Kapitulo 8

Ngaa Ginatugutan Sang Dios ang Pag-antos?

1, 2. Ano sa masami ang reaksion sang mga tawo sa pag-antos sang tawo?

 KON nagabunal ang mga kalamidad, nga nagapangguba sing mga pagkabutang kag nagapangutol sing kabuhi, madamo ang indi makahangop kon ngaa nagakatabo inang grabe nga mga butang. Ang iban ginatublag sang kadakuon, kapintas, kag pagkamahaliton sang krimen kag kasingki. Ikaw man mahimo nagpalibog, ‘Ngaa ginatugutan sang Dios ang pag-antos?’

 ² Bangod wala sila makasapo sing makaalayaw nga sabat sa sining pamangkot, madamo ang nadulaan sing pagtuo sa Dios. Ginabatyag nila nga indi sia interesado sa katawhan. Ang iban nga nagabaton sang pag-antos subong bahin sang kabuhi nagahinakit kag ginabasol ang Dios sa tanan nga kalautan sa katilingban sang tawo. Kon amo sina ang imo ginabatyag, walay duhaduha nga mangin interesado gid ikaw sa ginasiling sang Biblia nahanungod sining mga butang.

ANG PAG-ANTOS INDI HALIN SA DIOS

3, 4. Ngaa mapat-od naton nga ang kalautan kag pag-antos indi halin kay Jehova?

³ Ginapasalig kita sang Biblia nga ang pag-antos nga makita naton sa aton palibot wala maghalin kay Jehova nga Dios. Halimbawa, ang Cristianong disipulo nga si Santiago nagsulat: “Kon sa idalom sang pagtilaw, indi magsiling ang bisan sin-o: ‘Ginasulay ako sang Dios.’ Kay ang Dios indi masulay sa malaut nga mga butang ukon nga sia mismo nagasulay kay bisan sin-o.” (Santiago 1:13) Bangod sina, indi ang Dios ang ginahalinan sang madamo nga kabudlayan nga nagasalot sa katawhan. Wala sia nagadala sing mga pagtilaw sa katawhan agod himuon sila nga nagakabagay para sa kabuhi sa langit, ukon nga ginapaantos niya ang katawhan bangod sang kalautan nga ginhimo nila kuno sa ila nagligad nga kabuhi.​—⁠Roma 6:⁠7.

⁴ Dugang pa, bisan madamong makakulugmat nga mga butang ang ginahimo sa ngalan sang Dios ukon ni Cristo, wala gid ginapahangop sa Biblia nga may isa sa ila nga nahamuot sa sina nga mga buhat. Ang Dios kag si Cristo wala sing labot sa mga nagasiling nga nagaalagad sa ila apang nagapangdaya kag nagapanunto, nagapatay kag nagapang-ati, kag nagahimo sing madamo pa nga mga butang nga nagapaantos sa tawo. Sa katunayan, “ang dalanon sang malauton kangil-aran kay Jehova.” Ang Dios “malayo sa mga malauton.”​—⁠Hulubaton 15:​9, 29.

5. Ano ang pila sang mga kinaiya ni Jehova, kag ano ang ginabatyag niya nahanungod sa iya mga tinuga?

⁵ Ginalaragway sang Biblia si Jehova subong “malulo gid sa pagpalangga kag maluluy-on.” (Santiago 5:11) Nagasiling ini nga “si Jehova mahigugmaon sa katarungan.” (Salmo 37:28;  Isaias 61:⁠8) Indi sia matimaluson. Mainawaon nga ginaatipan niya ang iya mga tinuga kag ginahatagan sila tanan sang kon ano ang maayo gid para sa ila kaayuhan. (Binuhatan 14:​16, 17) Nahimo ina ni Jehova halin pa sang magsugod ang kabuhi sa duta.

ISA KA HIMPIT NGA GINSUGURAN

6. Paano ang pila ka mga leyenda nagapatuhoy sa mga kahimtangan sa tion sang maaga nga bahin sang maragtas sang katawhan?

⁶ Kita tanan naanad na sa pagtan-aw kag sa pagbatyag sing kasakit kag pag-antos. Busa, mahimo mabudlay handurawon ang tion nga wala na sing pag-antos, apang amo sina anay ang kahimtangan sa ginsuguran sang tawhanon nga maragtas. Bisan gani ang mga leyenda sang pila ka mga pungsod nagapatuhoy sa sinang malipayon nga ginsuguran. Sa Griegong mitolohiya, ang una sang “Lima ka Dag-on sang Tawo” gintawag nga “Bulawanon nga Dag-on.” Sadto nga tion ang mga tawo malipayon nga nagakabuhi, wala nagapakabudlay, wala nagaantos, kag hilway sa mga halit sang katigulangon. Ang mga Intsik nagasiling nga sang paggahom sang mitolohiko nga Dalag nga Emperador (Huang-Ti), ang mga tawo nagakabuhi sing malinong, nga may paghiusa bisan gani sa palibot kag sa mapintas nga mga sapat. Ang mga Persiahanon, mga Egiptohanon, mga Tibetano, mga Peruvianhon, kag ang mga Mexicano may leyenda tanan nahanungod sa tion sang kalipay kag kahimpitan sa ginsuguran sang maragtas sang katawhan.

7. Ngaa gintuga sang Dios ang duta kag ang katawhan?

⁷ Ginasulit lamang sang mga mito sang mga pungsod ang pinakadaan nga nasulat nga rekord sang tawhanon nga maragtas, ang Biblia. Ginasugiran kita sini nga ginbutang sang Dios ang unang mag-asawa, sanday Adan kag Eva, sa isa ka paraiso nga gintawag hardin sang Eden kag ginsugo sila: “Magmabungahon kag magbuad kag magtugob sang duta kag magpakaagalon sa sini.” (Genesis 1:28) Ang aton unang mga ginikanan himpit kag may palaabuton nga makita ang bug-os nga duta nga mangin isa ka paraiso nga ginapuy-an sang himpit nga pamilya sang tawo nga nagakabuhi sa dayon nga paghidait kag kalipay.  Amo sina ang katuyuan sang Dios sa pagtuga sang duta kag sang katawhan.​—⁠Isaias 45:⁠18.

ISA KA MALAUT NGA HANGKAT

8. Sanday Adan kag Eva ginpaabot nga tumanon ang ano nga sugo, apang ano ang natabo?

⁸ Agod padayon nga kahamut-an sang Dios, dapat likawan nanday Adan kag Eva ang pagkaon gikan sa “kahoy sang pagkilala sing maayo kag malaut.” (Genesis 2:​16, 17) Kon gintuman lamang nila ang sugo ni Jehova, wala kuntani sing pag-antos nga nagapabudlay sa kabuhi sang tawo. Sa pagtuman sa sugo sang Dios, napakita nila kuntani ang ila gugma kay Jehova kag ang ila katutom sa iya. (1 Juan 5:⁠3) Apang subong sang natun-an naton sa Kapitulo 6, indi amo sini ang natabo. Sa sugyot ni Satanas, nagkaon si Eva sing bunga gikan sa sadto nga kahoy. Sang ulihi, nagkaon man si Adan sing gindumilian nga bunga.

9. Anong hulusayon nga nagadalahig kay Jehova ang ginpautwas ni Satanas?

⁹ Nakita mo bala ang pagkaserioso sang natabo? Ginsalakay ni Satanas ang posisyon ni Jehova subong ang Labing Mataas. Sa pagsiling, “Indi ka mapatay nga totoo,” ginsumpakil sang Yawa ang mga pulong sang Dios, “Mapatay kamo nga totoo.” Ang dugang pa nga ginsiling ni Satanas nagpahangop nga ginlikom ni Jehova kanday Adan kag Eva ang posibilidad nga sila mangin kaangay sa Dios, sa amo wala na nagakinahanglan sa Iya sa pagpamat-od kon ano ang maayo kag malaut. Busa, bangod sang panghangkat ni Satanas nabutang sa duhaduha ang pagkamatarong kag pagkamakatarunganon sang posisyon ni Jehova subong ang Bug-os Uniberso nga Soberano.​—⁠Genesis 2:17; 3:​1-6.

10. Ano ang mga ginpahangop ni Satanas tuhoy sa mga tawo?

¹⁰ Ginpahangop man ni Satanas nga Yawa nga ang katawhan magamatinumanon lamang kay Jehova kon ang pagtuman sa Dios mangin sa ila kaayuhan. Kon sa aton pa, ginduhaduhaan ang integridad sang tawo. Nagsumbong si Satanas nga wala sing tawo ang kinabubut-on nga magmatutom sa Dios. Ining malaut nga panumbungon ni Satanas maathag nga ginapahayag sa kasaysayan sang Biblia nahanungod kay Job, isa ka matutom nga alagad ni Jehova nga nag-antos sing daku nga pagtilaw  sang mga tion antes sang 1600 B.C.E. Kon basahon mo ang una nga duha ka kapitulo sang tulun-an ni Job, mahangpan mo ang kabangdanan sang pag-antos sang tawo kag kon ngaa ginatugutan ini sang Dios.

11. Ano nga sahi sang tawo si Job, apang ano ang panumbungon ni Satanas?

¹¹ Si Job, “isa ka tawo nga himpit kag matarong,” ginsalakay ni Satanas. Una, ginbutangbutangan ni Satanas sing malain nga mga motibo si Job sa pagpamangkot, “Nahadlok bala si Job sa Dios sa wala sing pulos?” Nian, malalangon nga ginpakalain sang Yawa ang Dios kag si Job sa pagsumbong nga ginbakal ni Jehova ang katutom ni Job paagi sa pag-amlig kag pagpakamaayo sa iya. “Apang, sa pagbag-o sang kahimtangan,” panghangkat ni Satanas kay Jehova, “untaya ang imo kamot, palihug, kag tanduga ang tanan nga iya kag tan-awa kon indi ka niya pagsikwayon sa imo nawong.”​—⁠Job 1:​8-11.

12. (a) Anong mga pamangkot ang masabat lamang kon tugutan sang Dios si Satanas nga tilawan si Job? (b) Sa ano nagresulta ang pagtilaw kay Job?

¹² Nagaalagad bala si Job kay Jehova bangod lamang sang tanan nga kaayuhan nga iya nabaton sa Dios? Makabatas bala ang integridad ni Job sa idalom sang pagtilaw? Sa pihak nga bahin, may pagsalig bala si Jehova sa iya alagad nga tugutan sia nga tilawan? Ining mga pamangkot sarang masabat kon tugutan ni Jehova si Satanas nga paantuson si Job sing pinakamabudlay nga pagtilaw. Ang matutom nga dalanon ni Job sa idalom sang pagtilaw nga gintugutan sang Dios, nga ginasaysay sa tulun-an ni Job, nangin isa ka bug-os nga pagbindikar sa pagkamatarong ni Jehova kag sa integridad sang tawo.​—⁠Job 42:​1, 2, 12.

13. Paano kita nadalahig sang natabo sa Eden kag kay Job?

¹³ Apang, ang natabo sa hardin sang Eden kag sa tawo nga si Job may madalom pa nga kahulugan. Ang mga hulusayon nga ginpautwas ni Satanas nagadalahig sa tanan nga katawhan, lakip kita karon. Ang ngalan sang Dios ginpasipalahan, kag ginhangkat ang iya pagkasoberano. Ginduhaduhaan ang pagkamatarong sang tinuga sang Dios, ang tawo. Ining mga hulusayon dapat husayon. 

KON PAANO HUSAYON ANG MGA HULUSAYON

14. Kon ginaatubang sang isa ka malaut nga hangkat, ano ang mahimo nga himuon sang isa ka ginasumbong nga tawo?

¹⁴ Subong ilustrasyon lamang, ibutang ta nga isa ikaw ka mahigugmaon nga ginikanan nga may pila ka mga anak sa isa ka malipayon nga pamilya. Pananglit ang isa sang imo mga kaingod nagpalapta sing binutig, nga ikaw kuno isa ka malain nga ginikanan. Ano kon magsiling ang kaingod nga ang imo mga anak wala nagahigugma sa imo, nga sila nagaunong lamang sa imo bangod wala na sila sing makadtuan, kag nga mahalin sila kon may magbulig sa ila. ‘Binuang!’ mahimo isiling mo. Huo, apang paano mo pamatud-an ini? Mahimo nga maakig ang iban nga mga ginikanan. Wala labot nga magatuga ini sing dugang pa nga mga problema, ining masingki nga reaksion magapamatuod lamang sa binutig. Ang makaalayaw nga paagi sa paglubad sining problema amo ang paghatag sing kahigayunan sa manugsumbong  nga pamatud-an ang iya pangangkon kag para sa imo mga anak nga magtestigo nga ginahigugma nila ikaw sing sinsero.

15. Paano nagdesisyon si Jehova nga atubangon ang panghangkat ni Satanas?

¹⁵ Si Jehova kaangay sang mahigugmaon nga ginikanan. Sanday Adan kag Eva mahimo mapaanggid sa mga anak, kag si Satanas nagabagay sa papel sang butigon nga kaingod. Maalamon nga wala paglaglaga sang Dios sanday Satanas, Adan, kag Eva sa gilayon kundi gintugutan ining mga makasasala sa pagkabuhi pa sa makadali. Naghatag ini sa aton unang mga ginikanan sing tion nga sugdan ang tawhanon nga pamilya, kag naghatag ini sa Yawa sing kahigayunan nga pamatud-an kon bala matuod ang iya pangangkon agod mahusay ang mga hulusayon. Apang, halin sa ginsuguran, nahibaluan sang Dios nga ang iban nga mga tawo magamatutom sa iya kag sa amo magapamatuod sa Yawa nga butigon. Mapinasalamaton gid kita nga si Jehova padayon nga nagapakamaayo kag nagabulig sa mga nagahigugma sa iya!​—⁠2 Cronica 16:9; Hulubaton 15:⁠3.

ANO ANG NAPAMATUD-AN?

16. Paano napaidalom sa gahom ni Satanas ang kalibutan?

¹⁶ Sa halos kabug-usan sang tawhanon nga maragtas, nangin hilway gid si Satanas sa pagpadihot sing mga plano sa paggahom sa katawhan. Lakip sa iban nga mga butang, gin-impluwensiahan niya ang politikanhon nga mga kagamhanan kag ginsakdag niya ang mga relihion nga sing malalangon nagapatuhoy sing pagsimba sa iya sa baylo nga kay Jehova. Sa amo ang Yawa nangin “ang dios sining sistema sang mga butang,” kag ginatawag sia nga “manuggahom sining kalibutan.” (2 Corinto 4:4; Juan 12:31) Sa pagkamatuod, “ang bug-os nga kalibutan yara sa gahom sang isa nga malauton.” (1 Juan 5:19) Nagakahulugan bala ini nga napamatud-an ni Satanas ang iya pangangkon nga sarang niya mabuyok ang tanan nga katawhan pahilayo kay Jehova nga Dios? Wala sa pagkamatuod! Samtang ginatugutan si Satanas sa pagluntad, naghulag si Jehova sa pagtuman sang iya mismo katuyuan. Ano, nian, ang ginapahayag sang Biblia tuhoy sa pagtugot sang Dios sa kalautan?

17. Ano ang dapat naton tandaan kon tuhoy sa kabangdanan sang kalautan kag pag-antos?

 ¹⁷ Ang kalautan kag pag-antos wala nagahalin kay Jehova. Sanglit si Satanas amo ang manuggahom sining kalibutan kag ang dios sining sistema sang mga butang, sia kag ang iya mga sumalakdag amo ang may salabton sa kahimtangan karon sang tawhanon nga katilingban kag sang tanan nga kabudlayan nga ginaantos sang katawhan. Wala sing bisan sin-o ang makasiling sing husto nga ang Dios amo ang kabangdanan sina nga kabudlayan.​—⁠Roma 9:⁠14.

18. Ano ang ginapamatud-an sang pagtugot ni Jehova sa kalautan kag pag-antos kon tuhoy sa ideya nga pagkaindependiente sa Dios?

¹⁸ Ang pagtugot ni Jehova sa kalautan kag pag-antos nagpamatuod nga ang pagkaindependiente sa Dios wala magdala sing mas maayo nga kalibutan. Sing indi mapanghiwala, ang maragtas gintandaan sang paagisod nga mga kalamidad. Ang rason sini amo nga ginpili sang mga tawo nga padayunon ang ila independiente nga dalanon kag wala gid magpakita sing pagtahod sa pulong kag kabubut-on sang Dios. Sang ang dumaan nga katawhan ni Jehova kag ang ila mga lider dimatutom nga nagsunod sang “popular nga dalanon” kag nagsikway sang iya pulong, ang mga resulta malaglagon. Paagi sa iya manalagna nga si Jeremias, ang Dios nagsiling sa ila: “Ang maalam nga mga tawo nahuy-an. Hinadlukan sila kag madakpan. Yari karon! Ginsikway nila ang pulong gid ni Jehova, kag ano bala ang ila kaalam?” (Jeremias 8:​5, 6, 9) Bangod sang kapaslawan nga sundon ang mga talaksan ni Jehova, ang katawhan sa kabilugan nangin subong sang isa ka barko nga wala sing timon, nga ginatumbutumbo sa isa ka mabalod nga dagat.

19. Ano ang pamatuod nga indi mapatalikod ni Satanas ang tanan nga tawo sa Dios?

¹⁹ Ang pagtugot sang Dios sa kalautan kag pag-antos nagpamatuod man nga wala mapatalikod ni Satanas ang tanan nga katawhan kay Jehova. Ginapakita sang maragtas nga may yara pirme mga indibiduwal nga nagpabilin nga matutom sa Dios walay sapayan sang mga pagsulay ukon mga kabudlayan nga gindala sa ila. Sa sulod sang mga siglo, ang gahom ni Jehova ginpakita para sa iya mga alagad, kag ang iya ngalan ginpakilala sa bug-os  nga duta. (Exodo 9:16; 1 Samuel 12:22) Ang Hebreo kapitulo 11 nagasugid sa aton nahanungod sa malaba nga linya sang mga matutom, lakip sanday Abel, Enoc, Noe, Abraham, kag Moises. Ginatawag sila sang Hebreo 12:1 nga ‘tama kadaku nga panganod sang mga saksi.’ Mga huwaran sila sa dimationg nga pagtuo kay Jehova. Sa modernong panahon man, madamo ang nagtaya sang ila kabuhi subong pamatuod sang ila dimabungkag nga integridad sa Dios. Paagi sa ila pagtuo kag gugma, malig-on nga ginapamatud-an sina nga mga indibiduwal nga indi mapatalikod ni Satanas ang tanan nga tawo gikan sa Dios.

20. Ano ang ginpamatud-an sang pagtugot ni Jehova sa kalautan kag pag-antos kon tuhoy sa Dios kag katawhan?

²⁰ Bilang katapusan, ang pagtugot ni Jehova sa kalautan kag pag-antos nga magpadayon naghatag sing pamatuod nga si Jehova lamang, nga Manunuga, ang may ikasarang kag kinamatarong sa paggahom sa katawhan para sa ila dayon nga kaayuhan kag kalipay. Sa sulod sang mga siglo, gintilawan sang katawhan ang madamo nga porma sang panguluhan. Apang ano ang nangin resulta? Ang masibod nga mga problema kag mga krisis nga nagaatubang sa mga pungsod karon mabakod nga ebidensia nga sa pagkamatuod, subong sang ginasiling gid sang Biblia, “ang tawo naggahom sa tawo sa iya kahalitan.” (Manugwali 8:⁠9) Si Jehova lamang ang makatabang sa aton kag makatuman sang iya orihinal nga katuyuan. Paano niya himuon ini, kag san-o?

21. Ano ang himuon kay Satanas, kag sin-o ang gamiton sa paghimo sini?

²¹ Sa gilayon sa tapos mabiktima sanday Adan kag Eva sang pahito ni Satanas, ginpahibalo sang Dios ang dalan sang kaluwasan nga Iya ginatuyo. Amo sini ang ginpahayag ni Jehova tuhoy kay Satanas: “Butangan ko sing kaawayon sa tunga mo kag sang babayi kag sa tunga sang imo binhi kag sang iya binhi. Sia magadugmok sang imo ulo kag dugmukon mo sia sa tikod.” (Genesis 3:15) Yadto nga kapahayagan naggarantiya nga indi pagtugutan ang Yawa sa paghimo sang iya kalautan sing dayon. Subong ang Hari sa Mesianikong Ginharian, ang ginsaad nga Binhi, si Jesuscristo, ‘magadugmok kay Satanas sa ulo.’ Huo, “sa  indi madugay,” dugmukon ni Jesus ang rebelde nga si Satanas!​—⁠Roma 16:⁠20.

ANO ANG HIMUON MO?

22. (a) Anong mga pamangkot ang dapat mo atubangon? (b) Bisan pa ginapabutyag ni Satanas ang iya kasingkal sa mga matutom sa Dios, ano ang mapat-od nila?

²² Bangod nahibaluan na naton ang mga hulusayon nga nadalahig, kay sin-o ka dampig? Pamatud-an mo bala paagi sa imo mga buhat nga isa ikaw ka matutom nga sumalakdag ni Jehova? Sanglit nahibaluan ni Satanas nga malip-ot na lang ang iya tion, himuon niya ang tanan nga masarangan niya sa pagpabutyag sang iya kaakig batok sa mga maluyag maghupot sang ila integridad sa Dios. (Bugna 12:12) Apang makapangayo ka sing bulig sa Dios bangod “si Jehova makahibalo magluwas sang mga tawo nga may diosnon nga debosyon gikan sa pagtilaw.” (2 Pedro 2:⁠9) Indi niya ikaw pagtugutan nga sulayon labaw sa imo masarangan, kag magahimo sia sing dalan paguwa agod nga mabatas mo ang mga pagsulay.​—⁠1 Corinto 10:⁠13.

23. Ano ang masinaligon nga mapaabot naton?

²³ Sing masinaligon, paabuton naton ang tion nga si Hari Jesucristo magahikot batok kay Satanas kag sa tanan nga nagasunod sa iya. (Bugna 20:​1-3) Laglagon ni Jesus ang tanan nga may salabton sa mga kabudlayan kag kagamo nga gin-antos sang katawhan. Samtang wala pa ina nga tion, ang isa ka masakit gid nga sahi sang pag-antos amo ang pagkadula sang aton mga hinigugma sa kamatayon. Basaha ang masunod nga kapitulo agod hibaluon kon ano ang nagakatabo sa ila.

TILAWI ANG IMO IHIBALO

Paano naton nahibaluan nga indi si Jehova ang ginahalinan sang pag-antos sang tawo?

Ano nga mga hulusayon ang ginpautwas ni Satanas sa Eden kag nangin maathag sang adlaw ni Job?

Ano ang ginpamatud-an sang pagtugot sang Dios sa pag-antos?

[Mga Pamangkot sa Pagtinuon]