Kapitulo 39

Ang Bugalon kag ang Mapainubuson

SA TAPOS masambit ang mga kinaiya ni Juan Bautista, ginliso ni Jesus ang igtalupangod sa bugalon, pabag-obag-o nga mga tawo sa palibot niya. “Ini nga kaliwatan,” siling niya, “kaangay sang kabataan nga nagalingkod sa mga tiyendahan nga nagapanawag sa ila kaupdanan, ‘Nagtukar kami sa inyo sing plawta, pero wala kamo magsaot; nagpanalambiton kami, pero wala kamo magpanampok sa dughan.’ ”

Ano ang buot silingon ni Jesus? Sia nagpaathag: “Kay nagkari si Juan nga wala nagakaon ukon nagainom, kag nagasiling sila, ‘May demonyo sia’; nagkari ang Anak sang tawo nga nagakaon kag nagainom, kag nagasiling sila, ‘Yari karon! Ang tawo nga mahakog kag palainom sing alak, abyan sang mga manugsukot sang buhis kag sang mga makasasala.’ ”

Imposible paayawan ang mga tawo. Wala sing butang nga nagapahamuot sa ila. Si Juan nagdingot sa kaugalingon subong Nazareo, bilang pagtuman sa ginsiling sang anghel nga “indi gid sia mag-inom sing alak kag sing maisog nga ilimnon.” Apang ang mga tawo nagsiling nga may demonyo sia. Sa pihak nga bahin, si Jesus nagkabuhi kaangay sang iban nga mga lalaki, wala magdingot sa kaugalingon, kag ginsumbong sia nga nagapasobra.

Kabudlay gid pahamut-an ang mga tawo! Kaangay sila sang mga kaupdanan nga ang iban sa ila wala magsaot sang ang iban nga kabataan nagtukar sang plawta ukon magkasubo sang ang iban nagpanalambiton. Apang, si Jesus nagsiling: “Ang kaalam ginapakamatarong sang iya mga binuhatan.” Huo, ang pamatuod​—⁠ang binuhatan⁠—​nagpaathag nga ang mga panumbungon batok kay Juan kag kay Jesus indi matuod.

Si Jesus nagpadayon paagi sa pagsabdong sa tatlo ka siudad sang Corazin, Betsaida, kag Capernaum, diin ginhimo niya ang kalabanan sang iya gamhanan nga mga butang. Kon ginhimo niya ini kuntani sa Fenicia­hanon nga mga siudad sang Tiro kag Sidon, siling ni Jesus, ining mga siudad naghinulsol kuntani sa panapton nga sako kag mga abo. Nagapakamalaut sa Capernaum, nga hayag nga amo ang iya base nga puluy-an sang nagaministeryo sia, si Jesus nagsiling: “Magahaganhagan pa sa duta sang Sodoma sa Adlaw sang Paghukom sang sa imo.”

Masunod nga gindayaw sing dayag ni Jesus ang iya langitnon nga Amay. Napahulag sia nga himuon ina bangod ang Dios naga­tago sang hamili espirituwal nga mga kamatuoran gikan sa mga maalam kag mga intelektuwal apang ginapahayag ining makatilingala nga mga butang sa mga mapainubuson, sa mga lapsag, kon hambalon pa.

Sa katapusan, si Jesus naghatag sing makagalanyat nga pangagda: “Kari sa akon, tanan kamo nga ginabudlayan kag ginabug-atan, kag papahuwayon ko kamo. Itakod ang akon gota sa inyo kag magtuon kamo sa akon, kay ako mapainubuson kag malulo sa tagipusuon, kag makakita kamo sing kapahuwayan sa inyo mga kalag. Kay ang akon gota mahulas, kag ang akon lulan mamag-an.”

Paano si Jesus nagahatag sing kapahuwayan? Ginahimo niya ina paagi sa paghatag sing kahilwayan gikan sa nagaulipon nga mga tradisyon nga ginlulan sang relihioso nga mga lider sa mga tawo, lakip, halimbawa, ang estrikto nga pagtuman sa mga regulasyon sa Inugpahuway. Subong man, ginpakita niya ang dalan sang kapahuwayan sa mga ginapabug-atan sang pagginahom sang politikal nga mga awtoridad kag sang ila mga sala bangod sang natublag nga konsiensia. Ginpahayag niya sa mga nasit-an kon paano ang ila mga sala mapatawad kag kon paano nila maagom ang hamili nga kaangtanan sa Dios.

Ang malulo nga lulan nga ginahatag ni Jesus amo ang bug-os nga dedikasyon sa Dios, nga makaalagad sa aton mainawaon, maluluy-on nga langitnon nga Amay. Kag ang mamag-an nga lulan nga ginahatag ni Jesus sa mga nagakari sa iya amo ang pagtuman sa mga ginapatuman sang Dios para sa kabuhi, nga amo ang Iya mga sugo nga narekord sa Biblia. Kag ang pagtuman sa sini indi mabug-at. Mateo 11:16-30; Lucas 1:15; 7:31-35; 1 Juan 5:3.

▪ Paano ang kaliwatan ni Jesus kaangay sang kabataan?

▪ Ngaa napahulag si Jesus sa pagdayaw sa iya langitnon nga Amay?

▪ Sa anong mga paagi ginapabug-atan ang mga tawo, kag ano nga kapahuwayan ang ginahatag ni Jesus?