Palangga nga mga Utod:

“Nagapasalamat kami pirme sa Dios tungod sa inyo kag pirme namon kamo ginasambit sa amon mga pangamuyo, kay ginadumdom namon sing dayon sa atubangan sang aton Dios kag Amay ang inyo buhat sang pagtuo, ang inyo mahigugmaon nga pagpangabudlay, kag ang inyo pagbatas bangod sa inyo paglaum sa aton Ginuong Jesucristo.” (1 Tes. 1:2, 3) Amo gid sini ang ginabatyag namon sa inyo! Nagapasalamat gid kami kay Jehova bangod sa inyo, kag sa inyo maayo nga mga buhat. Ngaa?

Sang nagligad nga tuig, nangin masako gid kamo sa “buhat sang pagtuo” kag sa “mahigugmaon nga pagpangabudlay” sa hilikuton sang Ginharian. Madamo sa inyo ang nagpasangkad sang inyo ministeryo. Ang iban nagsaylo sa mga lugar ukon pungsod diin kinahanglan ang dugang nga manugbantala sang Ginharian. Ginpasangkad sang iban ang ila ministeryo paagi sa pagpakigbahin sa pagpanaksi sa publiko. Madamo ang napahulag nga mag-auxiliary payunir sa panahon sang Memoryal, sa duaw sang manugtatap sang sirkito, ukon sa tion sang pinasahi nga kampanya sang Agosto 2014. Bisan pa lainlain ang inyo kahimtangan, nakita namon ang inyo bug-os kalag nga pag-alagad kay Jehova, kag ginakomendahan gid namon kamo. (Col. 3:23, 24) May rason gid kami nga pasalamatan si Jehova bangod sa inyo “buhat sang pagtuo!”

Ginaapresyar man namon ang inyo “mahigugmaon nga pagpangabudlay” may kaangtanan sa pagtukod sang  teokratiko nga mga pasilidad sa bug-os nga kalibutan. Kinahanglan gid naton ini nga mga pasilidad bangod padayon nga nagadamo ang katawhan ni Jehova. (Isa. 60:22) Halimbawa, ang aton peak nga manugbantala sang nagligad nga tuig 8,201,545, kag ang aberids nga ginatun-an sa Biblia 9,499,933 kada bulan. Bangod sini nga pag-uswag, madamo nga sanga talatapan ang kinahanglan pasangkaron ukon bag-uhon. Kinahanglan man naton ang dugang nga Kingdom Hall. Subong man, kinahanglan ang mga remote translation office sa madamo nga bahin sang kalibutan agod ang aton mga translator makaistar kag makatrabaho sa lugar diin ginagamit ang ila lenguahe.

Gani, mapamangkot naton ang aton kaugalingon, ‘Paano ko masuportahan ang pagtukod sa sini nga mga pasilidad?’ Ang iban sa aton mahimo makaboluntaryo sa pagtukod. May abilidad man kita sa pagtukod ukon wala, tanan kita may pribilehiyo sa pag-amot sang aton hamili nga mga butang para sa sining importante nga mga proyekto. (Hulu. 3:9, 10) Sang gintukod ang tabernakulo, napahulag gid ang mga Israelinhon sa pag-amot, asta sang ulihi ginpahibalo nga untaton na ang paghatag. (Ex. 36:5-7) Pat-od nga napahulag kita kag napalig-on sa sini nga halimbawa sa Kasulatan. Ang inyo “mahigugmaon nga pagpangabudlay” sa sining importante nga mga bahin sang sagrado nga pag-alagad isa pa ka rason nga pasalamatan namon si Jehova!

Nalipay gid kami sa malig-on nga pagbatas sang aton mga kauturan. Halimbawa, binagbinaga ang aton pinalangga nga mga kauturan sa South Korea. Sugod sang 1950, ginapriso ang pamatan-on nga mga brother sa sina nga pungsod nga may lainlain nga kalawigon bangod indi nila pag-ikompromiso ang ila Cristianong  neutralidad. Pila na ka henerasyon sang aton mga utod ang nagbatas sini. Ang ila halimbawa sang pagbatas nagapabakod gid sang aton pagtuo!

Sa Eritrea, tatlo naton ka brother ang ginpriso sa sulod na sang sobra 20 ka tuig. Napriso man ang iban sing malip-ot nga tion, lakip na ang aton mga sister kag ang ila kabataan. Madamo ang ginhimo nga panikasog agod mahilway sila, pero wala ini nagmadinalag-on. Bisan pa sini, wala gid nagkompromiso ang aton mga kauturan. Nahuptan nila ang ila integridad sa sining mabudlay nga mga kahimtangan. Ginalakip gid namon sa amon mga pangamuyo ining matutom nga mga kauturan.—Roma 1:8, 9.

Siempre, ang kalabanan sa inyo wala ginpriso bangod sa inyo pagtuo. Pero, madamo sa inyo ang nagaatubang sing kabudlayan bangod sa katigulangon, problema sa panglawas, pagpamatok sang di-tumuluo nga tiayon ukon paryente, kag iban pa nga personal nga kabudlayan nga kamo lang ang nakahibalo. Bisan pa sini, padayon kamo nga nagaalagad kay Jehova sing matutom! (Sant. 1:12) Ginakomendahan gid namon kamo. Ang inyo pagbatas isa pa ka rason nga pasalamatan namon si Jehova.

Huo, ang inyo buhat sang pagtuo, mahigugmaon nga pagpangabudlay, kag ang inyo pagbatas nagahatag sa amon sing mga rason nga ‘pasalamatan si Jehova, kay maayo sia.’ (Sal. 106:1) Palangga gid namon kamo tanan, kag ginapangamuyo namon nga si Jehova magapabakod, magasakdag, kag magapakamaayo sa inyo agod maalagad ninyo sia sing walay katapusan.

Ang inyo mga utod,

Nagadumala nga Hubon sang mga Saksi ni Jehova