GEORGIA | 1924-1990
Ang Una nga mga Nagpangita sang Kamatuoran
SUGOD sang dekada 20, nagpanikasog gid ang mga Estudyante sang Biblia para mabantalaan ang mga sinsero nga nagapangita sang kamatuoran sa Georgia. Sang 1924, ginbuksan ang talatapan sa Beirut, Lebanon para dumalahan ang pagbantala sa mga lugar lakip ang Armenia, Georgia, Syria, kag Turkey.
Bisan pa ginsab-ug ang binhi sang kamatuoran sa Georgia sa sina nga tion, wala dayon ini sing talalupangdon nga resulta. (Mat. 13:33) Pero pagligad sang tion, naglapnag ang mensahe sang Ginharian kag nagresulta ini sa talalupangdon nga pagbag-o sa kabuhi sang madamo nga taga-Georgia.
Ginhandum Niya ang Hustisya
Tin-edyer pa lang si Vaso Kveniashvili sang nagsugod ang Bug-os Kalibutan nga Inaway II. Bangod bahin
sang Soviet Union ang Georgia, ginpatawag ang iya amay agod magsoldado. Patay na ang ila iloy kag si Vaso ang subang. Gani, nagpangawat sia para mabuhi niya ang iya mga manghod.Nag-entra si Vaso sa gang kag sang ulihi nangin miembro sang sindikato. Nagsiling sia, “Pamatyag ko makuha ko pa ang hustisya kon kriminal ako kay wala ini sa gobierno ukon sa sosiedad.” Pero sang narealisar niya nga indi gali ini mahatag sang tawo nakasiling sia, “Ginahandum ko gid ang hustisya.”
Si Vaso Kveniashvili sang 1964, wala madugay pagkatapos sia nakagua sa prisuhan
Sang ulihi, gindakop kag gintapok si Vaso sa labor camp sa Siberia bangod sang iya krimen. Nakilala niya didto ang isa sa mga Saksi ni Jehova nga ginpriso bangod sang iya pagtuo. “Nakita ko na gid man ang ginapangita
ko,” siling ni Vaso. “Bisan pa wala kami sing literatura nga magamit, madamo ako sing natun-an sa ginsugid sa akon sang brother.”Sang nakagua si Vaso sang 1964, nagpauli sia sa Georgia kag ginpangita ang mga Saksi ni Jehova. Sa amo man nga tion ginasulatan niya ang kaupod niya anay nga priso. Makapasubo nga napatay ang iya matutom nga abyan kag sugod sadto nautod ang iya pagpakig-angot sa katawhan sang Dios. Mga duha pa ka dekada antes niya nakita liwat ang mga Saksi. Mahibaluan pa naton ang dugang parte sa iya sa ulihi.
Mga Kabudlayan nga Nangin Pagpakamaayo
Miting sa kagulangan
Para sa isa ka pamatan-on nga taga-Georgia nga si Valentina Miminoshvili, ang pagpriso sa iya sa concentration camp sang Nazi nangin daku nga pagpakamaayo. Didto niya una nakilala ang mga Saksi ni Jehova kag nagdayaw gid sia sa ila mabakod nga pagtuo. Natandog
man ang iya tagipusuon sa mga gintudlo nila sa iya halin sa Biblia.Pagkatapos sang inaway, nagpauli si Valentina sa ila lugar kag ginpaambit ang iya bag-o nga ginapatihan. Pero sang ulihi, natalupangdan ini sang mga awtoridad, gani gintapok sia sa labor camp sa Russia sa sulod sang napulo ka tuig. Didto may nakilala sia liwat nga mga Saksi ni Jehova, kag sang ulihi nabawtismuhan.
Sang nakagua si Valentina sang 1967, nagsaylo sia sa nakatundan sang Georgia kag didto mahalungon sia nga nagpadayon sa pagbantala. Wala gid sia maghunahuna nga mangin sabat sia sa isa ka tudok nga pangamuyo.
Ginsabat ni Jehova ang Iya mga Pangamuyo
Sang 1962, naghalin si Sister Antonina Gudadze sa Siberia kay ang iya indi tumuluo nga bana nagdesisyon nga magpauli sa Georgia. Taga-Siberia gid si Antonina, kag natun-an niya ang kamatuoran sa mga Saksi nga gintapok didto. Sang yara na sia sa siudad sang Khashuri sa nasidlangan sang Georgia, napahilayo na sia sa iya masigkatumuluo.
Ang pamilya Gudadze sang dekada 60
Nadumduman pa ni Antonina kon paano ginsabat ni Jehova ang iya mga pangamuyo, nagsiling sia: “Isa ka adlaw nakabaton ako sing package halin sa akon iloy sa Siberia, kag may mga literatura sa Biblia nga natago gid sing maayo sa sulod sini. Nakabaton ako sing espirituwal nga pagkaon sa sulod sing anom ka tuig sa sini nga paagi. Pirme ko gid ginapasalamatan si Jehova sa iya paggiya, pagpalig-on, kag pag-atipan.”
Sia lang ang Saksi didto amo nga nakasiling sia: “Pirme ko ginapangabay kay Jehova nga makaupod liwat ang akon kauturan.” Pero suno sa iya, isa ka adlaw may nagsulod nga duha ka babayi sa tindahan nga iya
ginaubrahan kag namangkot kon bala sia si Antonina. “Ang kabuot sa ila nawong nagpakilala nga sila akon espirituwal nga kauturan. Gani naghaksanay kami kag naghibi,” siling ni Antonina.Si Valentina Miminoshvili ang isa sa ila. Nalipay gid si Antonina sang nahibaluan niya nga may mga miting nga ginahiwat sa nakatundan sang Georgia! Bisan sobra 300 kilometros ang distansia sini sa iya puluy-an, nagabiyahe sia sing makaisa sa isa ka bulan para makatambong sa miting.
Nanggamot ang Kamatuoran sa Nakatundan
Sang dekada 60, ang pila ka Saksi nga ginhingabot sang mga awtoridad sa iban nga bahin sang Soviet Union, nagsaylo sa mga lugar nga paborable ang kahimtangan. Ang isa sa ila amo si Vladimir Gladyuk, isa ka makugi nga brother. Sang 1969, naghalin sia sa Ukraine kag nagsaylo sa siudad sang Zugdidi sa nakatundan sang Georgia.
Sanday Lyuba kag Vladimir Gladyuk
Sang primero, ang mga nagsaylo sa Georgia nagahiwat sang mga miting sa Russian nga lenguahe. Pero, bangod
nagadamo ang taga-Georgia nga nagatambong sing regular sa mga miting, may ginhimo nga kahimusan nga hiwaton ini sa Georgian nga lenguahe. Nagmadinalag-on gid ang paghimo sing disipulo kay may 12 nga taga-Georgia nga nabawtismuhan sang Agosto 1970.Sang tigpamulak sang 1972, nagsaylo si Vladimir kag ang iya pamilya sa siudad sang Sokhumi sa baybayon sang Black Sea, sa mas malayo nga bahin sang nakatundan sang Georgia. Nagsiling si Vladimir: “Nagapasalamat gid kami kay Jehova sa iya bugana nga espirituwal nga pagpakamaayo. Madasig gid ang pag-uswag sang kongregasyon didto.” Ginhiwat man sa sina nga tigpamulak ang una nga Memoryal sa Sokhumi kag 45 ang nagtambong.
“Nagpamati Gid Ako sing Maayo”
Sang maaga nga bahin sang 1973, si Babutsa Jejelava nga mga nobentahon na karon, amo ang isa sa mga una
nga nagbaton dayon sang kamatuoran sa Sokhumi. Nagsiling sia: “Isa ka adlaw, natalupangdan ko ang apat ka babayi nga nagadiskusyon. Duha sa ila madre kag ang duha naman ulihi ko lang nahibaluan nga mga Saksi ni Jehova gali.” Ang mga sister amo sanday Lyuba nga asawa ni Vladimir Gladyuk, kag Itta Sudarenko nga makugi nga payunir halin sa Ukraine.Si Babutsa Jejelava sang 1979 kag 2016
Nadumduman pa ni Babutsa ang iya ginbatyag sang nabatian niya ang ila diskusyon. “Nagpamati gid ako sing maayo,” siling niya. Nag-entra sia dayon sa diskusyon sang nabatian niya nga may ngalan gali ang Dios kag namangkot kon bala mabasa niya ini sa Biblia. Madamo sia sing ginpamangkot amo nga naglawig sing tatlo ka oras ang ila diskusyon.
Nabalaka gid si Babutsa nga basi indi na niya makita liwat ang mga Saksi, gani namangkot sia, “Ti, bayaan na lang ninyo ako diri?”
Nagsabat sila, “Sa masunod nga Sabado mabalik kami.”
Pagka-Sabado, nalipay gid si Babutsa nga nagbalik ang duha ka sister! Ginsugdan gilayon ang pagtuon sa Biblia. Sang manugtapos na, nabalaka naman si Babutsa nga basi indi na niya makita liwat ang katawhan sang Dios. Nakahunahuna sia: ‘Karon kay nakilala ko na sila, indi ako magpasugot nga indi ko na sila makita liwat.’
May ginplano si Babutsa, nagsiling sia: “Nahibaluan ko nga may bana na si Lyuba, gani ginpamangkot ko si Itta kon may bana man sia. Nagsabat sia nga wala. ‘Magsaylo ka sa akon apartment!’ hambal ko sa iya. ‘May duha didto ka katre kag may suga sa ulot sini. Puede naton mabutang ang Biblia sa idalom agod mabinagbinag ini bisan gab-i!’” Nagpasugot si Itta kag nagsaylo.
“Kon kaisa, nagapulaw ako agod pamalandungan ang akon natun-an kag gulpi lang nga may madumduman ako nga pamangkot,” hinumdom ni Babutsa. Nagsiling pa sia: “Dayon pukawon ko si Itta, ‘May pamangkot ako, kuhaa ang imo Biblia!’ Bisan pa natuyo si Itta masabat sia, ‘Sige dali lang.’ Dayon ipakita niya ang sabat sang Biblia.” Tatlo pa lang ka adlaw sa tapos makasaylo si Itta, nagabantala na si Babutsa sang maayong balita.
May suod nga abyan si Babutsa nga si Natela Chargeishvili. Nadumduman pa ni Babutsa: “Nagsala gid ako kay abi ko indi niya pagbatunon ang kamatuoran bangod manggaranon sia. Pero sa una pa lang namon nga pag-istoryahanay nalangkag gid sia sa pagbaton sang kamatuoran.” Wala madugay, makugi nila nga ginpaambit ang ila paglaum sa ila mga abyan, katrabaho, kag kaingod.