Kapitulo 6

Ang Ginsaad nga Bata

SA BAYLO nga magbalik sa Nazaret, nagpabilin si Jose kag si Maria sa Betlehem. Kag sang walo ka adlaw ang kagulangon ni Jesus, ginpatuli nila sia, subong ginasugo sang Kasuguan sang Dios kay Moises. Daw kinabatasan man nga hatagan sing ngalan ang bata sa ikawalo nga adlaw. Gani gintawag nila ang bata Jesus, subong amo ang ginsiling ni anghel Gabriel anay.

Nagligad ang kapin sa isa ka bulan, kag si Jesus 40 ka adlaw ang kagulangon. Sa diin sia karon dalhon sang iya mga ginikanan? Sa templo sa Jerusalem, mga pila lamang ka kilometro halin sa ila ginapuy-an. Suno sa Kasuguan sang Dios kay Moises, 40 ka adlaw sa tapos mabun-ag ang isa ka anak nga lalaki, ang iloy dapat maghalad sing halad sang pagpaninlo sa templo.

Amo sina ang ginhimo ni Maria. Nagdala sia sing duha ka tukmo subong halad niya. Ginapahayag sini ang kahimtangan sang pangabuhi ni Jose kag ni Maria. Ginapakita sang Kasuguan ni Moises nga kordero, nga mas mahal sa mga pispis, ang dapat ihalad. Apang kon indi ini masarangan sang iloy, tuman na ang duha ka kuyabog nga salampati ukon duha ka tukmo.

Sa templo ginkugos sang isa ka tigulang nga tawo si Jesus. Simeon ang iya ngalan. Ginpahayag sang Dios sa iya nga indi sia mapatay antes makita niya ang ginsaad nga Cristo ni Jehova, ukon Mesias. Sang magkadto sa templo si Simeon sini nga adlaw, gintuytuyan sia sang balaan nga espiritu sa bata nga gindala ni Jose kag ni Maria.

Samtang ginakugos ni Simeon si Jesus nagpasalamat sia sa Dios, nga nagasiling: “Soberanong Ginuo, pataliwana karon sa paghidait ang imo ulipon suno sa imo pulong; kay ang akon mga mata nakakita sang imo paagi sa pagluwas nga gin-aman mo sa atubangan sang tanan nga katawhan, isa ka kapawa sa pagkuha sang tabon gikan sa mga pungsod kag himaya sang imo katawhan nga Israel.”

Nakibot si Jose kag si Maria sang mabatian nila ini. Nian ginpakamaayo sila ni Simeon kag nagsiling kay Maria nga ang iya anak “ginabutang nga kahigayunan sa pagkapukan kag pagbangon sang kadam-an sang Israel” kag nga ang kasubo, kaangay sang matalom nga espada, magalapos sa iya kalag.

Didto sa sini nga okasyon ang 84 anyos nga manalagna nga babayi nga gintawag Ana. Sa kamatuoran, wala gid sia nagakadula sa templo. Sadto gid nga oras nagpalapit sia kag nagpasalamat sa Dios kag naghambal nahanungod kay Jesus sa tanan nga mamati.

Nalipay gid si Jose kag si Maria sa sining mga hitabo sa templo! Sa pagkamatuod, ini tanan nagapamatuod sa ila nga ang bata amo ang Ginsaad nga Isa sang Dios. Lucas 2:21-38; Levitico 12:1-8.

▪ San-o ang kinabatasan nga hatagan sing ngalan ang Israelinhon nga bata?

▪ Ano ang ginpatuman sa isa ka Israelinhon nga iloy kon ang iya anak 40 ka adlaw ang kagulangon, kag paano ang pagtuman sining kinahanglanon nagapahayag sang kahimtangan sa pangabuhi ni Maria?

▪ Sin-o ang nakakilala sang identidad ni Jesus sini nga okasyon, kag paano nila ginpakita ini?