Sa tion sang pagdumili, ang kalabanan nga kongregasyon padayon nga nagatipon sa pribado nga mga balay agod magsimba. Agod indi sila matalupangdan, madamo nga kongregasyon ang wala nagakanta sing mga ambahanon sang Ginharian. Ginsalakay sang mga awtoridad ang pila ka tilipunan, pero wala na nagakakibot sa sini ang mga kauturan.

Masami nga ginabalibad sang mga kauturan ang mga kasal ukon pagtilipon sang pamilya agod maghiwat sing dalagku nga mga asembleya. “Ang mga mapakasal nagaparehistro sang ila kasal kag nagakuha sing permit sa pulis agod maghiwat sing punsion,” paathag ni Tagor Hutasoit. Sa tion sang punsion, nagapungko ang ginkasal sa plataporma samtang nagahatag sing mga pamulongpulong base sa Biblia ang mga utod.”

Sa isa ka asembleya, ginpalapitan sang pulis si Tagor.

“Kalabanan nga kasal duha ukon tatlo ka oras lang. Ngaa ang inyo kasal halin sa aga asta sa gab-i?” pamangkot sang pulis.

“Ang pila ka nobya kag nobyo madamo sing problema kag kinahanglan nila ang madamo nga laygay sang Pulong sang Dios,” sabat ni Tagor.

 “A, amo gali,” tangutango sang pulis.

Paagi sa madamo nga nagpakasal, napresentar sang mga utod ang mga bahin sa “Nahiusa sa Ginharian” Distrito nga Kombension sang 1983 sa daku nga istadyum sa Jakarta. Ang pinakamadamo nga nagtambong mga 4,000 ka kauturan kag interesado, kag 125 ang nabawtismuhan sing tago antes sang programa. Sang ulihi, medyo nag-ugdaw ang pagdumili, gani naghiwat naman sing dalagku nga mga kombension ang mga kauturan, lakip na ang gintambungan sang sobra 15,000.

Sang dekada 1980 kag 1990, pirme nagapetisyon sa gobierno ang sanga talatapan nga kuhaon ang pagdumili sa mga Saksi ni Jehova. Ang mga kauturan sa iban nga pungsod nagsulat man sa gobierno sang Indonesia kag sa mga embahador sini nga nagapamangkot kon ngaa gindumilian nila ang mga Saksi ni Jehova. Madamo nga opisyal ang pabor nga kuhaon ang pagdumili, pero ang impluwensiado nga Directorate General of Christian Community Guidance pirme nagapamalabag sa ila panikasog.

Sang 1990, naghinakop ang mga kauturan nga basi puede na makapatindog sing bag-o nga sanga talatapan sa lugar nga indi dali matalupangdan. Sa amo man nga tuig, gin-aprobahan sang Nagadumala nga Hubon ang pagbakal sing propiedad malapit sa Bogor, isa ka gamay nga siudad nga mga 40 ka kilometro sa bagatnan sang Jakarta. Apang pila lang ka kauturan diri ang makahibalo sa pagpanukod. Paano mapatindog ang bag-o nga pasilidad?

Ang solusyon amo ang internasyonal nga paghiliutod. Ang Brooklyn Construction Office kag Regional Engineering Office sa Australia naghimo sing arkitektural nga mga plano. Mga 100 ka hanas nga internasyonal nga boluntaryo ang nagbulig sa duha ka tuig nga proyekto.

Si Hosea Mansur, nga Indonesian nga utod kag ginsaligan nga makig-angot sa lainlain nga lokal nga opisyal, nagsiling: “Kon makita sang Muslim nga mga opisyal ang H.M. sa akon matig-a nga kalo, abi nila ang letra H nagakahulugan sing ‘Hājjī,’ ginatahod nga titulo sang mga nakakadto sa Mecca. Gani ginatahod gid nila ako. Bangod sini, mas mahapos ang pag-organisar sang hilikuton.”

 Gindedikar ang bag-o nga mga pasilidad sang sanga sang Hulyo 19, 1996. Si John Barr, miembro sang Nagadumala nga Hubon, amo ang namulongpulong para sa dedikasyon. Sa 285 nga nagtambong, 118 ang representante sang sanga kag mga misyonero anay halin sa madamo nga pungsod kag 59 ka miembro sang pamilya Bethel sa Indonesia. Duha ka adlaw sa tapos sang dedikasyon, 8,793 ka delegado ang nagtambong sa “Mga Mensahero sang Diosnon nga Paghidait” Distrito nga Kombension sa Jakarta.

Sang 1998, ang madugay na nga presidente nga si Soeharto (Suharto) naghalin sa puesto, nga nagbukas  sa bag-o nga panggobierno. Gani, gintinguhaan pa gid sang mga kauturan nga makuha ang pagdumili sa aton hilikuton.

Sang 2001, ang Secretary of State sang Indonesia nga si Mr. Djohan Effendi nagkadto sa New York kag nagbisita sa Brooklyn Bethel, naistorya niya ang tatlo ka miembro sang Nagadumala nga Hubon. Nagdayaw gid sia sa iya nakita, kag ginbaton niya nga maayo ang reputasyon sang mga Saksi ni Jehova sa bilog nga kalibutan. Pabor si Mr. Effendi nga kuhaon ang pagdumili, pero nagsiling sia nga ang desisyon magahalin sa abogado heneral sang Indonesia nga si Mr. Marzuki Darusman.

Pabor man ang abogado heneral nga kuhaon ang pagdumili, pero ang nagapamatok nga mga opisyal sa iya departamento padayon nga nagapaganot kay nagalaum sila nga islan man sia sa indi madugay. Sa katapusan, sang Hunyo 1, 2001, ginpatawag sa opisina sang abogado heneral si Tagor Hutasoit. “Sa sina man nga opisina, ginhatag sa akon sang nagligad nga mga 25 ka tuig ang dokumento nga nagasiling nga ginadumilian ang mga Saksi ni Jehova,” siling ni Tagor. “Apang sa sini nga adlaw, sa katapusan nga adlaw sang abogado heneral sa iya katungdanan, ginhatag niya sa akon ang isa ka dokumento nga nagasiling nga ginkuha na ang pagdumili.”

Sang Marso 22, 2002, opisyal nga ginrehistro sang Department of Religious Affairs ang mga Saksi ni Jehova sa Indonesia. Ang direktor-heneral sang departamento nagsiling sa representante sang sanga: “Ini nga dokumento wala nagahatag sa inyo sing kahilwayan sa pagsimba. Ina nga kahilwayan halin sa Dios. Suno sa sini nga dokumento, ang inyo relihion opisyal nga ginakilala sang gobierno. May kinamatarong na kamo pareho sang iban nga relihion, kag alagaran kamo sang gobierno.”