Kapitulo 1

Mahimo Mangin Malipayon ang Imo Palaabuton!

1, 2. Ano ang luyag sang imo Manunuga para sa imo?

 ISA ka hugot nga hakos gikan sa isa nga imo hinigugma. Mabaskog nga kinadlaw samtang nagakinaon kamo nga mga mag-abyan. Ang kahamuot samtang ginatan-aw mo ang imo kabataan nga malipayon nga nagahinampang. Ang mga tinion kaangay sini makalilipay nga mga tinion sa kabuhi. Apang, para sa madamo, ang kabuhi daw paagisod nga nagahatag sa isa sing mabug-at nga mga problema. Kon amo sina ang nagakatabo sa imo, magpakaisog.

² Kabubut-on sang Dios nga magaagom ikaw sing dayon nga kalipay sa idalom sang labing maayong mga kahimtangan sa matahom nga mga palibot. Indi ini damgo lamang, kay ginatanyag gid sa imo sang Dios ang yabi sa sinang malipayon nga palaabuton. Ina nga yabi amo ang ihibalo.

3. Ano nga ihibalo ang yabi sa kalipay, kag ngaa mapat-od naton nga sarang maaman sang Dios ina nga ihibalo?

³ Ginapatuhuyan naton ang isa ka pinasahi nga sahi sang ihibalo nga labaw gid sangsa tawhanon nga kaalam. Amo ini “ang ihibalo sang Dios.” (Hulubaton 2:⁠5) Halos 2,000 ka tuig ang nagligad, ang isa ka manunulat sang Biblia nagsiling: “Ang tagsa ka balay ginatukod sang isa, apang ang nagtukod sang tanan nga butang amo ang Dios.” (Hebreo 3:⁠4) Hunahunaa lamang ang ihibalo sang Magbubuhat sang tanan nga butang! Ang Biblia nagasiling nga ginaisip kag ginahingalanan sang Dios ang tanan nga bituon. Makahalawhaw gid ina hunahunaon, kay sa aton lamang galaksiya ginatos ka bilyon ang mga bituon, kag ang mga astronomo nagasiling nga may yara mga isa ka gatos ka bilyon ka galaksiya! (Salmo 147:⁠4) Nahibaluan man sang Dios ang tanan nahanungod sa aton, gani sin-o pa ang makahatag sing mas maayo  nga mga sabat sa importante nga mga pamangkot sang kabuhi?​—⁠Mateo 10:⁠30.

4. Ngaa dapat naton paabuton nga ang Dios mag-aman sing mga instruksion sa pagtuytoy sa aton, kag ano nga libro ang nagahatag sining kinahanglanon?

⁴ Handurawa ang duha ka tawo nga nagatinguha sa pagkay-o sang ila awto. Sa kapaslawan, nangampo ang isa ka tawo. Ang isa naman kalma nga naglubad sang problema, ginpaandar ang makina, kag nagyuhum sang mag-andar ini kag nagdalagan sing maayo. Indi ka mabudlayan sa pagpakot kon sin-o sa duha ka tawo ang may libro sang instruksion halin sa manughimo. Makatarunganon bala nga ang Dios mag-aman sing mga instruksion sa pagtuytoy sa aton sa kabuhi? Subong mahimo nahibaluan mo na, amo gid sina ang ginapangangkon sang Biblia​—⁠isa ka libro sang instruksion kag panuytoy halin sa aton Manunuga, nga gintuyo agod magpaalinton sing ihibalo tuhoy sa Dios.​—⁠2 Timoteo 3:⁠16.

5. Daw ano ka bilidhon ang ihibalo nga ginaunod sang Biblia?

⁵ Kon matuod ang pangangkon sang Biblia, hunahunaa lamang kon daw ano nga mga bahandi sang ihibalo ang ginaunod sina nga libro! Sa Hulubaton 2:​1-5, ginapalig-on kita nga pangitaon ang kaalam, kutkuton ini subong sang himuon naton sa isa ka natago nga bahandi​—⁠indi sa duta sang tawhanon nga panghunahuna, kundi sa Pulong sang Dios mismo. Kon diri kita mangita, aton “masapwan ang ihibalo sang Dios.” Sanglit nahangpan sang Dios ang aton mga limitasyon kag mga kinahanglanon, nagahatag sia sa aton sing instruksion nga magabulig sa aton para sa malinong, malipayon nga pagkabuhi. (Salmo 103:14; Isaias 48:17) Dugang pa, ang ihibalo sang Dios nagatanyag sa aton sing makakulunyag nga maayong balita.

KABUHI NGA WALAY KATAPUSAN!

6. Ano nga pasalig ang ginhatag ni Jesucristo tuhoy sa ihibalo sang Dios?

⁶ Ang bantog sa maragtas nga si Jesucristo maathag nga naglaragway sini nga bahin sang ihibalo sang Dios. Sia nagsiling: “Ini nagakahulugan sing kabuhi nga walay katapusan, ang pagkuha nila sing ihibalo tuhoy sa imo, ang lamang matuod nga Dios, kag tuhoy sa isa nga imo ginpadala, si Jesucristo.” (Juan 17:⁠3) Hunahunaa lamang​—⁠ihibalo nga nagadul-ong sa kabuhi nga walay katapusan! 

7. Ano ang ebidensia nga wala gintuyo sang Dios nga mapatay kita?

⁷ Indi pagsikwaya dayon ang kabuhi nga walay katapusan subong isa ka damgo lamang. Sa baylo, tan-awa kon paano ginhimo ang tawhanon nga lawas. Makadalayaw nga gindesinyo ini sa pagtilaw, sa pagpamati, sa pagpanimaho, sa pagtan-aw, kag sa pagbatyag. Madamo gid nga butang sa duta ang nagapahalipay sa aton mga igbalatyag​—⁠manamit nga kalan-on, makalilingaw nga ambahanon sang mga pispis, mahumot nga mga bulak, matahom nga talan-awon, makalilipay nga mga kaupod! Kag ang aton makatilingala nga utok labaw pa sa isa ka superyor nga kompyuter, kay paagi sa sini nagabatyag kita sing pag-apresyar kag kalipay sa sining tanan nga butang. Sa banta mo ayhan luyag sang aton Manunuga nga mapatay kita kag madula ini tanan? Indi bala kapin ka makatarunganon ihinakop nga luyag niya nga magkabuhi kita sing malipayon kag sing dayon? Ti, amo sina ang mahimo mangin kahulugan para sa imo sang ihibalo sang Dios.

KABUHI SA PARAISO

8. Ano ang ginasiling sang Biblia tuhoy sa palaabuton sang katawhan?

⁸ Ang ginasiling sang Biblia tuhoy sa palaabuton sang duta kag sang katawhan mahimo masumaryo sa isa ka tinaga​—⁠Paraiso! Ginpatuhuyan ini ni Jesucristo sang nagsiling sia sa isa ka nagatagumatayon nga tawo: “Mangin kaupod ko ikaw sa Paraiso.” (Lucas 23:43) Wala sing duhaduha nga ang pagsambit sa Paraiso nagpahanumdom sa sadto nga tawo sang makalilipay nga kahimtangan sang aton unang mga ginikanan, sanday Adan kag Eva. Sang gintuga sila sang Dios, himpit sila kag nagakabuhi sa isa ka tulad-hardin nga parke nga gindesinyo kag ginhimo sang Manunuga. Nagakaigo gid nga gintawag yadto nga hardin sang Eden, nga nagakahulugan sing kalipay.

9. Ano ang kahimtangan anay sang pagkabuhi sa orihinal nga Paraiso?

⁹ Daw ano ka makalilipay yadto nga hardin! Isa gid yadto ka matuod nga paraiso. Sa tunga sang matahom nga kakahuyan sini amo ang mga kahoy nga nagapamunga sing manamit nga mga prutas. Samtang ginalibot nanday Adan kag Eva ang ila puluy-an, nagainom gikan sa matinlo nga tubig sini, kag nagakuha sing mga prutas gikan sa kakahuyan sini, wala sila sing rason nga mabalaka ukon mahangawa. Bisan gani ang mga sapat indi makatalagam, kay ginpahamtang sang Dios ang lalaki kag  ang iya asawa subong amo ang mahigugmaon nga manugdumala sa ila tanan. Dugang pa, mapagros ang panglawas sang unang mag-asawa. Kon magpabilin sila nga matinumanon sa Dios, nagahulat sa ila ang dayon kag malipayon nga palaabuton. Ginhatagan sila sing makaalayaw nga hilikuton sa pag-atipan sang ila matahom nga Paraiso nga puluy-an. Dugang pa, ginsugo sang Dios sanday Adan kag Eva nga “tugbon ang duta kag gamhan ini.” Sila kag ang ila mga anak magapasangkad sang Paraiso tubtob ang aton bug-os nga planeta mangin isa ka duog sang katahom kag kalipay.​—⁠Genesis 1:⁠28.

10. Sang ginpatuhuyan ni Jesus ang Paraiso, ano ang buot niya silingon?

¹⁰ Apang, sang ginsambit ni Jesus ang Paraiso, wala niya ginpangabay ang nagatagumatayon nga tawo nga hunahunaon ang isa ka malayo nga nagligad. Indi, ang ginapatuhuyan ni Jesus amo ang palaabuton! Nahibaluan niya nga ang aton bug-os dutan-on nga puluy-an mangin isa ka paraiso. Sa amo, tumanon sang Dios ang iya orihinal nga katuyuan para sa katawhan kag para sa aton duta. (Isaias 55:​10, 11) Huo, ipasag-uli ang Paraiso! Kag ano ang mangin kahimtangan sa sini? Tuguti ang Pulong sang Dios, ang Balaan nga Biblia, sa pagsabat.

ANG KABUHI SA NAPASAG-ULI NGA PARAISO

11. Sa napasag-uli nga Paraiso, ano ang matabo sa balatian, pagtigulang, kag kamatayon?

¹¹ Wala na sing balatian, pagtigulang, kag kamatayon. “Sa amo nga tion ang mga mata sang mga bulag pamuklaton, kag ang mga dulunggan sang mga bungol mabuksan. Sa amo nga tion ang piang magalumpat subong sang usa, kag ang dila sang apa magasinggit sa kalipay.” (Isaias 35:​5, 6) “Ang Dios mismo magaupod sa [katawhan]. Kag pahiran niya ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa. Ang nahaunang mga butang nagtaliwan.”​—⁠Bugna 21:​3, 4.

12. Ngaa mapat-od naton nga wala na sing krimen, kasingki, kag kalautan sa palaabuton nga Paraiso?

¹² Madula sing dayon ang krimen, kasingki, kag kalautan. “Ang mga manughikot sing malaut pagautdon . . . Sa diutay pa nga tion, kag ang malauton wala na . . . Wala na sia didto. Apang ang mga mahagop magapanag-iya sang duta.” (Salmo 37:​9-11) “Tuhoy  sa mga malauton, sila pagautdon gikan sa duta gid; kag tuhoy sa mga maluib, sila pagagabuton sa sini.”​—⁠Hulubaton 2:⁠22.

13. Paano paluntaron sang Dios ang paghidait?

¹³ Ang paghidait magaluntad sa bug-os nga duta. “Sia [Dios] nagapatunong sang mga inaway tubtob sa ukbong sang duta. Ginabali niya ang pana kag ginautod niya ang bangkaw.” (Salmo 46:⁠9) “Magalambo ang matarong, kag ang bugana nga paghidait tubtob nga wala na ang bulan.”​—⁠Salmo 72:⁠7.

14, 15. Ano ang ginasiling sang Biblia tuhoy sa kabalayan, trabaho, kag kalan-on sa napasag-uli nga Paraiso?

¹⁴ Mangin permanente ang kabalayan kag mangin makaalayaw ang trabaho. “Magapatindog sila sing mga balay kag sila ang magapuyo . . . Indi sila magpatindog kag iban ang magapuyo; indi sila magtanom kag iban ang magakaon. Kay subong sang mga adlaw sang kahoy mangin amo ang mga adlaw sang akon katawhan; kag ang akon mga pinili magakalipay sing bug-os sa binuhatan sang ila mga kamot. Indi sila magpangabudlay sa walay pulos, ukon magpanganak nga sa kalalat-an.”​—⁠Isaias 65:​21-23.

¹⁵ Mangin bugana ang makapapagros nga kalan-on. “May bugana nga uyas sa duta; sa putukputukan sang kabukiran magahapayhapay ini.” (Salmo 72:16) “Ang duta gid magahatag sang iya patubas; ang Dios, ang aton Dios, magapakamaayo sa aton.”​—⁠Salmo 67:⁠6.

16. Ngaa mangin makalilipay ang kabuhi sa Paraiso?

¹⁶ Ang kabuhi nga walay katapusan sa isa ka paraiso nga duta mangin makalilipay. “Ang mga matarong magapanag-iya sang duta, kag magapuyo sila diri sing dayon.” (Salmo 37:29) “Ang kamingawan kag ang duta nga kigas magakasadya, kag ang desyerto magakalipay kag magapamulak subong sang rosa.”​—⁠Isaias 35:⁠1.

ANG IHIBALO KAG ANG IMO PALAABUTON

17. (a) Ano ang dapat mo himuon kon ang kabuhi sa Paraiso makagalanyat sa imo? (b) Paano naton nahibaluan nga himuon sang Dios ang dalagku nga mga pagbag-o sa duta?

¹⁷ Kon ang kabuhi sa Paraiso makagalanyat sa imo, indi pagtuguti ang bisan ano nga magpugong sa imo sa pagtigayon sing ihibalo gikan sa Dios. Ginahigugma niya ang katawhan kag himuon niya ang mga pagbag-o nga kinahanglanon agod mangin isa ka paraiso ang duta. Kon ikaw man gani may gahom sa pagtapos  sang pag-antos kag inhustisya nga tuman ka lapnag sa kalibutan, indi mo bala paghimuon ina? Indi bala naton paabuton nga amo man sina ang himuon sang Dios? Ang matuod, ang Biblia maathag nga nagapamulong tuhoy sa tion nga dulaon sang Dios ining magamo nga sistema kag islan ini sing isa ka himpit kag matarong nga paggahom. (Daniel 2:44) Apang indi lamang ini ang ginasugid sa aton sang Biblia. Ginapakita man sini sa aton kon paano kita maluwas pasulod sa ginsaad nga bag-ong kalibutan sang Dios.​—⁠2 Pedro 3:13; 1 Juan 2:⁠17.

18. Ano ang mahimo para sa imo karon sang ihibalo gikan sa Dios?

¹⁸ Daku man ang imo mabenepisyo gikan sa ihibalo sang Dios karon mismo. Ang pinakamadalom kag makatulublag gid nga mga pamangkot sang kabuhi ginasabat sa Biblia. Ang pagbaton sa panuytoy sini magabulig sa imo sa pagpalambo sing pagpakig-abyan sa Dios. Daw ano ina ka halangdon nga pribilehiyo! Kag paagi sa sini matigayon mo ang paghidait nga Dios lamang ang makahatag. (Roma 15:​13, 33) Samtang nagasugod ikaw sa pagkuha sining importante nga ihibalo, ginasugdan mo ang labing importante kag makapaladya nga paghimud-os sa imo kabuhi. Indi mo gid paghinulsulan ang pagtigayon sing ihibalo gikan sa Dios nga nagadul-ong sa kabuhi nga walay katapusan.

19. Anong pamangkot ang binagbinagon naton sa masunod nga kapitulo?

¹⁹ Ginpatuhuyan naton ang Biblia subong amo ang libro nga nagaunod sing ihibalo sang Dios. Apang, paano naton nahibaluan nga indi ini isa ka libro sang tawhanon nga kaalam, kundi labaw pa? Binagbinagon naton ini nga pamangkot sa masunod nga kapitulo.

TILAWI ANG IMO IHIBALO

Ngaa ang ihibalo gikan sa Dios makadul-ong sa imo sa dayon nga kalipay?

Ano ang mangin kahimtangan sang kabuhi sa nagapakari nga dutan-on nga Paraiso?

Ngaa magabenepisyo ka sa pagkuha sing ihibalo gikan sa Dios karon?

[Mga Pamangkot sa Pagtinuon]