SANG natun-an ko ang kamatuoran sa Biblia sang 1989, isa ako ka kilala nga miembro sang Partido Komunista sa amon lugar sa Senaki, kag miembro man ako sang Supreme Soviet sang Georgia, katumbas sang parlamento subong. Kalaslon man ako sadto sa isa ka bataon nga lalaki, gani pamatyag ko madinalag-on na ako.

Ginpatudok nanday Nanay kag Tatay sa akon ang gugma sa Dios. Gani nagapati ako sa Dios bisan pa isa ako ka Komunista. Sang nagtuon ako sa Biblia, nasabat gid ang tanan ko nga pamangkot, gani nagdesisyon ako nga idedikar ang akon kabuhi kay Jehova. Pero indi ugyon sa sini ang akon pamilya, mga abyan, kaupod sa obra, kag palamanhon.

Ginsikway ako sang akon pamilya bangod sang akon bag-o nga ginapatihan, kag indi man ini magsanto sa akon karera sa pulitika. Gani wala na ako sing mahimo pa kundi maghalin  sa balay, makigbulag sa akon palamanhon, kag maghalin sa akon obra subong man sa Partido Komunista kag sa Supreme Soviet. Sang nabawtismuhan ako, ilabi na gid nga gin-ipit ako sang akon mga abyan kag pamilya. Bangod kilala ako sa amon lugar, nagsaylo ako sa siudad sang Kutaisi kag gilayon nga nagpayunir.

Kon pamangkuton gani ako kon bala takus man ang akon pagtuo sa mga kabudlayan nga akon naagyan, nagasabat ako gilayon nga nalipay gid ako sa akon mga desisyon. Bisan pa wala nahangpan sang akon mga ginikanan ang akon mga desisyon, nagapasalamat gid ako nga gintudluan nila ako nga higugmaon ang Dios kag isigkatawo. Daku gid ang nabulig sini sa akon kabuhi.