“PIRME ko gid ginapasalamatan si Jehova sa akon pangamuyo nga nakatuon ako parte sa iya sa akon namat-an nga lenguahe,” siling ni Gulizar.

Di-bawtismado nga manugbantala si Gulizar sa sulod sang walo ka tuig, pero nabawtismuhan lang sia sang nakatambong na sa mga miting sa iya namat-an nga lenguahe nga amo ang Kurdish. Isa sia sa madamo nga Kurd nga nagbaton sang kamatuoran sa Georgia sining karon lang nga tinuig. Pero, sin-o ang mga Kurd?

 Ang mga Kurd siniglo na nga nagaistar sa Middle East. Ang iban nga iskolar nagahunahuna nga kaliwat sila sang mga Medianhon nga ginsambit sa Biblia. (2 Hari 18:11; Binu. 2:9) Ang ila lenguahe nalakip sa Iranian nga grupo sang mga lenguahe.

Subong, minilyon nga Kurd ang nagaistar sa lainlain nga pungsod, lakip na sa Armenia, Iran, Iraq, Syria, kag Turkey. May mga 20,000 ka Kurd sa Georgia. Kalabanan sa ila mahigugmaon sa Dios kag may pagtahod gid sa espirituwal nga mga butang.

Sa karon, may 500 na ka Kurd nga manugbantala kag tatlo ka Kurdish nga kongregasyon sa Georgia. Sang 2014, nalipay gid ang tanan sang ginhiwat ang una nga Kurdish nga rehiyonal nga kombension sa Tbilisi, kag gintambungan sang mga delegado halin sa Armenia, Germany, Turkey, kag Ukraine.