GEORGIA
Ngaa Bag-o Lang Kamo?
Artur Gerekhelia
-
NATAWO 1956
-
NABAWTISMUHAN 1991
-
MALIP-OT NGA BIOGRAPIYA Walo lang ka bulan sa tapos mabawtismuhan, ginbiyaan niya ang iya balay kag nagatin-ad nga negosyo para mag-alagad sa lugar nga mas daku ang kinahanglanon.
BAG-O lang ako nabawtismuhan sang ginpamangkot ako sang mga gulang kon luyag ko pasangkaron ang akon ministeryo. Sang Mayo 4, 1992, nagtambong ako sa pinasahi nga miting para sa mga handa magsaylo sa mga lugar nga mas daku ang kinahanglanon. Pagkasunod nga adlaw, ako kag ang akon kaupod nagsaylo sa pantalan sang Batumi, sa rehiyon sang Ajaria.
Nakulbaan gid ako sa una nga tion nga nagbantala ako sa Batumi. Naghunahuna ako, ‘Paano ko dapat istoryahon ang mga tawo?’ Nakibot gid ako sa ginsiling sang una nga babayi nga akon naistorya, “Ngaa bag-o lang kamo?” Gusto gid niya makahibalo sing dugang parte sa mga Saksi amo nga pagkasunod nga adlaw, nagtuon sia sa Biblia upod sa amon!
Antes kami magkadto sa Batumi, nakabaton kami sang madamo nga adres sang mga interesado. Indi namon sunado
ang siudad, gani nagpulupamangkot kami sa mga tawo sa dalan. Ugaling wala man sila kabalo kay bag-o lang naislan ang ngalan sang kalabanan nga dalan, pero interesado sila sa amon mensahe. Wala magdugay, nagadumala na kami sang pagtuon sa Biblia sa mga grupo nga may 10 tubtob 15 ka tawo.Apat pa lang ka bulan sang nakaabot kami, sobra na 40 ang regular nga nagatambong sa mga miting. Gani nakapamangkot kami, ‘Sin-o ang magaatipan sa sining mga bag-uhan?’ Dayon, bangod sang inaway sang mga soldado sang Georgia kag mga separatist sa Abkhazia, nagsaylo sa Batumi ang tanan nga miembro sang akon anay kongregasyon. Sa isa lang ka adlaw, naporma ang bag-o nga kongregasyon nga may eksperiensiado nga mga gulang kag payunir!