Kapitulo 60

Abanse nga Laragway sang Himaya ni Cristo sa Ginharian

NAGKADTO si Jesus sa mga bahin sang Cesarea Filipos, kag gintudluan niya ang kadam-an nga nagalakip sang iya mga apostoles. Ginhimo niya ining makapakibot nga pahibalo sa ila: “Sa pagkamatuod nagasiling ako sa inyo nga may iban sang mga nagatindog diri nga indi makatilaw sang kamatayon tubtob nga makita nila ang Anak sang tawo nga nagakari sa iya ginharian.”

‘Ano ang buot silingon ni Jesus?’ pat-od nga nagpalibog ang mga disipulo. Mga isa ka semana sang ulihi, ginpaupod ni Jesus sanday Pedro, Santiago, kag Juan, kag nagtaklad sila sa isa ka mataas nga bukid. Posible nga gab-i yadto, kay gintuyo ang mga disipulo. Samtang nagapangamuyo si Jesus, nagbalhin sia sing dagway sa atubangan nila. Ang iya nawong nagsilaw subong sang adlaw, kag ang iya mga panapton nagputi subong sang kapawa.

Nian, duha ka pigura, nga ginpakilala subong “si Moises kag si Elias,” ang nagpakita kag nagsugod sa pagpakighambal kay Jesus nahanungod sa iya ‘pagtaliwan nga mahanabo sa Jerusalem.’ Ang pagtaliwan maathag nga nagapatuhoy sa pagkapatay ni Jesus kag pagkabanhaw sa tapos sini. Sa amo, ining paghambalanay nagapamatuod nga ang iya makahuluya nga kamatayon indi butang nga likawan, subong sang ginhandum ni Pedro.

Namuragmuragan sa ila nakita, ang mga disipulo may katingala nga nagtan-aw kag namati. Bisan pa isa ini ka palanan-awon, daw nangin matuod gid ini sa bagay nga si Pedro nagsugod sa pagpakigbahin sa danyag, nga nagasiling: “Ginuo, maayo nga magpabilin kita diri. Kon luyag mo, mabuhat ako diri sing tatlo ka payag, isa sa imo kag isa kay Moises kag isa kay Elias.”

Samtang nagahambal si Pedro, ginlikupan sila sang isa ka madamol nga panganod, kag ang tingog gikan sa panganod nagsiling: “Ini ang akon Anak, ang hinigugma, nga akon nahamut-an; pamati kamo sa iya.” Sang mabatian ang tingog, naghapa ang mga disipulo. Apang si Jesus nagsiling: “Tindog kamo, kag indi magkahadlok.” Sang magtindog sila, wala sila sing nakita kundi si Jesus lamang.

Sang pagdulhog nila gikan sa bukid sang masunod nga adlaw, si Jesus nagsugo: “Dili kamo magpanugid bisan kay sin-o sang palanan-awon tubtob nga ang Anak sang tawo mabanhaw.” Ang paglutaw ni Elias sa palanan-awon nagapautwas sing pamangkot sa hunahuna sang mga disipulo. “Ngaa,” pamangkot nila, “nagasiling ang mga escriba nga si Elias dapat magkari sing una?”

“Si Elias nakakari na,” sabat ni Jesus, “wala nila sia makilal-i.” Apang, ang ginahambal ni Jesus amo si Juan Bautista, nga nagtuman sing papel nga kaanggid sa iya ni Elias. Ginhanda ni Juan ang dalan para kay Cristo, subong sang ginhimo ni Elias para kay Eliseo.

Daw ano ka makapalig-on ining palanan-awon, kay Jesus kag sa iya mga disipulo! Ang palanan-awon, kon sa aton pa, isa ka abanse nga laragway sang himaya ni Cristo sa Ginharian. Nakita sang mga disipulo, sa epekto, “ang Anak sang tawo nga nagakari sa iya ginharian,” subong ginsaad ni Jesus sang isa ka semana antes sini. Sang mapatay si Jesus, nagsulat si Pedro nahanungod sa ila ‘pagsaksi sa pagkaharianon ni Cristo samtang upod sila sa iya sa bukid nga balaan.’

Nangayo ang mga Fariseo sing tanda kay Jesus sa pagpamatuod nga sia ang isa nga ginsaad sa Kasulatan nga mangin pinili nga Hari sang Dios. Wala sila paghatagi sina nga tanda. Sa pihak nga bahin, gintugutan ang suod nga mga disipulo ni Jesus nga makita ang pagbalhin sing dagway ni Jesus subong pamatuod sa mga tagna tuhoy sa Ginharian. Sa amo, si Pedro nagsulat sang ulihi: “Napalig-on pa sa amon ang pulong sang tagna.” Mateo 16:13, Mat 16:28–17:13; Marcos 9:1-13; Lucas 9:27-37; 2 Pedro 1:16-19.

▪ Sa wala pa makatilaw sing kamatayon, paano nakita sang iban si Cristo nga nagakari sa iya Ginharian?

▪ Sa palanan-awon, ano ang ginhambalan ni Moises kag ni Elias nahanungod kay Jesus?

▪ Ngaa ining palanan-awon isa ka makapalig-on nga bulig sa mga disipulo?