Kapitulo 10

Ang Ginharian Sang Dios Nagagahom

1, 2. Paano napamatud-an nga indi sangkol ang tawhanon nga mga panguluhan?

 AYHAN naagihan mo na nga nakabakal ikaw sing isa ka kasangkapan, nga wala gali nagaandar. Ibutang ta nga nagtawag ikaw sing manugkay-o. Apang, wala lang madugay sa tapos niya “makay-o” ang kasangkapan, naguba ini. Makapalaslaw gid ini!

² Amo man sini sa tawhanon nga mga panguluhan. Ang katawhan halin sang una nagahandum sing isa ka panguluhan nga magapasalig sing paghidait kag kalipay. Apang, wala gid magmadinalag-on ang lakas nga mga panikasog sa pagkay-o sang mga problema sa katilingban. Madamo nga tratado para sa paghidait ang ginhimo​—⁠kag wala gintuman. Dugang pa, ano nga panguluhan ang nakadula sang kaimulon, pagdampigdampig sa rasa, krimen, balatian, kag kalaglagan sa ekolohiya? Ang paggahom sang tawo indi na makay-o. Bisan gani ang maalam nga si Hari Solomon sang Israel namangkot: “Tuhoy sa dutan-on nga tawo, paano niya mahantop ang iya dalanon?”​—⁠Hulubaton 20:⁠24.

3. (a) Ano ang tema sang ginbantala ni Jesus? (b) Paano ginalaragway sang iban nga mga tawo ang Ginharian sang Dios?

³ Indi madulaan sing paglaum! Ang isa ka malig-on nga panguluhan sa bug-os nga kalibutan indi isa ka damgo lamang. Amo ini anay ang tema sang ginbantala ni Jesus. Gintawag niya ini nga “ginharian sang Dios,” kag gintudluan niya ang iya mga sumulunod nga ipangamuyo ini. (Lucas 11:2; 21:31) Sa pagkamatuod, ang Ginharian sang Dios ginasambit kon kaisa sang mga relihion. Sa katunayan, minilyon ang nagapangamuyo sini adlaw-adlaw kon ginasulit-sulit nila ang Pangamuyo sang Ginuo (ginatawag man nga Amay Namon ukon modelo nga pangamuyo). Apang wala nagapalareho ang sabat sang mga tawo kon ginapamangkot sila, “Ano ang Ginharian sang Dios?” Ang iban nagasiling,  “Yari ini sa imo tagipusuon.” Ginatawag ini sang iban nga langit. Ang Biblia nagahatag sing isa ka maathag nga sabat, subong makita pa naton.

ISA KA GINHARIAN NGA MAY KATUYUAN

4, 5. Ngaa namat-od si Jehova nga maghimo sing isa ka bag-o nga kapahayagan sang iya pagkasoberano, kag ano ang himuon sini?

⁴ Si Jehova nga Dios amo pirme ang Hari, ukon Soberanong Manuggahom, sang uniberso. Ang katunayan nga gintuga niya ang tanan nga butang nagabayaw sa iya sa sinang mataas nga posisyon. (1 Cronica 29:11; Salmo 103:19; Binuhatan 4:24) Apang ang Ginharian nga ginbantala ni Jesus kabulig, ukon ikaduha, sa bug-os uniberso nga pagkasoberano sang Dios. Inang Mesianikong Ginharian may espisipiko nga katuyuan, apang ano ini?

⁵ Subong ginpaathag sa kapitulo 6, ang unang mag-asawa nagrebelde sa awtoridad sang Dios. Bangod sang mga hulusayon nga ginpautwas, namat-od si Jehova nga maghimo sing isa ka bag-o nga kapahayagan sang iya pagkasoberano. Ginpahibalo sang Dios ang iya katuyuan nga magpatubas sing isa ka “binhi” nga magadugmok sa Man-ug, si Satanas, kag dulaon ang mga epekto sang napanubli nga sala sang katawhan. Ang panguna nga “binhi” amo si Jesucristo, kag “ang ginharian sang Dios” amo ang ahensia nga magalutos sing bug-os kay Satanas. Paagi sa sining Ginharian, ipasag-uli ni Jesucristo ang paggahom sa duta sa ngalan ni Jehova kag ibindikar ang matarong nga pagkasoberano sang Dios sing dayon.​—⁠Genesis 3:15; Salmo 2:​2-9.

6, 7. (a) Diin ang Ginharian, kag sin-o ang Hari kag ang iya kaupod nga mga manuggahom? (b) Sin-o ang mga sakop sang Ginharian?

⁶ Suno sa isa ka pagbadbad sang ginsiling ni Jesus sa malauton nga mga Fariseo, sia nagsiling: “Ang ginharian sang Dios yara sa inyo.” (Lucas 17:​21, King James Version) Buot bala silingon ni Jesus nga ang Ginharian yara sa malaut nga mga tagipusuon sadtong malaut nga mga tawo? Indi. Ang mas sibu nga pagbadbad sa orihinal nga Griego mabasa: “Ang ginharian sang Dios yara sa tunga ninyo.” (New World Translation) Sa amo, si Jesus nga yara sa tunga nila, nagpatuhoy sa iya kaugalingon subong amo ang palaabuton nga Hari. Sa baylo nga isa ini ka butang nga yara sa tagipusuon sang isa ka tawo, ang Ginharian sang Dios isa ka matuod, nagapanghikot nga panguluhan nga may isa ka manuggahom kag mga sakop. Isa ini ka langitnon nga panguluhan, kay ginatawag  ini nga “ginharian sang mga langit” kag “ginharian sang Dios.” (Mateo 13:11; Lucas 8:10) Sa palanan-awon, nakita ni manalagna Daniel ang Manuggahom sini subong “isa nga kaangay sa anak sang tawo” nga gindala sa atubangan sang Labing Gamhanan nga Dios kag ginhatagan sing dayon nga “pagginahom kag himaya kag ginharian, agod nga ang katawhan, mga pungsod, kag mga hambal mag-alagad tanan sa iya.” (Daniel 7:​13, 14) Sin-o ining Hari? Ti, ginatawag sang Biblia si Jesucristo nga “Anak sang tawo.” (Mateo 12:40; Lucas 17:26) Huo, gintangdo ni Jehova ang iya Anak, si Jesucristo, nga mangin Hari.

⁷ Si Jesus wala nagagahom sing isahanon. Upod sa iya amo ang 144,000 nga “ginbakal gikan sa duta” agod mangin iya kaupod nga mga hari kag mga saserdote. (Bugna 5:​9, 10; 14:​1, 3; Lucas 22:​28-30) Ang mga sakop sang Ginharian sang Dios mangin amo ang tugob-globo nga pamilya sang mga tawo nga mapinasakupon sa pagkapangulo ni Cristo. (Salmo 72:​7, 8) Apang, paano naton mapat-od nga ibindikar gid sang Ginharian ang pagkasoberano sang Dios kag ipasag-uli ang tulad-paraiso nga mga kahimtangan sa aton duta?

ANG PAGKAMATUOD SANG GINHARIAN SANG DIOS

8, 9. (a) Paano naton mailustrar ang pagkamasaligan sang mga saad sang Ginharian sang Dios? (b) Ngaa mapat-od naton ang pagkamatuod sang Ginharian?

⁸ Handurawa nga nasunog ang inyo balay. Ang isa ka abyan nga may ikasarang nanaad nga buligan ikaw sa pagpatindog liwat sang imo balay kag sa pag-aman sing pagkaon para sa imo pamilya. Kon ina nga abyan pirme nga nagasugid sa imo sing kamatuoran, indi mo bala sia pagpatihan? Pananglit nagpauli ka halin sa trabaho sang masunod nga adlaw kag nakita mo nga ang mga trabahador nagasugod na sa pagpanghawan sang nasunog nga mga butang kag nga ang imo pamilya gindalhan sing pagkaon. Wala sing duhaduha nga magasalig gid ikaw nga sa ulihi, indi lamang mapasag-uli ang nadula kundi mangin mas matahom pa ini.

⁹ Sing kaanggid, ginapasalig kita ni Jehova sang pagkamatuod sang Ginharian. Subong ginapakita sa tulun-an nga Hebreo sang Biblia, madamo nga bahin sang Kasuguan ang naglandong sa Ginharian nga kahimusan. (Hebreo 10:⁠1) Ang matagnaon nga  laragway sang Ginharian sang Dios nangin hayag man sa dutan-on nga ginharian sang Israel. Indi yadto ordinaryo nga panguluhan, kay ang mga manuggahom naglingkod sa “trono ni Jehova.” (1 Cronica 29:23) Dugang pa, gintagna ini: “Ang setro indi mahamulag kay Juda, ukon ang sungkod sang manuggahom gikan sa tunga sang iya mga tiil, tubtob nga mag-abot ang Silo; kag ang pagkamasinulundon sang katawhan mangin sa iya.” (Genesis 49:10) a Huo, si Jesus, nga permanente nga Hari sang panguluhan sang Dios, matawo sa sining kaliwatan sang mga hari ni Juda.​—⁠Lucas 1:​32, 33.

10. (a) San-o ginpasad ang pundasyon sang Mesianikong Ginharian sang Dios? (b) Anong importante nga hilikuton sa duta ang pangunahan sang palaabuton nga kaupod nga mga manuggahom ni Jesus?

¹⁰ Ang pundasyon sang Mesianikong Ginharian sang Dios ginpasad sang ginpili ang 12 ka apostoles ni Jesus. (Efeso 2:​19, 20; Bugna 21:14) Amo ini sila ang una nga mga katapo sang 144,000 nga magagahom sa langit subong kaupod nga mga hari ni Jesucristo. Samtang sa duta, ining palaabuton nga kaupod nga mga manuggahom magapanguna sa isa ka kampanya sang pagpanaksi, bilang pagsunod sa sugo ni Jesus: “Lakat kamo . . . kag maghimo sing mga disipulo sa mga tawo sang tanan nga kapungsuran, nga ginabawtismuhan sila sa ngalan sang Amay kag sang Anak kag sang balaan nga espiritu.”​—⁠Mateo 28:⁠19.

11. Paano ginatuman ang hilikuton nga pagbantala sing Ginharian karon, kag ano ang nahimo sini?

¹¹ Ang sugo nga maghimo sing mga disipulo ginatuman karon sa isa ka walay tupong nga kasangkaron. Ginawali sang mga Saksi ni Jehova ang maayong balita sang Ginharian sa bilog nga globo, nahisanto sa matagnaon nga mga pulong ni Jesus: “Ibantala ining maayong balita sang ginharian sa bug-os napuy-an nga duta subong panaksi sa tanan nga kapungsuran; kag ugaling magaabot ang katapusan.” (Mateo 24:14) Bilang isa ka bahin sang hilikuton nga pagbantala sing Ginharian, isa ka daku nga programa sa pagtudlo ang ginahimo. Ang mga nagasunod sa kasuguan  kag mga prinsipio sang Ginharian sang Dios nagaeksperiensia na sing paghidait kag paghiusa nga indi matigayon sang tawhanon nga mga panguluhan. Ini tanan nagahatag sing maathag nga ebidensia sa pagkamatuod sang Ginharian sang Dios!

12. (a) Ngaa nagakaigo nga tawgon ang mga manugwali sang Ginharian nga mga Saksi ni Jehova? (b) Paano ang Ginharian sang Dios nagakatuhay sa tawhanon nga mga panguluhan?

¹² Ginsilingan ni Jehova ang mga Israelinhon: “Kamo akon mga saksi, . . . ang akon alagad nga ginpili ko.” (Isaias 43:​10-12) Si Jesus, “ang Matutom nga Saksi,” makugi nga nagwali sing maayong balita sang Ginharian. (Bugna 1:5; Mateo 4:17) Gani nagakaigo  nga ang mga manugwali sang Ginharian karon magdala sang gintangdo sang Dios nga ngalan nga mga Saksi ni Jehova. Apang ngaa nagahinguyang ang mga Saksi sing daku gid nga tion kag panikasog sa pagpakighambal sa iban nahanungod sa Ginharian sang Dios? Ginahimo nila ini bangod ang Ginharian amo lamang ang paglaum sang katawhan. Ang tawhanon nga mga panguluhan mawala sa indi madugay, apang indi gid ang Ginharian sang Dios. Ginatawag sang Isaias 9:​6, 7 ang Manuggahom sini, si Jesus, nga “Prinsipe sang Paghidait” kag nagadugang: “Sa kabuganaan sang prinsipenhon nga paggahom kag sang paghidait wala sing katapusan.” Ang Ginharian sang Dios indi kaangay sang mga panguluhan sang tawo​—⁠yari karon, buwas wala na. Sa pagkamatuod, ang Daniel 2:44 nagasiling: “Ang Dios sang langit magapatindog sing isa ka ginharian nga dili gid malaglag. Kag ang ginharian indi gid pag-ibilin sa iban nga katawhan. . . . Ini magapadayon tubtob sa tion nga walay latid.”

13. (a) Ano ang pila sang mga problema nga pagalubaron sing madinalag-on sang Ginharian sang Dios? (b) Ngaa mapat-od naton nga matuman ang mga saad sang Dios?

¹³ Sin-o nga tawhanon nga hari ang makadula sang inaway, krimen, balatian, gutom, kag pagkawalay puluy-an? Dugang pa, sin-o nga dutan-on nga manuggahom ang makabanhaw sang mga napatay? Lubaron sang Ginharian sang Dios kag sang Hari sini ining mga butang. Ang Ginharian indi mangin depektuso, kaangay sang gubaon nga kasangkapan nga pirme dapat kay-uhon. Sa baylo, ang Ginharian sang Dios magamadinalag-on, kay si Jehova nanaad: “Ang pulong nga nagaguwa sa akon baba . . . indi magabalik sa akon nga wala sing mga resulta, kundi pat-od gid nga himuon sini ang akon nahamut-an, kag pat-od gid nga magamadinalag-on ini sa butang nga akon ginpadal-an sini.” (Isaias 55:11) Ang katuyuan sang Dios indi mapaslawan, apang san-o magasugod ang paggahom sang Ginharian?

PAGGAHOM SANG GINHARIAN​—⁠SAN-O?

14. Ano ang sayop nga paghangop sang mga disipulo ni Jesus sa Ginharian, apang ano ang nahibaluan ni Jesus nahanungod sa iya paggahom?

¹⁴ “Ginuo, ipasag-uli mo bala ang ginharian sa Israel sa sining tion?” Ining pamangkot sang mga disipulo ni Jesus nagpahayag nga tubtob sadto nga tion wala pa nila mahibalui ang katuyuan sang Ginharian sang Dios kag ang gintangdo nga tion sa pagsugod  sang paggahom sini. Nagapaandam sa ila nga indi maghaumhaum sa sini nga butang, si Jesus nagsiling: “Indi inyo ang paghibalo sang mga tion ukon mga dag-on nga ginpat-od sang Amay sa iya kaugalingon nga pagbulut-an.” Nahibaluan ni Jesus nga ang iya paggahom sa duta gintigana sa palaabuton, madugay pa sa tapos sia ginbanhaw kag nagkayab pa langit. (Binuhatan 1:​6-11; Lucas 19:​11, 12, 15) Gintagna ini sang Kasulatan. Paano?

15. Paano ang Salmo 110:1 nagahatag sa aton sing paghangop sa tion sang paggahom ni Jesus?

¹⁵ Matagnaon nga nagapatuhoy kay Jesus subong “Ginuo,” si Hari David nagsiling: “Ang ginsiling ni Jehova sa akon Ginuo amo: ‘Lingkod ka sa akon tuuhan tubtob nga mahimo ko ang imo mga kaaway nga imo palatungan.’ ” (Salmo 110:1; ipaanggid ang Binuhatan 2:​34-36.) Ginapakita sining tagna nga ang paggahom ni Jesus indi magasugod sa gilayon nga nagkayab sia pa langit. Sa baylo, magahulat sia sa tuuhan sang Dios. (Hebreo 10:​12, 13) Tubtob san-o ining paghulat? San-o magasugod ang iya paggahom? Ang Biblia nagabulig sa aton sa paghibalo sa mga sabat.

16. Ano ang natabo sang 607 B.C.E., kag paano ini naangot sa Ginharian sang Dios?

¹⁶ Ang lamang nga siudad sa bug-os nga duta nga ginpahamtangan ni Jehova sang iya ngalan amo ang Jerusalem. (1 Hari 11:36) Amo man ini ang kapital sang isa ka nahamut-an sang Dios nga dutan-on nga ginharian nga nagalaragway sa langitnon nga Ginharian sang Dios. Busa, may kahulugan gid ang paglaglag sang mga Babilonianhon sa Jerusalem sang 607 B.C.E. Gintandaan sining hitabo ang pamuno sang malawig nga pag-awat sa direkta nga paggahom sang Dios sa iya katawhan sa duta. Mga anom ka siglo sang ulihi, ginpakita ni Jesus nga ining panahon sang gin-awat nga paggahom nagapadayon pa, kay sia nagsiling: “Ang Jerusalem tapakon sang mga pungsod, tubtob nga ang gintalana nga mga panag-on sang mga pungsod matuman.”​—⁠Lucas 21:⁠24.

17. (a) Ano “ang gintalana nga mga panag-on sang mga pungsod,” kag daw ano ini kalawig? (b) San-o “ang gintalana nga mga panag-on sang mga pungsod” nagsugod kag natapos?

¹⁷ Sa tion sang “gintalana nga mga panag-on sang mga pungsod,” ang kalibutanon nga mga panguluhan tugutan sa pag-awat sa paggahom nga ginakahamut-an sang Dios. Ina nga panahon  nagsugod sang malaglag ang Jerusalem sang 607 B.C.E., kag ginpakita ni Daniel nga magapadayon ini sa “pito ka tion.” (Daniel 4:​23-25) Daw ano ina kalawig? Ginapakita sang Biblia nga ang tatlo ka tion kag tunga katumbas sa 1,260 ka adlaw. (Bugna 12:​6, 14) Ang doble sina nga panahon, ukon pito ka tion, mangin 2,520 ka adlaw. Apang wala sing talalupangdon nga natabo sang matapos inang malip-ot nga hut-ong sang panahon. Kon iaplikar naton ang “isa ka adlaw para sa isa ka tuig” sa tagna ni Daniel kag mag-isip sing 2,520 ka tuig halin sang 607 B.C.E., magadangat kita sa tuig 1914 C.E.​—⁠Numeros 14:34; Ezequiel 4:⁠6.

18. Ano ang ginhimo ni Jesus sa tapos niya mabaton ang gahom sa Ginharian, kag paano ini nag-apektar sa duta?

¹⁸ Nagsugod bala si Jesus sa paggahom sa langit sadtong tion? Ang Makasulatanhon nga mga rason sa pagsiling nga naggahom sia matuod pagahambalan sa masunod nga kapitulo. Sa pagkamatuod, ang pamuno sang paggahom ni Jesus indi pagtandaan sing gilayon nga paghidait sa duta. Ginapakita sang Bugna 12:​7-12 nga sa tapos gid mabaton ang Ginharian, tabugon ni Jesus si Satanas kag ang iya demonyo nga mga anghel gikan sa langit. Magakahulugan ini sing kailo para sa duta, apang makalilipay basahon nga ang Yawa may yara lamang “malip-ot nga tion” nga nabilin. Sa indi madugay, magakalipay na kita indi lamang bangod nagagahom ang Ginharian sang Dios kundi bangod man nga magadala ini sing mga pagpakamaayo sa duta kag sa matinumanon nga katawhan. (Salmo 72:​7, 8) Paano naton nahibaluan nga mahanabo ini sa indi madugay?

[Mga footnote]

TILAWI ANG IMO IHIBALO

Ano ang Ginharian sang Dios, kag gikan diin ini nagagahom?

Sin-o ang nagagahom sa Ginharian, kag sin-o ang mga sakop sini?

Paano kita ginpasalig ni Jehova nga ang iya Ginharian matuod gid?

San-o “ang gintalana nga mga panag-on sang mga pungsod” nagsugod kag natapos?

[Mga Pamangkot sa Pagtinuon]

[Kahon sa pahina 94]

PILA KA IMPORTANTE NGA MGA HITABO NGA MAY KAANGTANAN SA GINHARIAN SANG DIOS

• Ginpahibalo ni Jehova ang iya katuyuan nga magpatubas sing isa ka “binhi” nga magadugmok sa Man-ug, si Satanas nga Yawa.​—⁠Genesis 3:⁠15.

• Sang 1943 B.C.E., ginpakita ni Jehova nga ining “binhi” mangin isa ka tawhanon nga kaliwat ni Abraham.​—⁠Genesis 12:​1-3, 7; 22:⁠18.

• Ang Kasuguan nga katipan nga ginhatag sa Israel sang 1513 B.C.E. naghatag sing “landong sang maayong mga butang nga maabot.”​—⁠Exodo 24:​6-8; Hebreo 10:⁠1.

• Ang dutan-on nga ginharian sang Israel nagsugod sang 1117 B.C.E., kag nagpadayon ini sang ulihi sa kaliwat ni David.​—⁠1 Samuel 11:15; 2 Samuel 7:​8, 16.

• Ginlaglag ang Jerusalem sang 607 B.C.E., kag nagsugod “ang gintalana nga mga panag-on sang mga pungsod.”​—⁠2 Hari 25:​8-10, 25, 26; Lucas 21:⁠24.

• Sang 29 C.E., ginhaplas si Jesus subong Tinangdo nga Hari kag nagsugod sang iya dutan-on nga ministeryo.​—⁠Mateo 3:​16, 17; 4:17; 21:​9-11.

• Sang 33 C.E., nagkayab si Jesus pa langit, agod maghulat didto sa tuuhan sang Dios tubtob magsugod ang iya paggahom.​—⁠Binuhatan 5:​30, 31; Hebreo 10:​12, 13.

• Si Jesus ginpalingkod sa trono sa langitnon nga Ginharian sang 1914 C.E. sang matapos “ang gintalana nga mga panag-on sang mga pungsod.”​—⁠Bugna 11:⁠15.

• Si Satanas kag ang iya mga demonyo gintagbong sa duta kag nagdala sing dugang pa nga kailo sa katawhan.​—⁠Bugna 12:​9-12.

• Ginadumalahan ni Jesus ang bug-os kalibutan nga pagbantala sing maayong balita sang Ginharian sang Dios.​—⁠Mateo 24:14; 28:​19, 20.