PAGBANTALA KAG PAGPANUDLO SA BUG-OS NGA DUTA
Kadutaan sa America
-
PUNGSOD 57
-
PULASYON 998,254,087
-
MANUGBANTALA 4,154,608
-
PAGTUON SA BIBLIA 4,353,152
“Matuon Ako Upod sa Imo”
Si Ismael nga nagaistar sa Mexico nagdesisyon nga basahon ang bilog nga Biblia kag sa sulod lang sang isa ka tuig, duha ka beses niya ini nga nabasa. Pero sang ulihi nabulag sia. Pagligad sang pila ka tuig, nakilala ni Ismael si Ángel nga isa ka Saksi ni Jehova nga nagsugid sa iya parte sa mga saad sang Dios. Gusto gid ni Ismael nga madugangan ang
iya nahibaluan, pero nagsiling sia, “Ugaling bulag ako; indi ako makabasa sing Biblia.”Ginpasalig sia ni Ángel, “Indi ka magkabalaka, tudluan ko ikaw sang Braille.”
“Kabalo ka mag-Braille?” pamangkot ni Ismael.
“Indi, pero matuon ako upod sa imo,” sabat ni Ángel. Indi makapati si Ismael nga himuon ini ni Ángel para sa iya. Pero nagpauli si Ángel, nanalawsaw kon paano magbasa sang Braille, kag naghimo sang mga letra sang Braille paagi sa pagpaulbo sang mga pintok sa cardboard. Dayon, gintudluan niya si Ismael kon paano magbasa sang Braille. Wala magdugay, nakahibalo na si Ismael sang alpabeto sang Braille, nagatambong sa miting, kag nagabasa sang aton Braille nga mga publikasyon. Sa karon, si Ángel may apat ka bulag nga ginatun-an sa Biblia. Nanamian gid sila mag-istorya parte sa palaabuton nga Paraiso, diin makakita na sila liwat.
Wala Niya Dayon Sia Makilal-an
Si Viannei nga isa ka 14 anyos nga sister sa United States, nagsulat: “Sa klase namon nga social studies, nag-istorya ang amon tal-us nga maestro parte sa relihion. Naghambal sia nga hingalanan ang pila ka relihion, gani ginsambit ko ang mga Saksi ni Jehova. Nagkinadlaw ang akon mga klasmeyt kag nagsiling nga ginauyangan lang naton ang ila tion, wala kita sing maayo nga himuon, kag ginahaboy nila ang aton literatura. Bisan ang maestro malain man ang ginsiling parte sa aton.
“Gani nangamuyo ako kay Jehova nga hatagan ako sing kusog nga makapanaksi. Ginsilingan ko sila nga nagakadto kita sa ila balay indi para uyangan ang ila tion, kundi bangod ginsugo kita ni Jehova agod hatagan sila sing nabase sa Biblia nga laygay. Ginpangabay ko sila nga indi pag-ihaboy ang aton literatura kay makapabag-o kag makaluwas ini sang ila kabuhi. Nangayo sing pasensia ang akon maestro kag nagpromisa nga mamati na sia kag basahon ang aton literatura sa masunod nga may magkadto nga Saksi. Pero indi ako kumbinsido sa iya ginsiling.
“Nagkitaay kami liwat pagligad sang apat ka bulan, kag nakibot gid ako nga nagatuon sia sa Biblia. Pagligad pa gid sang anom ka bulan, ginpangita niya ako sa eskwelahan kag nagpasalamat nga ginpanaksihan ko sia. Wala ko dayon sia makilal-an kay nakapagunting na sia kag nakapamarbas. Subong, isa na sia ka di-bawtismado nga manugbantala.”
Pagpanaksi sa Amazon
Sang nagligad nga tuig, ginhatagan sing igtalupangod sang katawhan ni Jehova sa Brazil ang malapad nga rehiyon sang Amazon. Madamo sa sini nga lugar ang wala pa gid makabati sang maayong balita. Gani gin-aprobahan sang Nagadumala nga Hubon ang isa ka tuig nga pinasahi nga kampanya agod mabantalaan ang linibo nga nagaistar sa pila ka naligwin nga bahin sang Amazon.
Brazil: Pagbantala sa Amazon
Nagpili ang sanga talatapan sang 53 ka banwa sa nagasangasanga nga mga suba kag sapa sa Amazon agod mabantalaan sina nga tion. Sa sulod lang sang apat ka bulan, sobra 6,500 ka manugbantala ang nagboluntaryo.
Sa naligwin nga banwa sang Anamã nga wala gid sing manugbantala sang Ginharian, 11 ka adlaw nga nagtener ang napulo ka kauturan kag nakapahamtang sila sang sobra 12,500 ka literatura. Nasugdan man ang mga 200 ka pagtuon sa Biblia, nga subong ginapadayon paagi sa telepono. Naghiwat man sila sang mga miting didto. Nalipay gid sila nga 90 ang nagtambong sa katapusan nga miting antes sila maghalin. Wala pa mahibaluan ang kabug-usan nga epekto sang kampanya.
Nakabulig ang jw.org
Klasmeyt ni Jehizel si Mariana sa sulod na sang anom ka tuig sa Venezuela. Bangod Saksi ni Jehova si Jehizel, pirme sia ginayaguta ni Mariana. Para kay Mariana, si Jehizel indi kabalo mag-enjoy sang iya kabuhi. Isa ka adlaw, pagkatapos nga mahambalan sang mga negatibo, nagsiling ang aton utod: “Mariana, buksi bala ang amon website nga jw.org. Dayon, i-click ang ‘Magpangita sing Video,’ kag i-click ang ‘Tin-edyer.’”
Sina nga hapon, gintawgan ni Mariana si Jehizel kag nagsiling, “Nahangpan ko na ikaw.”
Wala nahangpan ni Jehizel ang buot niya silingon, gani namangkot sia, “Ginayamuhat mo naman bala ako?”
“Wala a. Indi ko na ikaw pagyamuhaton liwat,” sabat ni Mariana. “Salamat gid. Narealisar ko nga ang ginasiling ko nga ‘pag-enjoy’ sa kabuhi, amo gali ang rason sang madamo ko nga problema.” Naghimo dayon sang iskedyul agod regular nga makatuon sing Biblia si Mariana, kag subong nagatambong na sia sa tanan nga miting.
Mga Pamangkot Para sa Klero
Si Gérole nga nagaobra subong sekretarya sa ila simbahan sa Haiti nagdayaw gid nga nasabat sang mga Saksi ang iya mga pamangkot paagi sa Biblia. Gani, sia kag ang iya bata nga babayi nagtuon sa Biblia. Bangod nanamian gid sila sa ila natun-an, nangabay sila nga hiwaton ini sing duha ka beses kada semana.
Pagligad sang tatlo ka bulan nga pagtuon, ginpamangkot ni Gérole ang klero sa ila simbahan sang apat ka pamangkot: “Ano nga tuig nangin Hari si Jesus? Diin makadto ang maayo nga mga tawo kon mapatay sila? Diin makadto ang mga malauton kon mapatay sila? Diin napatay si Jesus, sa krus ukon sa usok?” Nagsiling ang klero nga ikaduha kag ikatlo lang nga pamangkot ang masabat niya. “Nagapati ang mga Saksi ni Jehova nga 144,000 ang mapalangit,” siling sang klero. “Pero para sa akon ang tanan nga nagahimo sang kabubut-on sang Dios mapalangit. Ang mga malauton naman, sunugon sing dayon sa impierno.” Sang ginpangayuan sia sang pamatuod sa Kasulatan, wala sia sing mahatag. Nalugaw-an si Gérole, pero mas nangin determinado sia nga padayunon ang iya pagtuon sa Biblia. Naghalin sia sa simbahan kag nagsiling nga mas madamo pa sia sing natun-an sa Biblia sa sulod sang tatlo ka bulan upod sa mga Saksi ni Jehova sangsa sobra 30 ka tuig nga pagtambong niya sa simbahan. Sining karon lang, nabawtismuhan si Gérole kag ang iya bata, kag nakasugod sila sang 23 ka pagtuon sa Biblia sa ila baryo.
Haiti: Si Gérole kag ang iya bata madamo sing ginatun-an sa Biblia