TALALUPANGDON NGA MGA HITABO SANG NAGLIGAD NGA TUIG
Mga Balita sa Lainlain nga Pungsod
Pagbantala sa mga Refugee kag sa mga Nagsaylo
Sa Germany, nagdagsa ang mga refugee kag madamo ang nagsaylo sa sini nga pungsod, gani nag-uswag ang dumuluong sing lenguahe nga teritoryo. Sining karon lang, sa sulod sang siam ka bulan, naporma ang 229 ka dumuluong sing lenguahe nga grupo kag pregroup. Kag mga 800 ka manugbantala ang nagatambong sa mga 30 ka kurso sa pagtuon sa lenguahe sa 13 ka lenguahe.
Ang aton kauturan nagabantala sa mga refugee camp. Kag nakapahamtang sila sing mga 640,000 ka literatura nga nagagamit sang mga cart sa sobra 200 ka lugar.
Gin-aprobahan sang Nagadumala nga Hubon ang pinasahi nga kampanya sang pagbantala halin sa Mayo asta
Hulyo 2016. Ang mga 700 ka kauturan nga nagahambal sing Arabic halin sa pito ka pungsod, naglakbay pakadto sa napulo ka lugar sa Austria kag Germany agod magbantala sa madamo nga nagahambal sing Arabic didto.Mga Sensilyo sa Dalan
Sa masami, ang 50 ka manugbantala sa kongregasyon sang Faber’s Road Kriol sa Belize nagalakat lang pakadto sa ila teritoryo. Pigado ang kalabanan sa ila, pero kaalwan sa ila. Halimbawa, sang nagligad nga tinuig, ginapulot sang kauturan ang mga sensilyo nga makita nila sa yab-ukon nga dalan sa tion sang pagpamalaybalay. Sa katapusan sang kada tuig, nagatipon sila agod hugasan, painon, kag isipon ang mga sensilyo nga ila natipon.
Bisan pa gamay lang ang balor sang kalabanan nga sensilyo (tunga sa sentimo sa U.S.), kada tuig makatipon sila sing mga $225 (U.S.). Ang katunga sang ila matipon ginabulig nila sa kagastuhanan sang ila Kingdom Hall, kag ang katunga naman ginaamot nila para sa bug-os kalibutan nga hilikuton.
Mga Apat ka Milyon ang Nagpamati!
Ang isa sa talalupangdon nga hitabo sa teokratiko nga kasaysayan sang Burundi natabo sang Marso 5, 2016, sa tion sang pagduaw sa sanga ni Anthony Griffin nga isa ka representante sang ulong talatapan. Ginwaragwag sa bilog nga pungsod sang isa ka daku nga estasyon sang radyo ang pinasahi nga programa para sa mga kongregasyon. Kag mga apat ka milyon ang nagpamati!
Daku gid ini nga panaksi, kag madamo ang nagkomento sing positibo. Nagsiling ang isa sa mga teknisyan sang radyo nga nagbulig sa pagwaragwag, “Maghimo pa kamo sing pareho sini nga programa!” Kag ang isa ka opisyal
sang radyo nagsulat: “Padayuna ninyo [ang paghimo sing pareho sini nga programa], kay pat-od nga madamo nga kalag ang maluwas.” Madamo nga bus kag taxi ang nagpatokar sang programa sa ila mga radyo.Nag-untat ang Musika
Isa ka adlaw antes sang Memoryal sang 2016, nalugaw-an gid ang kauturan sa naligwin nga grupo sa Nepal sang nahibaluan nila nga may hiwaton nga daku nga concert sa eskwelahan sa tupad sang ila gin-arkilahan nga tilipunan.
Magahod gid ini nga mga concert. Sang aga sang Memoryal, samtang nagapaninlo sa tilipunan ang kauturan ginsilingan sila sang nagaorganisar sang concert, “Wala gid kamo sing mabatian luwas sa musika namon.”
Nagsugod sang udto ang concert, kag tama gid ini kagahod. Bisan pa ang speaker nga gin-arkilahan sang kauturan mas daku sangsa ila ginplano, indi gihapon mabatian ang mikropono sang gintestingan ini. Nasubuan gid ang kauturan, pero ginpangamuyo nila ini. Dayon, 30 minutos antes sang Memoryal, sang nagainabot ang kauturan, gulpi lang nag-untat ang musika. May pila gali sa mga tawo nga nakainom ang nag-ilinaway, gani ginpauntat sang mga pulis ang concert. Bilang resulta, matawhay kag malinong nga nasaulog sang kauturan ang Memoryal.
Gindayaw ang jw.org
Si Giuseppe isa ka regular payunir sa Italy. Nagatrabaho sia sa iya lang balay para sa isa ka kompanya nga nagahatag sing eksperto nga mga laygay parte sa Internet. Sang Mayo, nagtambong sia sa miting upod sa mga 70 niya nga katrabaho agod binagbinagon ang bag-o nga mga ideya nga puede gamiton sang kompanya. Nagsiling
ang chief executive officer (CEO) nga mahimo gamiton ang pila ka website subong halimbawa sa gusto malab-ot sang ila kompanya. Ginpakita niya dayon ang isa ka halimbawa sa daku nga screen. Nakibot gid si Giuseppe sang nakita niya ang home page sang jw.org. Nagsiling ang CEO, “Amo ini ang pinakamanami nga website!” Dayon ginbinagbinag niya ang teknikal nga mga bahin sang jw.org. Nanamian sia sa mga link kay mahapos lang ini pangitaon, subong man sa makagalanyat nga mga piktyur.“Nagdayaw gid ang akon mga katrabaho sang nahibaluan nila nga mabuksan ang website sa madamo nga lenguahe,” siling ni Giuseppe. “Sa katapusan sang presentasyon, ginsilingan sang akon superbisor ang tumalambong
kag ang CEO: ‘Si Giuseppe isa sa mga Saksi ni Jehova.’ Gani ginsilingan ako sang CEO: ‘Dapat dayawon ang inyo organisasyon. Nakadesinyo kamo sang website nga ginahandum gid sang bisan ano nga kompanya ukon organisasyon sa bilog nga kalibutan. Indi ko maimadyin kon daw ano nga panikasog ang inyo ginahimo agod mahuptan ini nga bag-o pirme kag mahapos gamiton, subong man ang panikasog nga ginahatag sa tagsa ka detalye kag unod sini.’ Nahuya ako kay gindayaw ako sa butang nga wala ko ginhimo. Pero nalipay gid ako kay madamo nga wala sing ihibalo parte sa mga Saksi ni Jehova ang napanaksihan. Pirme na kami subong nagaistoryahanay sang pila ko ka katrabaho kag ang tatlo sa ila nasugdan ko nga tun-an sa Biblia.” Padayon nga “ginatun-an” sang kompanya nga ginaubrahan ni Giuseppe ang jw.org nga website, samtang padayon niya nga ginaistorya sa iya mga katrabaho ang parte sa Biblia.Ginpangindian Niya ang Soccer
Argentina: Si Jorge nagahampang sing soccer upod sa kauturan
Si Jorge isa ka pamatan-on sa Argentina. Sa umpisa sang 2010, natun-an niya ang maayong balita sa iya klasmeyt. Dayon nagtuon sia sa libro nga Ano Gid ang Ginatudlo sang Biblia? Sa amo man nga tion nagahampang sia sing soccer. Sagad sia maghampang sini gani nangin kalipikado sia sa ikaduha nga dibisyon sang kilala nga soccer club. Sang Abril 2014, gintanyagan sia nga maghampang sa isa ka team sa Germany. Nalangkag gid sia nga mangin isa ka propesyonal nga humalampang sang soccer, gani ginbaton niya ini. Pila ka adlaw antes sia magpa-Europe, ginsilingan sia sang iya coach: “Daw Saksi ni Jehova ka man? Indi paggub-a ang imo kabuhi sa pag-abroad. Saksi man ako sang bata pa ako. Kag gintanyagan ako nga maghampang sa isa ka team sa Asia. Madamo sila sing ginpromisa sa akon kag gusto ko gid ini. Gani nagkadto kami didto sang akon pamilya, pero nagpauli kami nga nalugaw-an.” Nagsiling si Jorge: “Daku gid ang epekto sa akon sang iya ginhambal, gani wala ako nagdayon sa Europe. Sang 2015, nangin di-bawtismado ako nga manugbantala kag nabawtismuhan.”
Pagpakamaayo nga Wala sing Bayad
Sang Septiembre 2015, ginhiwat ang “Iluga si Jesus!” Rehiyonal nga Kombension sa Kampala, Uganda. Nalipay gid ang mga tumalambong sang ginpagua ni Mark Sanderson sang Nagadumala nga Hubon ang Bag-ong Kalibutan nga Badbad sang Balaan nga Kasulatan sa Luganda nga lenguahe.
Nagsiling ang isa ka nagatuon sa Biblia: “Nalipay gid ako sang nabaton ko ining matahom nga Biblia! Nagahanda sadto ang mga tawo sa pagbisita sang papa. Para makatipon sang pundo, nagbaligya ang simbahan sang ‘nabendisyonan’ nga mga rosarito sa presyo nga $30 (U.S.). Gusto gid sang mga tawo nga pakamaayuhon, apang madamo sa ila ang wala sing inugbakal. Sa pihak nga bahin, nakabaton ako sang matuod nga pagpakamaayo nga wala sing bayad. Ginhatag ini ni Jehova sa tanan nga nagtambong sa kombension, kag makaamot ang isa sing kinabubut-on. Pagpakamaayo gid nga mas makilala si Jehova samtang ginabasa ko kada adlaw ang iya Pulong sa akon namat-an nga lenguahe. Nagapasalamat ako kay Jehova nga ginhatagan niya ako sing Biblia.”
Pag-imprinta sa Kalibutan sang mga Espiritu?
Para malas-ayan ang mga tawo sa www.pr418.com, gintudluan sang mga lider sang pila ka simbahan sa rehiyon sang Congo (Kinshasa) ang ila sumulunod nga ang publikasyon sa numero nga 666 sa Bugna. (Bug. 13:18) Gani, pila sa nagatuon sa Biblia ang nag-untat.
sang mga Saksi ni Jehova ginaimprinta sa kalibutan sang mga espiritu. Para pamatud-an ini, gintudlo nila nga ang mga letra nga “www” nagapatuhoySa tapos mapangamuyo ini nga butang, gin-agda sang payunir nga mag-asawa sa ila balay ang ila mga ginatun-an sa Biblia upod sa ila mga tiayon. Tatlo ka mag-asawa ang nagkadto, kag sa tapos makakaon, ginpatan-aw nila sa ila ang video nga Mga Saksi ni Jehova—Naorganisar sa Pagbantala sang Maayong Balita. Natun-an sang ila mga bisita nga sala ang ila nabatian parte sa ginhalinan sang aton mga publikasyon. Pagkasunod nga semana, ang bana sang isa sa nagkadto nag-insister nga batunon sang mag-asawa nga Saksi ang $100 (U.S.) agod iamot sa bug-os kalibutan nga hilikuton, bisan wala pa sia nagatuon sa Biblia.
Pagtuon sang Bag-o nga mga Ambahanon
Gusto gid tun-an sang kauturan sa naligwin nga lugar sang Papua New Guinea ang bag-o nga mga ambahanon, bisan pa wala sila sing Internet. Gani ginapakadto sang kongregasyon sang Mundip ang isa ka utod sa pinakamalapit nga banwa, nga duha ka oras nga lalakton kag duha pa ka oras nga pagsakay sa bus. Pag-abot niya, kopyahon niya sa notebook ang liriko sang bag-o nga mga ambahanon halin sa Internet, kag pagpauli isulat niya ini sa blackboard sa Kingdom Hall. Dayon, kopyahon ini sang tanan sa kongregasyon agod gamiton sa miting. Nalipay sila sa pagkanta upod sa mga kongregasyon sa bilog nga kalibutan bilang bahin sang ila pagsimba kay Jehova.