Kapitulo 36

Ang Daku nga Pagtuo sang Isa ka Opisyal sang Hangaway

SANG ginahatag ni Jesus ang iya Wali sa Bukid, nalab-ot na niya ang tungatunga sang iya ministeryo sa publiko. Nagakahulugan ini nga isa ka tuig kag siam ka bulan ukon amoamo sini ang nabilin agod makompleto ang iya hilikuton sa duta.

Nagsulod karon si Jesus sa siudad sang Capernaum, isa ka sahi sang base nga puluy-an para sa iya mga hilikuton. Ginpalapitan sia diri sang mga gulang sang mga Judiyo nga may pangabay. Ginpadala sila sang isa ka opisyal sang Romanong hangaway nga isa ka Gentil, isa ka tawo nga tuhay sing rasa sa mga Judiyo.

Ang hinigugma nga suluguon sang opisyal sang hangaway nagatagumatayon bangod sang grabe nga balatian, kag luyag niya nga ayuhon ni Jesus ang iya suluguon. Ang mga Judiyo hanuot nga nagpakiluoy para sa opisyal: “Takus sia nga ikaw maghimo sini sa iya,” siling nila, “kay nagahigugma sia sa aton pungsod, kag sia gid ang nagpatukod sa amon sang amon sinagoga.”

Sa gilayon, nag-upod si Jesus sa mga tawo. Apang, sang malapit na sila, ang opisyal sang hangaway nagpadala sing mga abyan sa pagsiling: “Ginuo, indi ka na magpagamo, kay indi ako takus nga magkadto ka sa akon balay. Gani wala ako magpangahas sa pagpalapit sa imo.”

Daw ano ka mapainubuson nga mga pulong para sa isa ka opisyal nga naanad sa pagmando sa iban! Apang mahimo nga ginahunahuna man niya si Jesus, nga nakarealisar nga ang kinabatasan nagadumili sa isa ka Judiyo nga makig-upod sa mga indi Judiyo. Bisan si Pedro nagsiling: “Kamo gid nakahibalo nga indi tugot sa isa ka Judiyo ang pagpakig-impon ukon pagpalapit sa isa nga dumuluong.”

Ayhan agod indi mag-antos si Jesus sang ibunga sang paglalis sa sining kinabatasan, ginpadala sang opisyal ang iya mga abyan agod mangabay sa iya: “Magsiling ka lang, kag magaayo ang akon suluguon. Kay ako man tawo nga yara sa idalom sang pagbulut-an, kag may sakop man ako nga mga soldado, kag ginasugo ko sa sining isa, ‘Lakat!’ kag nagalakat sia, kag sa isa, ‘Kari!’ kag nagakari sia, kag sa akon ulipon, ‘Himua ini!’ kag ginahimo niya ini.”

Bueno, sang mabatian ini ni Jesus, nagdayaw sia. “Nagasiling ako sa inyo,” siling niya, “wala ako sing nakita nga subong sini kadaku nga pagtuo bisan sa Israel.” Sa tapos maayo ang suluguon sang opisyal, gingamit ni Jesus ang okasyon sa pagpaathag kon paano ang mga di-Judiyo nga may pagtuo paboran sing mga pagpakamaayo nga ginsikway sang wala sing pagtuo nga mga Judiyo.

“Madamo,” siling ni Jesus, “ang magakari gikan sa sidlangan kag sa katundan kag magalingkod kaupod ni Abraham, ni Isaac, kag ni Jacob, sa ginharian sang langit; samtang ang mga anak sang ginharian ipilak sa kadudulman sa guwa. Didto ang mga tawo magahibi kag magabagrot sang ila mga ngipon.”

‘Ang mga anak sang ginharian . . . nga ginpilak sa kadudulman sa guwa’ amo ang kinaugali nga mga Judiyo nga wala magbaton sang kahigayunan nga una gintanyag sa ila nga mangin mga manuggahom upod kay Cristo. Si Abraham, si Isaac, kag si Jacob nagalaragway sang Ginharian nga kahimusan sang Dios. Sa amo ginpaathag ni Jesus kon paano ang mga Gentil abiabihon sa pagsaliay sa langitnon nga latok, nga subong bala, “sa ginharian sang mga langit.” Lucas 7:1-10; Mateo 8:5-13; Binuhatan 10:28.

▪ Ngaa nagpakiluoy ang mga Judiyo para sa isa ka Gentil nga opisyal sang hangaway?

▪ Ngaa nangabay ang opisyal nga indi magsulod si Jesus sa iya balay?

▪ Ano ang buot silingon ni Jesus sa iya nagatakop nga mga pulong?