TALALUPANGDON NGA MGA HITABO SANG NAGLIGAD NGA TUIG
Pag-una sang Bug-os Kalibutan nga Pagbantala
SANG Mierkoles, Septiembre 23, 2015, ginpahibalo sang Nagadumala nga Hubon sa pamilya Bethel sa bilog nga kalibutan ang pila ka pagbag-o sa organisasyon agod magamit sing maayo ang pundo. Dayon sang Sabado, Oktubre 3, 2015, ang pahibalo halin sa Nagadumala nga Hubon nagpaathag: “Ginasilingan kita sang Filipos 1:10 nga ‘pat-uron ang mas importante nga mga butang.’ Nahisuno sa sining maalamon nga laygay, luyag namon [Nagadumala nga Hubon] nga unahon ang mga hilikuton nga daku ang mabulig sa espirituwal nga kaayuhan sang katawhan sang Dios kag sa pagpauswag sang bug-os kalibutan nga pagbantala.”
Si Stephen Lett sang Nagadumala nga Hubon nagpaathag sing dugang sa JW Broadcasting: “Serioso gid ang Nagadumala nga Hubon sa pagpauswag sang intereses sang Ginharian sa latagon amo nga ginbinagbinag namon liwat kon paano makakinot sa tanan nga sanga agod mas daku nga pundo ang magamit sa latagon. Halimbawa, madamo sa madugay na nga mga rutina kag serbisyo sa Bethel ang ginbuhinan ukon gindula, amo nga diutay na lang ang kinahanglan nga miembro sang pamilya Bethel.”
Gani, halin sang Septiembre 2015, mga 5,500 ka miembro sang pamilya Bethel sa bilog nga kalibutan ang gin-asayn sa latagon. Bisan daku ini nga mga pagbag-o, ginpakamaayo gid ini ni Jehova, kag napauswag sini ang pagbantala kag pagpanudlo.
Ang isa ka mag-asawa nga Bethelite sa Sri Lanka gin-asayn sa latagon, kag gintamod nila ini nga kahigayunan nga mapakita ang ila pagtuo kay Jehova kag pagsalig sa iya organisasyon. Nagsulat sila: “Wala kami makahibalo kon ano ang matabo sa unahan. Pero sigurado kami nga indi kami pagpabay-an ni Jehova. Gani nangamuyo kami, ‘Palihug, Jehova, kon ano man nga kahimtangan ang amon maatubang, buligi kami nga makapasibu agod makaalagad kami subong regular payunir.’ Sa una nga bulan, pigado gid kami. Pero nabatyagan namon ang gugma kag pag-atipan ni Jehova, kag karon, may trabaho na kami nga makasakdag sang amon kinahanglanon. Masako kami sa ulubrahon sa balay, sa trabaho, kag sa pagpayunir. Pero nagamit namon sing maayo ang amon tion bangod
sa paghanas nga nabaton namon sa Bethel. Wala na sing mas makaalayaw pa sangsa buligan ang mga tawo nga mahibaluan ang kamatuoran, kag nalipay gid kami nga mahimo namon ini subong payunir.”Sa Colombia, ang pila sa mga Bethelite nga gin-asayn sa latagon nagtuon sing lain nga lenguahe kag nagsaylo sa malayo nga mga lugar agod magbantala sang mensahe sang Ginharian didto. Nangin pagpakamaayo man sila sa ila bag-o nga kongregasyon. Ang isa ka manugtatap sang sirkito nagsulat parte sa mag-asawa nga gin-asayn sa isa ka kongregasyon sa iya sirkito: “Naapresyar gid sang kauturan ang ila bulig. Mas madamo sa kongregasyon ang nagapakigbahin sa ministeryo, kag nahanas man ang mga brother sa mga responsibilidad sa kongregasyon.” Madamo man sa anay Bethelite ang nagboluntaryo sa Bethel subong part-time nga commuter makaisa ukon pila ka beses kada semana.
Sa Japan, ang isa ka brother nga 31 ka tuig nga nag-alagad sa Bethel gin-asayn sa kongregasyon nga duha lang ang gulang. Bangod ang kongregasyon may iskedyul sa pagkay-o sang Kingdom Hall, nagdesisyon sia nga indi anay magtrabaho sa sekular sa sulod sang duha ka semana. Pero antes sang pagkay-o, gintay-og sang 7.0 nga kabaskugon sang linog ang Kumamoto diin nahamtang ang ila kongregasyon. Bangod wala sia sing obra sadto nga tion, napangunahan niya ang pagbulig kag pag-shepherding pagkatapos sang linog. “Kon pamensaron ko,” siling niya, “makasiling ako nga ginabutang ako ni Jehova kon diin daku gid ang kinahanglan.”
Sanday Phil kag Sugar nga nag-alagad sa sanga sang Australasia nagpaathag: “Sang nagbag-o ang amon asaynment, determinado kami nga magkabuhi sing simple. Nangabay kami sang panuytoy ni Jehova nga makahimo sang maayo nga mga desisyon kag pakamaayuhon ini. Luyag namon nga magboluntaryo sa isa ka kongregasyon sa iban nga pungsod. Kag ginpakamaayo gid ini ni Jehova, subong man ginbuligan niya kami nga maalagad sia sing bug-os kalag!” Karon, nagaalagad sila sa Pilipinas, sa isa ka Ingles nga grupo sa Samal Island, Davao nga may 34 ka manugbantala kag 9 ka regular payunir. May yara na sila mga 120 ka adres sang mga interesado nga kinahanglan tatapon. “Madamo pa sing makalilipay nga hilikuton. Nalipay gid kami nga nagsalig kami sing bug-os kay Jehova. Nakabulig ini nga magbakod pa gid ang amon pagtuo kag gugma sa iya!”
Ang di-minyo nga sister sa Russia nga gin-asayn subong espesyal payunir nagsiling: “Bilang payunir, makapakigbahin ako sing bug-os sa pinakaimportante kag indi na masulit nga hilikuton nga pagbantala tuhoy sa Ginharian sang Dios. Nalipay gid ako nga gamiton ni Jehova.” Sa karon, may anom sia nga ginatun-an sa Biblia. Lakip sa iya mga ginatun-an ang halin sa Iraq, Nigeria, Sri Lanka, Syria, kag Zambia.
Zambia: Ang mga miembro anay sang pamilya Bethel ginaabiabi sang ila bag-o nga kongregasyon
Sa Zambia, madamo nga miembro sang pamilya Bethel ang gin-asayn subong regular payunir. Nalipay sila nga madamo ang ila ginahimo sa ministeryo. “Wala lang madugay paghalin namon sa Bethel, duha ka tawo nga indi kabalo magbasa kag magsulat ang nabuligan namon,” siling ni Andrew nga nagaalagad
subong payunir upod sa iya asawa. “Ang dies anyos nga bata nga isa sa ginatun-an namon sa Biblia, magahatag sang iya una nga bahin sa midweek meeting. Ang isa naman ka mag-asawa nga nabantalaan namon nagtambong sa Memoryal, kag sugod sadto wala gid sila nagpalya sa pagtambong sa mga miting sa kongregasyon. Madasig man ang ila pag-uswag sa ila pagtuon sa Biblia. Natabo ini tanan bangod ginsunod namon ang panuytoy ni Jehova, ginbaton ang iya bulig, kag ginhulat ang iya pagpakamaayo.”Pila pa lang ka bulan nga nakasal sanday Edson kag Artness, nga nagaistar man sa Zambia, sang gin-asayn sila sa latagon. Nagsiling si Artness: “Ang paghanas nga natigayon namon sa Bethel nakabulig gid sa amon nga magkinot sa amon gamay nga kinitaan, subong man mahuptan ang kalipay kag indi mangutang. Wala gid kami naghinulsol nga nag-alagad kami sa Bethel. Natun-an namon nga ipasibu ang amon espirituwal nga tulumuron kag lab-uton ini sa bulig ni Jehova. Natilawan ang amon pagtuo kag nagbakod pa gid ini, kag handa kami nga magpabilin nga mainunungon kay Jehova.”