Kapitulo 100

Ang Ilustrasyon Nahanungod sa mga Mina

MAHIMO nga si Jesus yara pa sa balay ni Zaqueo, nga sa diin nagdayon sia anay sa iya paglakbay pakadto sa Jerusalem. Nagpati ang iya mga disipulo nga pag-abot nila sa Jerusalem, ipakilala niya nga sia ang Mesias kag tukuron niya ang iya Ginharian didto. Sa pagtadlong sining ideya kag sa pagpakita nga ang Ginharian madugay pa, si Jesus naghatag sing ilustrasyon.

“Ang isa ka tawo nga dungganon,” siling niya, “nagkadto sa malayo nga duta sa pagbaton sing ginharian kag ugaling magabalik.” Si Jesus amo ang “tawo nga dungganon,” kag ang langit amo ang “malayo nga duta.” Sa pag-abot ni Jesus didto, ihatag sa iya sang iya amay ang gahom sa paghari.

Apang, sa wala pa sia makalakat, gintawag sang tawo nga dungganon ang napulo ka ulipon kag ginhatagan ang tagsatagsa sing pilak nga mina, nga nagasiling: “Patikanga ninyo ini tubtob nga mag-abot ako.” Ang napulo ka ulipon sa nahauna nga katumanan nagalaragway sa nahauna nga mga disipulo ni Jesus. Sa isa ka napasangkad nga aplikasyon, nagalaragway sila sa tanan nga palaabuton nga mga manunubli kaupod niya sa langitnon nga Ginharian.

Ang pilak nga mga mina amo ang bilidhon nga kuwarta, nga ang tagsa may kantidad nga katumbas sa tatlo ka bulan nga suweldo sang isa ka mangunguma. Apang ano ang ginalaragway sang mga mina? Kag ano nga sahi sang pagpatikang ang himuon sang mga ulipon sa sini?

Ang mga mina nagalaragway sa mga pagkabutang nga magamit sang hinaplas sang espiritu nga mga disipulo sa pagpatubas sing dugang pa nga mga manunubli sang langitnon nga Ginharian tubtob sa pag-abot ni Jesus subong Hari sa ginsaad nga Ginharian. Sa tapos sang iya pagkabanhaw kag pagpakita sa iya mga disipulo, ginhatagan niya sila sing simbuliko nga mga mina para sa paghimo sing dugang pa nga mga disipulo kag sa amo ginadugangan ang klase para sa Ginharian sang langit.

“Apang,” padayon ni Jesus, “ang iya mga kasimanwa nagdumot [sa tawo nga dungganon] kag nagpaapas sa iya sing hubon sang mga embahador, nga nagasiling, ‘Indi namon luyag nga maghari sa amon ini nga tawo.’ ” Ang mga kasimanwa amo ang mga Israelinhon, ukon mga Judiyo, indi nalakip ang iya mga disipulo. Sang makakayab na si Jesus sa langit, ginpakita sining mga Judiyo nga indi nila luyag nga mangin hari nila sia paagi sa paghingabot sa iya mga disipulo. Sa sining paagi kaangay sila sang mga banwahanon nga nagpadala sing hubon sang mga embahador.

Paano gingamit sang napulo ka ulipon ang ila mga mina? Si Jesus nagpaathag: “Sang makabalik sia nga nakabaton na sang ginharian, nagsugo sia nga panawgon ining mga ulipon nga ginhatagan niya sing kuwarta, agod mahibaluan niya kon pila ang ila naganansya. Nian ang nahauna nag-abot sa iya atubangan, nga nagasiling, ‘Ginuo, ang imo mina nakaganansya sing napulo pa ka mina.’ Gani nagsiling sia sa iya, ‘Maayo, maayong ulipon! Bangod nga nagmatutom ka sa labing diutay, maggahom ka sa napulo ka siudad.’ Nag-abot karon ang ikaduha, nga nagasiling, ‘Ang imo mina, Ginuo, nakaganansya sing lima pa ka mina.’ Sia nagsiling man sa sining isa, ‘Maggahom ka man sa lima ka siudad.’ ”

Ang ulipon nga may napulo ka mina nagalaragway sa isa ka klase, ukon grupo, sang mga disipulo kutob sang Pentecostes 33 C.⁠E. tubtob karon nga nagalakip sa mga apostoles. Ang mga nakaganansya sing lima ka mina nagalaragway man sa isa ka grupo sa sulod sina man nga tion nga, suno sa ila mga kahigayunan kag mga ikasarang, nagapauswag sang mga pagkabutang sang ila hari sa duta. Ang duha ka grupo makugihon nga nagabantala sing maayong balita, kag subong resulta, madamo sang mga matarong sing tagipusuon ang nangin Cristiano. Ang siam sa mga ulipon nagmadinalag-on sa ila patikang kag napadamo nila ang ila pagkabutang.

“Apang,” padayon ni Jesus, “ang isa nga tuhay nag-abot, nga nagasiling, ‘Ginuo, yari ang imo mina, nga gintago ko nga naputos sa panyo. Kay nahadlok ako sa imo, bangod nga ikaw tawo nga mapintas; ginakuha mo ang wala mo mapatago kag ginaani mo ang wala mo masab-ug.’ Sia nagsiling sa iya, ‘Sa imo baba ginahukman ko ikaw, malaut nga ulipon. Nakahibalo ka, indi bala, nga ako tawo nga mapintas, nga nagakuha sang wala ko mapatago kag nagaani sang wala ko masab-ug? Nian ngaa bala wala mo ginpatago sa bangko ang akon kuwarta? Kuntani sa akon pagbalik makuha ko ang akon kuwarta nga may saka na.’ Kag nagsiling sia sa mga nagatilindog didto, ‘Kuhaa ninyo sa iya ang kuwarta kag ihatag sa may napulo ka mina.’ ”

Para sa malaut nga ulipon, ang pagkadula sing simbuliko nga mina nagakahulugan sing pagkadula sing lugar sa langitnon nga Ginharian. Huo, nadula niya ang pribilehiyo sa paggahom, kon sa aton pa, sa napulo ka siudad ukon lima ka siudad. Talupangda, man, nga ang ulipon wala ginpakamalaut bangod nakahibalo sia sing malain kundi, sa baylo, bangod napaslawan sia sa pagpadamo sang manggad sang ginharian sang iya agalon.

Sang ginhatag ang mina sang malaut nga ulipon sa nahauna nga ulipon, may namatok: “Ginuo, may napulo na sia ka mina!” Apang, si Jesus nagsabat: “Ang tagsatagsa nga may iya hatagan pa; apang sia nga wala sing iya, bisan pa ang yara sa iya kuhaon sa iya. Dugang pa, nahanungod sining akon mga kaaway nga indi luyag nga ako mangin hari nila, dalha sila diri sa akon atubangan kag pamatya sila.” Lucas 19:​11-27; Mateo 28:​19, 20.

▪ Ano ang nagpahulag kay Jesus sa paghatag sing ilustrasyon nahanungod sa mga mina?

▪ Sin-o ang tawo nga dungganon, kag ano ang duta nga iya ginkadtuan?

▪ Sin-o ang mga kasimanwa, kag paano nila ginapakita ang ila dumot?

▪ Sin-o ang mga ulipon, kag ano ang ginalaragway sang mga mina?

▪ Ngaa gintawag nga malaut ang isa ka ulipon, kag ano ang kahulugan sang pagkadula niya sang iya mina?