Si Rafael Pared, nga nagaalagad sa Bethel upod sa iya asawa nga si Francia, nangin manugbantala sang 1957 sang 18 anyos sia. Nadumduman pa niya nga sekreto sia  nga ginasundan sang mga pulis samtang nagabantala, nga nagapangita sing kahigayunan para arestuhon sia kag ang iya mga kaupdanan. “Kon kaisa,” siling ni Rafael, “nagapanglaktod kami, kag nagalumpat sa mga kudal agod indi madakpan.” Si Andrea Almánzar nagsugid kon ano ang ila ginhimo para indi sila pag-arestuhon: “Nagahalong gid kami. Nagabantala kami sa isa ka balay dayon laktawan ang pulo ka balay kag magbantala naman.”

Sang 1959, halos 30 ka tuig na nga nagagahom si Trujillo, pero nagbag-o ang kahimtangan sa pulitika. Sang Hunyo 14, 1959, ang tinapok nga mga taga-Dominican Republic nagsalakay agod pahalinon si Trujillo. Bisan pa napaslawan ang pagsalakay kag ginpatay ukon ginpriso ang mga nagsalakay, nagahunahuna gihapon ang nagadamo nga kaaway ni Trujillo nga mahimo sia mapahalin sa puesto, gani ginpabaskog pa gid nila ang ila pagpamatok.

Sang Enero 25, 1960, sa tapos sang tinuig nga pagkooperar sa panguluhan ni Trujillo, ang Iglesia Katolika naghimo sing sulat nga nagaprotesta sa pag-abuso sa kinamatarong sang mga tawo. Ang historian sa Dominican Republic nga si Bernardo Vega nagsiling: “Bangod sa mga pagsalakay sang Hunyo 1959 kag sa ginhimo batok sa mga nagsalakay, kag sang ulihi bangod sa sekreto nga mga grupo nga batok sa gobierno, napilitan ang Simbahan nga kontrahon si Trujillo.”

Sang Mayo 1960, ginkuha sang gobierno ang pagdumili sa mga Saksi ni Jehova. Sa tapos sang tinuig nga pagdumili, wala ginapaabot nga si Trujillo mismo ang naghatag sing kahilwayan sang naguba na ang iya relasyon sa Iglesia Katolika.