Kapitulo 17

Pagsapo Sing Kalig-unan sa Tunga Sang Katawhan Sang Dios

1, 2. Paano ang kahimtangan sang katawhan kaanggid sa kahimtangan sang katawhan sa lugar nga ginhapay sang bagyo?

 HANDURAWA nga ginhapay sang isa ka mabaskog nga bagyo ang inyo lugar. Naguba ang imo balay, kag nadula ang tanan mo nga pagkabutang. Maiwat ang pagkaon. Ang kahimtangan daw wala sing paglaum. Nian, nag-abot ang wala ginapaabot nga tabang nga mga suplay. Bugana nga gin-aman ang pagkaon kag panapton. Ginpatindugan ikaw sing bag-o nga balay. Sa pagkamatuod pasalamatan mo gid ang tawo nga naghatag sining mga aman.

² Kaanggid sini ang nagakatabo karon. Kaangay sadto nga bagyo, ang pagrebelde nanday Adan kag Eva nagresulta sa daku nga kahalitan sa kaliwatan sang tawo. Nadula ang Paraiso nga puluy-an sang katawhan. Halin sadto, napaslawan ang tawhanon nga mga panguluhan sa pag-amlig sang katawhan gikan sa inaway, krimen, kag inhustisya. Ang kadam-an ginhimo sang relihion nga gutom sa mapuslanon nga espirituwal nga kalan-on. Apang, sa espirituwal nga paghambal, si Jehova nga Dios nagaaman karon sing pagkaon, panapton, kag puluy-an. Paano niya ginahimo ina?

“ANG MATUTOM KAG MAINANDAMON NGA ULIPON”

3. Paano si Jehova nagahatag sing mga aman para sa katawhan, subong ginapakita sang anong mga halimbawa?

³ Ang tabang nga mga suplay masami nga ginapaagi sa isa ka organisado nga alagyan, kag amo man ang ginahimo ni Jehova tuhoy sa espirituwal nga aman para sa iya katawhan. Ha­limbawa,  ang mga Israelinhon “kongregasyon ni Jehova” sa mga 1,500 ka tuig. Sa tunga nila amo ang pila nga nag-alagad subong alagyan sang Dios sa pagtudlo sang iya Kasuguan. (1 Cronica 28:8; 2 Cronica 17:​7-9) Sang unang siglo C.E., ginbun-ag ni Jehova ang Cristianong organisasyon. Ginporma ang mga kongregasyon, kag nagpanghikot ini sa idalom sang pagtuytoy sang isa ka nagadumala nga hubon nga ginatapuan sang mga apostoles kag gulang nga mga lalaki. (Binuhatan 15:​22-31) Sa karon man, si Jehova nagapakig-angot sa iya katawhan ­paagi sa isa ka organisado nga hubon. Paano naton nahibaluan ini?

4. Sin-o ang napamatud-an nga “matutom kag mainandamon nga ulipon” sa modernong mga tion, kag paano matigayon ang espirituwal nga mga aman sang Dios?

⁴ Si Jesus nagsiling nga sa tion sang iya presensia nga may gahom sa Ginharian, “ang matutom kag mainandamon nga ulipon” masapwan nga nagaaman sing “pagkaon sa nagakaigo nga tion” para sa Iya mga sumulunod. (Mateo 24:​45-47) Sang ginpalingkod si Jesus subong langitnon nga Hari sang 1914, sin-o ang napamatud-an subong amo ining “ulipon”? Indi ang klero sang Cristiandad sa pagkamatuod. Sa daku nga bahin, ginpakaon nila ang ila mga panong sing propaganda nga nagsakdag sang ila kaugalingon pungsudnon nga mga panguluhan sa Inaway Kalibutanon I. Apang ang grupo sang matuod nga mga Cristiano nga ginhaplas sang balaan nga espiritu sang Dios kag bahin sang gintawag ni Jesus nga “diutay nga panong” nagpanagtag sing nagakaigo kag sibu sa tion nga espirituwal nga pagkaon (Lucas 12:32) Ginbantala sining hinaplas nga mga Cristiano ang Ginharian sang Dios sa baylo sang mga panguluhan sang tawo. Subong resulta, sa pagligad sang mga tinuig minilyon sang mahuyugon sa katarungan nga “iban nga mga karnero” ang nagbuylog sa hinaplas nga “ulipon” sa pagbuhat sang matuod nga relihion. (Juan 10:16) Paagi sa ‘matutom nga ulipon’ kag sa Nagadumala nga Hubon sini karon, ginatuytuyan sang Dios ang iya organisado nga katawhan agod ang espirituwal nga pagkaon, panapton, kag puluy-an matigayon sang tanan nga nagahandum sining mga aman. 

“PAGKAON SA NAGAKAIGO NGA TION”

5. Anong kahimtangan sa espirituwal ang nagaluntad sa kalibutan karon, apang ano ang ginahimo ni Jehova sa sini?

⁵ Si Jesus nagsiling: “Ang tawo mabuhi, indi sa tinapay lamang, kundi sa tagsa ka pulong nga nagaguwa sa baba ni Jehova.” (Mateo 4:⁠4) Apang, sing makapasubo ang kalabanan sang katawhan wala nagahatag sing igtalupangod sa mga pulong sang Dios. Subong gintagna sang manalagna ni Jehova nga si Amos, may “tiggulutom, indi sa tinapay, kag kauhaw, indi sa tubig, kundi sa pagpamati sa mga pulong ni Jehova.” (Amos 8:11) Bisan gani ang tuman ka relihioso nga mga tawo ginagutom sa espirituwal. Walay sapayan, ang kabubut-on ni Jehova amo nga “ang tanan nga sahi sang mga tawo maluwas kag makadangat sa sibu nga ihibalo sang kamatuoran.” (1 Timoteo 2:​3, 4) Sing nagakahisuno, nagaaman sia sing espirituwal nga pagkaon sing bugana. Apang diin ini matigayon?

6. Paano ginpakaon ni Jehova ang iya katawhan sa espirituwal sang nagligad nga mga tion?

⁶ Sa bug-os nga maragtas, si Jehova nagahatag sing espirituwal nga pagkaon sa iya katawhan subong isa ka grupo. (Isaias 65:13) Halimbawa, ginatipon anay sang Israelinhon nga mga saserdote ang mga lalaki, mga babayi, kag kabataan agod subong isa ka grupo matudluan sila sing Kasuguan sang Dios. (Deuteronomio 31:​9, 12) Sa idalom sang pagtuytoy sang nagadumala nga hubon, ang unang siglo nga mga Cristiano nag-organisar anay sing mga kongregasyon kag naghiwat sing mga miting agod matudluan kag mapalig-on ang tanan. (Roma 16:5; Filemon 1, 2) Ginasunod ini sang mga Saksi ni Jehova. Mainabyanon nga ginaagda ikaw sa pagtambong sa tanan nila nga mga miting.

7. Paano naangot ang regular nga pagtambong sa Cristianong mga miting sa ihibalo kag pagtuo?

⁷ Sa pagkamatuod, ayhan madamo ka na sing natun-an sa imo personal nga pagtuon sing Biblia. Ayhan may isa nga nagbulig sa imo. (Binuhatan 8:​30-35) Apang ang imo pagtuo mahimo mapaanggid sa isa ka tanom nga malayong kag mapatay kon indi ini maatipan sing nagakaigo. Busa, dapat ikaw makabaton sing nagakaigo nga espirituwal nga pagkaon. (1 Timoteo 4:⁠6) Ang Cristianong mga miting nagaaman sing isa ka dalayon nga programa sang pagtudlo nga gindesinyo sa pagpakaon sa imo sa espirituwal  kag sa pagbulig sa imo nga magpadayon sa pagtubo sa pagtuo samtang nagauswag ikaw sa ihibalo sang Dios.​—⁠Colosas 1:​9, 10.

8. Ngaa ginapalig-on kita nga magtambong sa mga miting sang mga Saksi ni Jehova?

⁸ May isa pa ka importante nga katuyuan ang mga miting. Si Pablo nagsulat: “Magpatugsiling kita kon paano ang pagpukaw sa isa kag isa sa gugma kag maayong mga buhat, nga wala nagabiya sang aton pagtilipon sing tingob.” (Hebreo 10:​24, 25) Ang Griegong tinaga nga ginbadbad “pagpukaw” nagakahulugan man sing “pagpatalom.” Ang isa ka hulubaton sa Biblia nagasiling: “Ang salsalon nagapatalom sang salsalon. Sa amo ang tawo nagapatalom sang nawong sang isa pa.” (Hulubaton 27:17) Kita tanan dapat padayon nga ‘patalumon.’ Ang matag-adlaw nga mga pag-ipit gikan sa kalibutan makapahabol sang aton pagtuo. Kon nagatambong kita sa Cristianong mga miting, may yara pagpalig-unay. (Roma 1:​11, 12) Ang mga katapo sang kongregasyon nagasunod sa laygay ni apostol Pablo nga ‘magpadayon sa paglinaygayay kag sa pagpalig-unay,’ kag ina nga mga butang nagapatalom sang aton pagtuo. (1 Tesalonica 5:11) Ang regular nga pagtambong sa Cristianong mga miting nagapakita man nga ginahigugma naton ang Dios kag nagahatag sa aton sing mga kahigayunan sa pagdayaw sa iya.​—⁠Salmo 35:⁠18.

“PANAPTI NINYO ANG INYO KAUGALINGON SING GUGMA”

9. Paano si Jehova nagpakita sing huwaran sa pagpasundayag sing gugma?

⁹ Si Pablo nagsulat: “Panapti ninyo ang inyo kaugalingon sing gugma, kay isa ini ka himpit nga higot sang paghiusa.” (Colosas 3:14) Mainayuhon nga gin-aman ni Jehova ining panapton para sa aton. Sa anong paagi? Ang mga Cristiano makapasundayag sing gugma bangod isa ini sang hinatag sang Dios nga mga bunga sang balaan nga espiritu ni Jehova. (Galacia 5:​22, 23) Si Jehova mismo nagpasundayag sing labing daku nga gugma paagi sa pagpadala sang iya bugtong nga Anak agod nga kita mahimo makatigayon sing kabuhi nga walay katapusan. (Juan 3:16) Ining talalupangdon gid nga pagpakita sing gugma isa ka modelo para sa aton sa pagpabutyag sining kinaiya. “Kon sa sining paagi  ginhigugma kita sang Dios,” sulat ni apostol Juan, “nian kita mismo yara sa idalom sang obligasyon nga maghigugmaanay sa isa kag isa.”​—⁠1 Juan 4:⁠11.

10. Paano kita makabenepisyo gikan sa “bug-os nga katilingban sang kauturan”?

¹⁰ Ang imo pagtambong sa mga miting sa Kingdom Hall magahatag sa imo sing maayo gid nga kahigayunan sa pagpakita sing gugma. Nanuhaytuhay nga mga tawo ang makilala mo didto. Walay duhaduha nga madali ikaw mabuyok sa ila. Sa pagkamatuod, wala nagapalareho ang personalidad sang mga nagaalagad kay Jehova. Mahimo nga sang una ginalikawan mo ang mga tawo nga indi pareho sa imo sing mga interes ukon mga kinaiya. Apang, ang mga Cristiano dapat “may gugma para sa bug-os nga katilingban sang kauturan.” (1 Pedro 2:17) Busa, himua nga tulumuron nga makilala ang mga nagatambong sa Kingdom Hall​—⁠bisan ang mga indibiduwal nga ang edad, personalidad, kaliwatan, ukon tinun-an tuhay sa imo. Mahimo gid nga masapwan mo nga ang tagsatagsa nagalabaw sa pila ka dalayawon nga kinaiya.

11. Ngaa indi ka dapat matublag sa nanuhaytuhay nga personalidad sa tunga sang katawhan ni Jehova?

¹¹ Indi ka dapat matublag sa nanuhaytuhay nga personalidad sa kongregasyon. Sa pag-ilustrar, handurawa nga nagalakbay sa dalanon upod sa imo ang madamo nga salakyan. Ang kadasigon sang pagdalagan sang tanan, ukon ang kahimtangan sang makina sang tanan indi palareho. Ang iban nakalakbay na sing madamo nga kilometro, apang kaangay mo, ang iban bag-o pa lang magsugod. Apang, walay sapayan sining mga kinatuhayan, ang tanan nagalakbay sa dalanon. Amo man sini sa mga indibiduwal nga mga katapo sang isa ka kongregasyon. Indi tanan nakapalambo sing Cristianong mga kinaiya sa pareho nga kadasigon. Dugang pa, indi pareho ang pisikal ukon emosyunal nga kahimtangan sang tanan. Ang iban nagasimba kay Jehova sa madamo nga tinuig; ang iban bag-o lang magsugod. Apang, ang tanan nagalakat sa dalanon padulong sa kabuhi nga walay katapusan, “nga nahiusa sa isa ka painuino kag isa ka kaisipan.” (1 Corinto 1:10) Busa, pangitaa ang maayo nga mga kinaiya indi ang mga kaluyahon sang mga nagatambong sa kongregasyon. Magabatyag ka sing kalipay kon himuon mo ina, kay marealisar  mo nga ang Dios yara gid sa tunga sining katawhan. Kag sa pagkamatuod amo ina ang luyag mo kadtuan.​—⁠1 Corinto 14:⁠25.

12, 13. (a) Ano ang imo mahimo, kon may isa sa sulod sang kongregasyon nga makasaklaw sang imo balatyagon? (b) Ngaa importante nga indi magtanom sing kaakig?

¹² Sanglit ang tanan nga tawo dihimpit, kon kaisa mahimo nga ang isa sa kongregasyon makasiling ukon makahimo sing isa ka butang nga makapaakig sa imo. (Roma 3:23) Ang disipulo nga si Santiago realistiko nga nagsulat: “Kita tanan nagakasandad sa madamo nga beses. Kon ang sin-o man wala nagakasandad sa pulong, ining isa himpit nga tawo.” (Santiago 3:⁠2) Ano ang himuon mo kon may isa nga nakasaklaw sang imo balatyagon? Ang isa ka hulubaton sa Biblia nagasiling: “Ang paghantop sang isa ka tawo nagapahinay gid sang iya kaakig, kag katahom sa iya bahin ang pagpasaylo sang paglalis.” (Hulubaton 19:11) Ang pagpakita sing paghantop nagakahulugan sing pagtan-aw sa ubos sang kadaygan sang isa ka kahimtangan, paghangop sang natago nga mga butang nga ginbangdan sang paghambal ukon paghikot sang isa ka tawo sa isa ka paagi. Ang kalabanan sa aton nagagamit sing daku nga paghantop sa pagpasaylo sang aton kaugalingon nga mga sayop. Ngaa indi man gamiton ini sa paghangop kag sa pagtabon sang mga dikahimpitan sang iban?​—⁠Mateo 7:​1-5; Colosas 3:⁠13.

¹³ Indi pagkalimti nga dapat naton patawaron ang iban agod nga kita man mismo makabaton sang pagpatawad ni Jehova. (Mateo 6:​9, 12, 14, 15) Kon ginabuhat naton ang kamatuoran, makig-angot kita sa iban sa isa ka mahigugmaon nga paagi. (1 Juan 1:​6, 7; 3:​14-16; 4:​20, 21) Busa, kon may masumalang ikaw nga problema batok sa isa ka indibiduwal sa kongregasyon, pamatuki ang pagtanom sing kaakig. Kon napanaptan ikaw sing gugma, magatinguha ikaw nga husayon ang problema, kag indi ikaw mangalag-ag sa pagpangayo sing pasaylo kon may nasaklaw ikaw.​—⁠Mateo 5:​23, 24; 18:​15-17.

14. Ano nga mga kinaiya ang dapat naton ipanapot?

¹⁴ Ang aton espirituwal nga panapton dapat maglakip sang iban nga mga kinaiya nga may suod nga kaangtanan sa gugma. Si Pablo nagsulat: “Panapti ang inyo kaugalingon sing mapinalanggaon nga pagkaawa, pagkalulo, pagkakubos, pagkamapinailubon,  kag pagkamabinatason.” Ining mga kinaiya, nga ginalakip sang gugma, mga bahin sang diosnon nga “bag-ong personalidad.” (Colosas 3:​10, 12) Manikasog ka bala nga panaptan ang imo kaugalingon sa sining paagi? Matigayon mo ang nagapakilala nga tanda sang mga disipulo ni Jesus ilabi na kon panaptan mo ang imo kaugalingon sing utudnon nga gugma, kay sia nagsiling: “Sa sini ang tanan nga tawo makahibalo nga kamo mga disipulo ko, kon maghigugmaanay kamo.”​—⁠Juan 13:⁠35.

ISA KA DUOG SANG KALIG-UNAN

15. Paano ang kongregasyon kaangay sang isa ka palalipdan?

¹⁵ Ang kongregasyon isa man ka palalipdan, isa ka nagaamlig nga dalangpan diin makasapo ikaw sing kalig-unan. Sa sini masapwan mo ang bunayag sing tagipusuon nga mga tawo nga nagatinguha sa paghimo sang kon ano ang husto sa mga mata sang Dios. Madamo sa ila ang nakalandas sang pareho nga malain nga mga buhat kag mga panimuot nga mahimo ginapanikasugan mo nga malandas. (Tito 3:⁠3) Makabulig sila sa imo, kay ginasugo kita nga ‘magpadayon sa pagdinalhanay sang mga lulan sang isa kag isa.’ (Galacia 6:⁠2) Sa pagkamatuod, ang pagpadayon sa dalanon nga nagadul-ong sa kabuhi nga walay katapusan imo gid kaugalingon nga salabton. (Galacia 6:5; Filipos 2:12) Apang, gin-aman ni Jehova ang Cristianong kongregasyon subong isa ka dalayawon nga bulig kag panakdag. Walay sapayan kon daw ano ka makatulublag ang imo mga problema, may yara ikaw isa ka mabuligon nga dalangpan​—⁠isa ka mahigugmaon nga kongregasyon nga magaunong sa imo sa panahon sang pag-antos ukon kinawad-on.​—⁠Ipaanggid ang Lucas 10:​29-37; Binuhatan 20:⁠35.

16. Ano nga bulig ang ginahatag sang mga gulang sa kongregasyon?

¹⁶ Lakip sa mga magabulig sa imo amo ang “dulot nga mga lalaki”​—⁠gintangdo nga mga gulang, ukon mga manugtatap sa kongregasyon, nga nagabantay sa panong sing kinabubut-on kag malangkagon. (Efeso 4:​8, 11, 12; Binuhatan 20:28; 1 Pedro 5:​2, 3) Tuhoy sa ila, si Isaias nagtagna: “Ang tagsatagsa mangin subong sang palalipdan sa hangin kag isa ka duog nga palanaguan sa unos, subong sang mga ilig sang tubig sa duog nga kigas, subong sang landong sang daku nga igang sa duta nga makalalapyo.”​—⁠Isaias 32:⁠2. 

17. (a) Ano nga sahi sang bulig ang luyag labi na nga ihatag ni Jesus? (b) Ano nga aman ang ginsaad sang Dios para sa iya katawhan?

¹⁷ Sang si Jesus yari sa duta, makapasubo nga ang relihioso nga mga lider wala magpakita sing mahigugmaon nga pagbantay. Ang kahimtangan sang katawhan nagtandog sa iya sing tudok, kag luyag niya labi na nga buligan sila sa espirituwal. Naluoy sa ila si Jesus bangod “ginpanitan sila kag nag-aplaag subong sang mga karnero nga wala sing manugbantay.” (Mateo 9:36) Daw ano ka nagakaigo nga ginalaragway sini ang kahimtangan karon sang madamo nga nagabatas sing makalilisang nga mga problema nga wala sing madangpan para sa espirituwal nga bulig kag paumpaw! Apang ang katawhan ni Jehova may yara espirituwal nga bulig, kay sia nanaad: “Magabutang ako sing mga manugbantay sa ibabaw nila nga magapahalab sa ila; kag indi na sila mahadlok, ukon mahangawa, kag walay bisan sin-o nga makulang.”​—⁠Jeremias 23:⁠4.

18. Ngaa dapat kita magpalapit sa isa ka gulang kon nagakinahanglan kita sing espirituwal nga bulig?

¹⁸ Pangilalaha ang gintangdo nga mga gulang sa kongregasyon. May daku sila nga eksperiensia sa pag-aplikar sang ihibalo gikan sa Dios, kay natuman nila ang mga kalipikasyon para sa mga manugtatap nga ginsambit sa Biblia. (1 Timoteo 3:​1-7; Tito 1:​5-9) Indi mangalag-ag sa pagpalapit sa isa sa ila kon nagakinahanglan ikaw sing espirituwal nga bulig sa paglandas sang isa ka bisyo ukon batasan nga nagasumpakil sa mga ginapatuman sang Dios. Masapwan mo nga ang mga gulang nagasunod sa laygay ni Pablo: “Maghambal sing malugpayon sa ginapung-awan nga mga kalag, sakdaga ang mga maluya, mangin mainantuson sa tanan.”​—⁠1 Tesalonica 2:​7, 8; 5:⁠14.

AGUMA ANG KALIG-UNAN UPOD SA KATAWHAN NI JEHOVA

19. Anong mga pagpakamaayo ang ginhatag ni Jehova sa mga nagapangita sing kalig-unan sa sulod sang iya organisasyon?

¹⁹ Bisan pa nagapuyo kita karon sa tunga sang dihimpit nga mga kahimtangan, ginaamanan kita ni Jehova sing espirituwal nga pagkaon, panapton, kag puluy-an. Sa pagkamatuod, dapat naton hulaton ang ginsaad nga bag-ong kalibutan sang Dios agod maeksperiensiahan naton ang mga benepisyo sang isa ka pisikal nga paraiso. Apang sila nga bahin sang organisasyon ni  Jehova nagaagom karon sing kalig-unan sang isa ka espirituwal nga paraiso. Tuhoy sa ila, si Ezequiel nagtagna: “Magapuyo gid sila sa kalig-unan, nga wala sing magapahadlok sa ila.”​—⁠Ezequiel 34:28; Salmo 4:⁠8.

20. Paano balusan ni Jehova ang bisan ano nga mahimo isakripisyo naton para sa iya pagsimba?

²⁰ Nagapasalamat gid kita nga si Jehova mahigugmaon nga nagahimo sing espirituwal nga mga aman paagi sa iya Pulong kag organisasyon! Magpalapit sa katawhan sang Dios. Indi magpangalag-ag sa paghimo sini nga ginakahangaw-an kon ano ang hunahunaon sang imo mga abyan ukon mga paryente sa imo pagkuha sing ihibalo sang Dios. Mahimo maglain ang buot sang iban bangod nagapakig-upod ikaw sa mga Saksi ni Jehova kag nagatambong sa mga miting sa Kingdom Hall. Apang bugana ang ibalos sa imo sang Dios bangod sang imo ginasakripisyo para sa iya pagsimba. (Malaquias 3:10) Dugang pa, si Jesus nagsiling: “Wala sing bisan sin-o nga nagbiya sang balay ukon mga utod nga lalaki ukon mga utod nga babayi ukon iloy ukon amay ukon mga anak ukon mga duta bangod sa akon kag sa maayong balita ang indi makabaton sing isa ka gatos ka pilo sa karon nga tion, sing mga balay kag mga utod nga lalaki kag mga utod nga babayi kag mga iloy kag mga anak kag mga duta, upod sang mga paghingabot, kag sa nagapakari nga sistema sang mga butang sing kabuhi nga walay katapusan.” (Marcos 10:​29, 30) Huo, bisan ano man ang ginbiyaan mo ukon dapat batason, makasapo ikaw sing makalilipay nga pag-inupdanay kag espirituwal nga kalig-unan sa tunga sang katawhan sang Dios.

TILAWI ANG IMO IHIBALO

Sin-o “ang matutom kag mainandamon nga ulipon”?

Ano nga aman ang nahimo ni Jehova agod pakaunon kita sa espirituwal?

Paano makabulig sa aton ang mga katapo sang Cristianong kongregasyon?

[Mga Pamangkot sa Pagtinuon]

 [Bug-os pahina nga piktyur sa pahina 165]