SUGOD sang ulihi nga bahin sang dekada 90, daku gid ang pag-uswag sa kadamuon sang mga manugbantala kag interesado sa Georgia. Sang 1998, indi magnubo sa 32,409 ang nagtambong sa Memoryal sang kamatayon sang Cristo.

Pero madamo nga manugbantala, lakip ang mga gulang, ang bag-o pa lang sa kamatuoran kag kulang sa eksperiensia. Gani kalabanan sa ila kinahanglan hanason sa lainlain nga bahin sang espirituwal nga mga hilikuton. Pero paano?

Sang Marso 1998, gin-asayn sa Georgia sanday Arno kag Sonja Tüngler nga nakaeskwela sa Gilead Extension School sa Germany. Sa amo man nga tuig, gin-aprobahan sang Nagadumala nga Hubon ang pagbukas sang talatapan sang pungsod sa Georgia sa idalom sang pagdumala sang sanga sa Russia.

Wala madugay, gindumalahan sang Komite sang Pungsod ang pagbantala. Sang narehistro ang aton hilikuton, ang mga literatura sa Biblia direkta na nga ginapadala halin sa sanga sa Germany (subong ginatawag nga sanga sa Central Europe). Kag makabakal naman kita sang mga propiedad para himuon nga mga Kingdom Hall kag pasilidad sang sanga.

Madamo nga manugbantala ang indi makapamalaybalay sa sulod sang tinuig nga pagdumili sa idalom sang paggahom sang Soviet. Naghinumdom si Arno Tüngler: “Kalabanan sa ila nagabantala sa mga dalan, pero indi  tanan naanad nga mamalaybalay kag magtatap sang interesado.”

Si Davit Devidze nga nagsugod sa pag-alagad sa bag-o naporma nga talatapan sang pungsod sang Mayo 1999, nagsiling: “Madamo sang dapat himuon sa latagon kag sa Bethel. May mga nabasahan kami pero indi kami kabalo kon paano himuon. Gani nag-obserbar kami kag nagtuon sa eksperiensiado nga kauturan nga ginpadala sang Nagadumala nga Hubon.”

Dayon ginsugdan ang maid-id nga paghanas sa kauturan sa Georgia. Pero kaangay sang pirme nagakatabo sa mga nagsaylo sa lugar nga mas daku ang kinahanglanon, nakabenepisyo man ang mga naghanas. (Hulu. 27:17) Ang matuod, madamo gid sila sing natun-an sa kauturan didto.

Halin sang pag-abot nila sa Georgia, madamo sang eksperiensia parte sa mainabyanon nga pag-abiabi sanday Arno kag Sonja. Ginbuligan gid sila sang kauturan nga makapasibu sa ila bag-o nga asaynment.

 Nadumduman pa ni Sonja ang ila kaalwan. Nagsiling sia: “Pirme kami ginadul-ungan sang manamit nga pagkaon sang mag-asawa nga nagaistar malapit sa amon. Gin-upod man kami sang isa ka sister sa pagministeryo, ginpakilala kami sa amon bag-o nga kongregasyon, kag gin-istoryahan kami parte sa kultura sang Georgia. May isa pa gid ka sister nga mapinasensiahon nga nagtudlo sa amon sang Georgian.”

Sang 1999, gin-asayn sanday Warren kag Leslie Shewfelt sa Georgia halin sa Canada. Nagsiling sila: “Dalayawon gid kag takus ilugon ang pagpalangga nga ginpakita sang kauturan sa Georgia. Ginapakita sang tanan, lakip sang mga pamatan-on, ang ila balatyagon kag gugma sa isa kag isa.”

Ang mga taga-iban nga pungsod nga gin-asayn sa Georgia wala nagpokus sa mga kabudlayan kundi sa maayo nga kinaiya sang kauturan. Ang pagkamapainubuson kag  pagkamahigugmaon sining mga misyonero gilayon nga nagpasuod sa ila sa kauturan.

Sang dekada 90, madamo nga sinsero ang padayon nga nagabaton sang kamatuoran. Sang 1998 lamang, 1,724 ang nabawtismuhan. Ngaa madamo nga taga-Georgia ang interesado sa kamatuoran?

Si Tamazi Biblaia nga tinuig nga nag-alagad subong nagalakbay nga manugtatap, nagpaathag: “Isa sa mga kinaiya nga napatudok sa mga taga-Georgia amo ang gugma sa Dios. Gani, kon magpaambit kami sang mensahe sang Biblia nagabaton sila dayon.”

Si Davit Samkharadze nga isa ka instruktor sa School for Kingdom Evangelizers, nagsiling: “Kon may magtuon gani sa Biblia, pirme nagapasilabot ang mga paryente kag kaingod agod mapauntat ang pagtuon. Pero madamo sa sining nagpasilabot ang nagtuon sa Biblia sang ulihi!”

Naglapnag ang mensahe sang Ginharian kag ginbag-o sini ang kabuhi sang madamo. Sang Abril 1999, may bag-o nga peak sa kadamuon sang nagtambong sa Memoryal nga naglab-ot sa 36,669.

Tuhoy sa iya pagbantala sa Efeso, nagsulat si apostol Pablo: “Nabuksan sa akon ang daku nga puertahan sang kahigayunan para sa madamo nga hilikuton, apang madamo ang nagapamatok.” (1 Cor. 16:9) Ini nga pinamulong nagalaragway gid sang natabo sa mga Saksi sa Georgia pagligad sang pila ka bulan matapos ang tumalagsahon nga Memoryal sang 1999.

Sang Agosto sina nga tuig, ginpangunahan ni Vasili Mkalavishvili nga isa ka ginpahalin sa pagkapari ang isa ka grupo sang Orthodox nga mga ekstremista sa pag-rally  kag publiko nga pagsunog sang aton literatura sa Tbilisi. Amo ini ang panugod sang sunodsunod nga paghingabot nga naglawig sang apat ka tuig.

Sang Oktubre 17, 1999, ginpangunahan sang pila ka ekstremista sang relihion ang mga 200 ka tawo agod gamuhon ang miting sang kongregasyon sang Gldani sa Tbilisi. Ginpangbakol nila sang mga batuta kag salsalon nga mga krus ang nagtambong amo nga madamo nga Saksi ang naospital.

Pero makapasubo nga wala gindakop ang mga nag-atake kag nagpadayon ang pagpamintas sa mga Saksi. Ginpakamalaut sang pila ka opisyal sang gobierno, lakip ni Presidente Shevardnadze ini nga mga pagpamintas, pero wala gid ini maaksionan. Ang matuod, pirme lang ulihi mag-abot ang mga pulis kon may mga pag-atake.

Sa amo man nga tion, ginpangunahan sang isa ka miembro sang parlamento sang Georgia nga si Guram Sharadze ang pagpalapta sang negatibo nga impormasyon agod pakalainon ang mga Saksi. Ginpasibangdan niya ang mga Saksi nga makatalagam nga mga tawo. Daw naglipas na ang “maayo nga panahon” sang pagbantala sing maayong balita.

Gilayon nga ginbuligan sang organisasyon ni Jehova ang mga Saksi sa Georgia. Nakabaton sila sang mahigugmaon nga panuytoy kon ano ang himuon kon may pag-atake. Ginpahanumdom man sila kon ngaa ginahingabot kon kaisa ang matuod nga mga Cristiano.—2 Tim. 3:12.

Dugang pa, naghimo man sang legal nga mga tikang ang organisasyon ni Jehova agod pangapinan ang aton kauturan sa korte. Ang isa ka brother nga nag-alagad sa Legal Department sa sanga sa Georgia naghinumdom: “Sa  sulod sadtong apat ka tuig nga pagpamintas, sobra 800 ang ginpasaka namon nga kaso batok sa mga ginhimo sang grupo ni Vasili Mkalavishvili. Nagpabulig kami sa mga opisyal kag sa mga organisasyon nga nagapangapin sa kinamatarong sang tawo. Ginsugdan man sang ulong talatapan sang mga Saksi ni Jehova ang lapnag nga kampanya sa pagpahibalo sa publiko, pero wala gihapon nauntat ang mga pag-atake.” *