Kapitulo 53

Ang Ginahandum nga Labaw sa Tawo nga Gumalahom

SANG milagruso nga ginpakaon ni Jesus ang linibolibo, ang mga tawo natingala. “Matuod gid ini amo ang manalagna nga nagakari sa kalibutan,” siling nila. Naghinakop sila nga indi lamang nga si Jesus amo inang manalagna nga mas labi pa kay Moises kundi nga isa man sia ka labing maayo nga gumalahom. Gani nagplano sila nga dakpon sia kag himuon sia nga hari.

Apang, nahibal-an ni Jesus kon ano ang gina­plano sang mga tawo. Gani dalidali sia nga naghulag agod likawan ang pilit nga paghaylo nila. Ginpapauli niya ang kadam-an kag ginpilit ang iya mga disipulo sa pagsakay sa ila sakayan kag nagkadto sa Capernaum. Nian nagtaklad sia sa bukid agod mangamuyo. Sadto nga gab-i nagaisahanon lamang didto si Jesus.

Wala pa ang kaagahon si Jesus naglaaw gikan sa iya mataas nga nahamtangan kag gintan-aw ang mga balod nga ginapalidpalid sang mabaskog nga hangin. Sa kapawa sang halos ugsad nga bulan, bangod malapit na ang Paskuwa, nakita ni Jesus ang sakayan sang iya mga disipulo nga ginabatibati sang mga balod. Ang mga lalaki nabudlayan sa paggaud.

Sang makita ini, si Jesus nagpanaug sa bukid kag nagsugod sa paglakat sa dagat pakadto sa sakayan. Mga lima ukon anom ka kilometro ang nalakbay sang sakayan sang malab-ot ni Jesus ang iya mga disipulo. Apang, nagpadayon sia sa paglakat nga daw buot magligad sa ila. Sang makita sia sang mga disipulo, nagsinggit sila: “Bagat ini!”

Si Jesus malugpayon nga nagsabat: “Pakaisog kamo; ako ini.”

Apang si Pedro nagsiling: “Ginuo, kon ikaw ina, sugua ako sa pagkara sa imo sa ibabaw sang tubig.”

“Kari!” sabat ni Jesus.

Gani, nagpanaug si Pedro sa sakayan kag naglakat sa ibabaw sang tubig sa pagkadto kay Jesus. Apang sang nakita ni Pedro ang hangin nga mabaskog, nahadlok sia, kag sang nakalugdang, nagsinggit sia: “Ginuo, luwasa ako!”

Sa gilayon gin-untay ni Jesus ang iya kamot kag ginkaptan sia, nga nagasiling sa iya: “Ikaw nga diutay sing pagtuo, ngaa bala nagduhaduha ka?”

Sang nakasakay si Pedro kag si Jesus sa sakayan, nagtunong ang hangin, kag natingala ang mga disipulo. Apang dapat bala sila matingala? Kon nahangpan nila ang “kahulugan sang mga tinapay” paagi sa pag-apresyar sa daku nga milagro nga ginhimo ni Jesus mga pila pa lang ka oras ang nakaligad sang ginpakaon niya ang linibolibo paagi sa lima lamang ka tinapay kag duha ka magagmay nga isda, nian indi dapat tuman ka makatilingala nga makalakat sia sa tubig kag makapatunong sang hangin. Apang, walay sapayan sina, ang mga disipulo nagsimba kay Jesus kag nagasiling: “Matuod gid nga ikaw Anak sang Dios.”

Sing wala dugay, nakalab-ot sila sa Gennesaret, isa ka matahom, mabungahon nga patag malapit sa Capernaum. Didto gindungka nila ang sakayan. Apang sang manaug sila, nakilala sang mga tawo si Jesus kag nagkadto sa palibot nga lugar, nga nagapangita sadtong nagabalatian. Sang gindala sila sa ila mga teheras kag nagtandog lamang sang sidsid sang panapton ni Jesus, nag-ayo sila.

Samtang, nahibal-an sang kadam-an nga nakasaksi sang milagruso nga pagpakaon sa linibolibo nga naglakat na si Jesus. Gani sang may pila ka sakayan nga nag-abot halin sa Tiberio, nagsakay sila sa sini kag nagkadto sa Capernaum agod pangitaon si Jesus. Sang makita nila sia, namangkot sila: “Rabbi, san-o ka bala mag-abot diri?” Ginsabdong sila ni Jesus, nga mahibaluan naton sa indi madugay. Juan 6:14-25; Mateo 14:22-36; Marcos 6:45-56.

▪ Sa tapos mapakaon sing milagruso ni Jesus ang linibolibo, ano ang luyag nga himuon sang mga tawo sa iya?

▪ Ano ang nakita ni Jesus gikan sa bukid nga ginkadtuan niya, kag ano ang ginhimo niya?

▪ Ngaa indi dapat matingala ang mga disipulo sa sining mga butang?

▪ Ano ang natabo sang magdungka sila?