ANTES pa mabun-ag si Sanel, ginpahibalo na sang mga doktor sa iya mga ginikanan nga magaantos sia sang malala nga mga balatian kon mabuhi gid man sia pagkatapos mabun-ag. Sa una pa lang nga adlaw sang iya pagkabun-ag, kinahanglan na sia maoperahan. Ang iya mga ginikanan nga nagapuyo sa Abkhazia, isa ka rehiyon nga nangin independiente sa Georgia, wala makakita sang doktor nga wala nagagamit sing dugo nga makaopera kay Sanel.

Nakig-angot ang mga ginikanan ni Sanel sa Hospital Liaison Committee (HLC) sa ila lugar. * Nalipay gid sila sang nakakita gilayon ang kauturan sa HLC sang isa doktor sa Tbilisi, kapital sang Georgia, nga handa mag-opera nga wala nagagamit sing dugo. Bangod maluya pa ang iloy ni Sanel, indi pa sia makabiyahe. Gani nadesisyunan nga ang duha ka Saksi nga lola ni Sanel ang magadala sa iya sa ospital sa Tbilisi.

Nagmadinalag-on ang operasyon. Wala madugay tapos sini, nagsulat ang mga lola ni Sanel: “Sobra 20 ka adlaw kami nga nagtener sa ospital. Sa sina nga tion, madamo nga kauturan nga taga-Georgia ang nagbisita kag nagbulig sa amon. Madamo man ang nagpakita sang ila simpatiya. Sang una, mabasahan lang namon ang parte sa gugma nga ginapakita sang aton kauturan, pero naeksperiensiahan namon ini subong.”