Wala nahadlok ang kauturan gani padayon sila nga nagtipon. Maalamon nga nangaman ang mga gulang agod amligan ang kauturan. Si Brother André Carbonneau, isa ka abogado nga taga-Canada nga nagpangapin sa aton kauturan sadto nga tion, nagsiling: “Sa masami, nagabantay ang isa ka utod nga may cellphone malapit sa duog tilipunan. Kon may makita sia nga nagapakadto nga guban, ginapaandaman niya dayon ang mga gulang.”

Pagkatapos sang kada pag-atake, duha ka representante halin sa sanga talatapan ang nagaduaw agod pabakuron ang kauturan. “Talalupangdon gid ini,” siling ni André, “nga sa masami madamo sang malipayon kag nagayuhum nga kauturan sa tilipunan kon magduaw ang mga representante sang sanga.”

Amo man sini ang ginpakita nga determinasyon sang mga indi direkta nga naapektuhan sang pagpang-atake, lakip na ang mga ginatun-an sa Biblia. Nadumduman ni André ang pag-istoryahanay nila sang isa ka babayi nga malapit na mangin di-bawtismado nga manugbantala.  Nagsiling ang babayi sa iya: “Sang natan-aw ko sa TV yadto nga pagpang-atake, nakita ko ang kinalain sang matuod kag butig nga mga Cristiano, kag luyag ko mangin matuod nga Cristiano.”

Sadtong mabudlay nga mga tion, nagpakita ang kauturan sang dalayawon nga pagtuo kag kaisog paagi sa pagpabilin nga masako sa pagbantala. Amo man sini nga pagtuo ang ginpakita sang kauturan nga nagpangapin sang ila masigkatumuluo sa korte.

 Sa mga balita sa media, pirme ginapakalain ang mga Saksi subong mga tawo nga nagapangguba sang mga pamilya, nagapangindi sa pagpabulong, kag nagapamatok sa Estado. Ang mga abogado nga nagpangapin sa sini nga kauturan nagrisgo sang ila reputasyon kag karera.

Si John Burns, isa ka abogado halin sa sanga sa Canada nga nagbulig sa kauturan sa Georgia sadto nga tion, naghinumdom: “Nagboluntaryo ang mga abogado nga kauturan nga taga-Georgia. Bisan pa sa mahimo matabo sa ila trabaho, nagkadto sila sa korte kag nagpakilala nga  mga Saksi ni Jehova.” Yadtong maisog nga mga Saksi nagbulig “sa pagpangapin kag legal nga pagpamatuod sa maayong balita.”—Fil. 1:7.

Sa amo man nga tion, padayon ang pagpamintas sa mga Saksi. Gani, sugod sang Enero 8, 2001, nagpalibot sang petisyon ang mga Saksi nga nagapangabay sang proteksion gikan sa mga nagapanggamo nga guban kag para makasuhan kag madala sa korte ang mga nagpanakit sa mahidaiton nga mga pumuluyo.

Ginpaathag ni Brother Burns ang katuyuan sini nga petisyon, nagsiling sia: “Luyag namon ipakita nga indi ugyon ang kalabanan nga taga-Georgia sa pagpamintas sa mga Saksi ni Jehova kag ang gamay nga grupo sang mga ekstremista sang relihion amo ang responsable sa sini.”

 Sa sulod lamang sang duha ka semana, 133,375 ka adulto halin sa tanan nga rehiyon sang Georgia ang nagpirma sa petisyon, kag Orthodox ang kalabanan sa ila. Bisan pa ini nga petisyon pormal nga ginpresentar kay Presidente Shevardnadze, wala nauntat ang pagpamintas. Padayon nga gingamo sang mga ekstremista ang mga Saksi.

Sa pihak nga bahin, padayon nga ginpakamaayo ni Jehova ang iya katawhan. Samtang ginagamo sang mga ekstremista ang katawhan sang Dios, ginabuligan naman ni Jehova ang mga sinsero nga makagua sa butig nga relihion.

Halos bilog nga kabuhi ni Babilina Kharatishvili, debotado sia nga miembro sang Georgian Orthodox Church. Sang treintahon sia, nagabiyahe sia sa mga banwa kag baryo agod magtudlo parte sa pagkabuhi sang mga santo.

Pero luyag pa ni Babilina nga madugangan ang iya nahibaluan parte sa Dios. Gani nagtambong sia sa mga lektyur sa seminaryo sang Georgian Orthodox. Isa ka bes, ginpakita sang pari ang libro nga Ang Ihibalo nga Nagadul-ong sa Kabuhi nga Walay Katapusan sa iya tagpalamati kag ginpalig-on sila nga mangayo sing kopya sa mga Saksi ni Jehova. Nagsiling ang pari, “Ini nga libro madamo sing matudlo sa inyo parte sa Biblia.”

Pirme ginalikawan ni Babilina ang mga Saksi, gani nakibot gid sia sang ginrekomendar mismo sang pari ang ila mga libro! Naghunahuna sia, ‘Kon sa mga Saksi ni Jehova ako makatuon parte sa Dios, ngaa ari ako diri?’ Nakig-angot sia gilayon sa mga Saksi sa siudad sang Poti kag nagtuon sa Biblia.

 Samtang nagadamo ang iya natun-an sa Biblia, naghimo sia sang dalagku nga pagbag-o sa iya kabuhi. Nagsiling sia: “Sang nabasa ko mismo sa Biblia nga sala ang pagsimba sa mga imahen, ginlikawan ko gilayon ang tanan nga porma sang idolatriya. Kumbinsido gid ako nga amo ini ang husto.” Manug-otsenta na sia sadto nga tion sang nagdesisyon sia nga mangin Saksi ni Jehova.

Makapasubo nga sang 2001, nagmasakit si Babilina kag napatay antes sia mabawtismuhan. Pero ang iya apo nga si Izabela, nabawtismuhan sang ulihi kag matutom nga nagaalagad kay Jehova subong.

Beinte-otso anyos si Eliso Dzidzishvili sang nagdesisyon sia nga magmadre. Sang 2001, nagsaylo sia sa Tbilisi bangod wala sing kombento nga malapit sa ila lugar sa Tkibuli. Samtang nagahulat sia nga makasulod sa kombento, nag-part-time sia subong tutor. Isa sa iya mga estudyante bata sang sister nga si Nunu.

 Nagsaysay si Eliso: “Pirme kami nagaistoryahanay parte sa Biblia. Ginpangapinan ko gid ang Orthodox pero mapinasensiahon nga ginpakita sa akon ni Nunu ang mga teksto. Isa ka adlaw, ginbasa niya sa akon ang brosyur nga Ano ang Ginapatuman sang Dios sa Aton? Samtang ginabasa namon ang mga parapo kag ang mga teksto sa Biblia, nahangpan ko nga ang pagsimba sa mga imahen direkta nga paglapas sa kasuguan sang Dios.”

Sang ulihi, nagkadto si Eliso sa simbahan kag namangkot sa pari. Base sa sabat sang pari, maathag nga wala nabase sa Biblia ang mga panudlo sang simbahan. (Mar. 7:7, 8) Bangod kumbinsido nga nakit-an niya ang kamatuoran, gilayon nga nagtuon sia sa Biblia sa mga Saksi ni Jehova kag nabawtismuhan sang ulihi.

Sang 2001, nagakinahanglan sang nagakaigo nga duog sang pagsimba ang nagadamo nga kongregasyon.  Suno sa pagbulubanta, mga 70 ka Kingdom Hall ang kinahanglan. Gani, ginsugdan ang programa sang pagpanukod sang mga Kingdom Hall bisan pa may pagpamatok sa pungsod.—Esd. 3:3.

Wala madugay, ginkay-o kag ginbag-o sang isa ka grupo sa pagpanukod ang isa ka bilding nga gingamit anay sang pila ka kongregasyon sa Tbilisi. Ginsundan dayon ini sang duha pa ka proyekto, isa sa Tbilisi kag isa sa Chiatura nga yara sa nakatundan sang Georgia.

Si Brother Tamazi Khutsishvili nga isa sa mga nagtukod sa Chiatura, naghinumdom: “Kinse kami nga nagatrabaho sa site adlaw-adlaw. Sang ulihi, nahibaluan sang tanan sa banwa nga nagatukod kami sang bag-o nga Kingdom Hall. Kon kaisa, may mga hinuringhuring nga ang mga kaaway magakadto kag gub-on ini.”

Bangod sang mga pagpamatok, mangin madinalag-on ayhan ini nga pagpanukod? Nagsiling si Tamazi: “Nagpadayon kami sa pagtukod kag natapos namon ang Kingdom Hall sa sulod sang tatlo ka bulan. Bisan  pa may mga hinuringhuring, wala sing manugpamatok nga nagkadto.” *

Sang Oktubre 2003, ginsugdan ang pagpanukod sa siudad sang Samtredia. Ginpahog liwat sang mga ekstremista sang relihion ang kauturan didto. Ang matuod, bag-o lang gid natukod ang mga pader kag basa pa ang semento sang nag-abot ang mga manugpamatok kag ginguba ang bilding.

Pero sang Nobiembre 2003, may pagbag-o sa Georgia nga nakapaumpaw sa kauturan. Ang pagbag-o sa panggobierno nagresulta sa kahilwayan sa relihion. Subong resulta, gindakop ang pila ka miembro sang grupo sang  Orthodox nga ekstremista nga nag-atake sa mga Saksi ni Jehova.

Wala madugay matapos ang paghingabot, nakabaton sang madamo nga espirituwal nga pagpakamaayo ang katawhan ni Jehova sa Georgia. Sang 2004 nga distrito nga kombension, ginpagua ang Bag-ong Kalibutan nga Badbad sang Cristianong Griegong Kasulatan sa Georgian nga lenguahe.

Dayon, indi man malipatan ang natabo sa “Malapit Na ang Kaluwasan!” nga Distrito nga Kombension sang 2006. Nalangkag gid ang mga delegado sang nahibaluan  nila nga si Geoffrey Jackson sang Nagadumala nga Hubon ang magapamulongpulong. Kag nakibot gid sila sang ginpahibalo ni Brother Jackson ang pagpagua sang kompleto nga Bag-ong Kalibutan nga Badbad sang Balaan nga Kasulatan sa Georgian.

Nagtulo ang luha sang madamo nga mga delegado bangod sang daku nga pagpasalamat. Nagsiling ang isa ka sister: “Indi ko malaragway ang akon kalipay sang nabaton namon ang kompleto nga Biblia. . . . Isa gid ini ka importante nga hitabo.” Sobra 17,000 ang nagtambong sa sini nga okasyon, nga nangin talalupangdon nga hitabo sa kasaysayan sang katawhan ni Jehova sa Georgia.