Kon Paano Ikaw Makapalapit sa Dios
Kapitulo 16
Kon Paano Ikaw Makapalapit sa Dios
1. Ano nga mga pagkaanggid ang kitaon sa madamo nga relihion?
ANG isa ka turista nga nagaduaw sa isa ka pungsod sa Sidlangan nakibot sa relihioso nga mga rito nga iya nakita sa isa ka templo sang mga Budhista. Bisan pa ang mga imahen indi iya ni Maria ukon ni Cristo, madamo sang mga rito ang nagaanggid sa ginahimo sang simbahan sa ila pungsod. Halimbawa, natalupangdan niya ang paggamit sing mga rosarito kag ang mga pagpangadi. Amo man nga pagkaanggid ang nakita sang iban. Sa Sidlangan man ukon Katundan, ang mga pamaagi nga ginagamit sang mga debotado sa pagpalapit sa Dios ukon sa mga butang nga ila ginagamit sa pagsimba talalupangdon nga magkaanggid.
2. Paano ginlaragway ang pangamuyo, kag ngaa madamo nga tawo ang nagapangamuyo?
2 Madamo ilabi na ang nagatinguha sa pagpalapit sa Dios paagi sa pagpangamuyo sa iya. Ang pangamuyo ginalaragway subong “isa ka buhat sang pagpakig-angot sang tawo sa mga sagrado ukon balaan—Dios, mga dios, duog sang mga espiritu, ukon labaw sa kinaugali nga mga gahom.” (The New Encyclopædia Britannica) Apang, kon nagapalapit sa Dios paagi sa pangamuyo, madamo ang nagahunahuna lamang sang kon ano ang mabaton nila. Halimbawa, ginpamangkot isa ka bes sang isa ka tawo ang isa sang mga Saksi ni Jehova: “Kon mangamuyo ka para sa akon, malubad ayhan ang mga problema ko sa akon pamilya, sa trabaho, kag sa akon panglawas?” Amo sini ang gindumdom sadto nga tawo, apang madamo ang nagapangamuyo kag sa gihapon ang ila mga problema wala nagakadula. Gani mahimo ipamangkot naton, ‘Ngaa dapat gid kita magpalapit sa Dios?’
KON NGAA DAPAT KITA MAGPALAPIT SA DIOS
3. Kay sin-o dapat ipatuhoy ang aton mga pangamuyo, kag ngaa?
3 Ang pangamuyo indi isa ka walay katuyuan nga rito, ukon isa lamang ka paagi agod makatigayon sing isa ka butang. Ang daku nga rason sa pagpalapit sa Dios amo ang makatigayon sing suod nga kaangtanan sa iya. Busa, dapat naton ipatuhoy ang aton mga pangamuyo kay Jehova nga Dios. “Si Jehova malapit sa tanan nga nagapanawag sa iya,” siling ni salmista David. (Salmo 145:18) Ginaagda kita ni Jehova nga makighidait sa iya. (Isaias 1:18) Ang mga nagabaton sining pangagda nagaugyon sa salmista nga nagsiling: “Tuhoy sa akon, ang pagpalapit sa Dios maayo para sa akon.” Ngaa? Bangod ang mga nagapalapit kay Jehova nga Dios makatigayon sing matuod nga kalipay kag malinong nga panghunahuna.—Salmo 73:28.
4, 5. (a) Ngaa importante nga mangamuyo sa Dios? (b) Ano nga sahi sang kaangtanan ang matukod naton upod sa Dios paagi sa pangamuyo?
4 Ngaa pa mangamuyo kita sa Dios agod mangayo sing bulig kon iya ‘nahibaluan ang aton kinahanglanon sa wala pa kita nagapangayo sa iya’? (Mateo 6:8; Salmo 139:4) Ginapakita sang pangamuyo nga may pagtuo kita sa Dios kag ginatamod naton sia subong ang Tuburan sang ‘tagsa ka maayong regalo kag tagsa ka maayong dulot.’ (Santiago 1:17; Hebreo 11:6) Nagakalipay si Jehova sa aton mga pangamuyo. (Hulubaton 15:8) Nalipay sia mamati sa aton makatalandog nga mga pagpabutyag sing apresasyon kag pagdayaw, subong nga ang isa ka amay nagakalipay mamati sa iya gamay nga bata nga nagahambal sing sinsero nga mga pulong sang pagpasalamat. (Salmo 119:108) Kon maayo ang kaangtanan sang amay kag sang bata, may yara mahigugmaon nga pagpaalintunay. Ang isa ka bata nga ginahigugma maluyag makighambal sa iya amay. Amo man sa aton kaangtanan sa Dios. Kon matuod gid nga ginaapresyar naton ang aton ginatun-an nahanungod kay Jehova kag ang gugma nga ginapakita niya sa aton, magapakita kita sing mabaskog nga handum nga ipabutyag ang aton kaugalingon sa iya paagi sa pangamuyo.—1 Juan 4:16-18.
5 Kon nagapalapit kita sa Labing Mataas nga Dios, dapat kita mangin matinahuron, kag indi magkabalaka nahanungod sa sibu nga mga tinaga nga gamiton naton. (Hebreo 4:16) Makapalapit kita kay Jehova sa tanan nga tion. Kag daw ano nga pribilehiyo nga sarang naton ‘maula ang aton tagipusuon’ sa Dios paagi sa pangamuyo! (Salmo 62:8) Ang apresasyon kay Jehova nagadul-ong sa isa ka malapit nga kaangtanan sa iya, kaangay sang natigayon sang matutom nga tawo nga si Abraham subong abyan sang Dios. (Santiago 2:23) Apang kon nagapangamuyo sa Soberanong Ginuo sang uniberso, dapat naton sundon ang iya mga ginapatuman tuhoy sa pagpalapit sa iya.
MGA TULUMANON SA PAGPALAPIT SA DIOS
6, 7. Bisan pa wala ginapabayaran sang Dios ang aton mga pangamuyo, ano ang ginapatuman niya sa aton kon nagapangamuyo kita?
6 Kinahanglan bala ang kuwarta sa pagpalapit sa Dios? Madamo nga tawo ang nagabayad sa klero agod mangamuyo para sa ila. Ang iban nagapati pa gani nga ang ila mga pangamuyo pagapamatian suno sa kadakuon sang ila donasyon. Apang, wala nagasiling ang Pulong sang Dios nga kinahanglan naton ang halad nga kuwarta agod makapalapit kita kay Jehova paagi sa pangamuyo. Ang iya espirituwal nga mga aman kag ang mga pagpakamaayo sang isa ka kaangtanan sa iya paagi sa pangamuyo matigayon nga wala sing bayad.—Isaias 55:1, 2.
7 Ano, nian, ang ginapatuman? Kinahanglanon ang nagakaigo nga panimuot sang tagipusuon. (2 Cronica 6:29, 30; Hulubaton 15:11) Sa aton tagipusuon dapat kita magpakita sing pagtuo kay Jehova nga Dios subong amo ang “Manugpamati sang pangamuyo” kag “ang manugpadya sadtong hanuot nga nagapangita sa iya.” (Salmo 65:2; Hebreo 11:6) Dapat man kita maghupot sing mapainubuson nga tagipusuon. (2 Hari 22:19; Salmo 51:17) Sa isa sang iya mga ilustrasyon, ginpakita ni Jesucristo nga sang nagpalapit sa Dios napamatud-an nga mas matarong ang isa ka mapainubuson nga manugsukot sing buhis nga may kubos nga tagipusuon sangsa isa ka matinaastaason nga Fariseo. (Lucas 18:10-14) Kon magpalapit kita sa Dios sa pangamuyo, dapat naton dumdumon nga “ang tagsatagsa nga bugalon sa tagipusuon kangil-aran kay Jehova.”—Hulubaton 16:5.
8. Kon luyag naton nga sabton sang Dios ang aton mga pangamuyo, dapat naton tinluan ang aton kaugalingon gikan sa ano?
8 Kon handum naton nga sabton sang Dios ang aton mga pangamuyo, dapat naton tinluan ang aton kaugalingon gikan sa makasasala nga paggawi. Sang ginpalig-on ni disipulo Santiago ang iban nga magpalapit sa Dios, nagdugang sia: “Tinlui ang inyo mga kamot, kamo nga mga makasasala, kag putlia ang inyo mga tagipusuon, kamo nga mga indi makapamat-od.” (Santiago 4:8) Bisan ang mga makasasala sarang makapakighidait kay Jehova kon maghinulsol sila kag biyaan ang ila anay dalanon sang pagkabuhi. (Hulubaton 28:13) Indi kita makaatubang kay Jehova kon nagapakunokuno lamang kita nga natinluan na naton ang aton dalanon. “Ang mga mata ni Jehova nagatamod sa mga matarong, kag ang iya mga dulunggan nabuksan sa ila mga pangamuyo; apang ang nawong ni Jehova batok sa nagahimo sing malaut nga mga butang,” siling sang Pulong sang Dios.—1 Pedro 3:12.
9. Paagi kay sin-o dapat kita magpalapit kay Jehova, kag ngaa?
9 Ang Biblia nagasiling: “Wala sing tawo nga matarong sa duta nga nagahimo sing maayo kag wala nagapakasala.” (Manugwali 7:20) Busa, mahimo mamangkot ikaw: ‘Paano, nian, kita makapalapit kay Jehova nga Dios?’ Ang Biblia nagasabat: “Kon ang bisan sin-o makasala, may mananabang kita upod sa Amay, si Jesucristo, nga matarong.” (1 Juan 2:1) Bisan pa makasasala kita, makapalapit kita sa Dios nga may kahilwayan sa paghambal paagi kay Jesucristo, nga napatay subong isa ka gawad para sa aton. (Mateo 20:28) Sia lamang ang alagyan agod makapalapit kita kay Jehova nga Dios. (Juan 14:6) Indi kita dapat maghunahuna nga makabenepisyo kita sa balor sang halad nga gawad ni Jesus bisan pa kon hungod kita nga magpakasala. (Hebreo 10:26) Apang, kon ginahimo naton ang aton labing masarangan nga likawan ang malaut kag sa gihapon nagapakasala kita kon kaisa, makahinulsol kita kag makapangayo sa Dios sing kapatawaran. Kon palapitan naton sia nga may mapainubuson nga tagipusuon, pamatian niya kita.—Lucas 11:4.
MGA KAHIGAYUNAN SA PAGPAKIGHAMBAL SA DIOS
10. Kon tuhoy sa pangamuyo, paano naton mailog si Jesus, kag ano ang pila ka kahigayunan para sa pribado nga pagpangamuyo?
10 Ginpabilihan ni Jesucristo sing daku gid ang iya kaangtanan kay Jehova. Busa, nagpain sia sing tion sa pagpakighambal sa Dios sa pribado nga pagpangamuyo. (Marcos 1:35; Lucas 22:40-46) Maayo nga ilugon naton ang huwaran ni Jesus kag mangamuyo sa Dios sing tayuyon. (Roma 12:12) Nagakaigo nga sugdan ang adlaw paagi sa mga pulong sang pangamuyo, kag antes magtulog, pasalamatan naton si Jehova sa aton nahimuan sa bug-os nga adlaw. Sa sulod sang adlaw, ugalia nga magpalapit sa Dios “sa tagsa ka kahigayunan.” (Efeso 6:18) Mahimo gani kita makapangamuyo sing hipos sa aton tagipusuon, kay nahibaluan naton nga si Jehova makabati sa aton. Ang pagpakighambal sa Dios sing pribado nagabulig sa aton sa pagpabakod sang aton kaangtanan sa iya, kag ang pagpangamuyo kay Jehova sa adlaw-adlaw nagabulig sa aton nga mangin suod pa sa iya.
11. (a) Ngaa dapat mangamuyo sing tingob ang mga pamilya? (b) Ano ang buot silingon kon magsiling ka sing “Amen” sa katapusan sang isa ka pangamuyo?
11 Ginapamatian man ni Jehova ang mga pangamuyo nga ginahalad para sa mga grupo sang mga tawo. (1 Hari 8:22-53) Makapalapit kita sa Dios subong isa ka pamilya, nga ginapangunahan sang ulo sang panimalay. Nagapabakod ini sa higot sang pamilya, kag si Jehova mangin matuod sa kabataan samtang ginapamatian nila ang ila mga ginikanan nga nagapangamuyo sing mapainubuson sa Dios. Ano kon ang isa nagatiglawas sa isa ka grupo sa pangamuyo, ayhan sa isa ka miting sang mga Saksi ni Jehova? Kon lakip kita sa tumalambong, mamati kita sing maayo agod nga sa katapusan sang pangamuyo, bug-os tagipusuon nga makasiling kita sing “Amen,” nga nagakahulugan sing “Kabay pa.”—1 Corinto 14:16.
MGA PANGAMUYO NGA GINAPAMATIAN NI JEHOVA
12. (a) Ngaa wala ginasabat sang Dios ang iban nga mga pangamuyo? (b) Ngaa indi kita dapat magkonsentrar lamang sa personal nga mga kinahanglanon kon nagapangamuyo?
12 Ang iban mahimo magabatyag nga ang ila mga pangamuyo wala ginasabat sang Dios bisan pa nagapangamuyo sila sa iya paagi kay Cristo. Apang, si apostol Juan nagsiling: “Bisan ano man nga butang nga pangayuon naton suno sa kabubut-on [sang Dios], nagapamati sia sa aton.” (1 Juan 5:14) Gani, nian, dapat kita mangayo suno sa kabubut-on sang Dios. Sanglit interesado sia sa aton espirituwal nga kaayuhan, ang bisan ano nga nagaapektar sang aton espirituwalidad isa ka nagakaigo nga tema para sa pangamuyo. Dapat naton pamatukan ang pagsulay nga ang hunahunaon lang amo ang pisikal nga mga kinahanglanon. Halimbawa, samtang nagakaigo nga mangamuyo para sa paghangop kag kaisog sa pag-atubang sa balatian, ang kabalaka sa panglawas indi dapat magtabon sa espirituwal nga mga interes. (Salmo 41:1-3) Bangod nahibaluan niya nga sobra ang iya kabalaka sa iya panglawas, ang isa ka Cristianong babayi nangayo sing bulig kay Jehova nga makatigayon sia sing nagakaigo nga pagtamod sa iya balatian. Subong resulta, ang iya mga problema sa panglawas nabuhinan, kag ginbatyag niya nga ginhatagan sia sing “gahom nga labaw sa kinaandan.” (2 Corinto 4:7) Ang iya handum nga makabulig sa iban sa espirituwal nagbaskog, kag sia nangin bug-os tion nga manugwali sang Ginharian.
13. Subong ginapakita sa Mateo 6:9-13, ano ang pila ka nagakaigo nga mga tema nga malakip naton sa aton mga pangamuyo?
13 Ano ang mahimo ilakip naton sa aton mga pangamuyo agod nga mahamuot si Jehova sa pagpamati sa sini? Gintudluan ni Jesucristo ang iya mga disipulo kon paano mangamuyo. Sa modelo nga pangamuyo nga narekord sa Mateo 6:9-13, ginpahamtang niya ang isa ka sulundan sang mga tema nga nagakaigo nga mapangamuyo naton. Ano dapat ang una nga kabalak-an naton sa aton mga pangamuyo? Ang ngalan ni Jehova nga Dios kag ang Iya Ginharian amo dapat ang nagapanguna. Nagakaigo nga mangayo kita sang aton materyal nga mga kinahanglanon. Importante man nga mangayo sing kapatawaran sa aton mga sala kag sing kaluwasan gikan sa mga pagsulay kag sa malaut nga isa, si Satanas nga Yawa. Wala ginhandum ni Jesus nga ining pangamuyo ipangadi naton ukon sulit-suliton, nga wala ginabinagbinag ang kahulugan sini. (Mateo 6:7) Ano nga sahi sang kaangtanan ang mangin resulta kon ang isa ka bata nagagamit sing pareho nga mga tinaga sa kada tion nga makighambal sia sa iya amay?
14. Luwas sa mga pangabay, ano nga mga pangamuyo ang dapat naton ihalad?
14 Luwas sa mga pangabay kag tinagipusuon nga mga pag-ampo, dapat man kita maghalad sing mga pangamuyo sang pagdayaw kag pagpasalamat. (Salmo 34:1; 92:1; 1 Tesalonica 5:18) Makapangamuyo man kita para sa iban. Ang mga pangamuyo tuhoy sa aton espirituwal nga kauturan nga mga lalaki kag mga babayi nga nagaantos ukon ginahingabot nagapakita sang aton interes sa ila, kag nahamuot si Jehova sa pagpamati sa aton nga nagapabutyag sina nga kabalaka. (Lucas 22:32; Juan 17:20; 1 Tesalonica 5:25) Sa katunayan, si apostol Pablo nagsulat: “Dili kamo mabalaka sa bisan anong butang, kundi sa tagsa ka butang sa pangamuyo kag pag-ampo nga may pagpasalamat ipakilala sa Dios ang inyo mga pangabay; kag ang paghidait sang Dios nga nagalabaw sa tanan nga painuino magatipig sang inyo mga tagipusuon kag sang inyo ikasarang sa paghunahuna paagi kay Cristo Jesus.”—Filipos 4:6, 7.
MAGPADAYON SA PAGPANGAMUYO
15. Ano ang dapat naton dumdumon kon ang aton mga pangamuyo daw wala ginasabat?
15 Bisan pa nagauswag ang imo ihibalo tuhoy sa Dios, mahimo batyagon mo nga ang imo mga pangamuyo kon kaisa wala ginasabat. Mahimo nga subong sini bangod indi pa tion sang Dios nga sabton ang espisipiko nga pangamuyo. (Manugwali 3:1-9) Mahimo nga tugutan ni Jehova ang isa ka kahimtangan nga magpadayon sa sulod sang isa ka tion, apang ginasabat niya ang mga pangamuyo kag nahibaluan niya ang labing maayo nga tion sa paghimo sini.—2 Corinto 12:7-9.
16. Ngaa dapat kita magpadayon sa pagpangamuyo, kag paano ang paghimo sini makaapektar sang aton kaangtanan sa Dios?
16 Ang aton padayon nga pagpangamuyo nagapahayag sang aton tinagipusuon nga interes sa aton ginahambal sa Dios. (Lucas 18:1-8) Halimbawa, mahimo ginapangabay naton si Jehova nga buligan kita sa paglandas sang pila ka kaluyahon. Paagi sa padayon nga pagpangamuyo kag paghikot nahisuno sa aton mga pangabay, ginapakita naton ang aton pagkasinsero. Dapat kita mangin espisipiko kag bunayag sa aton mga pangabay. Importante labi na nga mangamuyo sing hugot kon ginasulay kita. (Mateo 6:13) Samtang padayon kita nga nagapangamuyo kag sa amo man nga tion ginatinguhaan naton nga kontrolon ang aton makasasala nga mga sugyot, makita naton kon paano nagabulig si Jehova. Magapalig-on ini sang aton pagtuo kag sang aton kaangtanan sa iya.—1 Corinto 10:13; Filipos 4:13.
17. Paano kita magabenepisyo gikan sa mapangamuyuon nga panimuot sa pag-alagad sa Dios?
17 Paagi sa pagpalambo sing mapangamuyuon nga panimuot sa paghalad sing sagrado nga pag-alagad kay Jehova nga Dios, marealisar naton nga wala kita nagaalagad sa iya sa aton kaugalingon nga kusog. Si Jehova ang nagahatag sa aton sing kusog agod makaalagad kita sa iya. (1 Corinto 4:7) Ang pagkilala sini magabulig sa aton nga mangin mapainubuson kag magapalambo sang aton kaangtanan sa iya. (1 Pedro 5:5, 6) Huo, may malig-on kita nga mga rason nga magpadayon sa pagpangamuyo. Ang aton hanuot nga mga pangamuyo kag hamili nga ihibalo kon paano magpalapit sa aton mahigugmaon langitnon nga Amay magahimo sang aton kabuhi nga makalilipay gid.
ANG PAGPAKIG-ANGOT KAY JEHOVA INDI LAMANG ISA KA LINYA
18. Paano kita makapamati sa Dios?
18 Kon luyag naton nga pamatian sang Dios ang aton mga pangamuyo, dapat kita mamati sa iya ginasiling. (Zacarias 7:13) Wala na sia nagapadala sang iya mga mensahe paagi sa ginbugnaan nga mga manalagna kag sa pagkamatuod wala sia nagagamit sing espiritistiko nga mga pamaagi. (Deuteronomio 18:10-12) Apang makapamati kita sa Dios paagi sa pagtuon sang iya Pulong, ang Biblia. (Roma 15:4; 2 Timoteo 3:16, 17) Subong nga mahimo kinahanglan naton tun-an ang pagkaluyag sa sabor sang pisikal nga pagkaon nga maayo sa aton lawas, ginapalig-on kita nga “magpatubo sing kalangkag sa walay simbog nga gatas nga iya sang pulong.” Palambua ang huyog sa espirituwal nga pagkaon paagi sa pagbasa sang Pulong sang Dios adlaw-adlaw.—1 Pedro 2:2, 3; Binuhatan 17:11.
19. Ano ang benepisyo sang pagpamalandong sa imo ginabasa sa Biblia?
19 Pamalandungi ang imo ginabasa sa Biblia. (Salmo 1:1-3; 77:11, 12) Nagakahulugan ina nga binagbinagon ang materyal. Mahimo mo ipaanggid ini sa pagtunaw sang pagkaon. Sarang mo matunaw ang espirituwal nga pagkaon paagi sa pag-angot sang imo ginabasa sa mga butang nga nahibaluan mo na. Binagbinaga kon paano ang materyal nagaapektar sa imo kabuhi, ukon kon ano ang ginapahayag sini nahanungod sa mga kinaiya kag mga pagpakig-angot ni Jehova. Sa amo, paagi sa personal nga pagtuon, makabaton ikaw sing espirituwal nga pagkaon nga ginaaman ni Jehova. Labi pa ini nga magapasuod sa imo sa Dios kag magabulig sa imo sa pag-atubang sa adlaw-adlaw nga mga problema.
20. Paano ang pagtambong sa Cristianong mga miting nagabulig sa aton sa pagpalapit sa Dios?
20 Makapalapit man ikaw sa Dios paagi sa pagpamati sa iya Pulong nga ginahambalan sa Cristianong mga miting, subong nga ang mga Israelinhon anay namati sing maayo sang magtipon sila agod pamatian ang pagbasa sa publiko sang Kasuguan sang Dios. Ang mga instruktor sadtong tion nagbutang sing kahulugan sa ila pagbasa sing Kasuguan, sa amo ginbuligan nila ang ila mga manugpalamati nga makahangop kag mapahulag sa pag-aplikar sang ila nabatian. Nagdul-ong ini sa daku nga kalipay. (Nehemias 8:8, 12) Gani ugalia ang pagtambong sa mga miting sang mga Saksi ni Jehova. (Hebreo 10:24, 25) Magabulig ini sa imo nga mahangpan kag iaplikar ang ihibalo gikan sa Dios sa imo kabuhi kag magadala sa imo sing kalipay. Ang pagpabilin nga isa ka bahin sang bug-os kalibutan nga Cristianong paghiliutod magabulig sa imo sa pagpabilin nga malapit kay Jehova. Kag subong sang makita pa naton, makasapo ikaw sing matuod nga kalig-unan sa tunga sang katawhan sang Dios.
TILAWI ANG IMO IHIBALO
Ngaa dapat ka magpalapit kay Jehova?
Ano ang pila ka tulumanon sa pagpalapit sa Dios?
Ano ang malakip mo sa imo mga pangamuyo?
Ngaa dapat ka magpadayon sa pagpangamuyo?
Paano ikaw makapamati kay Jehova karon?
[Mga Pamangkot sa Pagtinuon]
[Bug-os pahina nga piktyur sa pahina 157]
