Kapitulo 5

Kay Sin-o Pagsimba ang Ginabaton Sang Dios?

1. Ano ang luyag mahibaluan sang isa ka Samariahanon nga babayi nahanungod sa pagsimba?

 GINPALIGBAN mo na bala, ‘Kay sin-o pagsimba ang ginabaton sang Dios?’ Mahimo nga amo sini nga pamangkot ang ginahunahuna sang isa ka babayi sang nakighambal sia kay Jesucristo malapit sa Bukid sang Gerizim sa Samaria. Nagapatalupangod sang kinatuhayan sang pagsimba sang mga Samariahanon kag sang mga Judiyo, sia nagsiling: “Ang amon mga katigulangan nagsimba sa sining bukid; apang kamo nagasiling nga sa Jerusalem amo ang duog diin ang mga tawo dapat magsimba.” (Juan 4:20) Nagsiling bala si Jesus sa Samariahanon nga babayi nga ginabaton sang Dios ang tanan nga pagsimba? Ukon nagsiling bala sia nga kinahanglanon ang espisipiko nga mga butang agod mapahamut-an ang Dios?

2. Sa pagsabat sa Samariahanon nga babayi, ano ang ginsiling ni Jesus?

² Ang makapakibot nga sabat ni Jesus amo: “Ang oras magaabot nga indi sa sining bukid ukon sa Jerusalem magasimba kamo sa Amay.” (Juan 4:21) Ang mga Samariahanon madugay na nagakahadlok kay Jehova kag nagasimba sa iban pa nga mga dios sa Bukid sang Gerizim. (2 Hari 17:33) Nagsiling karon si Jesus nga yadto nga duog ukon ang Jerusalem indi mangin importante sa matuod nga pagsimba.

MAGSIMBA SA ESPIRITU KAG KAMATUORAN

3. (a) Ngaa indi kilala sang mga Samariahanon ang Dios? (b) Paano makilala sang matutom nga mga Judiyo kag sang iban pa ang Dios?

³ Si Jesus nagpadayon pa sa pagsiling sa Samariahanon nga babayi: “Kamo nagasimba sang wala ninyo mahibalui; kami nagasimba  sang amon nahibaluan, kay ang kaluwasan gikan sa mga Judiyo.” (Juan 4:22) Ang mga Samariahanon may sayop nga relihioso nga mga ideya kag ang lamang ginbaton nila subong inspirado amo ang una nga lima ka tulun-an sang Biblia​—⁠kag ini sa ila lamang tulun-an nga ginatawag Samariahanon nga Pentateuko. Busa, wala nila makilala ang Dios. Apang, ang mga Judiyo gintugyanan sing Makasulatanhon nga ihibalo. (Roma 3:​1, 2) Ang Kasulatan naghatag sa matutom nga mga Judiyo kag sa bisan sin-o nga mamati sang kon ano ang kinahanglanon nila agod makilala ang Dios.

4. Suno kay Jesus, ano ang dapat himuon sang mga Judiyo kag mga Samariahanon agod ang ila pagsimba mangin kalahamut-an sa Dios?

⁴ Ang matuod, ginpakita ni Jesus nga dapat bag-uhon sang mga Judiyo kag mga Samariahanon ang ila paagi sang pagsimba agod mapahamut-an ang Dios. Sia nagsiling: “Ang oras magaabot, kag amo na karon, nga ang matuod nga mga sumilimba magasimba sa Amay sa espiritu kag kamatuoran, kay, sa pagkamatuod, ang Amay nagapangita sing subong sina sa pagsimba sa iya. Ang Dios isa ka Espiritu, kag ang mga nagasimba sa iya dapat magsimba sa espiritu kag kamatuoran.” (Juan 4:​23, 24) Dapat naton simbahon ang Dios “sa espiritu,” ginapahulag sang tagipusuon nga puno sing pagtuo kag gugma. Posible nga simbahon ang Dios ‘sa kamatuoran’ paagi sa pagtuon sang iya Pulong, ang Biblia, kag paagi sa pagsimba sa iya suno sa iya ginpahayag nga kamatuoran. Luyag mo bala himuon ina?

5. (a) Ano ang kahulugan sang “pagsimba”? (b) Ano ang dapat naton himuon kon luyag naton nga batunon sang Dios ang aton pagsimba?

⁵ Ginpadaku ni Jesus nga ang ginakinahanglan sang Dios amo ang matuod nga pagsimba. Ginapakita sini nga may yara mga porma sang pagsimba nga wala ginabaton ni Jehova. Ang pagsimba sa Dios nagakahulugan sing paghatag sa iya sing mayaubon nga pagpadungog kag balaan nga pag-alagad. Kon luyag mo padunggan ang isa ka gamhanan nga manuggahom, mahimo gid nga luyag mo mag-alagad sa iya kag himuon ang magapahamuot sa iya. Sa pagkamatuod, nian, luyag naton pahamut-an ang Dios. Sa baylo nga magsiling lamang, ‘Naluyagan ko ang akon relihion,’ dapat naton busa pat-uron nga ang aton pagsimba nagahisanto sa mga ginapatuman sang Dios. 

PAGHIMO SING KABUBUT-ON SANG AMAY

6, 7. Ngaa wala ginakilala ni Jesus ang iban nga nagapangangkon nga mga disipulo niya?

⁶ Basahon naton ang Mateo 7:​21-23 kag tan-awon kon mapain naton ang isa ka importante nga butang nga nagapat-od kon bala ang tanan nga pagsimba ginabaton sang Dios. Si Jesus nagsiling: “Indi ang tagsatagsa nga nagasiling sa akon, ‘Ginuo, Ginuo,’ magasulod sa ginharian sang langit, kundi ang isa nga nagahimo sing kabubut-on sang akon Amay nga yara sa langit. Madamo ang magasiling sa akon sa sadtong adlaw, ‘Ginuo, ginuo, wala bala kami magpanagna sa imo ngalan, kag sa imo ngalan magsubol sa mga demonyo [malaut nga mga espiritu], kag sa imo ngalan maghimo sing madamo nga mga buhat nga gamhanan?’ Kag nian pahayagan ko sila: Wala gid ako makakilala sa inyo! Palayo sa akon, kamo nga mga manugbuhat sing kalautan.”

⁷ Ang pagkilala kay Jesucristo subong Ginuo kinahanglanon gid sa matuod nga pagsimba. Apang may butang nga kulang sa pagsimba sang madamo nga nagapangangkon nga mga disipulo ni Jesus. Nagsiling sia nga ang iban magahimo sing “mga buhat nga gamhanan,” subong sang ginapatihan nga milagruso nga mga pagpang-ayo. Apang, wala nila ginahimo ang butang nga siling ni Jesus kinahanglanon gid. Wala nila ‘ginahimo ang kabubut-on sang [iya] Amay.’ Kon luyag naton pahamut-an ang Dios, dapat naton tun-an kon ano ang kabubut-on sang Amay kag dayon himuon ini.

SIBU NGA IHIBALO—⁠ISA KA PANGAMLIG

8. Kon luyag naton himuon ang kabubut-on sang Dios, ano ang ginapatuman, kag anong sayop nga mga pagtamod ang dapat naton likawan?

⁸ Ang paghimo sing kabubut-on sang Dios nagakinahanglan sing sibu nga ihibalo tuhoy kay Jehova nga Dios kag kay Jesucristo. Ina nga ihibalo nagadul-ong sa kabuhi nga walay katapusan. Pat-od gid, kon amo, nga luyag naton tanan mangin serioso sa pagkuha sing sibu nga ihibalo gikan sa Pulong sang Dios, ang Biblia. Ang iban nagasiling nga indi kita dapat mabalaka basta sinsero lamang kita kag makugi sa aton pagsimba. Ang iban  naman nagasiling pa, ‘Kon diutay ang imo nahibaluan, diutay man ang ginapaabot sa imo.’ Apang, ginapalig-on kita sang Biblia nga pauswagon ang aton ihibalo tuhoy sa Dios kag sa iya mga katuyuan.​—⁠Efeso 4:13; Filipos 1:9; Colosas 1:⁠9.

9. Paano ang sibu nga ihibalo nagaamlig sa aton, kag ngaa kinahanglan naton ina nga pangamlig?

⁹ Ina nga ihibalo isa ka pangamlig agod indi madagtaan ang aton pagsimba. Si apostol Pablo naghambal tuhoy sa isa ka espiritu nga tinuga nga nagapakunokuno nga “isa ka anghel sang kapawa.” (2 Corinto 11:14) Ining nagapakunokuno nga espiritu nga tinuga​—⁠si Satanas​—⁠nagatinguha nga patalangon kita sa paghimo sing mga butang nga batok sa kabubut-on sang Dios. Ang iban pa nga espiritu nga mga tinuga nga kaupod ni Satanas nagdagta man sang pagsimba sang katawhan, kay si Pablo nagsiling: “Ang mga butang nga ginahalad sang mga pungsod ginahalad nila sa mga demonyo, kag indi sa Dios.” (1 Corinto 10:20) Mahimo gid nga madamo ang nagdumdom nga nagasimba sila sa husto nga paagi, bisan pa wala nila ginahimo ang ginapahimo sang Dios. Ginpatalang sila sa dimatinlo nga butig nga pagsimba. Madugangan pa sa ulihi ang aton matun-an tuhoy kay Satanas kag sa mga demonyo, apang matuod gid nga ginadagtaan sining mga kaaway sang Dios ang pagsimba sang katawhan.

10. Ano ang himuon mo kon hungod nga ginhiluan ang inyo tangke sang tubig, kag ano ang ginasangkap sa aton sang sibu nga ihibalo tuhoy sa Pulong sang Dios nga himuon naton?

¹⁰ Kon nahibaluan mo nga hungod nga ginhiluan ang inyo tangke sang tubig, magainom ka pa bala diri? Sa pagkamatuod, mangita ka sa gilayon sing makuhaan sing matinlo nga tubig. Ti, ang sibu nga ihibalo tuhoy sa Pulong sang Dios nagasangkap sa aton agod makilala naton ang matuod nga relihion kag sikwayon ang mga dagta nga nagahimo sang pagsimba nga indi kalahamut-an sa Dios.

MGA SUGO SANG MGA TAWO SUBONG MGA DOKTRINA

11. Ano ang sayop sa pagsimba sang madamo nga mga Judiyo?

¹¹ Sang si Jesus yari sa duta, madamo nga mga Judiyo ang  wala magpanghikot nahisuno sa sibu nga ihibalo tuhoy sa Dios. Busa, nadula nila ang kahigayunan nga makatigayon sing matinlo nga panindugan sa atubangan ni Jehova. Tuhoy sa ila, si Pablo nagsulat: “Nagasaksi ako tuhoy sa ila nga may kakugi sila sa Dios; apang indi suno sa sibu nga ihibalo.” (Roma 10:⁠2) Sila ang namat-od para sa ila kaugalingon kon paano simbahon ang Dios sa baylo nga mamati sa iya.

12. Ano ang nagdagta sa pagsimba sang Israel, kag ano ang resulta?

¹² Ang relihion sang mga Israelinhon putli sang primero kag ginhatag sang Dios, apang gindagtaan ini sing mga panudlo kag mga pilosopiya sang mga tawo. (Jeremias 8:​8, 9; Malaquias 2:​8, 9; Lucas 11:52) Bisan pa ang Judiyo nga relihiosong mga lider nga nakilal-an subong mga Fariseo nagdumdom nga ang ila pagsimba kalahamut-an sa Dios, si Jesus nagsiling sa ila: “Nagakaigo gid ang gintagna ni Isaias nahanungod sa inyo nga mga salimpapaw, subong sang nasulat na, ‘Ining katawhan nagatahod sa akon sa ila mga bibig, apang ang ila tagipusuon malayo sa akon. Walay pulos ang pagsimba nila sa akon, kay ginatudlo nila subong mga doktrina ang mga sugo sang mga tawo.’ ”​—⁠Marcos 7:​6, 7.

13. Paano naton basi mahimo ang ginhimo sang mga Fariseo?

¹³ Posible bala nga basi himuon man naton ang ginhimo sang mga Fariseo? Mahimo ini matabo kon ginsunod naton ang relihioso nga mga tradisyon nga ginpasubli sa aton sa baylo nga usisaon kon ano ang ginsiling sang Dios nahanungod sa pagsimba. Nagapaandam batok sa sining matuod gid nga katalagman, si Pablo nagsulat: “Ang inspirado nga kapahayagan nagasiling sing pat-od nga sa ulihi nga mga tion ang iban magatalikod sa pagtuo, nga nagatalupangod sa nagapatalang nga inspirado nga mga kapahayagan kag mga panudlo sang mga demonyo.” (1 Timoteo 4:⁠1) Gani indi tuman na nga maghaumhaum lamang kita nga ang aton pagsimba nagapahamuot sa Dios. Kaangay sang Samariahanon nga babayi nga ­nakilala ni Jesus, mahimo nga napanubli naton ang aton dalanon sang pagsimba gikan sa aton mga ginikanan. Apang dapat naton pat-uron nga ang ginahimo naton nahamut-an sang Dios.

 MAGBANTAY BATOK SA PAGSAKLAW SA DIOS

14, 15. Bisan pa may pila kita ka ihibalo tuhoy sa kabubut-on sang Dios, ngaa dapat kita maghalong?

¹⁴ Luwas kon mahalungon kita, mahimo nga makahimo kita sing butang nga indi kalahamut-an sa Dios. Halimbawa, si apostol Juan naghapa sa tiilan sang isa ka anghel “sa pagsimba sa iya.” Apang ang anghel nagpaandam: “Maghalong ka! Dili ka maghimo sina! Isa lamang ako ka masigkaulipon mo kag sang imo mga kauturan nga may hilikuton sa pagpanaksi kay Jesus. Simbaha ang Dios.” (Bugna 19:10) Busa, nakita mo bala ang kinahanglanon nga pat-uron gid nga ang imo pagsimba wala madagtai sang bisan ano nga sahi sang idolatriya?​—⁠1 Corinto 10:⁠14.

¹⁵ Sang ang pila ka mga Cristiano nagsugod sa pagbuhat sing relihioso nga mga kinabatasan nga wala magpahamuot sa Dios, si Pablo namangkot: “Paano bala nga nagabalik kamo liwat sa maluya kag imol nga nahauna gid nga mga butang kag buot kamo magpaulipon liwat sa sini? Mahalungon gid nga ginabantayan ninyo ang mga adlaw kag mga bulan kag mga panag-on kag mga tuig. Nagakahadlok ako, nga basi kon nakapangabudlay ako sa inyo sa walay pulos.” (Galacia 4:​8-11) Yadto nga mga indibiduwal nakatigayon sing ihibalo gikan sa Dios apang nakasala sang ulihi paagi sa pagsunod sa relihioso nga mga kinabatasan kag mga okasyon nga indi kalahamut-an kay Jehova. Subong ginsiling ni Pablo, dapat naton ‘padayon nga pat-uron kon ano ang kalahamut-an sa Ginuo.’​—⁠Efeso 5:⁠10.

16. Paano ang Juan 17:16 kag 1 Pedro 4:3 nagabulig sa aton sa pagpamat-od kon bala ang mga selebrasyon kag mga kinabatasan nagapahamuot sa Dios?

¹⁶ Pat-uron gid naton nga likawan ang relihioso nga mga selebrasyon kag iban pa nga mga kinabatasan nga nagasumpakil sa mga prinsipio sang Dios. (1 Tesalonica 5:21) Halimbawa, si Jesus nagsiling tuhoy sa iya mga sumulunod: “Indi sila bahin sang kalibutan, subong nga ako indi bahin sang kalibutan.” (Juan 17:16) Nadalahig bala ang imo relihion sa mga seremonya kag mga selebrasyon nga nagasumpakil sa prinsipio sang pagkawalay nadampigan sa mga hilikuton sining kalibutan? Ukon nagapakigbahin bala kon kaisa ang mga sumalakdag sang  imo relihion sa mga kinabatasan kag mga kapiestahan nga mahimo nagadalahig sing pagginawi nga kaangay sang ginlaragway ni apostol Pedro? Sia nagsulat: “Ang tion nga nagtaliwan tuman na agod nga mahimo ninyo ang kabubut-on sang mga pungsod sang nagaginawi kamo sa mga kaulag, mga kailigbon, pagkapalainom sing alak, mga magansal nga kinalipay, mga paghinubog, kag mga ilegal nga idolatriya.”​—⁠1 Pedro 4:⁠3.

17. Ngaa dapat naton likawan ang bisan ano nga nagapabanaag sing espiritu sang kalibutan?

¹⁷ Ginpadaku ni apostol Juan ang kinahanglanon nga likawan ang bisan anong mga buhat nga nagapabanaag sing espiritu sang didiosnon nga kalibutan sa palibot naton. Si Juan nagsulat: “Dili ninyo paghigugmaon ang kalibutan ukon ang mga butang nga yara sa kalibutan. Kon ang bisan sin-o nagahigugma sang kalibutan, ang gugma sa Amay wala sa iya; kay ang tanan nga yara sa kalibutan​—⁠ang kailigbon sang unod kag ang kailigbon sang mga mata kag ang bugal sang kabuhi sang isa​—⁠wala nagahalin sa Amay, kundi nagahalin sa kalibutan. Dugang pa, ang kalibutan nagataliwan kag ang kailigbon man sini, apang sia nga nagahimo sing kabubut-on sang Dios nagapabilin sing dayon.” (1 Juan 2:​15-17) Natalupangdan mo bala nga ang mga “nagahimo sing kabubut-on sang Dios” magapabilin sing dayon? Huo, kon himuon naton ang kabubut-on sang Dios kag likawan ang mga hilikuton nga nagapabanaag sang espiritu sining kalibutan, matigayon naton ang ginalauman nga kabuhi nga walay katapusan!

SUNDA ANG MATAAS NGA MGA TALAKSAN SANG DIOS

18. Paano nagsayop ang iban nga mga taga-Corinto nahanungod sa pagginawi, kag ano ang dapat naton matun-an gikan sa sini?

¹⁸ Luyag sang Dios nga mangin mga sumilimba niya yadtong mga nagasunod sa iya mataas nga mga talaksan sa moralidad. Ang iban anay sa dumaan nga Corinto nagsayop sa paghunahuna nga tugutan sang Dios ang imoral nga paggawi. Makita naton nga sayop gid sila kon basahon naton ang 1 Corinto 6:​9, 10. Agod mangin kalahamut-an ang pagsimba naton sa Dios, dapat naton sia pahamut-an sa pulong kag sa buhat. Ang imo  bala porma sang pagsimba nagabulig sa imo sa paghimo sina?​—⁠Mateo 15:8; 23:​1-3.

19. Paano ang matuod nga pagsimba nagaapektar sang aton pagpakig-angot sa iban?

¹⁹ Ang aton mga pagpakig-angot sa iban nga mga tawo dapat man magpabanaag sang mga talaksan sang Dios. Ginpalig-on kita ni Jesucristo nga himuon sa iban ang luyag naton nga himuon man nila sa aton, kay bahin ini sang matuod nga pagsimba. (Mateo 7:12) Talupangda kon ano man ang iya ginsiling nahanungod sa pagpakita sing utudnon nga gugma: “Sa sini mahibaluan sang tanan nga mga disipulo ko kamo, kon maghigugmaanay kamo.” (Juan 13:35) Ang mga disipulo ni Jesus dapat maghigugmaanay kag maghimo sang kon ano ang maayo sa mga masigkasumilimba kag sa iban.​—⁠Galacia 6:⁠10.

BUG-OS KALAG NGA PAGSIMBA

20, 21. (a) Ano nga sahi sang pagsimba ang ginapatuman sang Dios? (b) Ngaa ginsikway ni Jehova ang pagsimba sang Israel sang adlaw ni Malaquias?

²⁰ Sa imo tagipusuon, mahimo nga luyag mo simbahon ang Dios sing kalahamut-an. Kon amo, dapat mo tigayunon ang pagtamod ni Jehova sa pagsimba. Ginpadaku ni disipulo Santiago nga ang pagtamod sang Dios amo ang importante, indi ang aton. Si Santiago nagsiling: “Ang porma sang pagsimba nga putli kag walay dagta gikan sa pagtamod sang aton Dios kag Amay amo ini: ang pag-atipan sa mga ilo kag balo nga mga babayi sa ila kapipit-an, kag ang pagtipig sang iya kaugalingon nga walay dagta sa sining kalibutan.” (Santiago 1:27) Upod ang handum nga pahamut-an ang Dios, dapat usisaon sang tagsatagsa sa aton ang aton pagsimba agod mapat-od nga wala ini madagtai sang didiosnon nga mga buhat ukon nga wala naton ginawasi ang butang nga ginakabig niya nga importante.​—⁠Santiago 1:⁠26.

²¹ Ang putli lamang, bug-os kalag nga pagsimba ang nagapahamuot kay Jehova. (Mateo 22:37; Colosas 3:23) Sang kubos pa sa sini ang ginhatag sang pungsod sang Israel sa Dios, sia nagsiling: “Ang anak, sa iya bahin, nagatahod sa amay; kag ang alagad, sa iya agalon. Gani kon ako amay, diin bala ang pagtahod sa akon? Kag kon ako agalon, diin bala ang kahadlok sa akon?”  Ginsaklaw nila ang Dios paagi sa paghalad sa iya sing bulag, piang, kag masakiton nga mga sapat, kag ginsikway niya ang subong sadto nga mga buhat sang pagsimba. (Malaquias 1:​6-8) Takus si Jehova sang pinakaputli nga porma sang pagsimba kag eksklusibo nga debosyon lamang ang iya ginabaton.​—⁠Exodo 20:5; Hulubaton 3:9; Bugna 4:⁠11.

22. Kon luyag naton nga batunon sang Dios ang aton pagsimba, ano ang likawan naton, kag ano ang himuon naton?

²² Ang Samariahanon nga babayi nga nakighambal kay Jesus daw interesado sa pagsimba sa Dios sa paagi nga nahamut-an niya. Kon amo sina ang handum naton, likawan naton ang tanan sang nagadagta nga mga panudlo kag mga buhat. (2 Corinto 6:​14-18) Sa baylo, magapanikasog kita sa pagtigayon sing sibu nga ihibalo tuhoy sa Dios kag sa paghimo sang iya kabubut-on. Sundon naton sing maayo ang iya mga ginapatuman para sa kalahamut-an nga pagsimba. (1 Timoteo 2:​3, 4) Amo gid sina ang ginatinguhaan sang mga Saksi ni Jehova, kag mainit nga ginapalig-on nila kamo nga magbuylog sa ila sa pagsimba sa Dios “sa espiritu kag kamatuoran.” (Juan 4:24) Si Jesus nagsiling: “Ang Amay nagapangita sing subong sina sa pagsimba sa iya.” (Juan 4:23) Ginalauman nga ikaw subong sina nga tawo. Kaangay sadtong Samariahanon nga babayi, walay duhaduha nga luyag mo makatigayon sing kabuhi nga walay katapusan. (Juan 4:​13-15) Apang makita mo nga ang mga tawo nagatigulang kag nagakapatay. Ang masunod nga kapitulo magapaathag kon ngaa.

TILAWI ANG IMO IHIBALO

Subong ginpakita sa Juan 4:​23, 24, ano nga pagsimba ang ginabaton sang Dios?

Paano naton mahibaluan kon bala nahamuot ang Dios sa pila ka mga kinabatasan kag kapiestahan?

Ano ang pila sang mga tulumanon para sa kalahamut-an nga pagsimba?

[Mga Pamangkot sa Pagtinuon]

 [Bug-os pahina nga piktyur sa pahina 44]