GEORGIA
“Amo Ini ang Palanublion sang mga Alagad ni Jehova.”—Isa. 54:17.
ANG mga alagad ni Jehova sa Georgia mapisan nga nagbantala sang maayong balita, kag ginpakamaayo gid ni Jehova ang ila pagpangabudlay. Subong resulta, naglapnag ang maayong balita sa halos bug-os nga pungsod.
Kauturan nga nagahanda sa pagbantala sa Ushguli nga mga 2,200 metros sa ibabaw sang nibel sang dagat
Pero sining karon lang nga tinuig, gintuon sang makugi nga mga manugbantala kag mga payunir ang ila igtalupangod sa kinahanglanon sang mga nagaistar sa talagsa lang mapanghikutan nga mga teritoryo. Sa kabukiran,
ang malayo nga mga baryo kag minuro malab-ot lamang sang salakyan nga makataklad sa bukid ukon cable car.Mga manugbantala sa rehiyon sang Svaneti
Kada tuig sugod sang 2009, ang sanga sa Georgia nagapadala sang listahan sang wala pa maasayn nga mga teritoryo sa mga kongregasyon, kag nagaagda sa mga manugbantala nga sakdagon ang pagbantala sa sini nga mga lugar. Agod makapakigbahin sa sini nga hilikuton, madamo ang naghimo sang dalagku nga pagsakripisyo.
Sanday Ana kag Temuri Bliadze
Bag-o lang nakasal sanday Temuri kag Ana Bliadze sang nahibaluan nila nga kinahanglan sang madamo nga manugbantala sa nabukid nga rehiyon sang Ajaria. Bag-o lang man sila nakabakal sang duta nga patindugan sang balay. Pero subong, may kahigayunan sila nga pasangkaron ang ila ministeryo.
Una, isa lang anay sila ka semana nga nagtener sa Ajaria. Parte sa iya una nga pagkadto, naghinumdom si Temuri: “Nagalakat lang ang kauturan para malab-ot ang magagmay nga baryo. May van kami nga makataklad sa bukid gani ginhunahuna ko dayon nga makabulig gid ini didto.”
Nagdugang si Ana: “Mabudlay ang pagsaylo bangod suod gid kami sa amon kongregasyon kag pamilya. Apang ginpakamaayo gid kami ni Jehova.” Sobra tatlo ka tuig nga nagasakdag sanday Temuri kag Ana sa isa ka grupo sa Keda nga isa ka banwa sa Ajaria.
Maayo Gid Mangita sing Paagi nga mga Payunir
Daku gid ang nabulig sang temporaryo nga mga espesyal payunir sa pagbantala sa malayo nga mga lugar. Sang natapos ang ila asaynment, madamo nga payunir ang nagpabilin sa mga lugar nga gin-asaynan sa ila para atipanon ang ila mga ginatun-an sa Biblia.
Ang duha ka sister nga payunir nga ang ngalan pareho nga Khatuna, gin-asayn sa matahom nga banwa sang
Manglisi. Bisan pa duha lang sila nga Saksi didto, mabungahon gid ang ila pagministeryo. Sa una nga bulan, nagdumala sila sang 9 ka pagtuon sa Biblia, pagkasunod nga bulan 12, dayon 15, kag dayon 18! Para padayon nga maatipan ang ila mga ginatun-an sa Biblia, nagdesisyon sila nga magpabilin sa Manglisi.Kinahanglan gid mangita sing paagi ang duha ka sister para masakdag ang ila kinahanglanon. Madamo sang nagabisita sa Manglisi ang nanamitan sa ila kilala nga gindulse nga pinecone nga ginapatihan sang madamo nga masustansia. Gani sa primero, nagapanguha sila sang linghod nga mga pinecone agod dulsehon kag ginabaligya nila ini sa tindahan. Pero nakabaton sila sang wala ginapaabot nga palangitan-an.
Isa ka adlaw, gindal-an sila sang ila ginatun-an sa Biblia sang mga piso. Ginpaathag sang babayi nga wala sia nakahibalo kon diin nangitlog ang isa sa iya mga munga
kag may mga piso na ini sang nakita niya. Luyag niya ihatag ang mga piso sa mga nagatuon sa iya sa Biblia. Bangod ang isa sa mga sister may eksperiensia sa pagsagod sang manok, nagsugod sila sang gamay nga manukan para masakdag ang ila kaugalingon.Ang isa sa mga sister nagsiling: “Sa bulig ni Jehova kag sang kauturan kag sang amon mga ginatun-an sa Biblia, nakapabilin kami sa Manglisi sang lima ka tuig.” Sa karon, may aktibo na nga kauturan didto.
Sanday Khatuna Kharebashvili kag Khatuna Tsulaia sa Manglisi
Pagpayunir sa Dumuluong nga Teritoryo
Sining karon lang nga tinuig, nagdagsa ang mga dumuluong sa Georgia. Nahunahuna sang madamo nga payunir nga nabuksan ang bag-o nga teritoryo. Gani nagtuon sila sang mga lenguahe subong sang Arabic, Azerbaijani, Chinese, Ingles, Persian, kag Turkish.
Samtang madamo nga payunir ang nagsakdag sa dumuluong sing lenguahe nga mga grupo kag kongregasyon, may iban naman nga nagsaylo sa mga pungsod nga mas daku ang kinahanglanon. Mga beintehon sanday Giorgi kag Gela sang nagsaylo sila sa kaingod nga pungsod. “Luyag namon alagaron si Jehova sa amon bug-os nga masarangan, kag ang pagsaylo didto isa gid ka maayo nga kahigayunan para mahimo ini,” siling ni Giorgi.
Parte sa iya pagtener didto, nagsiling si Gela: “Madamo gid ako sing natun-an bilang gulang sa sadto nga teritoryo. Kanami gid batyagon nga ginagamit ka ni Jehova sa pagbulig sa iya ‘magagmay nga mga karnero.’”—Juan 21:17.
Nagdugang si Giorgi: “Bisan pa may mga kabudlayan, nagpokus kami sa amon pag-alagad kag wala gid sing ginhinulsulan. Para sa amon, ginahimo lang namon kon ano ang dapat himuon.”
Ang isa pa ka brother nga Gela man ang ngalan, nag-alagad sa Turkey sing pila ka tuig. Naghinumdom sia: “Sang primero, nabudlayan ako sa lenguahe didto, gani daw indi ko mahuptan ang akon kalipay. Apang sang makakomunikar na ako sing maayo sa kauturan kag sa mga tawo sa teritoryo, daw wala na ako sing masudlan sang akon kalipay.”
Si Sister Nino nga sobra napulo na ka tuig nga nagapayunir sa Istanbul, Turkey, nagpabutyag: “Ginbuligan gid ako ni Jehova halin sa una nga adlaw sang akon pagsaylo. Kon nagapayunir ka sa dumuluong nga teritoryo, pang-Yearbook ang imo eksperiensia halos kada adlaw.”