Kapitulo 73

Ang Mabuot nga Samariahanon

MAHIMO nga malapit na si Jesus sa Betania, isa ka minuro nga mga tatlo ka kilometro halin sa Jerusalem. Ginpalapitan sia sang isa ka tawo nga hanas sa Kasuguan ni Moises kag namangkot sia: “Manunudlo, ano ang himuon ko agod makapanubli ako sing kabuhi nga wala sing katapusan?”

Namutikan ni Jesus nga ang tawo, nga isa ka abogado, nagapamangkot indi agod makakuha sing impormasyon kundi, sa baylo, agod tilawan sia. Mahimo nga tuyo sang abogado nga pasabton si Jesus sa paagi nga masaklaw ang mga Judiyo. Gani gindalahig ni Jesus ang abogado, paagi sa pagpamangkot: “Ano bala ang nasulat sa Kasuguan? Paano bala ang pagbasa mo?”

Bilang sabat, ang abogado, nga nagpakita sing dikinaandan nga paghantop, nagbalikwat gikan sa kasuguan sang Dios sa Deuteronomio 6:5 kag Levitico 19:​18, nga nagasiling: “ ‘Higugmaa si Jehova nga imo Dios sa bug-os mo nga tagipusuon, kag sa bug-os mo nga kalag, kag sa bug-os mo nga kusog, kag sa bug-os mo nga hunahuna,’ kag, ‘ang imo isigkatawo subong sang imo kaugalingon.’ ”

“Husto ang imo sabat,” sabat ni Jesus. “Padayuna ang paghimo sini kag magakabuhi ka.”

Apang, wala pa maayawi ang abogado. Para sa iya indi espisipiko ang sabat ni Jesus. Luyag niya nga lig-unon ni Jesus nga ang iya kaugalingon nga pagtamod matadlong kag busa matarong sia sa iya pagtratar sa iban. Gani, namangkot sia: “Sin-o bala ang akon isigkatawo?”

Nagapati ang mga Judiyo nga ang termino nga “isigkatawo” nagapatuhoy lamang sa mga masigka-Judiyo, subong sang daw ginapakita sang konteksto sang Levitico 19:⁠18. Sa katunayan, bisan si apostol Pedro nagsiling sang ulihi: “Kamo gid nakahibalo nga indi tugot sa isa ka Judiyo ang pagpakig-impon ukon pagpalapit sa isa nga tuhay sing rasa.” Busa ang abogado, kag ayhan ang mga disipulo man ni Jesus, nagapati nga matarong sila kon mangin malulo sila sa mga masigka-Judiyo lamang, bangod, sa ila pagtamod, ang mga di-Judiyo indi nila mga isigkatawo.

Paano matadlong ni Jesus ang ila pagtamod nga indi masaklaw ang mga nagapamati sa iya? Nagsugid sia sing isa ka sugilanon, ayhan pasad sa isa ka matuod nga hitabo. “May isa ka [Judiyo],” paathag ni Jesus, “nga nagdulhog pakadto sa Jerico halin sa Jerusalem nga ginbanggaan sang mga buyong, ginhublasan kag ginbakol, kag ginbiyaan nga daw sa patay na.”

“Natabuan karon,” padayon ni Jesus, “nga may saserdote nga nagdulhog sa sadto nga dalan, apang, sang nakita niya sia, naglikaw sia sa pihak sang dalan. Subong man, ang Levita, sang nag-abot sia sa sadto nga duog kag nakita sia, naglikaw sa pihak sang dalan. Apang may isa ka Samariahanon nga nakaagi sa amo nga dalan, kag sang nakita niya sia, naluoy sia.”

Madamo nga saserdote kag mga kabulig nila nga mga Levita sa templo ang nagapuyo sa Jerico, nga 23 ka kilometro ang kalayuon sa makatalagam nga dalan nga dulhugon sing 900 ka kilometro gikan sa ginaalagaran nila sa templo sa Jerusalem. Ginapaabot nga ang saserdote kag Levita magabulig sa isa ka masigka-Judiyo nga nagakinahanglan sing bulig. Apang wala sila magbulig. Sa baylo, ang Samariahanon amo ang nagbulig. Daku gid ang kaugot sang mga Judiyo sa mga Samariahanon sa bagay nga wala lang madugay gin-insulto nila si Jesus sa matigdas nga hambal paagi sa pagtawag sa iya nga “isa ka Samariahanon.”

Ano ang ginhimo sang Samariahanon agod buligan ang Judiyo? “Nagpalapit sia sa iya,” siling ni Jesus, “kag ginsamburan ang iya mga pilas, ginbubuan sing lana kag alak. Kag ginpasakay niya sia sa iya kaugalingon nga hayop kag gindala sia sa dalayunan kag gin-atipan sia. Kag sang madason nga adlaw nagkuha sia sing duha ka denario [suweldo sa mga duha ka adlaw], ginhatag ini sa tag-iya sang dalayunan, nga nagasiling, ‘Tatapa sia, kag sa akon pagbalik bayaran ko ikaw sang tanan nga magasto mo sa iya.’ ”

Sa tapos masugid ang sugilanon, ginpamangkot ni Jesus ang abogado: “Sin-o bala sa sining tatlo, sa hunahuna mo, ang nangin isigkatawo sa ginbanggaan sang mga buyong?”

Nasaw-ahan sa paghatag sing dungog sa isa ka Samariahanon, ang abogado nagsabat lamang: “Ang nagpakita sing kaluoy sa iya.”

“Lakat kag himua ang subong man,” siling ni Jesus.

Kon ginsilingan ni Jesus sing direkta ang abogado nga ang mga di-Judiyo mga isigkatawo man niya, mahimo nga indi lamang nga wala niya ini pagbatuna kundi mahimo nga ang kalabanan sa tumalambong magadampig man sa tawo sa pagpakigsugilanon kay Jesus. Apang, ining matuodtuod nga sugilanon nagapaathag sa dimasuay nga paagi nga ang aton mga isigkatawo nagalakip sa mga tawo nga luwas sadtong yara sa aton kaugalingon nga rasa kag nasyonalidad. Daw ano gid katahom ang paagi ni Jesus sa pagpa­nudlo! Lucas 10:​25-37; Binuhatan 10:​28; Juan 4:​9; 8:⁠48.

▪ Ano ang ginpamangkot sang abogado kay Jesus, kag ano gid ang tuyo niya sa pagpamangkot?

▪ Sin-o ang ginapatihan sang mga Judiyo nga isigkatawo nila, kag ano ang rason sa pagpati nga bisan ang mga disipulo may amo man nga pagpati?

▪ Paano ginpahangop ni Jesus ang matadlong nga pagtamod agod indi ini masuay sang abogado?