Palangga nga mga Kaupod sa Panimalay:

Nalipay gid kami nga makasulat sa inyo sa panugod sining importante nga tuig! Sa ulihi nga bahin sang 2014, isa ka siglo na ang paggahom sang aton pinalangga nga hari nga si Jesucristo sa tunga sang iya mga kaaway.—Sal. 110:1, 2.

Sang maaga nga bahin sini nga tuig sang pag-alagad, sa annual meeting sang Watch Tower Bible and Tract Society of Pennsylvania, ginpagua sang New World Bible Translation Committee ang bag-o nga narebisar nga Ingles nga edisyon sang pinakamaayo nga translation sang Biblia nga matigayon sang katawhan. Gingamit ni Jehova ang iya hinaplas sang espiritu nga mga anak nga mag-aman sing orihinal nga New World Translation. (Roma 8:15, 16) Bangod sini, pat-od nga magaugyon kamo nga ini nga translation pinasahi gid.

Sa sulod sang madamo nga tuig, nangin prioridad sang Writing  Committee sang Nagadumala nga Hubon ang pagtranslate sang Biblia. Sa karon, ang New World Translation matigayon sing bug-os ukon sing bahin sa 121 ka lenguahe. Ginapalig-on namon kamo nga ipakita kay Jehova nga ginaapresyar gid ninyo ang Biblia. Basaha kag pamalandungi ini adlaw-adlaw. Kon himuon ninyo ini magasuod kamo sa Awtor sini, si Jehova nga Dios.—Sant. 4:8.

Nasubuan gid kami kon mabatian namon ang mga pagtilaw nga ginaatubang sang aton pinalangga nga mga kauturan. Nahangpan namon nga kon kaisa mahimo mabudlay para sa ila nga magkalipay upod sa mga kauturan. Halimbawa sining karon lang, isa ka pamilya sa Asia ang nakaatubang sing daku nga problema sang hinali nga naparalisar ang bug-os nga lawas sang iloy sang puluy-an. Makapasubo gid nga indi sia masarangan bulngon sang mga doktor. Ang iya bana amo ang nagapulaw-bugtaw sa iya. Ang ila bata nga lalaki kag duha ka bata nga babayi nagpakita sing maayo nga halimbawa subong mga Cristiano paagi sa pagbulig sa ila mga ginikanan. Ining huwaran nga pamilya lakip na kamo tanan nga nagmadinalag-on sa pag-atubang sa lainlain nga pagtilaw sa inyo pagtuo nagakalipay bangod nabatas ninyo ini. (Sant. 1:2-4) Ginapasalig ni Jehova ang iya mga hinaplas kag ang iban nga karnero nga mangin malipayon sila samtang padayon nga nagabatas sing mga pagtilaw, bangod padyaan sila sing kabuhi nga walay katapusan!—Sant. 1:12.

Sang nagligad nga tuig, ang nagtambong sa Memoryal 19,241,252. Makapalig-on gid makita nga kadamo sang nagapadungog kay Jehova kag kay Jesucristo paagi sa pagtambong sa pinakaimportante nga pagtilipon kada tuig sang katawhan sang Dios! Sa panahon sang Memoryal, daku nga hugyaw sang pagdayaw ang nabatian bangod  minilyon ang nag-auxiliary payunir sang Marso kag Abril. Makapalig-on gid ini! Indi bala nalipay gid kita kay ang mga nag-auxiliary payunir sa duaw sang manugtatap sang sirkito makatambong sa bug-os nga miting sang mga payunir, bisan pa ang iya duaw indi sa bulan sang Marso kag Abril? Nahangpan sang espirituwal nga mga tawo nga importante nga mangin aktibo sa pagbantala kag sa hilikuton sang kongregasyon. Paagi sini makapabilin kita nga malig-on kag indi mationg, kag mabatuan ang mga pagsulay sang Yawa nga paluyahon ang aton pagtuo kag patalangon kita.—1 Cor. 15:58.

Makapalig-on gid nga sang nagligad nga tuig sang pag-alagad, 277,344 ang nagsimbulo sang ila dedikasyon paagi sa pagpabawtismo kag nagalakat na sila karon sa dalan padulong sa kabuhi upod sa ila mga kauturan sa bug-os kalibutan! (Mat. 7:13, 14) Ining mga bag-uhan nagakinahanglan sang aton bulig agod mangin ‘mabakod sila sa pagtuo.’ (Col. 2:7) Padayon nga palig-una ang isa kag isa nga magbatas asta sa katapusan. (Mat. 24:13) ‘Pahalipaya ang mga kalag nga ginapung-awan, sakdaga ang mga maluya, mangin mapinasensiahon sa tanan.’ (1 Tes. 5:14) Sa katapusan, kabay nga ang tagsa sa aton ‘indi mag-untat sa pagpangamuyo’ nga nagasiling: “Magkari ang imo ginharian.”—1 Tes. 5:17; Mat. 6:10.

Palihug basaha ining Tuigan nga Libro, kag dumduma nga palangga gid namon ang kada isa sa inyo nga nagahigugma kay Jehova!

Ang inyo mga utod,

Nagadumala nga Hubon sang mga Saksi ni Jehova