SI Luis, nga paryente ni Trujillo, amo ang tresurero sang pulitikal nga partido nga Partido Dominicano. Pero, wala gid nagustuhan ni Luis ang pamaagi sang paggahom ni Trujillo kag bisan pa pirme niya gintinguhaan nga maghalin sa iya posisyon, wala sia gintugutan sang diktador.

Sang ginpapatay ni Trujillo ang duha ka utod nga lalaki ni Luis, duha ka beses nga gintinguhaan ni Luis nga patyon ang diktador. Pero, wala gid mahibaluan nga sia ang nagplano nga patyon ang diktador. Nagpabulig pa gani sia sa mga espiritista kon paano patyon ini nga tawo, nga suno sa iya: “Daw sapat ang iya batasan kag para sa iya, sia ang pinakagamhanan sa tanan.” Sa lamesa sa balay sang isa ka espiritista nakita niya ang libro nga “The Truth Shall Make You Free” kag ginbasa niya ini. Interesado gid si Luis sa libro kag gindala ini sa ila balay kag sang ulihi narealisar niya nga amo ini ang kamatuoran nga ginapangita niya.

 Sang nagkadto si Luis sa Ciudad Trujillo, nagtambong sia sa miting sang mga Saksi ni Jehova kag nagkuha sing pila ka libro kag magasin. Ginpulawan niya sa pagbasa ang mga literatura kag sang ulihi nangabay sing pagtuon sa Biblia. Samtang nagauswag sia, nagdesisyon si Luis nga maghalin sa pagdumalahan ni Trujillo. Sang nahibaluan ini sang diktador, gintanyagan niya si Luis sing mataas nga posisyon bilang konsul sang Dominican Republic sa Puerto Rico. Pero wala ini ginbaton ni Luis, bisan pa nahibaluan niya nga mahimo sia hingabuton bangod sa iya desisyon.

“Nag-antos ako sang nanuhaytuhay nga pagmaltrato,” siling ni Luis, “kag gintinguhaan sang gobierno nga siuron ako sa lainlain nga paagi. Pero determinado ako nga isikway ang mga tanyag sa sini nga kalibutan.” Si Luis nangin maisugon nga manugbantala sang maayong balita amo nga gintawag sia sang mga pari sang Katoliko nga “ang manugbantala.” Sang Oktubre 5, 1947, pagligad sang anom ka bulan sang una niya nga pagtambong sa miting, nabawtismuhan sia.

Pagkatapos sini, ginpangita si Luis agod dakpon, dayon ginbilanggo sia kag ginbartolina. Pila ka beses nga gintinguhaan sia nga patyon. Pero, sa kada tion nga arestuhon sia kag dal-on sa korte, ginagamit niya ini nga kahigayunan nga makapanaksi. “Nakig-away ako nga daw leon para pangapinan ang akon pagtuo,” siling ni Luis, “kag malipayon ko nga ginadumdom ini.”

Natalupangdan gid sang mga tawo ang katutom ni Luis sa pag-alagad sa Dios. Sang 1994, ang pamantalaan sa Dominican Republic nga El Siglo nagsiling parte kay Luis: “Si Mr. Luis Eduardo Montás kilala sa San Cristobal nga serioso nga tawo. Malulo sia kag may simpatiya. Sa kasaysayan sang San Cristobal, ang tanan nga nahibaluan parte sa iya naangot sa iya hilikuton bilang isa ka Cristiano.”