing duha ka semana nga wala sing untat. Kon tig-ilinit, tuman kainit kag mapaang.” Ang Sierra Leone gintawag sang mga bisita sadto nga taga-Europa subong lulubngan sang mga puti. Lapnag ang malaria, yellow fever, kag iban pa nga balatian sa tropikal  nga mga lugar. Isaisa nga nagbalatian ang mga misyonero kag nagpalauli.

Nasubuan gid sa sini ang mga kauturan. Pero wala sila nangampo. Halin sang 1947 asta 1952, ang 38 ka manugbantala nangin 73. Sa Waterloo, isa ka banwa malapit sa Freetown, ang mapisan nga mga payunir nagbulig agod matukod ang bag-o nga kongregasyon. Naumpisahan man ang bag-o nga mga grupo sa Kissy kag Wellington, nga nahamtang sa gua sang Freetown. Daw handa na gid ang Sierra Leone sa pagsangkad. Pero paano?

Sang Nobiembre 1952, isa ka maniwang kag mataas nga Amerikano nga mga treintahon ang nag-abot sa pantalan sang masako nga siudad sang Freetown. Sia amo si Milton G. Henschel halin sa ulong talatapan. Sia naghinumdom: “Nagdayaw gid ako sa katinlo sining moderno nga siudad kon ikumparar sa iban nga siudad. . . . Sementado ang mga dalan, masako ang mga balaligyaan, bag-o ang mga salakyan, kag nagapakadto-pakari lang ang mga tawo.”

Nagdiretso si Brother Henschel sa puluy-an sang mga misyonero sa Freetown, duha ka bloke gikan sa bantog nga Cotton Tree. Ginsilingan niya ang mga utod didto nga ang Sierra Leone makabaton sing dugang nga bulig. Pagka-Domingo, nagdugok ang 253 ka tawo sa Wilberforce Memorial Hall agod mamati sa makalilipay nga mga pahibalo: Ang Sierra Leone makatigayon sing kaugalingon nga sanga talatapan, manugtatap sang sirkito, kag mga sirkito nga asembleya; may bag-o nga kongregasyon nga tukuron sa Kissy; kag ang pagbantala sa mga probinsia pasangkaron. Nalipay gid ang mga nagtambong!

Si Brother Henschel nagsiling: “Padayon sila nga nagasiling kusheh, nga nagakahulugan sing ‘maayo gid!’ Grabe gid ang ila kalipay. Gab-i na sila nagpalauli, . . . ang iban nagakinanta pa.”

 Ang bag-ong abot nga misyonero nga si William Nushy amo ang gintangdo nga magtatap sa bag-o nga sanga talatapan. Si William manugbangka anay sa mga casino sa bilog nga Estados Unidos. Pero sang nangin Cristiano sia, ginbiyaan niya ini kag nanindugan sing malig-on sa matarong nga mga prinsipio. Gani, pat-od gid nga higugmaon sia kag tahuron sang mga utod sa Sierra Leone.