Sang 2005, gintangdo sang sanga ang Bethelite nga kahibalo mag-Chinese, nga si Tin Wa Ng, nga mangin espesyal payunir agod bantalaan ang madamo nga Chinese sa pungsod. Natawo sia kag nagdaku sa Dominican Republic. Ang iya mga ginikanan nagsaylo sa Santo Domingo halin sa China.

Sang Enero 1, 2008, naporma ang Mandarin Chinese nga kongregasyon sa Santo Domingo, kag sang 2011 naporma ang isa ka grupo sa Santiago. Ang 70 ka manugbantala, lakip ang 36 ka regular payunir kag pila ka  auxiliary payunir, may aberids nga 76 ka pagtuon sa Biblia kada bulan.

Sang 2007, may 27,466 ka manugbantala nga nakigbahin sa ministeryo sa 376 ka kongregasyon, kag may 49,795 sila nga ginatun-an sa Biblia. Pero wala sing kongregasyon para sa madamo nga nagahambal sing Ingles. Gani sang Abril 2008, gin-asayn sang sanga ang mga misyonero nga sanday Donald kag Jayne Elwell para magporma sing Ingles nga grupo sa Santo Domingo. Nagsurbe anay ang gamay nga grupo sang manugbantala kon diin nagaistar ang mga nagahambal sing Ingles. Dayon gin-organisar nila ang mga teritoryo para mapanaksihan sing maid-id.

Bangod sa ila mga pagpanikasog, padayon nga nag-uswag ang Ingles nga grupo sa Santo Domingo, kag sang Hulyo 2009, nangin kongregasyon ini nga may 39 ka manugbantala. Amo man sini ang ginhimo sa iban nga bahin sang pungsod. Sang Nobiembre 2011, may pito na ka Ingles nga kongregasyon kag isa ka grupo sa pungsod.

Si Lorys, nga isa ka ilo, may Usher Syndrome. Natawo sia nga apa kag amat-amat nga nagburon ang iya panan-aw sang 16 anyos sia. Medyo makakita pa sia kon adlaw, pero kon gab-i wala na gid sia sing makita. Makakomunikar lang sia kon gab-i paagi sa tactile signing, ukon pag-uyat sa kamot sang nagasenyas.

Nakilala sang mag-asawa nga espesyal payunir si Lorys sang 23 anyos sia. Sina nga tion, nagapuyo sia upod sa apa nga lalaki kag may isa ka tuig sila nga bata nga babayi  nga indi apa. Nagpasugot si Lorys nga magtambong sa miting sa kongregasyon kag napahulag sia sa iya natun-an.

Naghimo gilayon si Lorys sing mga pagbag-o sa iya kabuhi. Halimbawa, sang natun-an niya nga indi nagakaigo nga magpuyo ang indi kasal, ginsilingan niya ang iya ginapuyo nga mapakasal sila kag ginpaathag niya nga indi niya pag-ikompromiso ang moral nga talaksan sang  Biblia. Bangod prangka si Lorys, nagpasugot ang lalaki nga magpakasal sila.

Sa tapos sang ila kasal, si Lorys nangin manugbantala kag wala madugay nabawtismuhan sia. Bangod sa iya pagtuon sa mga Saksi, nakatuon sia sing American Sign Language (ASL). Sugod sadto, gintudluan niya ang iya bata sing ASL kag ginatun-an sing kamatuoran.

Indi gid malipatan sang mga taga-Dominican Republic kag taga-Haiti ang adlaw sang Martes, Enero 12, 2010. Sina nga adlaw ginhalitan sang mabaskog nga linog ang Haiti. Ang Nagadumala nga Hubon sang mga Saksi ni Jehova gilayon nga nagpahanugot sa sanga sa Dominican Republic nga magpadala sing kuarta sa sanga sa Haiti. Bangod daku nga kuarta ang ipadala, ginpadala ini sa doktor sang Bethel nga si Evan Batista, nga nagataas sing  anom ka pie kag tatlo ka pulgada, kag nagabug-at sing 127 ka kilo.

Maayo gid nga desisyon nga si Brother Batista ang ginpadala kay sang nakaabot sia sa dulunan, ginsilingan sia nga kinahanglan gid ang doktor. Madamo sang malubha nga nasamaran sang linog ang gindala sa Assembly Hall nga ingod sang sanga sa Haiti para bulngon. Sang nahibaluan sang mga kauturan nga taga-Haiti nga doktor sang sanga ang nagdala sang kuarta, gintawgan nila ang sanga sa Dominican Republic kag nangabay kon puede makapabilin si Brother Batista sa Haiti. Siempre, ginpasugtan sila, gani pila lang ka oras sa tapos sang linog, nabuligan dayon ang mga kauturan sa Haiti.

Ang Purchasing Department sang sanga sa Dominican Republic gilayon nga nagkontak sa ila mga suplayer sang pagkaon. Sobra 6,800 ka kilo sang bugas kag beans kag iban pa nga pagkaon ang ginpadala sa Haiti sang 2:30 a.m. sang Huebes, Enero 14, nga amo ang pinakauna nga bulig nga nag-abot sa dulunan halin sa gua sang pungsod. Sa sina man nga adlaw, tatlo pa ka doktor halin sa Dominican Republic ang nagbiyahe sing pito ka oras pakadto sa sanga sa Haiti. Gab-i na sila nakaabot, pero sa baylo nga magdiretso sa ila dalayunan, nagkadto sila sa mga biktima kag ginbuligan tubtob sa tungang gab-i. Pagkasunod nga adlaw, apat pa ka doktor kag apat ka nars ang nag-abot halin sa Dominican Republic. Mabudlay ang pag-opera sa mga nasamaran kay naghimo lang sila sing temporaryo nga kuarto sa Assembly Hall para didto mag-opera. Pagkasunod nga semana, sobra 300 ka tawo ang nabulong sining 12 ka boluntaryo.

Kada adlaw, ginadala sa Dominican Republic ang mga malubha gid ang kahimtangan. Kon kaisa, ang mga salakyan nga ginagamit sa pagdala sing mga suplay sa Haiti  amo man ang nagadala sa mga nasamaran pakadto sa mga ospital sa Dominican Republic. Nag-organisar ang sanga sing mga Patient Visitation Group para palig-unon ang mga nasamaran kag mapat-od nga may ara sila bulong kag mga suplay. Ginaamanan sang pagkaon kag dalayunan sang lokal nga mga kongregasyon ang mga miembro sang pamilya nga nagabantay sa ila hinigugma nga nasamaran.

Ang mga sakripisyo kag pagpanikasog sang katawhan ni Jehova pagkatapos sang kalamidad nagapamatuod sa ginasiling sang Hulubaton 17:17: “Ang matuod nga abyan nagahigugma sa tanan nga tion, kag isa ka utod nga masaligan sa tion sang kalisdanan.” Ginapakita sang mga eksperiensia nga paagi sa Cristianong paghiliutod kag sa espiritu ni Jehova, ginabuligan niya ang mga matutom sa iya bisan pa sa ital-ital nga kahimtangan. Nagpadayon ang pagbulig sa sulod sang pila ka bulan. Ang mga Saksi ni Jehova nakapanagtag sing sobra 450,000 ka kilo nga relief goods, lakip ang 400,000 ka pagkaon. Mga 78 ka kauturan nga eksperto sa medisina halin sa lainlain nga bahin sang kalibutan ang nag-abot kag nagboluntaryo sang ila tion kag ikasarang upod ang madamo pa nga boluntaryo. *