GEORGIA
“Sa Dios ang Tanan nga Butang Posible”
Natela Grigoriadis
-
NATAWO 1960
-
NABAWTISMUHAN 1987
-
MALIP-OT NGA BIOGRAPIYA Wala madugay pagkatapos nabawtismuhan, gingamit ni Natela ang iya eksperiensia kag pangilala bilang manedyer sang isa ka balaligyaan agod mapadayon ang sekreto nga pag-imprinta.
SANG ulihi nga bahin sang dekada 80, sa amon mga miting, ang konduktor lang sa Pagtinuon sa Ang Lalantawan ang may kopya sang magasin, kag sa masami ginsulat lang ini. Gani nagpanugda ako kay Genadi Gudadze nga isa sa mga gulang kon bala puede namon tilawan nga mag-imprinta sang mga magasin.
Antes sini, nagagamit ang kauturan sang ginhimo lang nga mimeograph para mag-imprinta sang diutay nga publikasyon. Para regular ang pag-imprinta sang magasin, kinahanglan nila sing maayo nga mimeograph, eksperiensiado nga typist, makinilya, kag regular nga suplay sang stencil. Pero ginarehistro sa gobierno kag ginakontrol sang special security services ang tanan nga kagamitan sa pag-imprinta, bisan gani ang papel.
May kilala ako nga makakuha sing wala na ginagamit nga mga makinilya nga indi na kontrolado sang gobierno, gani sa iya ako nakakuha sing makinilya. Kag bangod isa ka typist ang akon utod nga babayi, mabuligan niya kami. Dayon, naghimo
ang kauturan sang bag-o nga mimeograph kag may nakita man sila nga balaklan sang stencil. Daw ka hapos lang sang tanan, kag sang ulihi gin-imprinta ang amon una nga kopya sang Ang Lalantawan sa Georgian.Pero may bag-o naman nga problema. Isa ka adlaw, ginsilingan ako ni Genadi, “Dapat kita mangita sang iban nga makuhaan sang stencil.” May nakita sia nga mga stencil sa isa ka opisina nga ginapalakat sang gobierno, pero indi sia makabakal didto kay ginabantayan sia sang awtoridad. Gani, paano namon ini matigayon? Sulitsulit ko nga ginsiling, “Imposible ini!” Nagsabat sing malig-on si Genadi, “Indi ka magsiling nga ‘Imposible ini.’ ‘Sa Dios ang tanan nga butang posible’!”—Mat. 19:26.
Pagkasunod nga adlaw, nagkadto ako sa sini nga opisina. Ginakulbaan ako, pero ginadumdom ko ang ginhambal ni Genadi. Gintuytuyan ako ni Jehova sa isa ka mainabyanon nga typist nga handa ipahibalo ang akon pangabay sa nagadumala sang opisina. Bana gali niya ang nagadumala! Sang ulihi, regular na ako nga nagabakal sang mga stencil sa sini nga opisina, kag sugod sadto wala na kami namroblema sa suplay.