GEORGIA
Wala Nagakapaslawan ang Cristianong Gugma
Igor: Updanay kami sa isa ka grupo sang mga Saksi sa banwa sang Tkvarcheli sa Abkhazia. Bangod ang ginapakig-angutan namon nga kongregasyon yara sa siudad sang Jvari nga mga 85 kilometros ang kalayuon, nagabiyahe ako pakadto sa Jvari kada bulan para magkuha sang mga literatura para sa amon grupo. Sang 1992, wala madugay sang nabungkag ang Soviet Union, nagtinguha nga mangin independiente ang Abkhazia. Dayon, nag-inaway ang mga separatist kag soldado sang Georgia nga nagresulta sa tuman nga kabudlayan.
Sanday Gizo Narmania kag Igor Ochigava
Magkaupod nga nagbulig sa ila mga masigkatumuluo sa tion sang inaway sa rehiyon sang Abkhazia.
Gizo: Nabawtismuhan ako sa edad nga 21, mga isa ka tuig antes sang inaway. Sang nagsugod ang inaway, temporaryo nga wala nakapanghikot ang kauturan bangod sa kahadlok kag indi sila sigurado kon paano magbantala. Pero ginpalig-on kami ni Igor nga isa gid ka maayo nga manugbantay, nagsiling sia: “Amo ini ang tion nga kinahanglan sang mga tawo ang lugpay.
Makapabilin lamang kita nga mabakod sa espirituwal kon magpadayon kita sa pagbantala.” Gani sing mahalungon, adlaw-adlaw namon nga ginapaambit ang makapalugpay nga mensahe sang Biblia.Igor: Bangod sa inaway, indi kami makaagi sa pirme namon ginaagyan nga ruta pakadto sa Jvari para magkuha sang literatura. Nagdaku ako sa sini nga lugar, gani nakakita ako sang hilway nga alagyan sa mga plantasyon sang tsa kag sa kabukiran. Pero may katalagman gihapon nga makasugata sang mga armado nga grupo kag makatapak sang nalubong nga bomba. Bangod indi ko luyag nga ibutang sa katalagman ang akon kauturan, nagabiyahe ako nga isahanon makaisa kada bulan. Sa bulig ni Jehova, pirme ako makakuha sang suno sa tion nga mga literatura nga nagbulig sa amon nga magpabilin nga malig-on.
Bisan pa wala sing inaway sa Tkvarcheli, sang ulihi ginbarikadahan ang amon banwa kag ginbudlayan gid kami. Samtang nagahilapit ang tigtulugnaw, manug-ubos naman ang amon pagkaon kag nabalaka kami. Sang nahibaluan namon nga ang kauturan sa Jvari nag-organisar sang bulig para sa amon nalipay gid kami!
Gizo: Isa ka adlaw, ginpamangkot ni Igor ang akon pamilya kon puede gamiton ang amon balay para sa pagtago kag pagpanagtag sing pagkaon halin sa amon kauturan. Nagaplano sia nga magkuha sing pagkaon sa Jvari. Nabalaka kami sa iya kay pat-od nga may maagyan sia nga mga checkpoint kag mahimo makasugata sang mga armado nga grupo kag kawatan.—Juan 15:13.
Pila ka adlaw sang ulihi, nalipay gid kami nga nakabalik si Igor nga wala sing malain nga natabo sa iya. Nagadrayb sia sang salakyan nga puno sing pagkaon nga bastante para sa tigtulugnaw! Sadtong mabudlay nga tion, naeksperiensiahan gid namon nga wala nagakapaslawan ang matuod nga Cristianong gugma.—1 Cor. 13:8.