GEORGIA
Ang Akon Bana Indi Mag-untat sa Pagbasa!
Marina Kopaliani
-
NATAWO 1957
-
NABAWTISMUHAN 1990
-
MALIP-OT NGA BIOGRAPIYA Si Marina kag ang iya bana nga si Badri nangin mapisan nga mga manugbantala samtang nagapadaku sang ila duha ka bata nga lalaki. Sang ulihi, si Badri nag-alagad sa Komite sang Pungsod kag nagpabilin nga matutom tubtob sa iya kamatayon sang 2010.
SANG 1989, nakilala namon sang akon bana ang mga Saksi sa balay sang amon kaingod. Si Brother Givi Barnadze nga nagadumala sang pagtuon sa amon kaingod, wala sing kaugalingon nga Biblia, bangod mabudlay makatigayon sing Biblia sa Georgia sa sina nga tion.
Nanamian kami sang amon nabatian gani gusto namon makatigayon sang Biblia. Sang nakita sang akon bana ang iya utod nga lalaki, ginsilingan niya ini nga nagapangita sia sing Biblia. Nakibot gid si Badri sang nagsabat ang iya utod nga bag-o lang sia nakabakal sang isa ka bag-o nga bersion sang Georgian nga Biblia kag nalipay sia nga iregalo ini kay Badri.
Pagpauli ni Badri, ginbasa niya dayon ang Biblia asta maggab-i. Pagbugtaw niya sang aga, nagpadayon sia sa pagbasa.
Pagpauli ko halin sa obra, naabtan ko sia nga nagabasa gihapon. Indi gid sia mag-untat sa pagbasa! Gani, ginsilingan ko sia nga magbakasyon anay sa iya obra sing pila ka adlaw para matapos niya ini basa. Sang ulihi, natapos gid man niya basa ang bug-os nga Biblia.Nalipay gid kami nga may kopya na kami sang Biblia sang nagtuon kami sa libro nga Ang Kamatuoran nga Nagadul-ong sa Kabuhi nga Dayon upod kay Brother Barnadze. Tayming gid ini kay wala kami sing kopya sang Kamatuoran nga libro kag wala man sing Biblia ang amon manunudlo! Mga isa ka tuig sang ulihi, nabawtismuhan kami ni Badri.