Kapitulo 16

Ang Kakugi Para sa Pagsimba kay Jehova

ANG mga utod sa iloy ni Jesus​—ang iban pa nga mga anak nga lalaki ni Maria​—amo sanday Santiago, Jose, Simon, kag Judas. Antes sila tanan maglakbay upod kay Jesus kag sa iya mga disipulo padulong sa Capernaum, isa ka siudad malapit sa Dagat sang Galilea, mahimo nga naghapit anay sila sa ila balay sa Nazaret agod nga makapamutos sila sang mga butang nga kinahanglan nila.

Apang ngaa makadto si Jesus sa Capernaum sa baylo nga padayunon ang iya ministeryo sa Cana, sa Nazaret, ukon sa iban nga duog sa pukatod sang Galilea? Una, ang Capernaum mas kilala kag mahimo gid nga isa ka daku nga siudad. Subong man, ang kalabanan sang bag-o nga mga disipulo ni Jesus nagapuyo sa Capernaum ukon malapit sa sini, gani indi kinahanglan nga biyaan nila ang ila puluy-an agod mahanas niya.

Sa tion sang iya pagtener sa Capernaum, naghimo si Jesus sing dalayawon nga mga buhat, subong iya mismo ginpamatud-an pila ka bulan sang ulihi. Apang wala magdugay si Jesus kag ang iya mga kaupod naglakbay liwat. Tion ini sang tigpamulak, kag manugpakadto sila sa Jerusalem agod magtambong sa Paskuwa didto sang 30 C.E. Samtang didto sila, may nakita ang iya mga disipulo kay Jesus nga wala pa nila anay makita.

Suno sa Kasuguan sang Dios, ang mga Israelinhon ginaobligar sa paghalad sing mga sapat. Gani, para sa ila kasulhayan, ang mga negosyante sa Jerusalem nagabaligya sing mga sapat ukon mga pispis para sa sini nga katuyuan. Apang nagabaligya sila sa sulod gid sang templo, kag ginadayaan nila ang mga tawo paagi sa pagtasar sa ila sing sobra gid.

Puno sang kaakig, naghimo si Jesus sing putik nga lubid kag gintabog niya ang mga manugbaligya. Gin-ula niya ang kuwarta sang mga manugbaylo sang kuwarta kag ginpamaliskad ang ila mga lamisa. “Kuhaa ninyo ining mga butang diri!” singgit niya sa mga manugbaligya sang mga salampati. “Dili ninyo paghimua nga balaligyaan ang balay sang akon Amay!”

Sang makita ini sang mga disipulo ni Jesus, nadumduman nila ang tagna nahanungod sa Anak sang Dios: “Ang kakugi sa imo balay magahalunhon sa akon.” Apang ang mga Judiyo namangkot: “Ano bala nga tanda ang mapakita mo sa amon, kay ginhimo mo ining mga butang?” Si Jesus nagsabat: “Gub-a ninyo ining templo, kag sa tatlo ka adlaw akon patindugon ini?”

Nagdumdom ang mga Judiyo nga ang ginapatuhuyan ni Jesus amo ang literal nga templo, kag gani namangkot sila: “Sa kap-atan kag anom ka tuig gintukod ining templo, kag patindugon mo bala ini sa tatlo ka adlaw?” Apang, ang ginapatuhuyan ni Jesus amo ang templo sang iya lawas. Kag tatlo ka tuig sang ulihi, nadumduman sang iya mga disipulo ining ginhambal niya sang ginbanhaw sia gikan sa minatay. Juan 2:​12-22; Mateo 13:​55; Lucas 4:23.

▪ Sa tapos sang kasal sa Cana, sa ano nga mga duog nagkadto si Jesus?

▪ Ngaa naakig si Jesus, kag ano ang iya ginhimo?

▪ Ano ang nadumduman sang mga disipulo ni Jesus sang makita nila ang iya ginhimo?

▪ Ano ang ginsiling ni Jesus nahanungod sa “sining templo,” kag ano ang buot niya silingon?