Sa legal nga mga pagpakigbato kag sa mabudlay nga mga kahimtangan, nangin mainunungon kay Jehova nga Dios ang aton kauturan. Ang ila halimbawa magabulig sa aton nga mangin malig-on kag magsalig nga “ginapadunggan ni Jehova ang mainunungon sa iya.”—Sal. 4:3.

Nagdaku si Ruth sa kamatuoran pero nangin di-aktibo sia sang hoben pa. Sang ulihi, may nakarelasyon sia kag nakabata sila sing babayi. Isa ka adlaw, nakita ni Ruth sa siudad sang La Plata ang mga Saksi ni Jehova nga nagadispley sang mga literatura sa lamesa kag nadumduman niya ang iya Cristiano nga pagkabuhi sang una. Napahulag sia nga makig-angot liwat sa kongregasyon kag gintudluan ang iya bata parte sa Biblia. Ginpamatukan ini sang amay sang bata kag nagdangop sia sa korte agod punggan si Ruth sa pagtudlo sing Biblia sa ila bata ukon pagdala sa bata sa mga miting.

Ginpaathag sang abogado ni Ruth nga may kinamatarong ang duha ka ginikanan nga tudluan ang ila bata parte sa relihion kag indi makapasilabot ang korte sa sini luwas lang kon may pamatuod nga nahalitan ang bata bangod sang panudlo. Nagdesisyon ang korte nga dapat respetuhon sang mga ginikanan ang kinamatarong sang ila bata sa pagpili parte sa relihion, bisan apat ka tuig pa lang ang bata sadto! Ginklaro sang court of appeal nga ang bata indi pa makadesisyon parte sa sini, gani ang mga ginikanan may pareho nga kinamatarong nga tudluan ang ila bata parte sa relihion.

Kada gab-i, nagabasa sang Biblia ang bata ni Ruth kag nagatambong na ini sa mga miting upod sa iya. Nalangkag gid ang bata nga magbisita sa Bethel sa Buenos Aires.

Nagsiling si apostol Pablo nga sa matuod nga Cristianong kongregasyon, “kon ang isa ka bahin nagaantos, ang tanan nga bahin nagaantos man.” (1 Cor. 12:26) Amo gid sini ang nabatyagan sang mga Saksi ni Jehova sa bug-os nga kalibutan parte sa pag-antos nanday Irina Zakharchenko kag Valida Jabrayilova sa Azerbaijan. Sang Pebrero 2015, gin-akusar sang mga awtoridad ining duha ka sister nga nagahimo sang ilegal nga relihioso nga hilikuton. Nagdesisyon ang hukom nga prisuhon sila samtang ginahulat nga bistahon, kag bangod makapila nga ginpaiway ang pagbista, lapit isa ka tuig sila nga napriso diin gintratar sila sing indi maayo kag ginpit-an.

Sang Enero 2016, ginbista gid man sila kag ginpamatbatan sang hukom nga nakasala kag ginmultahan, pero ginkanselar ang multa kay napriso na sila antes sini, gani gintugutan sila nga magpauli. Sang ginbasura sang Baku Court of Appeal ang ila apelar, gindala nila ini sa Supreme Court. Dugang pa, nagpasaka sila sang mga reklamo sa UN Human Rights Committee bangod sang indi maayo nga pagtratar sa ila kag ginlapas ang ila kinamatarong nga ipasundayag ang ila relihioso nga pagpati.

Samtang nagahulat sang resulta, nagapaayoayo ang mga sister sa ila naagyan. Nagpasalamat gid sila sa mga pangamuyo  kag pag-ulikid para sa ila. Nagsulat si Sister Jabrayilova sa Nagadumala nga Hubon: “Nabatyagan ko gid nga ang inyo mga pangamuyo nagbulig sa amon nga magbatas. Indi ko gid malipatan ang gugma kag pag-ulikid nga ginpakita ninyo, ni Jehova, kag sang akon kauturan sa bilog nga kalibutan.”

Sang Hulyo 2016, may 55 na ka mga Saksi ni Jehova ang ginpriso sang gobierno sang Eritrea bangod sang ila pagtuo. Ang tatlo ka brother nga sanday Paulos Eyassu, Isaac Mogos, kag Negede Teklemariam, napriso sugod pa sang Septiembre 1994, kag siam pa ka kauturan ang napriso sa indi magnubo napulo ka tuig.

May positibo nga hitabo sang Enero 2016, ginbista sa korte ang mga Saksi nga gin-aresto sa Memoryal sa Asmara sang Abril 2014. Amo ini ang una nga tion nga ang mga Saksi pormal nga ginkasuhan sang mga awtoridad sang “paglapas sa kasuguan” kag ginhatagan sing kahigayunan nga magpangapin. Subong sa ginapaabot, ang kalabanan sa kauturan ginsentensiahan nga nakasala bangod sa pagtambong sa isa ka “ilegal” nga miting, gani ginmultahan sila kag dayon ginbuy-an. Pero, nangindi nga magbayad sang multa si Sister Saron Gebru. Gani, ginsentensiahan sia nga mapriso sing anom ka bulan. Makabaton sia sing mga bisita makaisa kada semana kag nagsiling sia nga maayo ang pagtratar sa iya. Nagapasalamat gid sia kag ang 54 ka napriso nga mga Saksi sa mga pangamuyo para sa ila samtang ‘ginadumdom naton ang mga yara sa bilangguan, nga daw subong nga nabilanggo man kita upod sa ila.’—Heb. 13:3.

Sang Disiembre 21, 2015, sa sulod sang apat ka tuig nga pagtinguha, mas legal nga ginkilala sang estado sang Bremen, nga yara sa aminhan-katundan sang Germany, ang Religious Association of Jehovah’s Witnesses sa Germany. Sang nakagua ang  desisyon sang Higher Administrative Court sa Berlin, ang kalabanan sa 16 ka estado sa Germany naghatag sa mga Saksi ni Jehova sang paborable nga legal nga pagkilala, nga ginatawag public law status. Pero wala ginhatag sang awtoridad sang Bremen ini nga pagkilala sa mga Saksi, bangod sa butig nga mga panumbungon nga ginpalapta sang mga manugpamatok.

Sang 2015, nagsiling ang Federal Constitutional Court sang Germany nga ang pagpangindi sang Bremen nga ihatag ang public law status, pagsupak sa kinamatarong sang mga Saksi. Ginapakita sini nga desisyon nga ang kahilwayan sa relihion nga nasulat sa konstitusyon, nagaamlig sa hilikuton sang mga Saksi ni Jehova sa Bremen. Ang mga kongregasyon sa sini nga lugar may kinamatarong nga malibre sa buhis kag matigayon ang iban pa nga mga pribilehiyo pareho sa dalagku nga mga relihion sa Germany.

Sang Marso 2013, ang awtoridad sang Osh sa Kyrgyzstan naghimuhimo sang kriminal nga panumbungon batok kay Oksana Koriakina kag sa iya iloy nga si Nadezhda Sergienko. Gin-akusahan sila sang piskal nga nagapanonto samtang nagasugid sang ginatudlo sang Biblia sa iban, kag nagdesisyon ang hukom nga prisuhon sila sa ila kaugalingon nga balay samtang nagahulat nga bistahon. Sang Oktubre 2014, natukiban sang korte nga gintanom lang ang ebidensia, wala ginsunod ang proseso, kag inosente ang duha ka sister. Amo man sini ang desisyon sang court of appeal sang Oktubre 2015.

Pero nag-apelar liwat ang piskal sang Osh, sa sini nga tion sa Supreme Court na sang Kyrgyzstan. Gani, ginkanselar sang Supreme Court ang desisyon sang court of appeal kag nagmando nga bistahon liwat ang mga sister. Sa tion sang hearing sang Abril 2016, ang mga abogado sang mga sister nagpangabay nga isira ang kaso bangod natapos na ang tion nga gintalana sang kasuguan nga ipasaka ang kaso. Wala sing mahimo ang hukom kundi ibasura ang kaso.

 Sa tanan nila nga naagyan, nagpabilin nga positibo ang mga sister. Si Sister Sergienko nagsiling: “Masami nga nagahinakit ang mga tawo kon himuan sila sing malain, pero nabatyagan ko ang gugma kag pag-ulikid ni Jehova paagi sa kauturan. Wala gid kami nagaisahanon.” Naeksperiensiahan nila mismo nga ginatuman gid ni Jehova ang iya saad sa Isaias 41:10: “Indi ka mahadlok . . . uyatan ko ikaw sang akon tuo nga kamot sang pagkamatarong.”

Sang Agosto 9, 2015, nagsalakay ang pulo ka pulis sa isa ka miting sa siudad sang Osh sa Kyrgyzstan. Nagmando sila nga untaton gilayon ang “ilegal” nga miting kag namahog pa nga paniruhon ang sobra 40 nga nagtambong. Gindala nila ang pulo ka kauturan sa presinto, kag siam sa ila ang ginmaltrato kag ginkastigo, dayon ginbuy-an. Pagligad sang duha ka adlaw, gin-aresto si Nurlan Usupbaev, isa sa kauturan nga ginkastigo, kag ginkasuhan sing ilegal nga relihioso nga hilikuton bangod sang pagdumala sa miting.

Sang ginbista si Brother Usupbaev sa korte sang Osh, wala sing nakita nga ebidensia ang hukom batok sa iya gani ginbasura ang kaso. Nag-apelar ang piskal sa Regional Court sang Osh, pero ginbasura liwat ang kaso. Gani ginpamatud-an sini nga si Brother Usupbaev wala makasala sing ilegal nga relihioso nga hilikuton bangod ang mga Saksi ni Jehova legal nga narehistro sa Kyrgyzstan.

Wala mag-untat ang piskal kag gindala ang kaso sa Supreme Court sang Kyrgyzstan. Nalipay gid si Brother Usupbaev nga ginbasura sang Supreme Court ang kaso sang Marso 2016, kag wala ginbag-o ang desisyon sang manubo nga mga korte, kag sa liwat nagpamatuod nga ang mga Saksi ni Jehova sa Kyrgyzstan may kinamatarong nga maghiwat sang relihioso nga mga miting. Nagpasaka sang kaso ang mga biktima batok sa mga pulis sang Osh kag ginahulat pa ang desisyon sang korte.

Ang mga Saksi ni Jehova kag ang ila hilikuton padayon nga ginahingabot sang gobierno sang Russia, bisan pa indi ugyon sa sini ang mga awtoridad nga nagapangapin sa kinamatarong sang tawo. Suno sa pinakaulihi nga report, 88 na sang aton publikasyon ang gindeklarar sang awtoridad sang Russia nga “batok sa gobierno” kag gindumilian ang aton opisyal nga website nga jw.org. Sang 2015, gindumilian man sang mga opisyal sang custom ang pagpasulod sa pungsod sang Bag-ong Kalibutan nga Badbad sang Balaan nga Kasulatan, kag nagahunahuna ang isa ka korte sa Vyborg kon bala ideklarar man ining moderno  nga badbad nga “batok sa gobierno.” Sang Marso 2016, ginpabaskog pa gid sang Prosecutor General’s Office ang ila paghingabot sang namahog sila nga ipasira ang sanga talatapan sang mga Saksi ni Jehova sa Solnechnoye nga yara sa gua sang St. Petersburg bangod sang gin-alegar nga “hilikuton batok sa gobierno.”

Bisan pa sini, may pila ka maayo nga balita. Sang Oktubre 2015, nagpasaka sang kaso ang piskal agod pauntaton ang Local Religious Organization (LRO) sa siudad sang Tyumen, nga mga 2,100 kilometros sa nasidlangan sang Moscow. Kag bisan may pamatuod nga ginhimuhimo lang sang mga pulis ang ebidensia batok sa mga Saksi, nagdesisyon ang Regional Court nga nakasala ang LRO sa Tyumen. Pero sang Abril 15, 2016, ginbaliskad sang Supreme Court of the Russian Federation ang desisyon sang manubo nga korte kag nagdesisyon nga “wala sing basihan nga pauntaton ang LRO sang mga Saksi ni Jehova sa Tyumen.” Sang ginbasa sang hukom ang desisyon, nagtindog kag nagpamalakpak ang 60 ka kauturan sa sulod sang korte.

 Ang katawhan ni Jehova sa Russia determinado nga padayunon ang pagsimba sa iya bisan ano pa ang ‘himuon nga hinganiban batok sa ila.’—Isa. 54:17.

Sa sining karon lang nga tinuig, ginpahalin sa eskwelahan ang mga Saksi nga estudyante sa Rwanda bangod sang pagpangindi nga suportahan ang relihioso ukon patriotiko nga mga hilikuton. Para masolusyunan ini nga problema, sang Disiembre 14, 2015, nagpagua ang gobierno sang kasuguan agod dulaon ining diskriminasyon bangod sa relihion sa mga eskwelahan. Ginapadaku sini nga dapat tahuron sang mga eskwelahan ang kahilwayan sa pagsimba sang mga estudyante.

Sang Hunyo 9, 2016, ginpagua sa Newsroom sa jw.org ang isa ka artikulo nga may tig-ulo “Ginkontra sang Rwanda ang Diskriminasyon sa Eskwelahan Bangod sa Relihion.” Talalupangdon nga gin-post ini liwat sang isa ka kilala nga pamantalaan sa Internet sa Rwanda. Wala madugay, sobra 3,000 ka beses nga ginbuksan ini nga website kag madamo sa nagbasa ang nagsulat sang positibo nga mga komento parte sa ginhimo sang gobierno. Nagapasalamat gid ang mga Saksi sa Rwanda sa kasuguan nga nagapasalig nga ang ila kabataan makatigayon sang edukasyon nga hilway sa diskriminasyon bangod sa relihion.

Sa South Korea, sobra na 60 ka tuig nga nagaatubang sang isyu sa pagsoldado ang mga lalaki nga Saksi nga nagaedad 19 asta 35. Wala ginakilala sang gobierno ang kinamatarong sa pagpangindi nga magsoldado bangod sa konsiensia kag wala man sang alternatibo nga serbisyo subong sibilyan. Sa pila ka kahimtangan, sunodsunod nga henerasyon sang mga Saksi, halin sa lolo asta sa apo, ang nagpapriso na lang sang ginpatawag nga magsoldado.

 Duha ka beses na nga nadesisyunan sang Constitutional Court nga ang Military Service Law nahisuno sa konstitusyon, pero gindala liwat sang manubo nga mga korte kag sang mga napriso bangod sa sini nga kasuguan ini nga isyu sa Constitutional Court. Gani sang Hulyo 9, 2015, ginpamatian sang Korte ang argumento sang mga nangindi magsoldado bangod sa konsiensia. Si Brother Min-hwan Kim, nga napriso sa sulod sang 18 ka bulan bangod indi magtugot ang iya konsiensia nga magsoldado, nagpaathag: “Nakaagi ako priso. Pero kabay nga indi na pagprisuhon ang iban nga nangindi magsoldado bangod sa konsiensia. Kon tugutan sila sa alternatibo nga serbisyo, makabulig gid sila sa komunidad.” Ginahulat pa ang desisyon sang Constitutional Court.

Si Brother Hemdemov, nga 53 anyos, may apat ka bata nga lalaki. Makugi sia nga brother kag ginatahod sa ila lugar. Sang Mayo 2015, ginsentensiahan sia sang korte nga mangabudlay sa prisuhan sa sulod sang apat ka tuig bangod sa paghiwat sang “ilegal” nga relihioso nga miting sa iya balay. Ginbutang sia sa isa ka labor camp sa banwa sang Seydi nga kilala bangod sa mabudlay nga kahimtangan, diin sulitsulit sia nga gin-interogar kag ginsakit sang mga awtoridad. Pero ginhuptan niya kag sang iya pamilya ang ila integridad kay Jehova nga Dios. Regular sia nga ginabisitahan sang iya asawa nga si Gulzira agod palig-unon.

Nagapangamuyo kita para sa katawhan ni Jehova nga nagapabilin nga mainunungon bisan pa sang mga pagtilaw. Ang ila halimbawa nagapahulag man sa aton nga mangin mainunungon pa gid sa Dios, kag nagasalig sa promisa sang Salmo 37:28: “Indi niya pagbiyaan ang mga mainunungon sa iya.”