Kapitulo 117

Ang Kasakit sa Hardin

SANG makatapos pangamuyo si Jesus, sia kag ang iya 11 ka matutom nga apostoles nag-amba sing mga ambahanon sang pagdayaw kay Jehova. Nian nanaug sila gikan sa naibabaw nga kuwarto, nagguwa sa mabugnaw nga kadulom sang kagab-ihon, kag gin-usoy nila liwat ang Nalupyakan sang Kidron padulong sa Betania. Apang sa ila dalanon, nagdulog sila sa isa ka paborito nila nga duog, ang hardin sang Getsemani. Nahamtang ini sa Bukid sang mga Olivo ukon sa palibot sini. Pirme anay diri nagatipon si Jesus kag ang iya mga apostoles sa tunga sang olivo nga mga kahoy.

Sang ginbilin niya ang walo sang mga apostoles​—⁠ayhan malapit sa alagyan sang hardin⁠—​ginhatagan niya sila sing instruksion: “Lingkod kamo diri samtang makadto ako sa unhan sa pagpangamuyo.” Nian ginpaupod niya ang tatlo sa ila​—⁠sanday Pedro, Santiago, kag Juan⁠—​kag nagkadto sila sa sulod pa nayon sang hardin. Nagpangalisod gid kag natublag si Jesus. “Ang akon kalag masinulub-on sing tama, tubtob gid sa kamatayon,” siling niya sa ila. “Pabilin kamo diri kag pulaw kaupod nakon.”

Sang nakakadto sia sa uluunhan, naghapa si Jesus kag nagpangamuyo: “Amay ko, kon mahimo, paligara sa akon ining kupa. Apang, indi ang akon kabubut-on ang matuman kundi ang imo.” Ano ang iya buot silingon? Ngaa ‘masinulub-on sia sing tama, tubtob gid sa kamatayon’? Nagaisol bala sia sa iya desisyon nga mapatay kag mag-aman sing gawad?

Wala gid! Wala nagapangabay si Jesus nga luwason sia sa kamatayon. Ginakangil-aran niya bisan ang ideya lamang nga likawan ang mahalaron nga kamatayon, subong sang ginpanugda anay ni Pedro. Sa baylo, nagakasakit sia bangod nahadlok sia nga ang paagi sang iya pagkapatay sa indi madugay​—⁠subong isa ka talamayon nga kriminal⁠—​magadala sing kahuy-anan sa ngalan sang iya Amay. Nahibaluan niya karon nga sa pila ka oras na lamang ilansang sia sa usok subong ang pinakamalain nga sahi sang tawo​—⁠isa ka manugpasipala batok sa Dios! Amo ini ang nagatublag gid sa iya.

Sa tapos mangamuyo sing malawig, nagbalik si Jesus kag naabtan niya ang tatlo ka apostoles nga nagakatulog. Ginahambal si Pedro, sia nagsiling: “Indi bala kamo makapulaw sing isa ka oras upod sa akon? Magpulaw kamo kag magpangamuyo, agod nga indi kamo madaug sang panulay.” Apang, bangod nahangpan niya ang kabudlayan nga ila ginaatubang kag gab-i na gid man, sia nagsiling: “Ang espiritu, matuod, handa apang ang unod maluya.”

Naglakat si Jesus sa ikaduha nga tion kag nangabay sa Dios nga kuhaon gikan sa iya “ining kupa,” kon sayoron, ang gintangdo nga bahin, ukon kabubut-on ni Jehova, para sa iya. Pagbalik niya, naabtan niya liwat ang tatlo nga nagakatulog samtang dapat nga nagapangamuyo sila agod nga indi sila madaug sang panulay. Sang maghambal si Jesus sa ila, indi nila mahibal-an kon ano ang isabat.

Sang katapusan, sang ikatlo nga tion, naglakat si Jesus sa malapit lang, kag samtang nagaluhod, upod ang mabaskog nga pagsinggit kag paghibi, nangamuyo sia: “Amay, kon buot mo, ipahilayo sa akon ining kupa.” Nabatyagan ni Jesus ang mabaskog nga kasakit bangod sang kahuy-anan nga dalhon sang iya pagkapatay subong isa ka kriminal sa ngalan sang iya Amay. Ti, ang akusaron ka subong isa ka manugpasipala​—⁠isa nga nagapakamalaut sa Dios⁠—​daw sobra gid nga indi masarangan!

Walay sapayan, nagpadayon si Jesus sa pagpangamuyo: “Indi ang akon kabubut-on, kundi ang imo, paghimuon.” Matinumanon nga ginpasakop ni Jesus ang iya kaugalingon sa kabubut-on sang Dios. Sa sini, nagpahayag ang isa ka anghel gikan sa langit kag ginpabakod sia paagi sa pila ka makapalig-on nga mga pulong. Mahimo gid nga ginsugiran sang anghel si Jesus nga nahamuot ang iya Amay sa iya.

Apang, daw ano kabug-at nga lulan ang ginapas-an ni Jesus! Ang iya kaugalingon nga dayon nga kabuhi kag sang bug-os nga kaliwatan sang tawo yara sa timbangan. Daku gid ang kahuol sa emosyon. Gani nagpadayon si Jesus sa pagpangamuyo sing kapin pa ka hanuot, kag ang iya balhas nangin kaangay sang dalagku nga tinulo sang dugo nga nagatupa sa duta. “Bisan pa talagsa gid ini nga hitabo,” siling sang The Journal of the American Medical Association, “ang duguon nga balhas . . . mahimo nga matabo kon ang emosyon nagabakho gid.”

Pagkatapos sini, nagbalik si Jesus sa iya mga apostoles sa ikatlo nga tion, kag sa liwat naabtan niya sila nga nagakatulog. Nangluya sila bangod sa daku nga kasubo. “Sa sini nga tion nagakatulog kamo kag nagapahuway gihapon!” tuaw niya. “Tuman na! Nag-abot na ang oras! Yari karon! Ang Anak sang tawo ginatugyan sa mga kamot sang mga makasasala. Tindog kamo, malakat kita. Tan-awa! Ang nagatugyan sa akon yari na.”

Samtang nagahambal pa sia, nagpalapit si Judas Iscariote, kaupod ang isa ka daku nga kadam-an nga nagadala sing mga sulo kag mga suga kag mga armas. Mateo 26:​30, 36-47; 16:​21-23; Marcos 14:​26, 32-43; Lucas 22:​39-47; Juan 18:​1-3; Hebreo 5:⁠7.

▪ Sa tapos manaug sa naibabaw nga kuwarto, sa diin gindala ni Jesus ang mga apostoles, kag ano ang ginhimo niya didto?

▪ Samtang nagapangamuyo si Jesus, ano ang ginahimo sang mga apostoles?

▪ Ngaa nagakasakit si Jesus, kag ano ang ginpangabay niya sa Dios?

▪ Ano ang ginapakita sang dugo ni Jesus nga nangin kaangay sang mga tulo sang dugo?