SANG bata pa ako, nadula ang akon palamatin-an kag nagtuon ako sang sign language sa isa ka eskwelahan para sa mga apa. Una ko nga natun-an ang kamatuoran sang 11 anyos ako, sang gin-agda ako sang amon kaingod nga Saksi nga pamilya nga magtambong sa miting sa kongregasyon. Bisan pa indi ko maintiendihan ang mga pamulongpulong, gin-abiabi ako sing maayo kag nagpadayon ako sa pagtambong. Madamo sa kongregasyon ang nagaagda sa akon sa pagkaon kag sa iban pa nga hilikuton.

Nangin manugbantala ako sang 1982, kag sa sina man nga tuig nabawtismuhan ako. Sang 1984, napangasawa ko si Eva nga isa man ka apa. Bisan pa indi madalom ang amon paghangop sa mga kamatuoran sa Biblia, kilala namon ang organisasyon ni Jehova bangod sa pinasahi nga tanda sang gugma kag nalipay kami sa pagpakig-upod sa kongregasyon.—Juan 13:35.

 Sang 1992, may ginhimo nga kahimusan para tudluan sing American Sign Language (ASL) ang pila ka kauturan. Ginpangita nila gilayon ang mga apa agod bantalaan sing maayong balita. Dayon sang 1994, nag-uswag ang hilikuton sa sign language nga teritoryo sang gin-agda sa sanga ang mag-asawa halin sa Puerto Rico para magtudlo sing sign language sa 25 ka kauturan.

Sa sina man nga tuig, nagtambong kami ni Eva sa mga miting sa bag-o lang natukod nga sign language nga grupo. Sa amon pagtambong sa mga miting sa sign language, nahangpan namon sing maayo ang mga panudlo sa Biblia pareho sang paghangkat ni Satanas sa pagkasoberano ni Jehova kag ang papel sang Mesianikong Ginharian sa katuyuan sang Dios.

Sang Disiembre 1, 1995, ang ASL nga mga kongregasyon naporma sa Santo Domingo kag Santiago. Pagka-Agosto 2014, may 26 na ka kongregasyon sa sign language kag 18 ka grupo.

Gintudluan namon ni Eva ang amon tatlo ka kabataan sing sign language subong ila una nga lenguahe. Ang amon kamagulangan nga bata nga lalaki nga si Éber, nagabulig sa pag-translate sang sign language sa sanga sa Estados Unidos. Ministeryal nga alagad ako sa kongregasyon, kag regular payunir naman si Eva.