Kapitulo 12

Batui ang Malaut nga mga Espiritu

1. Ano ang ginhimo ni Jesus sang masumalang niya ang malaut nga mga espiritu?

 PAGKATAPOS gid sia mabawtismuhan, nagkadto si Jesucristo sa kahanayakan sang Judea agod mangamuyo kag magpamalandong. Didto nagtinguha si Satanas nga Yawa nga sulayon sia sa paglapas sa kasuguan sang Dios. Apang, ginsikway ni Jesus ang pagsulay sang Yawa kag wala malimbungan. Nasumalang man ni Jesus ang iban pa nga malaut nga mga espiritu sa tion sang iya ministeryo sa duta. Apang, sa liwat kag liwat, ginsabdong niya kag ginbatuan sila.​—⁠Lucas 4:​1-13; 8:​26-34; 9:​37-43.

2. Ano nga mga pamangkot ang binagbinagon naton?

² Ang mga kasaysayan sang Biblia nga nagaasoy sadtong mga engkwentruhanay dapat magkumbinsi sa aton nga nagaluntad gid ang malaut nga mga espiritu. Nagatinguha sila nga patalangon ang mga tawo. Walay sapayan, sarang naton mabatuan ining malaut nga mga espiritu. Apang, diin maghalin ang malaut nga mga espiritu? Ngaa nagatinguha sila nga limbungan ang mga tawo? Kag anong mga padihot ang ginagamit nila agod matuman ang ila mga katuyuan? Ang paghibalo sang mga sabat sa mga pamangkot subong sini magabulig sa imo sa pagbato sa malaut nga mga espiritu.

MALAUT NGA MGA ESPIRITU​—⁠ANG ILA GINHALINAN KAG GINATUMOD

3. Paano nagluntad si Satanas nga Yawa?

³ Nagtuga si Jehova nga Dios sing madamo nga espiritu nga mga tinuga madugay na antes niya gintuga ang mga tawo. (Job 38:​4, 7) Subong ginpaathag sa Kapitulo 6, ang isa sining mga  anghel nagpatubo sing handum nga simbahon sia sang mga tawo sa baylo nga simbahon si Jehova. Sa pagtuman sina nga tulumuron, ginbatuan kag ginpasipalahan sining malaut nga anghel ang Manunuga, ginpahangop pa gani sa unang babayi nga ang Dios butigon. Sing nagakaigo, nian, ining rebelde nga espiritu nga tinuga gintawag nga Satanas (mabinatuon) nga Yawa (mapasipalahon).​—⁠Genesis 3:​1-5; Job 1:⁠6.

4. Paano nakasala ang pila ka anghel sang adlaw ni Noe?

⁴ Sang ulihi, ang iban pa nga mga anghel nagdampig kay Satanas nga Yawa. Sang mga adlaw sang matarong nga tawo nga si Noe, ang iban sini sa ila nagbiya sang ila pag-alagad sa langit kag nagpakatawo agod busgon ang ila kailigbon sa sekso upod sa dutan-on nga mga babayi. Walay duhaduha nga ginsugyot ni Satanas yadtong mga anghel sa pagpili sadtong malalison nga dalanon. Nagdul-ong ini sa ila pag-anak sing mestiso nga mga anak nga gintawag Nefilim, nga nangin mapintas nga mga hurong. Sang magpadala si Jehova sing daku nga Anaw, ginlaglag sini ang malaut nga katawhan kag ining dikinaugali nga mga anak sang malalison nga mga anghel. Ang rebelyuso nga mga anghel nakalikaw sa kalaglagan paagi sa paghuklas sang ila undanon nga lawas kag pagbalik sa duog sang mga espiritu. Apang ginbalabagan sang Dios ining mga demonyo paagi sa pagkabig sa ila subong mga tinapok sa espirituwal nga kadudulman. (Genesis 6:​1-7, 17; Judas 6) Apang, si Satanas, “ang manuggahom sang mga demonyo,” kag ang iya malaut nga mga anghel nagpadayon sang ila pagrebelde. (Lucas 11:15) Ano ang ila tulumuron?

5. Ano ang tulumuron ni Satanas kag sang iya mga demonyo, kag ano ang ginagamit nila sa pagsiod sa mga tawo?

⁵ Ang malaut nga tulumuron ni Satanas kag sang mga demonyo amo nga patalikuron ang katawhan kay Jehova nga Dios. Busa, sa bug-os nga maragtas, ginapatalang, ginapahog, kag ginasalakay sining mga malauton ang katawhan. (Bugna 12:⁠9) Ang modernong-adlaw nga mga halimbawa nagapamatuod nga mas mabaris karon ang mga demonyo. Sa pagsiod sa mga tawo, masami nga ginagamit sang mga demonyo ang tanan nga porma sang espiritismo. Paano ginagamit sang mga demonyo ini nga paon, kag paano mo madepensahan ang imo kaugalingon? 

KON PAANO IKAW GINAPATALANG SANG MALAUT NGA MGA ESPIRITU

6. Ano ang espiritismo, kag ano ang pila ka porma sini?

⁶ Ano ang espiritismo? Amo ini ang pagpakig-angot sa mga demonyo, ukon malaut nga mga espiritu, sing direkta ukon paagi sa isa ka espiritista. Ang espiritismo mapuslanon sa mga demonyo subong nga ang paon mapuslanon sa mga mangangayam: Nagaganyat ini sa mga dalakpon. Kag subong nga ang isa ka mangangayam nagagamit sing nanuhaytuhay nga mga paon sa pagganyat sa mga sapat padulong sa iya siod, ang malaut nga mga espiritu nagapalig-on man sang nanuhaytuhay nga porma sang espiritismo agod kontrolon ang mga tawo. (Ipaanggid ang Salmo 119:110.) Ang pila sining mga porma amo ang pagpamakot, madyik, pagpangita sing malain nga mga palatandaan, pagkababaylan, paglumay, pagdangop sa mga espiritista, kag pagpakig-angot sa mga patay.

7. Daw ano ka lapnag ang espiritismo, kag ngaa nagadagsa ini bisan sa ginatawag nga Cristianong kadutaan?

⁷ Madinalag-on gid ang paon, kay ang espiritismo nagaganyat sang katawhan sa bilog nga kalibutan. Ang mga nagapuyo sa mga minuro sa kagulangan nagadangop sa mga albularyo, kag ang mga mamumugon sa siudad nagadangop sa mga astrologo. Ang espiritismo nagadagsa bisan sa ginatawag nga Cristianong kadutaan. Ginapakita sang pananalawsaw nga sa Estados Unidos lamang, mga 30 ka magasin nga kon tingubon may sirkulasyon nga kapin sa 10,000,000 ang ginabalhag para sa nanuhaytuhay nga porma sang espiritismo. Ang mga taga-Brazil nagagasto sing kapin sa 500 milyones dolyares sa mga butang may kaangtanan sa espiritismo kada tuig. Apang, 80 porsiento sang mga nagakadto sa mga tilipunan sang espiritistiko nga pagsimba sa sina nga pungsod nabunyagan nga mga Katoliko nga nagatambong man sa mga Misa. Bangod nagabuhat sing espiritismo ang iban nga mga klerigo, madamo nga relihiosong mga tawo ang nagahunahuna nga ang pagbuhat sini kalahamut-an sa Dios. Apang amo bala?

KON NGAA GINAPAKAMALAUT SANG BIBLIA ANG PAGBUHAT SING ESPIRITISMO

8. Ano ang Makasulatanhon nga pagtamod sa espiritismo?

⁸ Kon gintudluan ikaw nga ang pila ka porma sang espiritismo  mga paagi sa pagpakig-angot sa maayong mga espiritu, mahimo makibot ikaw sa paghibalo kon ano ang ginasiling sang Biblia tuhoy sa espiritismo. Ang katawhan ni Jehova ginpaandaman: “Dili kamo magliso sa mga espiritista, kag dili kamo magdangop sa propesyunal nga mga manugpakot, sa pagpadagta paagi sa ila.” (Levitico 19:31; 20:​6, 27) Ang tulun-an nga Bugna sang Biblia nagapaandam nga ang “mga nagabuhat sing espiritismo” magakadto sa “linaw nga nagadabdab sing kalayo kag asupre. Ini nagakahulugan sing ikaduha [walay katapusan] nga kamatayon.” (Bugna 21:8; 22:15) Ang tanan nga porma sang espiritismo wala ginakahamut-an ni Jehova nga Dios. (Deuteronomio 18:​10-12) Ngaa subong sini?

9. Ngaa makahinakop kita nga ang mga mensahe karon gikan sa kalibutan sang mga espiritu wala nagagikan kay Jehova?

⁹ Nagpadala si Jehova sing maayong mga espiritu, ukon matarong nga mga anghel, sa pagpaalinton sa pila ka tawo sa wala pa matapos ang Biblia. Sugod sang matapos ini, ang Pulong sang Dios nagaaman sing panuytoy nga ginakinahanglan sang mga tawo sa pag-alagad kay Jehova sing kalahamut-an. (2 Timoteo 3:​16, 17; Hebreo 1:​1, 2) Wala niya ginalaktawan ang iya balaan nga Pulong paagi sa paghatag sing mga mensahe sa mga espiritista. Ang tanan nga mensahe karon gikan sa kalibutan sang mga espiritu nagahalin sa malaut nga mga espiritu. Ang pagbuhat sing espiritismo makadul-ong sa pagsalakay sang mga demonyo ukon sa pagkontrol pa gani sang malaut nga mga espiritu. Busa, mahigugmaon nga ginapaandaman kita sang Dios nga indi magbuylog sa bisan anong espiritistiko nga mga buhat. (Deuteronomio 18:14; Galacia 5:​19-21) Dugang pa, kon ginapadayon naton ang pagbuhat sing espiritismo sa tapos mahibaluan ang pagtamod ni Jehova sa sini, nagadampig kita sa rebelyuso nga malaut nga mga espiritu kag mangin mga kaaway sang Dios.​—⁠1 Samuel 15:23; 1 Cronica 10:​13, 14; Salmo 5:⁠4.

10. Ano ang pagpamakot, kag ngaa dapat naton likawan ini?

¹⁰ Ang isa ka popular nga porma sang espiritismo amo ang pagpamakot​—⁠pagtinguha nga hibaluon ang palaabuton ukon ang wala mahibaluan paagi sa bulig sang mga espiritu. Ang pila ka porma sang pagpamakot amo ang astrolohiya, pagtan-aw sa bola nga kristal, pagpatpat sang mga damgo, panghimalad, kag  pagpakot sang kapalaran paagi sa paggamit sing mga baraha. Madamo ang nagatamod sa pagpamakot subong walay halit nga kalingawan, apang ginapakita sang Biblia nga magkaupod ang mga manugpakot sing kapalaran kag ang malaut nga mga espiritu. Halimbawa, ang Binuhatan 16:​16-19 nagasambit sing “isa ka demonyo nga nagapamakot” nga nagbulig sa isa ka lin-ay sa “pagpamakot.” Apang, ang iya ikasarang sa pagpakot sang palaabuton nadula sang gintabog ang demonyo. Sing maathag, ang pagpamakot isa ka paon nga ginagamit sang mga demonyo sa pagganyat sa katawhan padulong sa ila siod.

11. Paano ang mga paninguha sa pagpakig-angot sa mga patay nagadul-ong sa isa ka siod?

¹¹ Kon nagapangalisod ikaw bangod sang pagkapatay sang isa ka hinigugma nga katapo sang pamilya ukon suod nga abyan, mahapos ikaw mahaylo sang isa pa ka paon. Ang isa ka espiritista mahimo maghatag sa imo sing pinasahi nga impormasyon ukon mahimo maghambal sa tingog nga daw iya gid sang napatay nga tawo. Mag-andam! Ang mga paninguha sa pagpakig-angot sa mga patay nagadul-ong sa isa ka siod. Ngaa? Bangod indi makahambal ang mga patay. Subong ayhan madumduman mo pa, ang Pulong sang Dios maathag nga nagasiling nga sa kamatayon ang isa ka tawo “nagabalik sa iya duta; sa amo nga adlaw nagakawala ang iya mga hunahuna.” Ang mga patay “wala makahibalo sing bisan ano.” (Salmo 146:4; Manugwali 9:​5, 10) Dugang pa, ang mga demonyo amo gid ang nahibaluan nga nagailog sang tingog sang mga napatay kag nagahatag sa isa ka espiritista sing impormasyon nahanungod sa isa nga napatay. (1 Samuel 28:​3-19) Gani “ang bisan sin-o nga nagapamangkot sa mga napatay” ginasiod sang malaut nga mga espiritu kag nagahikot batok sa kabubut-on ni Jehova nga Dios.​—⁠Deuteronomio 18:​11, 12; Isaias 8:⁠19.

GIKAN SA PAGGANYAT PADULONG SA PAGSALAKAY

12, 13. Ano ang ebidensia nga ang mga demonyo nagapadayon sa pagsulay kag sa pagtublag sa mga tawo?

¹² Kon sundon mo ang laygay sang Pulong sang Dios tuhoy sa espiritismo, ginasikway mo ang paon sang mga demonyo. (Ipaanggid ang Salmo 141:​9, 10; Roma 12:⁠9.) Nagakahulugan bala  ini nga ang malaut nga mga espiritu magauntat sa pagtinguha nga bihagon ikaw? Indi gid! Sa tapos ginsulay si Jesus sing makatlo, si Satanas “naghalin sa iya tubtob sa nagakaigo nga tion.” (Lucas 4:13) Sing kaanggid, ang batinggilan nga mga espiritu wala lamang nagaganyat sa mga tawo kundi nagasalakay man sa ila.

¹³ Dumduma ang aton anay pagbinagbinag sang pagsalakay ni Satanas sa alagad sang Dios nga si Job. Ginpahanabo sang Yawa nga madula ang iya kasapatan kag mapatay ang kalabanan sang iya mga suluguon. Ginpatay pa gani ni Satanas ang mga anak ni Job. Masunod, ginpaantos niya si Job mismo sing isa ka masakit nga balatian. Apang ginhuptan ni Job ang iya integridad sa Dios kag ginpakamaayo sia sing bugana. (Job 1:​7-19; 2:​7, 8; 42:12) Sugod sadto, ginhimo sang mga demonyo ang iban nga mga tawo nga apa ukon bulag kag nagpadayon sa pagkakunyag sa pag-antos sang mga tawo. (Mateo 9:​32, 33; 12:22; Marcos 5:​2-5) Sa karon, ginapakita sang mga report nga ginasalakay sang mga demonyo ang iban nga mga tawo sa seksuwal nga paagi kag ginapabuang ang iban. Ginasugyot nila ang iban pa nga magpatay kag maghikog, mga sala batok sa Dios. (Deuteronomio 5:17; 1 Juan 3:15) Walay sapayan, linibo ka tawo nga nasiod anay sining malaut nga mga espiritu ang nakapanginpalos. Paano nila nahimo ini? Nahimo nila ini paagi sa paghimo sang importante nga mga tikang.

KON PAANO BATUAN ANG MALAUT NGA MGA ESPIRITU

14. Nahisanto sa huwaran sang unang siglo nga mga Cristiano sa Efeso, paano mo mabatuan ang malaut nga mga espiritu?

¹⁴ Ano ang isa ka paagi nga mabatuan mo ang malaut nga mga espiritu kag maamligan ang imo kaugalingon kag ang imo pamilya gikan sa ila mga siod? Ang unang-siglo nga mga Cristiano sa Efeso nga nagbuhat sing espiritismo antes mangin mga tumuluo naghimo sing positibo nga mga tikang. Mabasa naton nga “indi diutay sang mga naghimo sing mga salamangka nagdala sing tingob sang ila mga libro kag ginpanutdan nila ini sa itululok sang tanan.” (Binuhatan 19:19) Bisan pa kon wala ikaw magbuhat sing espiritismo, ihaboy ang bisan ano nga may espiritistiko nga katuyuan ukon kahulugan. Nagalakip ini sa mga  libro, mga magasin, mga video, mga poster, musikal nga mga rekording, kag mga butang nga ginagamit para sa espiritistiko nga mga katuyuan. Nalakip man ang mga idolo, mga anting-anting kag iban pa nga mga butang nga ginasuksok subong pangamlig, kag mga regalo nga nabaton gikan sa mga nagabuhat sing espiritismo. (Deuteronomio 7:​25, 26; 1 Corinto 10:21) Sa pag-ilustrar: Ang isa ka mag-asawa sa Thai­land madugay na nga ginasalakay sang mga demonyo. Nian ginpanghaboy nila ang mga butang nga may kaangtanan sa espiritismo. Ano ang resulta? Nahilway sila gikan sa mga pagsalakay sang mga demonyo kag sa tapos sadto nag-uswag sing maayo sa espirituwal.

15. Sa pagbato sa malaut nga mga espiritu, ano pa ang kinahanglanon nga tikang?

¹⁵ Agod mabatuan ang malaut nga mga espiritu, ang isa pa ka kinahanglanon nga tikang amo ang pag-aplikar sang laygay ni apostol Pablo nga isuklob ang bug-os nga panapton sang espirituwal nga hinganib gikan sa Dios. (Efeso 6:​11-17) Dapat pabakuron sang mga Cristiano ang ila mga depensa batok sa malaut nga mga espiritu. Ano ang ginalakip sining tikang? “Labaw sa tanan,” siling ni Pablo, “gamita ang taming sang pagtuo, nga paagi sa amo masarangan ninyo palungon ang tanan nga nagadabadaba nga mga baslay sang malauton.” Sa pagkamatuod, kon mas malig-on ang imo pagtuo, mangin mas daku ang imo ikasarang sa pagbato sa malaut nga mga espiritu.​—⁠Mateo 17:​14-20.

16. Paano mo mapalig-on ang imo pagtuo?

¹⁶ Paano mo mapalig-on ang imo pagtuo? Paagi sa padayon nga pagtuon sang Biblia kag pag-aplikar sang laygay sini sa imo kabuhi. Ang kalig-on sang pagtuo sang isa ka tawo nasandig ilabi na sa kabakuron sang sadsaran sini​—⁠ang ihibalo sang Dios. Wala ka bala nagaugyon nga ang sibu nga ihibalo nga natigayon mo kag nabinagbinag sing tinagipusuon sang gintun-an mo ang Biblia nagpalig-on sang imo pagtuo? (Roma 10:​10, 17) Busa, walay duhaduha nga samtang ginapadayon mo ining pagtuon kag ginahimo nga kinabatasan ang pagtambong sa mga miting sang mga Saksi ni Jehova, ang imo pagtuo mapalig-on sing dugang pa. (Roma 1:​11, 12; Colosas 2:​6, 7) Mangin isa ini ka mabakod nga pangamlig batok sa mga pagsalakay sang mga demonyo.​—⁠1 Juan 5:⁠5. 

17. Anong dugang pa nga mga tikang ang mahimo kinahanglanon sa pagbato sa malaut nga mga espiritu?

¹⁷ Ano pa nga mga tikang ang mahimo himuon sang isa ka tawo nga determinado sa pagbato sa malaut nga mga espiritu? Ang taga-Efeso nga mga Cristiano nagkinahanglan sing pangamlig bangod nagapuyo sila sadto sa isa ka siudad diin lapnag ang demonismo. Busa, ginsilingan sila ni Pablo: “Magpangamuyo sa tanan nga tion sa espiritu.” (Efeso 6:18) Sanglit nagapuyo kita sa kalibutan nga ginatublag sang mga demonyo, ang hugot nga pagpangamuyo para sa pangamlig sang Dios kinahanglanon gid sa pagbato sa malaut nga mga espiritu. (Mateo 6:13) Makabulig sa sining bahin ang espirituwal nga bulig kag mga pangamuyo sang gintangdo nga mga gulang sa Cristianong kongregasyon.​—⁠Santiago 5:​13-15.

PADAYUNA ANG IMO PAGPAKIG-AWAY BATOK SA MALAUT NGA MGA ESPIRITU

18, 19. Ano ang sarang mahimo kon ang mga demonyo nagatublag liwat sa isa ka tawo?

¹⁸ Apang, bisan sa tapos mahimo ining sadsaran nga mga tikang, ang iban ginatublag gihapon sang malaut nga mga espiritu. Halimbawa, ang isa ka tawo sa Côte d’Ivoire nagtuon sang Biblia upod sa mga Saksi ni Jehova kag ginpangguba niya ang tanan niya nga anting-anting. Pagkatapos sadto, nag-uswag sia sing maayo, gindedikar ang iya kabuhi kay Jehova, kag ginbawtismuhan. Apang isa ka semana sa tapos sia mabawtismuhan, gintublag sia liwat sang mga demonyo, kag may mga tingog nga nagasugo sa iya nga biyaan ang iya bag-o masapwan nga pagtuluuhan. Kon matabo ini sa imo, nagakahulugan bala ini nga nadula mo ang pangamlig ni Jehova? Indi gid man.

¹⁹ Bisan pa ang himpit nga tawo nga si Jesucristo may pangamlig sang Dios, nabatian niya ang tingog sang malaut nga espiritu nga si Satanas nga Yawa. Ginpakita ni Jesus kon ano ang himuon kon matabo ina. Ginsilingan niya ang Yawa: “Palayo ka, Satanas!” (Mateo 4:​3-10) Gani man, indi mo dapat pamatian ang mga tingog gikan sa kalibutan sang mga espiritu. Batui ang malaut nga mga espiritu paagi sa pagpangayo sing bulig kay Jehova. Huo, mangamuyo sing mabaskog nga ginagamit ang ngalan  sang Dios. Ang Hulubaton 18:10 nagasiling: “Ang ngalan ni Jehova isa ka torre nga mabakod. Ang matarong nagadalagan pasulod sa sini kag ginaamligan.” Ginhimo ini sang Cristiano nga tawo sa Côte d’Ivoire, kag ang malaut nga mga espiritu nag-untat sa pagtublag sa iya.​—⁠Salmo 124:8; 145:⁠18.

20. Bilang sumaryo, ano ang imo mahimo agod mabatuan ang malaut nga mga espiritu?

²⁰ Gintugutan ni Jehova nga magpabilin sa pagluntad ang malaut nga mga espiritu, apang ginapakita niya ang iya gahom, ilabi na para sa iya katawhan, kag ang iya ngalan ginapahayag sa bug-os nga duta. (Exodo 9:16) Kon magpabilin ikaw nga suod sa Dios, indi ka dapat mahadlok sa malaut nga mga espiritu. (Numeros 23:​21, 23; Santiago 4:​7, 8; 2 Pedro 2:⁠9) Limitado ang ila gahom. Ginsilutan sila sang adlaw ni Noe, gintabog gikan sa langit sang ulihi, kag karon nagahulat sang hingapusan nga paghukom. (Judas 6; Bugna 12:9; 20:​1-3, 7-10, 14) Sa katunayan, ginakahadlukan nila ang ila nagapakari nga kalaglagan. (Santiago 2:19) Gani bisan pa ang malaut nga mga espiritu nagatinguha sa pagganyat sa imo paagi sa pila ka sahi sang paon ukon ginasalakay ikaw sa bisan anong paagi, sarang mo mabatuan sila. (2 Corinto 2:11) Likawi ang tanan nga porma sang espiritismo, iaplikar ang laygay sang Pulong sang Dios, kag tinguhai ang kahamuot ni Jehova. Himua ini sa gilayon, kay ang imo kabuhi nasandig sa imo pagbato sa malaut nga mga espiritu!

TILAWI ANG IMO IHIBALO

Paano nagatinguha ang malaut nga mga espiritu sa pagpatalang sa katawhan?

Ngaa ginapakamalaut sang Biblia ang espiritismo?

Paano ang isa ka tawo makapanginpalos sa malaut nga mga espiritu?

Ngaa dapat ikaw magpadayon sa pagbato sa malaut nga mga espiritu?

[Mga Pamangkot sa Pagtinuon]

 [Piktyur sa pahina 110]

Paano mo ginatamod ang madamo nga porma sang espiritismo?