Kapitulo 7

Kon Ano ang Nahimo sang Dios sa Pagluwas sa Katawhan

1, 2. (a) Paano nahangpan sang isa ka Romanong senturion kon sin-o ang Anak sang Dios? (b) Ngaa gintugutan ni Jehova nga mapatay si Jesus?

 SANG isa ka hapon sang tigpamulak sang halos 2,000 ka tuig na ang nagligad, isa ka Romanong senturion ang nagatan-aw sa amat-amat kag masakit nga pagkapatay sang tatlo ka lalaki. Pinasahi nga natalupangdan sadtong soldado ang isa sa ila​—⁠si Jesucristo. Ginlansang si Jesus sa isa ka kahoy nga usok. Nagdulom ang langit sang kaudtuhon sang nagahilapit ang iya kamatayon. Sang mapatay sia, mabaskog nga nagtay-ug ang duta, kag ang soldado nagtuaw: “Matuod gid nga ining tawo Anak sang Dios.”​—⁠Marcos 15:⁠39.

² Anak sang Dios! Husto yadto nga soldado. Bag-o lang niya masaksihan ang labing importante nga hitabo sa duta. Antes sini, gintawag mismo sang Dios si Jesus nga iya hinigugma nga Anak. (Mateo 3:17; 17:⁠5) Ngaa gintugutan ni Jehova nga mapatay ang iya Anak? Bangod amo ini ang paagi sang Dios sa pagluwas sa katawhan gikan sa sala kag kamatayon.

GINPILI PARA SA ISA KA PINASAHI NGA KATUYUAN

3. Ngaa nagakaigo nga ang pilion para sa isa ka pinasahi nga katuyuan tuhoy sa katawhan amo ang bugtong nga Anak sang Dios?

³ Subong natun-an na naton sa sining libro, nagakabuhi na si Jesus antes sia mangin tawo. Gintawag sia nga “bugtong nga Anak” sang Dios bangod direkta sia nga gintuga ni Jehova. Pagkatapos sadto, gingamit sang Dios si Jesus sa pagpaluntad sang tanan nga iban pa nga mga butang. (Juan 3:18; Colosas 1:16) Si Jesus may pinasahi nga pagkawili sa katawhan. (Hulubaton 8: ​30, 31) Indi katingalahan nga ginpili ni Jehova ang iya bugtong nga Anak para sa isa ka pinasahi nga katuyuan sang ang tawo mapaidalom sa pagpakamalaut sang kamatayon!

4, 5. Antes magkari si Jesus sa duta, ano ang ginapahayag sang Biblia nahanungod sa Mesianikong Binhi?

⁴ Sang ginpamatbatan sanday Adan, Eva, kag Satanas sa hardin sang Eden, gintawag sang Dios ang palaabuton nga Manluluwas subong isa ka “binhi.” Ining Binhi, ukon anak, magakari agod dulaon ang daku nga mga kabudlayan nga ginpahanabo ni Satanas nga Yawa, “ang orihinal nga man-ug.” Sa katunayan, ang ginsaad nga Binhi magadugmok kay Satanas kag sa tanan nga nagsunod sa iya.​—⁠Genesis 3:15; 1 Juan 3:8; Bugna 12:⁠9.

⁵ Sa sulod sang mga siglo, amat-amat nga nagpahayag ang Dios sing dugang pa nahanungod sa Binhi, nga gintawag man nga Mesias. Subong ginapakita sa tsart sa pahina 37, madamo nga tagna ang naghatag sing mga detalye nahanungod sa madamo nga bahin sang iya kabuhi sa duta. Halimbawa, magabatas sia sing daku nga kapintas agod tumanon ang iya papel sa katuyuan sang Dios.​—⁠Isaias 53:​3-5.

KON NGAA DAPAT MAPATAY ANG MESIAS

6. Suno sa Daniel 9:​24-26, ano ang himuon sang Mesias, kag paano?

⁶ Ang tagna nga narekord sa Daniel 9:​24-26 nagtagna nga ang Mesias​—⁠ang Hinaplas nga Isa sang Dios​—⁠magatuman sing isa ka dakung katuyuan. Magakari sia sa duta “sa pagtapos sang paglalis, kag sa pagpauntat sang sala, kag sa pagtumbas para sa kalautan, kag sa pagpasulod sang pagpakamatarong” sing dayon. Pagadulaon sang Mesias ang pagpakamalaut sang kamatayon gikan sa matutom nga katawhan. Apang paano niya himuon ini? Ang tagna nagapaathag nga sia ‘pagautdon,’ ukon pagapatyon.

7. Ngaa naghalad sing mga sapat ang mga Judiyo, kag ano ang ginlandong sini?

⁷ Kilala sang dumaan nga mga Israelinhon ang ideya tuhoy sa pagtumbas para sa sala. Sa ila pagsimba sa idalom sang Kasuguan nga ginhatag sa ila sang Dios paagi kay Moises, regular sila nga nagahalad sing mga sapat. Nagpahanumdom ini sa katawhan sang Israel nga ang mga tawo nagakinahanglan sing butang nga inugtumbas, ukon inugtabon, sa ila mga sala. Ginsumaryo ni apostol Pablo ang prinsipio sing subong sini: “Luwas kon dugo ang ipaagay wala sing kapatawaran sang mga sala.” (Hebreo 9:22)  Ang mga Cristiano wala sa idalom sang Mosaikong Kasuguan lakip ang mga ginapatuman sini, subong sang mga halad. (Roma 10:4; Colosas 2:​16, 17) Nahibaluan man nila nga ang sapat nga mga halad indi makaaman sing permanente kag bug-os nga kapatawaran sang mga sala. Sa baylo, ining mga halad naglandong sing mas hamili nga halad​—⁠ang iya sang Mesias, ukon Cristo. (Hebreo 10:​4, 10; ipaanggid ang Galacia 3:24.) Apang, mahimo mamangkot ikaw, ‘Kinahanglanon gid bala nga mapatay ang Mesias?’

8, 9. Anong hamili nga mga butang ang nadula nanday Adan kag Eva, kag paano ang ila mga ginbuhat nakaapektar sa ila mga kaliwat?

⁸ Huo, kinahanglan nga mapatay ang Mesias agod maluwas ang katawhan. Agod mahangpan kon ngaa, balikan naton ang hardin sang Eden kag hangpon naton kon daw ano kadaku ang nadula nanday Adan kag Eva sang magrebelde sila sa Dios. Gintanyagan sila sing dayon nga kabuhi! Subong mga anak sang Dios, direkta man ang ila kaangtanan sa iya. Apang sang ginsikway nila ang paggahom ni Jehova, nadula nila ina tanan kag nagdala sila sing sala kag kamatayon sa kaliwatan sang tawo.​—⁠Roma 5:⁠12.

⁹ Daw subong bala nga gin-uyangan sang aton unang mga ginikanan ang isa ka daku nga manggad, ginlubong ang ila kaugalingon sa utang. Ginpaliton nanday Adan kag Eva ina nga utang sa ila mga anak. Bangod wala kita matawo nga himpit kag walay sala, ang tagsatagsa sa aton makasasala kag nagakapatay. Kon magmasakit kita ukon makahambal sing butang nga makasalaklaw nga kuntani sarang naton mabawi, mga epekto ini sang aton napanubli nga utang​—⁠ang tawhanon nga pagkadihimpit. (Roma 7:​21-25) Ang paglaum lamang naton amo nga bawion ang nadula ni Adan. Apang, indi kita takus sa himpit nga tawhanon nga kabuhi. Sanglit nagahimo sing sala ang tanan nga dihimpit nga mga tawo, takus kita tanan sa kamatayon, indi sa kabuhi.​—⁠Roma 6:⁠23.

10. Ano ang kinahanglanon agod magawad ang nadula ni Adan?

¹⁰ Apang, may butang bala nga matanyag bilang baylo sang kabuhi nga nadula ni Adan? Ang talaksan sang katarungan sang Dios nagapatuman sing pagkatimbang, “kalag sa kalag.” (Exodo 21:23) Gani dapat nga kabuhi ang ibayad sa kabuhi nga nadula. Indi nagakaigo ang kabuhi sang bisan sin-o lang. Ang Salmo 49:​7, 8 nagasiling tuhoy sa dihimpit nga mga tawo: “Wala sa ila sing  sarang nga mas-a makatubos sang iya utod, ukon makahatag sa Dios sing gawad sa iya; (kag ang gawad nga bili sang ila kalag tuman ka mahal sa bagay nga nagdulog ini sa tion nga walay latid).” Busa, wala bala sing paglaum ang kahimtangan? Indi, sa pagkamatuod.

11. (a) Ano ang kahulugan sang tinaga nga “gawad” sa Hebreo? (b) Sin-o lamang ang makagawad sa katawhan, kag ngaa?

¹¹ Sa Hebreo nga pamulong, ang tinaga nga “gawad” nagakahulugan sing kantidad nga ginabayad agod gawaron ang isa ka bihag kag nagapahangop man sing pagkatumbas. Isa lamang ka tawo nga may himpit nga tawhanon nga kabuhi ang makatanyag sing katumbas sa nadula ni Adan. Luwas kay Adan, ang himpit lamang nga tawo nga natawo sa duta amo si Jesucristo. Busa, ginatawag sang Biblia si Jesus nga “ang katapusan nga Adan” kag nagapasalig sa aton nga si Cristo “naghatag sang iya kaugalingon subong katumbas nga gawad para sa tanan.” (1 Corinto 15:45; 1 Timoteo 2:​5, 6) Samtang si Adan nagpaliton sing kamatayon sa iya mga anak, si Jesus nagpaliton sing kabuhi nga dayon. Ang 1 Corinto 15:22 nagapaathag: “Subong nga kay Adan ang tanan nagakalamatay, amo man kay Cristo ang tanan buhion.” Sing nagakaigo, nian, si Jesus ginatawag nga “Dayon nga Amay.”​—⁠Isaias 9:​6, 7.

KON PAANO GINBAYAD ANG GAWAD

12. San-o nangin Mesias si Jesus, kag anong dalanon sang kabuhi ang iya ginpadayon pagkatapos sadto?

¹² Sang tigragas sang 29 C.E., si Jesus nagkadto sa iya paryente nga si Juan agod magpabawtismo kag paagi sa amo ginpresentar niya ang iya kaugalingon sa pagtuman sang kabubut-on sang Dios. Sadto nga okasyon ginhaplasan ni Jehova si Jesus sing balaan nga espiritu. Sa amo, si Jesus nangin ang Mesias, ukon Cristo, ang isa nga hinaplas sang Dios. (Mateo 3:​16, 17) Nian ginsugdan ni Jesus ang iya tatlo ka tuig kag tunga nga ministeryo. Naglakbay sia sa tanan nga bahin sang iya namat-an nga pungsod, nga nagabantala nahanungod sa Ginharian sang Dios kag nagatipon sing matutom nga mga sumulunod. Apang, subong sang gintagna, wala madugay nagbaskog ang pagpamatok sa iya.​—⁠Salmo 118:22; Binuhatan 4:​8-11.

13. Anong mga hitabo ang nagdul-ong sa kamatayon ni Jesus subong isa nga nagahupot sing integridad?

¹³ Maisugon nga ginbuyagyag ni Jesus ang pagkasalimpapaw  sang relihiosong mga lider, kag nagtinguha sila nga patyon sia. Sang ulihi nakahunahuna sila sing isa ka malaw-ay nga plano nga nagdalahig sing pagluib, dimakatarunganon nga pag-aresto, ilegal nga kasaba, kag sing butig nga panumbungon nga sedisyon. Si Jesus ginbunal, ginduplaan, gin-uligyat, kag ginhanot sing latigo nga gintuyo agod pilason ang iya panit. Nian ginpamatbatan sia sang Romanong gobernador nga si Poncio Pilato sing kamatayon sa usok sang pag-antos. Ginlansang sia sa isa ka kahoy nga usok kag ginbitay didto. Ang tagsa ka pagginhawa makaalantos gid, kag mga inoras pa ang nagligad antes sia napatay. Sa sadtong bug-os nga pag-antos, si Jesus naghupot sing himpit nga integridad sa Dios.

14. Ngaa gintugutan sang Dios ang iya Anak nga mag-antos kag mapatay?

¹⁴ Sa amo, ginhatag ni Jesus ang iya kabuhi subong “gawad sa baylo sang madamo,” sadtong Nisan 14, 33 C.E. (Marcos 10:45; 1 Timoteo 2:​5, 6) Gikan sa langit, makita ni Jehova ang iya pinalangga nga Anak nga nagaantos kag nagatagumatayon. Ngaa gintugutan sang Dios nga matabo yadtong makakulugmat nga butang? Ginhimo niya yadto bangod ginhigugma niya ang katawhan. Si Jesus nagsiling: “Ginhigugma gid sang Dios ang kalibutan sa bagay nga ginhatag niya ang iya bugtong nga Anak, agod nga ang bisan sin-o nga magpakita sing pagtuo sa iya indi mawala kundi may kabuhi nga walay katapusan.” (Juan 3:16) Ang kamatayon ni Jesus nagatudlo man sa aton nga si Jehova isa ka Dios sang himpit nga katarungan. (Deuteronomio 32:⁠4) Ang iban mahimo matingala kon ngaa wala ginpaiway sang Dios ang iya mga prinsipio sang katarungan nga kalag sa kalag kag ginsikway ang kabayaran sang makasasala nga dalanon ni Adan. Ang rason amo nga si Jehova pirme nagasunod sa iya kasuguan kag nagasakdag sini, bisan pa may daku ini nga kabilihanan sa iya mismo.

15. Sanglit dimakatarunganon kuntani kon gintugutan ang pagluntad ni Jesus nga matapos sing permanente, ano ang ginhimo ni Jehova?

¹⁵ Ang katarungan ni Jehova nagpatuman man nga ang kamatayon ni Jesus magadangat sa makalilipay nga resulta. Kay man, may katarungan bala kon tugutan ang matutom nga si Jesus nga magtulog sing dayon sa kamatayon? Sa pagkamatuod wala! Ang Hebreong Kasulatan nagtagna nga ang matutom nga isa sang Dios indi magpabilin sa lulubngan. (Salmo 16:10; Binuhatan 13:35)  Nagtulog sia sa kamatayon sa halos tatlo ka adlaw, kag dayon ginbanhaw sia ni Jehova nga Dios subong isa ka gamhanan nga espiritu nga tinuga.​—⁠1 Pedro 3:⁠18.

16. Ano ang ginhimo ni Jesus sang magbalik sia sa langit?

¹⁶ Sa iya pagkapatay, ginhatag ni Jesus ang iya tawhanon nga kabuhi sing dayon. Sang ginbanhaw sia pa langit, nangin isa sia ka nagahatag-sing-kabuhi nga espiritu. Dugang pa, sang magkayab si Jesus sa labing balaan nga duog sa uniberso, nagbalik sia liwat sa iya mahal nga Amay kag pormal nga ginpresentar sa Iya ang balor sang iya himpit nga tawhanon nga kabuhi. (Hebreo 9:​23-28) Nian ang balor sadtong hamili nga kabuhi sarang magamit para sa matinumanon nga katawhan. Ano ang kahulugan sina para sa imo?

ANG GAWAD NI CRISTO KAG IKAW

17. Paano kita makatigayon sing kapatawaran pasad sa halad nga gawad ni Cristo?

¹⁷ Binagbinaga ang tatlo ka paagi nga makabenepisyo ikaw sa halad nga gawad ni Cristo bisan sa karon. Una, nagadala ini sing kapatawaran sang mga sala. Paagi sa pagtuo sa ginpaagay nga dugo ni Jesus, kita may “kahilwayan paagi sa gawad,” huo, “ang kapatawaran sang aton mga paglapas.” (Efeso 1:⁠7) Gani bisan pa kon nakahimo kita sing isa ka mabug-at nga sala, makapangayo kita sa Dios sing kapatawaran sa ngalan ni Jesus. Kon mahinulsulon gid kita, gamiton ni Jehova sa aton ang balor sang halad nga gawad sang iya Anak. Ginapatawad kita sang Dios, nga ginahatag sa aton ang pagpakamaayo sang isa ka maayong konsiensia, sa baylo nga ipadapat sa aton ang silot nga kamatayon bangod sang aton pagpakasala.​—⁠Binuhatan 3:19; 1 Pedro 3:⁠21.

18. Sa anong paagi ang halad ni Jesus nagahatag sa aton sing paglaum?

¹⁸ Ikaduha, ang halad nga gawad ni Cristo nagaaman sing sadsaran sa aton paglaum sa palaabuton. Sa palanan-awon, nakita ni apostol Juan nga ang “isa ka dakung kadam-an, nga walay tawo nga makaisip” makalampuwas sa nagapakari nga kalaglagan sining sistema sang mga butang. Ngaa makalampuwas sila kon laglagon sang Dios ang madamo nga iban pa? Ginsugiran sang isa ka anghel si Juan nga ang dakung kadam-an ‘naglaba sang ila mga panapton nga malaba kag ginpaputi ini sa dugo sang Kordero,’ si Jesucristo. (Bugna 7:​9, 14) Tubtob nagapakita kita sing  pagtuo sa ginpaagay nga dugo ni Jesucristo kag nagakabuhi nahisanto sa mga kasuguan sang Dios, mangin matinlo kita sa panulok sang Dios kag may paglaum kita sa kabuhi nga walay katapusan.

19. Paano ang halad ni Cristo nagapamatuod nga sia kag ang iya Amay nagahigugma sa imo?

¹⁹ Ikatlo, ang halad nga gawad amo ang pinakamabakod nga pamatuod sang gugma ni Jehova. Ginpabutyag sang kamatayon ni Cristo ang duha ka labing daku nga buhat sang gugma sa maragtas sang uniberso: (1) ang gugma sang Dios sa pagpadala sang iya Anak agod mapatay para sa aton; (2) ang gugma ni Jesus paagi sa kinabubut-on nga pagtanyag sang iya kaugalingon subong gawad. (Juan 15:13; Roma 5:⁠8) Kon matuod gid nga nagapakita kita sing pagtuo, ini nga gugma naaplikar sa tagsatagsa sa aton. Si apostol Pablo nagsiling: “Ang Anak sang Dios . . . naghigugma sa akon kag nagtugyan sang iya kaugalingon tungod sa akon.”​—⁠Galacia 2:20; Hebreo 2:9; 1 Juan 4:​9, 10.

20. Ngaa dapat kita magpakita sing pagtuo sa halad nga gawad ni Jesus?

²⁰ Busa, ipakita naton ang aton pagpasalamat sa gugma nga ginpakita sang Dios kag ni Cristo paagi sa pagpakita sing pagtuo sa halad nga gawad ni Jesus. Ang paghimo sini nagadul-ong sa kabuhi nga walay katapusan. (Juan 3:36) Apang, ang aton kaluwasan indi ang labing importante nga rason sa pagkabuhi kag pagkapatay ni Jesus sa duta. Indi, ang iya una nga ginkabalak-an amo ang isa ka daku pa nga hulusayon, isa nga nagadalahig sang bug-os nga uniberso. Subong makita pa naton sa masunod nga kapitulo, ina nga hulusayon nagadalahig sa aton tanan bangod ginapakita sini kon ngaa gintugutan sang Dios ang kalautan kag pag-antos nga magpadayon sing tuman kadugay sa sining kalibutan.

TILAWI ANG IMO IHIBALO

Ngaa dapat mapatay si Jesus agod luwason ang katawhan?

Paano ginbayad ang gawad?

Sa anong mga paagi nagabenepisyo ikaw sa gawad?

[Mga Pamangkot sa Pagtinuon]

 [Bug-os pahina nga piktyur sa pahina 67]