Kapitulo 18

Himua nga Tulumuron ang Pag-alagad sa Dios Sing Dayon

1, 2. Ano ang kinahanglanon luwas sa pagpanag-iya sing ihibalo sang Dios?

 HANDURAWA nga nagatindog ikaw sa isa ka nakandaduhan nga puwertahan nga nagapadulong sa isa ka kuwarto nga nagaunod sing daku nga kamanggaran. Ibutang ta nga ginhatag sa imo sang isa ka awtorisado nga tawo ang yabi kag ginsilingan ka nga manguha lang sang luyag mo sa sining bilidhon nga mga butang. Indi mo mapuslan ang yabi kon indi mo paggamiton ini. Sing kaanggid, dapat mo gamiton ang ihibalo agod makabenepisyo ikaw sa sini.

² Matuod gid ini sa ihibalo sang Dios. Sa pagkamatuod, ang sibu nga ihibalo tuhoy kay Jehova nga Dios kag kay Jesucristo nagakahulugan sing kabuhi nga walay katapusan. (Juan 17:⁠3) Apang, ina nga paglaum indi maagom paagi sa pagpanag-iya lamang sing ihibalo. Subong nga gamiton mo ang isa ka importante nga yabi, dapat mo iaplikar ang ihibalo gikan sa Dios sa imo kabuhi. Si Jesus nagsiling nga ang mga nagahimo sang kabubut-on sang Dios ‘magasulod sa ginharian.’ Ina nga mga indibiduwal makatigayon sing pribilehiyo nga mag-alagad sa Dios sing dayon!​—⁠Mateo 7:21; 1 Juan 2:⁠17.

3. Ano ang kabubut-on sang Dios para sa aton?

³ Sa tapos mahibaluan kon ano ang kabubut-on sang Dios, importante nga himuon ini. Ano sa banta mo ang kabubut-on sang Dios para sa imo? Masumaryo ini sa sining mga pulong: Iluga si Jesus. Ang 1 Pedro 2:21 nagasugid sa aton: “Sa sining dalanon gintawag kamo, kay bisan si Cristo nag-antos tungod sa inyo, nga  nagbilin sa inyo sing sulundan agod nga sundon ninyo sing maayo gid ang iya mga tikang.” Busa, sa paghimo sang kabubut-on sang Dios, dapat mo sundon ang huwaran ni Jesus sing maayo gid sa masarangan mo. Amo sina ang pag-aplikar mo sang ihibalo gikan sa Dios.

KON PAANO GINGAMIT NI JESUS ANG IHIBALO TUHOY SA DIOS

4. Ngaa madamo gid sing nahibaluan si Jesus nahanungod kay Jehova, kag paano niya gingamit ining ihibalo?

⁴ Si Jesucristo may kapin ka tul-id nga ihibalo tuhoy sa Dios sangsa bisan sin-o pa nga tinuga. Nagkabuhi sia kag nagpangabudlay upod kay Jehova nga Dios sa langit sa sulod sang mga dag-on antes magkari sa duta. (Colosas 1:​15, 16) Kag ano ang ginhimo ni Jesus sa sadtong tanan nga ihibalo? Wala sia maayawi nga panag-iyahan lamang ini. Si Jesus nagkabuhi nahisuno sa sini. Amo kon ngaa tuman gid sia ka maluluy-on, mapailubon, kag mahigugmaon sa iya mga pagpakig-angot sa mga isigkatawo. Sa amo, si Jesus nag-ilog sa iya langitnon nga Amay kag naghikot nahisanto sa iya nahibaluan tuhoy sa mga dalanon kag personalidad ni Jehova.​—⁠Juan 8:​23, 28, 29, 38; 1 Juan 4:⁠8.

5. Ngaa nagpabawtismo si Jesus, kag paano sia nagkabuhi nahisuno sa kahulugan sang iya bawtismo?

⁵ Ang ihibalo ni Jesus nagpahulag man sa iya sa paghimo sing isa ka importante nga tikang. Halin sa Galilea, nagkadto sia sa Suba sang Jordan, diin ginbawtismuhan sia ni Juan. (Mateo 3:​13-15) Ano ang ginsimbulo sang bawtismo ni Jesus? Subong isa ka Judiyo, natawo sia sa isa ka pungsod nga dedikado sa Dios. Busa, si Jesus nadedikar halin sa pagkabun-ag. (Exodo 19:​5, 6) Sa pagpabawtismo, ginpresentar niya ang iya kaugalingon kay Jehova sa paghimo sang balaan nga kabubut-on para sa iya sadtong tion. (Hebreo 10:​5, 7) Kag gintuman ni Jesus ang kahulugan sang iya bawtismo. Nanikasog sia sa pag-alagad kay Jehova, ginpaambit ang ihibalo tuhoy sa Dios sa mga tawo sa tanan nga kahigayunan. Nakasapo si Jesus sing kalipay sa paghimo sang kabubut-on sang Dios, kag nagsiling pa sia gani nga kaangay ini sang pagkaon para sa iya.​—⁠Juan 4:⁠34.

6. Sa anong paagi ginsikway ni Jesus ang iya kaugalingon?

⁶ Nahangpan sing bug-os ni Jesus nga ang paghimo sang kabubut-on ni Jehova may daku gid nga bili​—⁠nga magabili ini bisan  sang iya kabuhi. Walay sapayan, ginsikway ni Jesus ang iya kaugalingon, ginhimo nga ikaduha lamang ang iya personal nga mga kinahanglanon. Ang paghimo sang kabubut-on sang Dios amo pirme ang nauna. Sa sining bahin, paano naton masunod ang himpit nga huwaran ni Jesus?

MGA TIKANG NGA NAGADUL-ONG SA KABUHI NGA DAYON

7. Ano ang pila ka tikang nga dapat himuon sang isa agod makalipikar para sa bawtismo?

⁷ Indi kaangay ni Jesus, kita dihimpit kag makadangat lamang sa importante nga bawtismo sa tapos mahimo ang iban pa nga kinahanglanon nga mga tikang. Nagasugod ini paagi sa tinagipusuon nga pagkuha sing sibu nga ihibalo tuhoy kay Jehova nga Dios kag kay Jesucristo. Nagapahulag ini sa aton nga magpakita sing pagtuo kag tudok nga gugma sa Dios. (Mateo 22:​37-40; Roma 10:17; Hebreo 11:⁠6) Ang pagsunod sa mga kasuguan, mga prinsipio, kag mga talaksan sang Dios dapat magpahulag sa aton sa paghinulsol, nagapabutyag sing diosnon nga kasubo sa aton nagligad nga mga sala. Nagadul-ong ini sa pagpakumbertir, kon sayuron, pagliso kag pagbiya sang bisan anong sayop nga dalanon nga ginsunod naton anay sang wala pa kita sing ihibalo tuhoy sa Dios. (Binuhatan 3:19) Sa pagkamatuod, kon kita likom gihapon nga nagabuhat sing pila ka sala sa baylo nga himuon kon ano ang matarong, wala pa gid kita magliso, kag indi naton malimbungan ang Dios. Mahibaluan ni Jehova ang tanan nga pagkasalimpapaw.​—⁠Lucas 12:​2, 3.

8. Ano nga buhat ang dapat mo himuon kon nagahandum ka nga makigbahin sa pagbantala sing Ginharian nga hilikuton?

⁸ Karon nga nagakuha na ikaw sing ihibalo tuhoy sa Dios, indi bala nagakaigo nga binagbinagon ang espirituwal nga mga butang sa isa ka tuman ka personal nga paagi? Ayhan nalangkag ikaw nga isugid sa imo mga paryente, mga abyan, kag sa iban pa ang imo ginatun-an. Sa katunayan, ayhan ginahimo mo na ini, kay bisan si Jesus nagpaambit sing maayong balita sa iban sa di-pormal nga mga kahimtangan. (Lucas 10:​38, 39; Juan 4:​6-15) Ayhan karon luyag mo nga kapin pa ang himuon. Malipay ang Cristianong mga gulang nga makighambal sa imo agod hibaluon kon bala kalipikado ka kag sangkol nga makigbahin sa regular nga pagbantala sing Ginharian nga hilikuton sang mga Saksi ni Jehova. Kon ikaw kalipikado  kag sangkol, magahimo ang mga gulang sing mga kahimusan nga mag-upod ikaw sa isa ka Saksi sa ministeryo. Ginsunod sang mga disipulo ni Jesus ang iya mga instruksion agod himuon ang ila ministeryo sa isa ka mahim-ong nga paagi. (Marcos 6:​7, 30; Lucas 10:⁠1) Makabenepisyo ikaw gikan sa kaanggid man sini nga bulig samtang nagapakigbahin ka sa pagpalapnag sing mensahe sang Ginharian sa kabalayan kag sa iban pa nga mga paagi.​—⁠Binuhatan 20:​20, 21.

9. Paano ginadedikar sang isa ka tawo ang iya kaugalingon sa Dios, kag paano ang dedikasyon nagaapektar sang kabuhi sang tawo?

⁹ Ang pagbantala sing maayong balita sa tanan nga sahi sang katawhan sa teritoryo sang kongregasyon isa ka paagi sa pagpangita sadtong may huyog sa pagkamatarong kag isa sang maayong mga buhat nga nagapamatuod nga may pagtuo ikaw. (Binuhatan 10:​34, 35; Santiago 2:​17, 18, 26) Ang regular nga pagtambong sa Cristianong mga miting kag ang mapuslanon nga pagpakigbahin sa pagbantala nga hilikuton mga paagi man sa pagpakita nga ikaw naghinulsol kag nakumbertir kag determinado na karon nga magkabuhi nahisuno sa ihibalo tuhoy sa Dios. Ano ang masunod makatarunganon nga tikang? Amo ang pagdedikar kay Jehova nga Dios. Nagakahulugan ini nga sa isa ka tinagipusuon nga pangamuyo, ginasugiran mo ang Dios nga ginahatag mo sing kinabubut-on kag bug-os tagipusuon ang imo kabuhi sa iya sa paghimo sang iya kabubut-on. Amo sini ang paagi sa pagdedikar sang imo kaugalingon kay Jehova kag batunon ang mahulas nga gota ni Jesucristo.​—⁠Mateo 11:​29, 30.

BAWTISMO​—⁠ANG KAHULUGAN SINI PARA SA IMO

10. Ngaa dapat ikaw magpabawtismo sa tapos mo madedikar ang imo kaugalingon kay Jehova?

¹⁰ Suno kay Jesus, ang tanan nga mangin mga disipulo niya dapat mabawtismuhan. (Mateo 28:​19, 20) Ngaa kinahanglanon ini sa tapos ikaw makadedikar sa Dios? Sanglit nadedikar mo na ang imo kaugalingon kay Jehova, nahibaluan niya nga ginahigugma mo sia. Apang walay duhaduha nga agod mapahibalo ang iban nahanungod sa imo gugma sa Dios, luyag mo maghimo sing dugang pa. Ti, ang bawtismo nagahatag sa imo sing kahigayunan nga ipahibalo sa publiko ang imo dedikasyon kay Jehova nga Dios.​—⁠Roma 10:9, 10. 

11. Ano ang kahulugan sang bawtismo?

¹¹ Ang bawtismo madamo sing simbuliko nga kahulugan. Samtang natum-oy ka, ukon “nalubong,” sa idalom sang tubig, daw subong bala nga napatay ikaw kon tuhoy sa imo nagligad nga dalanon sang pagkabuhi. Sa pagbutwa mo gikan sa tubig, daw subong bala nga ikaw nagbutwa sa isa ka bag-o nga kabuhi, nga ginatuytuyan sang kabubut-on sang Dios kag indi sang imo kaugalingon. Sa pagkamatuod, wala ina nagakahulugan nga indi na ikaw makasala, kay kita tanan dihimpit kag busa nagasala sa adlaw-adlaw. Apang, subong isa ka dedikado, bawtismado nga alagad ni Jehova, nakasulod na ikaw sa isa ka pinasahi nga kaangtanan sa iya. Bangod sang imo paghinulsol kag sang imo mapainubuson nga pagpabawtismo, handa si Jehova nga patawaron ang imo mga sala pasad sa halad nga gawad ni Jesus. Sa amo, ang bawtismo nagadul-ong sa isa ka matinlo nga konsiensia sa atubangan sang Dios.​—⁠1 Pedro 3:⁠21.

12. Ano ang kahulugan sang pagpabawtismo (a) “sa ngalan sang Amay”? (b) ‘sa ngalan sang Anak’? (c) ‘sa ngalan sang balaan nga espiritu’?

¹² Ginsugo ni Jesus ang iya mga sumulunod nga bawtismuhan ang bag-ong mga disipulo “sa ngalan sang Amay kag sang Anak kag sang balaan nga espiritu.” (Mateo 28:19) Ano ang buot silingon ni Jesus? Ang bawtismo “sa ngalan sang Amay” nagapakita nga ang tawo nga ginabawtismuhan bug-os tagipusuon nga nagabaton kay Jehova nga Dios subong amo ang Manunuga kag ang may kinamatarong nga Soberano sang uniberso. (Salmo 36:9; 83:18; Manugwali 12:⁠1) Ang mabawtismuhan ‘sa ngalan sang Anak’ nagakahulugan nga ginakilala sang indibiduwal si Jesucristo​—⁠kag ilabi na ang Iya halad nga gawad​—⁠subong amo lamang ang paagi sang kaluwasan nga gin-aman sang Dios. (Binuhatan 4:12) Ang bawtismo ‘sa ngalan sang balaan nga espiritu’ nagakahulugan nga ang kandidato sa bawtismo nagakilala sa balaan nga espiritu ukon aktibo nga puwersa ni Jehova subong amo ang instrumento sang Dios sa pagtuman sang Iya mga katuyuan kag sa pagpabakod sa Iya mga alagad sa paghimo sang Iya matarong nga kabubut-on upod sa Iya ginatuytuyan sang espiritu nga organisasyon.​—⁠Genesis 1:2; Salmo 104:30; Juan 14:26; 2 Pedro 1:⁠21.

HANDA KA NA BALA PARA SA BAWTISMO?

13, 14. Ngaa indi kita dapat mahadlok sa pagpili sa pag-alagad kay Jehova nga Dios?

¹³ Sanglit ang bawtismo may daku nga kahulugan kag amo ang  labing importante nga tikang sa kabuhi sang isa ka tawo, isa bala ini ka tikang nga dapat mo kahadlukan? Indi gid! Samtang ang desisyon sa pagpabawtismo indi dapat pasapayanan, indi maduhaduhaan nga amo ini ang pinakamaalam nga desisyon nga ma­himo mo.

¹⁴ Ang bawtismo nagahatag sing ebidensia sa imo desisyon nga mag-alagad kay Jehova nga Dios. Hunahunaa ang mga tawo nga nakilala mo. Sa nanuhaytuhay nga paagi, indi bala nga ang tagsatagsa sa ila nagaalagad sa isa ka agalon? Ang iban nagapaulipon sa manggad. (Mateo 6:24) Ang iban maukod gid nga nagapadayon sang ila karera ukon nagaalagad sa ila kaugalingon paagi sa pagkabig sang katumanan sang ila kaugalingon nga mga handum subong amo ang pinakaimportante nga butang sa ila kabuhi. Ang iban pa gid nagaalagad sa butig nga mga dios. Apang ginpili mo nga mag-alagad sa matuod nga Dios, si Jehova. Wala na sing iban pa nga nagapakita sing subong kadaku nga kaluoy, kaawa, kag gugma. Ginapadunggan sang Dios ang mga tawo sing mapuslanon nga hilikuton nga nagatuytoy sa ila sa kaluwasan. Padyaan niya ang iya mga alagad sing kabuhi nga walay katapusan. Sa pagkamatuod, ang pagsunod sa huwaran ni Jesus kag ang paghatag sang imo kabuhi kay Jehova indi isa ka dalanon nga kahadlukan. Ang matuod, amo lamang ini ang nagapahamuot sa Dios kag makatarunganon sing bug-os.​—⁠1 Hari 18:⁠21.

15. Ano ang pila sang kinaandan nga mga balagbag sa bawtismo?

¹⁵ Apang, ang bawtismo indi isa ka tikang nga himuon bangod sang impluwensia sang iban nga tawo. Isa ini ka personal nga butang sa ulot mo kag ni Jehova. (Galacia 6:⁠4) Bangod nag-uswag na ikaw sa espirituwal, mahimo nga nagapalibog ka: “Ano ang nagapugong sa akon sa pagpabawtismo?” (Binuhatan 8:​35, 36) Mahimo pamangkuton mo ang imo kaugalingon, ‘Ginapunggan bala ako sang pagpamatok sang akon pamilya? Nadalahig bala ako gihapon sa pila ka dimakasulantahon nga kahimtangan ukon makasasala nga buhat? Mahimo bala nga nahadlok ako nga kaugtan sa komunidad?’ Pila ini sang mga butang nga dapat binagbinagon, apang timbangtimbanga ini sing realistiko.

16. Paano ikaw makabenepisyo sa pag-alagad kay Jehova?

¹⁶ Apang, indi realistiko nga timbangtimbangon ang kabilihanan nga indi pagbinagbinagon ang mga benepisyo sang pag-alagad kay Jehova. Halimbawa, binagbinaga ang tuhoy sa pagpamatok  sang pamilya. Nanaad si Jesus nga bisan pa kon madula sang iya mga disipulo ang ila mga paryente bangod sang pagsunod sa iya, makatigayon sila sing mas daku nga espirituwal nga pamilya. (Marcos 10:​29, 30) Ining mga masigkatumuluo magapakita sa imo sing utudnon nga gugma, magabulig sa imo sa pagbatas sang paghingabot, kag magasakdag sa imo sa dalanon padulong sa kabuhi. (1 Pedro 5:⁠9) Ang mga gulang sa kongregasyon labi na nga makabulig sa imo sa paglandas sang mga problema kag sa pag-atubang sa iban pa nga mga hangkat sing madinalag-on. (Santiago 5:​14-16) Tuhoy sa madula ang kahamuot sining kalibutan, maayo nga pamangkuton mo ang imo kaugalingon, ‘Ano ang mapaanggid sa pagtigayon sing kahamuot sang Manunuga sang uniberso, nga magapahalipay sa iya bangod sang akon ginpili nga dalanon sang kabuhi?’​—⁠Hulubaton 27:⁠11.

PAGKABUHI NAHISUNO SA IMO DEDIKASYON KAG BAWTISMO

17. Ngaa dapat mo tamdon ang bawtismo subong pamuno sa baylo nga katapusan?

¹⁷ Importante dumdumon nga ang bawtismo indi ang katapusan sang imo espirituwal nga pag-uswag. Ginatandaan sini ang pamuno sang bug-os kabuhi nga pag-alagad sa Dios subong isa ka ordenado nga ministro kag isa sang mga Saksi ni Jehova. Bisan pa ang bawtismo importante gid, indi ini garantiya sa kaluwasan. Si Jesus wala magsiling: ‘Ang tagsatagsa nga mabawtismuhan maluwas.’ Sa baylo, sia nagsiling: “Sia nga nakabatas tubtob sa katapusan amo ang maluwas.” (Mateo 24:13) Busa, importante nga pangitaon mo una ang Ginharian sang Dios paagi sa pagkabig sini subong ang pinakaimportante nga butang sa imo kabuhi.​—⁠Mateo 6:​25-34.

18. Sa tapos sang bawtismo, ano ang pila ka tulumuron nga dapat lab-uton?

¹⁸ Agod makapadayon sa imo pag-alagad kay Jehova, handumon mo nga magpahamtang sing espirituwal nga mga tulumuron para sa imo kaugalingon. Ang isa ka mapuslanon nga tulumuron amo nga pauswagon ang imo ihibalo tuhoy sa Dios paagi sa tayuyon personal nga pagtuon sang iya Pulong. Planuha nga basahon ang Biblia adlaw-adlaw. (Salmo 1:​1, 2) Magtambong sa Cristianong mga miting sing regular, kay ang paghiliupod nga masapwan mo didto magabulig sa paghatag sa imo sing espirituwal nga kalig-on. Para sa imo bahin, ngaa indi himuon nga tulumuron ang  magkomento sa mga miting sang kongregasyon, sa amo ginadayaw si Jehova kag ginapalig-on ang iban? (Roma 1:​11, 12) Ang isa pa ka tulumuron mahimo nga amo ang pagpauswag sang kinaiya sang imo mga pangamuyo.​—⁠Lucas 11:​2-4.

19. Anong mga kinaiya ang mabulig sang balaan nga espiritu nga ipasundayag mo?

¹⁹ Kon luyag mo magkabuhi nahisuno sa kahulugan sang imo bawtismo, dapat mo bantayan pirme ang imo ginahimo, ginatugutan ang balaan nga espiritu sang Dios nga magpatubas sa imo sing mga kinaiya subong sang gugma, kalipay, paghidait, pagkamainantuson, pagkalulo, pagkaayo, pagtuo, pagkalum-ok, kag pagpugong sa kaugalingon. (Galacia 5:​22, 23; 2 Pedro 3:11) Dumduma, ginahatag ni Jehova ang iya balaan nga espiritu sa tanan nga nagapangamuyo sini kag nagatuman sa iya subong iya matutom nga mga alagad. (Lucas 11:13; Binuhatan 5:32) Gani mangamuyo sa Dios para sa iya espiritu kag mangayo sa iya sing bulig sa pagpasundayag sing mga kinaiya nga nagapahamuot sa iya. Ining mga kinaiya dugang pa nga mangin dayag sa imo panghambal kag paggawi samtang nagasunod ka sa impluwensia sang espiritu sang Dios. Sa pagkamatuod, ang tagsa ka indibiduwal sa Cristianong kongregasyon nagatinguha sa pagpalambo sing “bag-ong personalidad” agod dugang pa nga mangin kaangay kay Cristo. (Colosas 3:​9-14) Ang tagsatagsa sa aton nagaatubang sing nanuhaytuhay nga mga hangkat sa paghimo sini bangod indi palareho ang kadakuon sang aton espirituwal nga pag-uswag. Sanglit dihimpit ikaw, dapat ikaw magpangabudlay sing lakas sa pagtigayon sing isa ka tulad-Cristo nga personalidad. Apang indi gid mangampo sa sini, kay posible ini upod sa bulig sang Dios.

20. Sa anong mga paagi mailog mo si Jesus sa ministeryo?

²⁰ Lakip sa imo espirituwal nga mga tulumuron amo dapat ang pag-ilog sa malipayon nga huwaran ni Jesus sing suod pa. (Hebreo 12:​1-3) Ginhigugma niya ang ministeryo. Kon may pribilehiyo ikaw nga magpakigbahin sa pagbantala sing Ginharian nga hilikuton, nian, indi pagtuguti nga ini mangin isa ka rutina lamang. Tinguhai nga makasapo ikaw sing kaayawan sa pagtudlo sa iban nahanungod sa Ginharian sang Dios subong sang ginhimo ni Jesus. Gamita ang instruksion nga ginaaman sang kongregasyon sa pagbulig sa imo nga mag-uswag subong isa ka manunudlo. Kag saligi nga si Jehova makahatag sa imo sing kusog sa pagtuman sang imo ministeryo.​—⁠1 Corinto 9:​19-23. 

21. (a) Paano naton nahibaluan nga ginapakabahandi ni Jehova ang matutom nabawtismuhan nga mga indibiduwal? (b) Ano ang nagapakita nga ang bawtismo importante sa aton kaluwasan sa paghukom sang Dios sa sining malaut nga sistema sang mga butang?

²¹ Ang isa ka dedikado, bawtismado nga tawo nga nagapanikasog sing matutom sa pagsunod kay Jesus pinasahi sa Dios. Ginausisa ni Jehova ang tanan sang binilyon ka tawhanon nga tagipusuon kag nakahibalo kon daw ano ka tumalagsahon ina nga mga indibiduwal. Ginakabig niya sila subong mga bahandi, “bilidhon nga mga butang.” (Hageo 2:⁠7) Ginapakita sang mga tagna sa Biblia nga ginatamod sila sang Dios subong natandaan na nga maluwas sa iya paghukom nga malapit na magaabot sa sining malaut nga sistema sang mga butang. (Ezequiel 9:​1-6; Malaquias 3:​16, 18) Ikaw bala “husto nga nahuyog sa kabuhi nga walay katapusan”? (Binuhatan 13:48) Hanuot nga handum mo bala nga matandaan subong isa nga nagaalagad sa Dios? Ang dedikasyon kag bawtismo mga bahin sinang tanda, kag kinahanglanon ini para sa kaluwasan.

22. Ano ang ginalauman sang “dakung kadam-an”?

²² Pagkatapos sang tugob-globo nga Anaw, si Noe kag ang iya pamilya nagguwa sa arka padulong sa isa ka natinluan nga duta. Sa karon man, ang “dakung kadam-an” nga nagaaplikar sing ihibalo gikan sa Dios sa ila kabuhi kag nagatigayon sang kahamuot ni Jehova may paglaum nga maluwas sa katapusan sining malaut nga sistema sang mga butang kag makatigayon sing kabuhi nga walay katapusan sa natinluan sing dayon nga duta. (Bugna 7:​9, 14) Ano ang kahimtangan sina nga kabuhi sa Paraiso?

TILAWI ANG IMO IHIBALO

Paano luyag ni Jehova nga gamiton mo ang imo ihibalo tuhoy sa iya?

Ano ang pila ka tikang nga nagadul-ong sa bawtismo?

Ngaa ang bawtismo indi ang katapusan kundi ang pamuno?

Paano kita makakabuhi nahisuno sa aton dedikasyon kag bawtismo?

[Mga Pamangkot sa Pagtinuon]

 [Piktyur sa pahina 172]

Nadedikar mo na bala ang imo kaugalingon sa Dios paagi sa pangamuyo?

 [Mga piktyur sa pahina 174]

Ano ang nagapugong sa imo sa pagpabawtismo?