Kapitulo 74

Ang Laygay kay Marta, kag ang Instruksion Tuhoy sa Pangamuyo

SA TION sang ministeryo ni Jesus sa Judea, nagsulod sia sa minuro sang Betania. Diri nagapuyo si Marta, si Maria, kag ang ila utod nga si Lazaro. Mahimo nga nakilala ni Jesus ining tatlo sang maaga nga bahin sang iya ministeryo kag gani suod na sia nga abyan nila. Ano man ang natabo, nagkadto karon si Jesus sa puluy-an ni Marta kag gin-abiabi niya si Jesus.

Luyag ni Marta nga himuon ang labing masarangan niya para kay Jesus. Sa pagkamatuod, isa ka dakung kadungganan nga duawon ka sa imo puluy-an sang ginsaad nga Mesias! Gani masako gid si Marta sa paghanda sing manamit nga pagkaon kag sing madamo pa nga detalye agod mangin makalilipay kag komportable ang pagtener ni Jesus.

Sa pihak nga bahin, ang utod ni Marta nga si Maria nagpungko sa tiilan ni Jesus kag namati sa iya. Madugaydugay, nagpalapit si Marta kag nagsiling kay Jesus: “Ginuo, wala ka bala sing kabalaka nga ginpatumbayaan ako sang akon utod nga isa lamang sa pag-aman? Busa, silinga sia nga buligan ako.”

Apang wala sing ginhambal si Jesus kay Maria. Sa baylo, ginlaygayan niya si Marta bangod sang iya sobra nga kabalaka sa materyal nga mga butang. “Marta, Marta,” maluluy-on nga sabdong niya, “nagakabalaka ka kag nagakalisang sa madamo nga butang. Apang pila lamang ka butang, ang kinahanglan, ukon isa lamang.” Nagsiling si Jesus nga indi kinahanglan nga maghinguyang sing madamo nga tion sa pagluto sing madamo nga putahe. Bastante na ang pila lamang ukon isa lamang.

Maayo ang mga katuyuan ni Marta; luyag niya mangin maabiabihon nga tagbalay. Apang, bangod sang iya mabinalak-on nga pag-atipan sa materyal nga mga aman, nawasi niya ang kahigayunan nga makabaton sing personal nga instruksion gikan sa Anak mismo sang Dios! Gani si Jesus naghinakop: “Para sa iya bahin, napili ni Maria ang maayo nga bahin, kag indi ini pagkuhaon sa iya.”

Sang ulihi, sa isa pa ka okasyon, namangkot ang isa ka disipulo kay Jesus: “Ginuo, tudlui kami kon paano mangamuyo, subong nga gintudluan man ni Juan ang iya mga disipulo.” Mahimo nga ining disipulo wala didto sang nagligad nga mga isa ka tuig kag tunga sang ginhatag ni Jesus ang modelo nga pangamuyo sa iya Sermon sa Bukid. Gani ginsulit ni Jesus ang iya mga instruksion apang naghatag pa sia sing isa ka ilustrasyon agod padakuon ang kinahanglanon nga indi mag-untat sa pagpangamuyo.

“Sin-o sa inyo ang may abyan,” umpisa ni Jesus, “nga magkadto sa iya sa gab-i kag magsiling sa iya, ‘Abyan, pahulama ako sing tatlo ka tinapay, kay ang akon abyan nag-abot sa akon gikan sa panlakatan kag wala ako sing ibutang sa atubangan niya’? Kag sia gikan sa sulod magsabat, ‘Dili ako paggamuha. Natakop na ang ganhaan, kag ang akon kabataan nagahigda upod sa akon; indi ako makabangon kag makahatag sa imo.’ Nagasiling ako sa inyo, Bisan indi sia magbangon kag maghatag bangod nga abyan niya sia, apang bangod sang iya tama gid nga pagpilit magabangon sia kag magahatag sa iya suno sa kinahanglan niya.”

Sa sini nga pagpaanggid indi buot silingon ni Jesus nga si Jehova nga Dios indi handa sa pagsabat sa mga pangabay, subong sang abyan sa iya sugilanon. Indi, kundi ginailustrar niya nga kon ang dihanda nga abyan magasabat sa nagapamilit nga mga pangabay, daw ano pa ang aton mahigugmaon nga langitnon nga Amay! Gani si Jesus nagpadayon: “Gani nagasiling ako sa inyo, Padayon kamo sa pagpangayo, kag kamo hatagan; padayon sa pagpangita, kag kamo makakita; padayon sa pagpanuktok, kag kamo pagabuksan. Kay ang tagsatagsa nga nagapangayo magabaton, kag ang tagsatagsa nga nagapangita makakita, kag ang nagapanuktok pagabuksan.”

Nian ginpatuhuyan ni Jesus ang dihimpit kag makasasala nga tawhanon nga mga amay, sa pagsiling: “Sa pagkamatuod, sin-o sa inyo nga amay, nga kon pangayuan sang iya anak sing isda, sa baylo sang isda hatagan niya sia sing man-ug? Ukon kon magpangayo sia sing itlog, hatagan niya sia sing iwiiwi? Busa, kon kamo nga malaut, makahibalo maghatag sing maayong mga dulot sa inyo mga anak, daw ano pa nga ang inyo Amay nga langitnon magahatag sing balaan nga espiritu sa mga nagapangayo sa iya!” Sa pagkamatuod, daw ano ka makapahulag nga pagpalig-on ang ginahatag ni Jesus nga indi mag-untat sa pagpangamuyo. Lucas 10:​38⁠–​11:⁠13.

▪ Ngaa daku gid ang paghanda ni Marta para kay Jesus?

▪ Ano ang ginhimo ni Maria, kag ngaa gindayaw sia ni Jesus sa baylo ni Marta?

▪ Ngaa ginsulit ni Jesus ang iya mga instruksion tuhoy sa pangamuyo?

▪ Paano gin-ilustrar ni Jesus ang kinahanglanon nga indi mag-untat sa pagpangamuyo?