NAAKIG gid ang akon iloy sang nangin Saksi ni Jehova kami sang akon asawa nga si Tsitso. Isa ka adlaw, ginpatawag niya ang tanan namon nga paryente agod kumbinsihon ako nga indi na makig-upod sa mga Saksi. Ginsilingan nila ako nga biyaan ang pagka-Saksi kay kon indi sikwayon nila ako.

Nagdesisyon ako nga maghalin sa amon lugar. Bangod panday ako sa salsalon, naghunahuna ako nga magsaylo sa Kutaisi nga ikaduha sa pinakadaku nga siudad sa Georgia, diin mas mahapos ako makakita sang obra. Kinahanglan man sang madamo nga manugbantala sa sina nga siudad, gani nangabay ako sang panuytoy ni Jehova.

Wala madugay, nagkitaay kami sang akon ginatun-an sa Biblia nga nagaistar sa gamay nga banwa sang Jvari. Sang nahibaluan niya nga plano ko nga magsaylo sa Kutaisi, nangabay sia sa akon nga sa ila lugar na lang ako magsaylo. “May apartment kami,” siling niya sa akon. “Masaylo kami sang akon asawa kag duha ka bata sa isa ka kuarto, kag puede ninyo gamiton sang imo asawa ang isa pa.”

 Bangod ginahulat ko ang panuytoy ni Jehova, ginhambalan ko sia nga batunon ko ang iya ginatanyag kon makakita ako dayon sing obra kag maarkilahan nga puluy-an sa Jvari. Nakibot gid ako sang nagbalik sia sina nga gab-i nga may dala nga listahan sang mga puede obrahan.

Pagligad sang pila ka adlaw, nag-istar kami sang akon pamilya sa Jvari. Halin sa una nga adlaw, may obra ako nga daku ang sueldo. Ginpaistar kami sang akon bag-o nga amo sa daku nga balay nga iya sang kompanya. Sang ulihi, ginpangabay ako nga magbulig sa sekreto nga pag-imprinta sang mga literatura sa Biblia. Maligwa ang amon bag-o nga puluy-an, gani ginpagamit namon ini para sa sini nga hilikuton.

Tinuig nga ginpagamit namon ang amon puluy-an para hiwatan sang Memoryal kag iban pa nga espirituwal nga hilikuton. Sobra 500 ang nabawtismuhan sa amon puluy-an! Nalipay gid ako nga ginsunod ko ang panuytoy ni Jehova!