Sang maaga nga bahin sang dekada 90, may isa lang ka gulang ukon ministeryal nga alagad ang kalabanan nga kongregasyon sa Georgia. Sa masami, ang mga kongregasyon ginahuman sang lainlain nga grupo nga nagahiwat sang ila kaugalingon nga miting. Ini bangod nagaistar ang kauturan sa malayo nga mga baryo ukon banwa.

Sanday Joni Shalamberidze kag Pavle Abdushelishvili nga pareho nga nakaalagad sa malayo nga mga lugar, gin-asayn sa Telavi nga isa ka siudad sa rehiyon sang Kakheti agod magbulig sa kauturan. Ang kongregasyon didto may 13 ka grupo nga ginahuman sang 300 ka manugbantala nga nagatipon sa lainlain nga lugar, pero wala sing bisan isa ka gulang.

 Natalupangdan sang ulihi nanday Joni kag Pavle kon ngaa mahinay ang espirituwal nga pag-uswag sang kauturan. Nagpaathag si Joni: “Madamo nga kauturan ang may malapad nga kaumhan kag ulubasan. Kinabatasan na sa sini nga lugar nga nagabuligay ang mga tawo sa pagpanguma, bangod sini daku ang tion nga nagapakig-upod ang kauturan sa indi tumuluo.”—1 Cor. 15:33.

Nagpanugda sanday Joni kag Pavle nga magpabulig ang kauturan sa ila masigkatumuluo sa pagpanguma. Kon himuon nila ini, makabenepisyo sila sa maayo nga kaupdanan samtang nagapanguma. (Man. 4:9, 10) Nagsiling si Joni, “Nagbakod pa gid ang gugma sang kauturan sa sulod sang kongregasyon.” Sang naghalin sanday Joni kag Pavle sa Kakheti pagligad sang tatlo ka tuig, may 5 na ka gulang kag 12 ka ministeryal nga alagad didto.

Bangod ginadumilian pa ang aton hilikuton tubtob sa maaga nga bahin sang dekada 90, nagatipon lang ang mga Saksi sa magagmay nga grupo para sa Pagtinuon sang Kongregasyon sa Libro kag Pagtinuon sa Ang Lalantawan. Bisan pa makapalig-on ini nga mga miting, wala ini nagahanas sa kauturan sa pagministeryo.

Pero nagbag-o ini sang natapos ang paggahom sang Komunista. Naghatag sing panuytoy ang organisasyon ni Jehova sa mga kongregasyon nga maghiwat sang Teokratikong Eskwelahan Para sa Ministeryo kag Miting sa Serbisyo bilang bahin sang ila semanal nga mga miting.

Madamo sing matahom nga eksperiensia si Naili Khutsishvili kag ang iya utod nga babayi nga si Lali Alekperova sa pagtambong sa sini nga mga miting. Naghinumdom si Lali: “Makalilipay gid yadto nga tion. Nalangkag gid ang tanan nga may bahin na sa programa ang mga sister.”

 “Sa isa ka pasundayag,” hinumdom ni Naili, “nagabasa sang newspaper ang tagbalay sang may nanuktok sa puertahan. Sang ginpasulod niya, nag-agi ang duha ka sister sa mayor nga puertahan sang tilipunan kag nagsaka sa stage!” Nagdugang pa si Lali, “Bisan kon kaisa daw kahalam-utan yadto nga mga miting, nakapauswag ini sang amon ikasarang sa pagbantala.”

Tinuig na nga nagaimprinta sang mga literatura sa Biblia ang pila ka utod nga nagagamit sang de-mano nga mga duplicator sa ila puluy-an. Pero bangod nagadamo ang kinahanglan nga publikasyon, nagpangita ang kauturan sang mga kompanya nga makaimprinta sang mga magasin sa rasonable nga presyo.

Maayo gid mangita sing paagi ang kauturan sa paghanda sang orihinal nga kopya para sa manug-imprinta. Ang gin-translate nga mga tinaga sa Georgian gina-type sing mahalungon suno sa layout sang Ingles nga magasin. Dayon ginapapilit sa sini ang gingunting nga mga piktyur halin sa Ingles nga magasin. Tapos, nagagunting sila sang matahom nga mga letra halin sa mga newspaper kag ginapapilit ini sa kober sang Ingles nga magasin. Handa na ang orihinal nga kopya para sa manug-imprinta!

Sang may mga kompyuter na, ang pamatan-on nga mga brother nga sanday Levani Kopaliani kag Leri Mirzashvili nag-eskwela para makahibalo kon paano ini gamiton sing maayo. Naghinumdom si Leri: “Indi ini pirme mahapos bangod kulang kami sing eksperiensia. Pero sa bulig ni Jehova, sang ulihi naga-type kag naga-compose na kami sang mga magasin.”

Walay sapayan sang mga kabudlayan, ang mga kongregasyon sa Georgia may colored na nga magasin nga gin-imprinta mismo sa Georgia. Apang sang ulihi nangin  mabudlay ang pagsuplay sa nagadugang nga kinahanglanon. Sa husto gid nga tion, nakabaton sing mahigugmaon nga panuytoy ang kauturan sa Georgia halin sa organisasyon ni Jehova.

Ang 1992 nga internasyonal nga kombension nga ginhiwat sa St. Petersburg, Russia naghatag sing kahigayunan sa kauturan nga taga-Georgia nga maistorya ang mga representante sang sanga nga halin sa Germany. “Ginpaathag nila sa amon ang ila kinaandan nga pamaagi sang translation,” siling ni Genadi Gudadze. “Ginhambalan nila kami nga sa indi madugay may mabisita sa amon para mabuligan kami sa translation.”

Indi gid mahapos ang pag-imprinta sang base sa Biblia nga mga publikasyon sa Georgian. Bangod pinasahi ang alpabeto sini nga lenguahe, wala pa ini sa Multilanguage Electronic Publishing System (MEPS) nga ginagamit sang organisasyon. Gani kinahanglan pa idesinyo ini nga mga letra para sa pag-imprinta.

Antes sini, sang hingapusan sang dekada 70, ang pamilya Datikashvili nga taga-Georgia nagsaylo sa United States. Sang ulihi, ang isa sa ila bata nga si Marina nakatuon sang kamatuoran. Daku gid ang nabulig niya sang ginsugdan sang kauturan sa Brooklyn Bethel ang pagdrowing sang Georgian nga alpabeto para mapasulod ini sa MEPS. Wala magdugay, ang pila ka tract kag ang brosyur nga “Toloka! Ginahimo Ko nga Bag-o ang Tanan nga Butang” gin-imprinta sa Germany.

Sang 1993, si Michael Fleckenstein kag ang iya asawa nga si Silvia nga naghalin sa sanga sang Germany nag-abot sa Tbilisi agod sugdan ang translation office. “Ginahunahuna ko pa ang gin-istoryahan namon sa miting sa  St. Petersburg,” siling ni Michael. “Pero sang nag-abot kami sa Tbilisi isa ka tuig kag tunga sang ulihi, nakibot gid kami sang naabtan namon ang isa ka nagapanghikot sing maayo nga translation team!”

Sa sulod lang sang pila ka bulan, 11 na ang naga-translate sing bug-os tion sa isa ka opisina sa gamay nga apartment. Daku gid ang nabulig sang paghanas halin sa organisasyon ni Jehova, amo nga nasugdan ang regular nga pagdul-ong sang espirituwal nga pagkaon sa mga kongregasyon.

Sang nabungkag ang Soviet Union, nag-utwas ang kinagamo kag inaway sang mga rasa sa mga sakop sini anay nga mga republika, lakip na ang Georgia. Gani delikado gid ang pagbiyahe ilabi na sa mga dulunan.

Isa ka adlaw, sang Nobiembre 1994, samtang nagatabok sa dulunan si Aleko Gvritishvili kag ang duha pa ka utod, ginparahan sila sang armado nga mga lalaki kag ginpagua sa ila salakyan. “Naakig gid sila sang nakita nila ang amon dala nga literatura sa Biblia,” siling ni Aleko. “Dayon ginpalinya nila kami nga daw pamatyon. Gani  nangamuyo kami sing hanuot kay Jehova. Pagligad sang mga duha ka oras, naghambal ang isa sa ila, ‘Kuhaa ang dala ninyo nga literatura kag maghalin. Pero kon magbalik pa kamo, sunugon namon ang inyo salakyan kag pamatyon kamo.’”

Walay sapayan sina nga mga pamahog, padayon nga ginadul-ong sang kauturan ang mga literatura. Si Brother Zaza Jikurashvili nga nagsakripisyo gid para madul-ong ang mga literatura sa Biblia sa Georgia, nagsiling: “Nahibaluan namon nga nagakinahanglan sing espirituwal nga pagkaon ang kauturan. Kag ginasuportahan kami sang amon asawa.”

“Pamilyado ang kalabanan nga kauturan nga nagadul-ong sang mga literatura,” saysay ni Aleko. Ano ang nagpahulag sa ila nga magpadayon walay sapayan sang mga katalagman? Nagdugang pa sia: “Bangod ini sang amon tudok nga pagpasalamat kag gugma kay Jehova. Kag luyag man namon ipabatyag sa amon pinalangga nga kauturan ang pag-atipan ni Jehova.”

Bangod sang pagkamasinakripisyuhon sini nga kauturan, wala gid nauntat ang pagdul-ong sang literatura sa tion sang kinagamo. Sang ulihi, nakakita ang kauturan sang alagyan nga hilway sa katalagman pakadto-pabalik sa Germany kag Georgia.

Sang naghaganhagan ang kahimtangan sa pulitika sang 1995, nagplano ang mga Saksi nga maghiwat sang ila una nga distrito nga kombension. Sang tig-ilinit sang 1996, mga 6,000 ka delegado halin sa lainlain nga lugar sang Georgia ang nagtambong sa distrito nga kombension sa Marneuli, Tsnori, kag malapit sa Gori.

Indi gid malipatan sang mga nagtambong ang kombension malapit sa Gori. Lain gid ini sang tion nga  nagaduhaduha sila kon paano nila mapuno ang awditoryum nga hiwatan sang Memoryal! Subong, nabudlayan sila mangita sing lokasyon sa sobra duha ka libo nga matambong sa sini nga kombension. Gani ginhiwat nila ini sa isa ka matahom nga bukid nga ginakampingan malapit sa siudad.

Si Brother Kako Lomidze nga isa ka miembro sang Komite sang Kombension sadto, nagsiling: “Pagkatapos sang programa, nag-inupdanay ang kauturan para magkanta-kanta kag magpalig-unanay. Nagapamatuod ini nga ang katawhan sang Dios nahiusa sa gugma.”—Juan 13:35.

Sugod sang 1996, may kahimusan nga isa ka semana nga bisitahan sang nagalakbay nga manugtatap ang tagsa ka kongregasyon sa pungsod. Para mahimo ini, nagtangdo sang bag-o nga mga manugtatap agod madugangan ang mga manugtatap sa nakatundan kag nasidlangan sang Georgia.

Pat-od gid nga ang “mahigugmaon nga pagpangabudlay” kag ang matutom nga pag-alagad sining mga manugtatap nakabulig sa mga kongregasyon nga mag-uswag kag magsunod sing maayo sa teokratiko nga mga kahimusan. (1 Tes. 1:3) Sugod sang 1990 asta 1997, daku ang pag-uswag sa kadamuon sang mga manugbantala. Sang 1990, may 904 lamang ka manugbantala nga nagreport sang ila napanghikutan, pero pagligad lang sang pito ka tuig, may 11,082 na nga nagabantala sang maayong balita!

Ang espirituwal nga pag-uswag nga nagsugod mga pila ka dekada ang nagligad nangin maathag na kag naglapnag sa bug-os nga pungsod. Pero madamo pa sang ihatag nga pagpakamaayo si Jehova sa iya katawhan sa Georgia.