TALALUPANGDON NGA MGA HITABO SANG NAGLIGAD NGA TUIG
Branch Dedications
ISA ka tuig kag tunga nga nagboluntaryo ang mapisan nga mga utod nga taga-Kyrgyzstan kag mga utod halin sa iban nga pungsod sa pagpatahom kag pagpasangkad sang mga pasilidad sang sanga sa Bishkek, ang kapital nga siudad. Sang Oktubre 24, 2015, isa lang ka bulan matapos ang pagpasangkad, gindedikar ang pasilidad. Sobra 3,000 ang nakabenepisyo sa programa paagi sa hook-up sa 18 ka Kingdom Hall kag 5 pa ka lugar. Si Stephen Lett sang Nagadumala nga Hubon ang nagpamulongpulong sa dedikasyon nga may makapahulag nga tema nga “Alagda si Jehova sa Bug-os Mo nga Tagipusuon.” Pagkasunod nga adlaw, nakabenepisyo ang kalabanan nga manugbantala sa pungsod sa isa ka makapalig-on nga programa.
Sanga sa Kyrgyzstan
Sang Sabado, Mayo 14, 2016, gindedikar ang 6 ka panalgan nga sanga sa Armenia nga makita sa isa ka bilding nga may 18 ka panalgan, kag 6,435 ang nagtambong. Gindedikar man ang Assembly Hall kag ang mga pasilidad para sa School for Kingdom Evangelizers. Ginpadaku sa mga pamulongpulong kon paano nagsugod ang mga alagad ni Jehova sa Armenia. Nagsugod ini sa mga taga-Armenia nga nagsaylo sa United States sang maaga nga bahin sang ika-20 nga siglo, kag sa Armenia mismo sang tungatunga nga bahin sang dekada 70, sang ang pungsod bahin pa sang Soviet Union. Sining karon lang, narehistro ang aton organisasyon kag naporma ang sanga. Ang kalabanan nga nagtambong wala gid maghunahuna nga masaksihan nila ining makakulunyag nga mga hitabo. Ang talalupangdon sa sini nga dedikasyon amo ang tinagipusuon nga pag-ugyon sang tanan nga tumalambong kay David Splane sang Nagadumala nga Hubon nga i-dedikar ining matahom nga mga pasilidad kay Jehova.
Armenia
Ibabaw: Dedikasyon sang sanga sa Armenia
Tunga: Kauturan nga nagatambong sa pinasahi nga programa sa talipuspusan sang semana
Idalom: Tradisyonal nga saot sa Armenia sang gab-i sang pinasahi nga programa