Sulat Halin sa Nagadumala nga Hubon
Palangga nga mga Utod:
Sang ikapito nga siglo B.C.E., ginhatagan si manalagna Ezequiel sang isa ka makahalawhaw nga palanan-awon. Nakakita sia sang isa ka daku nga salakyan, isa ka langitnon nga kangga, nga ginakontrol sang Soberano sang uniberso. Dalayawon gid ang paagi sang pagdalagan sini nga salakyan. Nagadalagan ini sa kadasigon nga kaangay sang kirab sang kilat kag makabag-o gilayon sang direksion nga indi na kinahanglan maghinay ukon magliso!—Ezeq. 1:4, 9, 12, 14, 16-27.
Ini nga palanan-awon nagapahanumdom sa aton nga padayon nga nagadalagan sing madasig ang langitnon nga bahin sang organisasyon ni Jehova. Kamusta naman ang dutan-on nga bahin sini? Ginapakita sang report sang nagligad nga tuig sang pag-alagad nga ginapadalagan ni Jehova ang dutan-on nga bahin sang iya organisasyon sa dalayawon man nga kadasigon!
Padayon nga nagadalagan sing madasig ang langitnon nga bahin sang organisasyon ni Jehova
Diri sa United States, nangin masako sa pagsaylo ang mga miembro sang pamilya Bethel halin sa Brooklyn pakadto sa bag-o nga ulong talatapan sa Warwick, New York, subong man sa iban nga pasilidad kag sa latagon. Masako man ang mga Bethelite sa pila ka sanga sa bilog nga kalibutan sa pagtukod, pagbag-o, kag pagtingob sang mga sanga, ukon pagsaylo sa iban nga lugar. Kamusta ikaw? Bisan pa nga indi ka masako sa pagsaylo, pat-od gid nga masako ka sa iban nga paagi.
Nalipay gid kag napalig-on ang Nagadumala nga Hubon nga nangin mas masako ang katawhan sang Dios sa bilog nga kalibutan samtang nagadungan sa organisasyon ni Jehova. Madamo ang nagsaylo sa lugar nga mas daku ang kinahanglanon. Gintilawan sang iban ang bag-o nga sahi sang pag-alagad pareho sang pag-alagad sa dumuluong sing lenguahe nga teritoryo. Gintilawan naman sang madamo ang porma sang pagbantala nga bag-o para sa ila. Ang iban naman nagpasangkad sang ila pag-alagad sa iban pa nga paagi. Kag ang tanan nga matutom nga Cristiano, lakip ang mga tigulang kag may kasablagan, nagadalagan para sa kabuhi nga nagapadayon sa pag-alagad kay Jehova, kag nagabulig ini nga mabuyagyag nga butigon si Satanas!Heb. 6:10) Ang imo kahanda nagapahanumdom sa amon kanday Abraham kag Sara. Sang setentahon si Abraham, naghalin sia upod sa iya pamilya sa Ur nga isa ka siudad sa Caldea kag nagsaylo sa Canaan diin magaistar sia sa mga tolda sa iya nabilin nga kabuhi. Dalayawon gid ang kahanda nga ginpakita niya kag sang iya asawa!—Gen. 11:31; Binu. 7:2, 3.
Makasalig ka nga indi gid pagkalimtan ni Jehova ang imo ginapakita nga panimuot. (Amo man bala sini ang imo ginapakita? Tanan kamo nga nagapabilin nga matutom sa sining mabudlay nga tion nagatuman gid sang ginsugo ni Jesus sa aton. Nagsiling sia: “Gani kadtui ninyo ang mga tawo sa tanan nga pungsod kag tudlui ninyo sila agod mangin disipulo ko. Bawtismuhi ninyo sila sa ngalan sang Amay kag sang Anak kag sang balaan nga espiritu.”—Mat. 28:19.
Bisan ang paggamit ni Jesus sang tinaga nga “kadtui” nagapakita nga kinahanglan naton manghikot sing aktibo. Makalilipay gid makita ang nahimuan sang makugi nga mga sumulunod sang Cristo sang nagligad nga tuig! Maathag nga ginapakamaayo gid ni Jehova ang pagpalapnag sang maayong balita sang Ginharian sa tanan nga pungsod.—Mar. 13:10.
Madamo ang nagabaton sang mensahe. Ang pinakamadamo nga manugbantala sang nagligad nga tuig naglab-ot sa 8,340,847, samtang ang aberids nga kadamuon sang ginatun-an sa Biblia kada bulan naglab-ot sa 10,115,264. Maathag nga nagadalagan gid ang langitnon nga kangga, kag ikaw man! Magpadayon sa imo maayo nga buhat sa nabilin nga malip-ot nga tion antes siraduhan ni Jehova ang ganhaan padulong sa kaluwasan.
Nagakaigo gid ang aton tuigan nga teksto para sa 2017 nga “Magsalig ka kay Jehova kag himua ang maayo”! (Sal. 37:3) Kon ginatuman mo ini nga pinamulong, nga ginahimo ang maayo paagi sa sagrado nga pag-alagad kay Jehova, ginapakita mo ang imo pagsalig sa iya. Palihug dumduma pirme nga wala ka nagaisahanon. Matuod gid ang ginsiling ni Jesus: “Dumduma ninyo nga kaupod ninyo ako sa tanan nga tion tubtob sa hingapusan sang sistema sang mga butang.”—Mat. 28:20.
TUIGAN NGA TEKSTO PARA SA 2017:
“Magsalig ka kay Jehova kag himua ang maayo”
Pat-od gid nga padayon ka nga pakamaayuhon ni Jehova sa imo matutom nga pag-alagad. Gamay man ukon daku ang imo nahimuan, ang importante kay Jehova amo nga ginhatag mo ang imo pinakamaayo kag husto ang imo motibo. Nahamuot gid sia sa sini nga mga dulot. (2 Cor. 9:6, 7) Gani magpabilin nga suod sa imo mahigugmaon nga Amay paagi sa regular nga pagpangamuyo, pagtuon sa Pulong sang Dios, pagtambong sa Cristianong mga miting, kag pagpakigbahin sa ministeryo.
Tubtob matapos ining ‘malip-ot na lamang nga tion’ sang Yawa, pat-od nga himuon sining malaut nga rebelde ang tanan agod gub-on ang aton integridad kay Jehova. (Bug. 12:12) Magpabilin nga suod kay Jehova, kag sigurado nga mapaslawan ang Yawa sa tanan niya nga panikasog. (Sal. 16:8) Palangga gid namon kamo kag ginaapresyar gid namon ang inyo bulig sa pagpauswag sang intereses sang Ginharian sang Ginuo sa sining katapusan nga mga adlaw.
Ang inyo mga utod,
Nagadumala nga Hubon sang mga Saksi ni Jehova