BANGOD sa madasig nga pag-uswag sang organisasyon ni Jehova kinahanglan man ang dugang nga mga Kingdom Hall, Assembly Hall, pasilidad para sa teokratiko nga mga eskwelahan, remote translation office, kag mga pasilidad sang sanga sa lainlain nga lugar. Gani sang Oktubre 2013, ang Nagadumala nga Hubon nagporma sing bag-o nga departamento agod ang pagdesinyo, pagtukod, pagkay-o, kag pagmentinar sang aton mga pasilidad mahimo sa pinakamaayo nga paagi pero makakinot. Ini nga departamento ginatawag nga Worldwide Design/Construction Department (WDC), nga nahamtang sa aton ulong talatapan sa Brooklyn, New York, kag  nagapanghikot sa idalom sang Publishing Committee sang Nagadumala nga Hubon.

Ang WDC amo ang nagatatap sang mga Regional Design/Construction Department, nga nahamtang sa mga sanga talatapan sa Australia, Estados Unidos, Germany, kag South Africa. Ini nga mga departamento ang nagadumala sang pagdesinyo, pagtukod, kag pagmentinar sang mga proyekto sa mga sakop nila nga rehiyon. Ang ila tulumuron amo ang pagpadasig sa pagtukod sang mga Kingdom Hall. Sang una, ginatukod ang mga Kingdom Hall sa bulig sang Regional Building Committee ukon paagi sa programa para sa imol nga mga lugar. Ining duha ka kahimusan gintingob na para mapadasig ang hilikuton sa pagtukod.

Para maorganisar ang nagadamo nga kinahanglan nga mga Kingdom Hall kag Assembly Hall, ginporma ang Local Design/Construction Department sa kada sanga. Ini nga departamento nagapanghikot sa idalom sang Komite sang Sanga sa ila lugar. Ang isa ka makalilipay nga pagbag-o sa sini amo nga ang tanan nga sanga makaasayn na sing bug-os tion nga mga construction servant agod buligan ang lokal nga mga kauturan sa pagtukod sang mga Kingdom Hall kag Assembly Hall.

Sang Abril 2014, sobra 270 ka dalagku nga proyekto ang kinahanglan tapuson, lakip na ang 90 ka remote translation office, 35 ka Assembly Hall, kag 130 ka proyekto sang sanga. Dugang pa, sobra 14,000 ka Kingdom Hall ang kinahanglan patindugon ukon kay-uhon.

Makapabakod gid sing pagtuo nga makita ang katawhan ni Jehova bisan ano man ang ila pungsod, kultura, kag lenguahe nga nahiusa sa pagtukod sang mga pasilidad nga nagahatag sing kahimayaan kag kadayawan sa  iya balaan nga ngalan! “Daku pa nga hilikuton ang kinahanglan tapuson,” siling ni Dan Molchan, sang Personnel Committee Office sa ulong talatapan, “kag ginaapresyar gid namon ang pangamuyo sang mga kauturan kag ang ila mga donasyon para sa pagsakdag sang hilikuton. Pero nagapasalamat gid kami sa mga kauturan nga nagboluntaryo sa pagbulig sa mga proyekto.”