Kapitulo 102

Ang Madaugon nga Pagsulod ni Cristo sa Jerusalem

PAGKAAGA, Domingo, Nisan 9, ginbiyaan ni Jesus ang Betania upod sa iya mga disipulo kag nagpakadto sa Bukid sang mga Olivo pa Jerusalem. Wala lang dugay, nagahinampot na sila sa Betfage, nga nahamtang sa Bukid sang mga Olivo. Ginsugo ni Jesus ang duha sang iya mga disipulo:

“Kadto kamo sa minuro nga kit-anon sa inyo, kag sa gilayon makita ninyo ang isa ka asna nga nahigot, kag isa ka polyino kaupod niya; hubara ninyo sila kag dalha sila sa akon. Kag kon may magsiling sa inyo sing bisan ano, magsabat kamo, ‘Ang Ginuo nagakinahanglan sa ila.’ Kag sa gilayon ipadala niya sila.”

Bisan pa sang primero wala mahangpi sang mga disipulo nga ining mga tugon may kahilabtanan sa katumanan sang tagna sa Biblia, narealisar nila ini sang ulihi. Gintagna ni manalagna Zacarias nga ang ginsaad nga Hari sang Dios magasakay sa asna pasulod sa Jerusalem, huo, “sa polyino nga tinday sang asna.” Si Hari Solomon nagsakay man sa tinday sang asna sang ginhaplas sia.

Sang mag-abot ang mga disipulo sa Betfage kag ginakuha nila ang polyino kag ang iloy sini, ang iban sang mga nagatilindog nagsiling: “Ano ang inyo ginahimo?” Apang sang ginsugiran sila nga ang mga sapat para sa Ginuo, gintugutan sang mga tawo ang mga disipulo nga dalhon sila kay Jesus. Ginhampiluan sang mga disipulo sang ila kunop ang asna kag ang iya polyino, apang si Jesus nagsakay sa polyino.

Samtang nagasakay si Jesus pasulod sa Jerusalem, nagdamo ang kadam-an. Ginhumlad sang kalabanan nga tawo ang ila mga kunop sa dalan, samtang ang iban nag-utod sing mga sanga gikan sa mga kahoy kag ginladlad ini. “Bulahan ang Isa nga nagakari subong Hari sa ngalan ni Jehova!” singgit nila. “Paghidait sa langit, kag himaya sa labing mataas nga mga duog!”

Naakig ang iban nga mga Fariseo sa kadam-an sa sining mga pagpahayag kag nagreklamo sila kay Jesus: “Manunudlo, sabdunga sila.” Apang si Jesus nagsabat: “Nagasiling ako sa inyo, Kon ini sila maghipos, ang mga bato gid magasinggit.”

Samtang nagahilapit si Jesus sa Jerusalem, nakita niya ang siudad kag naghibi sia, nga nagasiling: “Kon ikaw kuntani nakahibalo sa sining adlaw sang mga butang nga nahanungod sa paghidait​—⁠apang karon nalipdan sila sa imo mga mata.” Bangod sang iya hungod nga paglalis, dapat matilawan sang Jerusalem ang resulta sini, subong gintagna ni Jesus:

“Likupan ka sang imo mga kaaway [ang mga Romano sa idalom ni Heneral Tito] sing talutog kag libutan ka kag ipiton ka sa tagsa ka luyo, kag was-agon ka sa duta, kag ang imo mga anak sa sulod nimo, kag wala sila sing ibilin sa imo nga isa ka bato nga nasampaw sa isa.” Ining kalaglagan sang Jerusalem nga gintagna ni Jesus natabo gid pagligad sang 37 ka tuig, sang tuig 70 C.⁠E.

Mga pila ka semana lamang antes sini, nakita sang madamo sa kadam-an nga ginbanhaw ni Jesus si Lazaro. Ginpanugidsugid nila sa iban ining milagro. Gani sang magsulod si Jesus sa Jerusalem, nagkinagula ang bug-os nga siudad. “Sin-o ini?” luyag mahibaluan sang katawhan. Kag ang kadam-an nagsiling: “Ini amo ang manalagna nga si Jesus gikan sa Nazaret sang Galilea!” Sang makita ang nagakatabo, nanganduhoy ang mga Fariseo nga sila napaslawan, kay, subong ginsiling nila: “Ang kalibutan nagsunod sa iya.”

Subong kinabatasan niya kon nagaduaw sia sa Jerusalem, nagkadto si Jesus sa templo agod magpanudlo didto. Didto ginpalapitan sia sang mga bulag kag mga piang, kag gin-ayo niya sila! Sang makita sang puno nga mga saserdote kag mga escriba ang makatilingala nga mga butang nga ginahimo ni Jesus kag sang mabatian nila ang mga bata nga lalaki sa templo nga nagasinggit, “Ginapangamuyo namon, luwasa ang Anak ni David!” nagsingkal sila. “Nabatian mo bala ang ginasiling nila sini?” protesta nila.

“Huo,” sabat ni Jesus. “Wala bala ninyo mabasa ini, ‘Sa baba sang kabataan kag sang mga nagasuso nag-aman ka sing pagdayaw’?”

Nagpadayon si Jesus sa pagpanudlo, kag nagpanghulunghulong sia sa tanan nga butang sa templo. Wala magdugay nagsirom na. Gani naglakat sia, upod sa 12, kag ginlakbay nila liwat ang mga tatlo ka kilometro pabalik sa Betania. Ginpaligad nila didto ang Domingo sang gab-i, mahimo sa puluy-an sang iya abyan nga si Lazaro. Mateo 21:​1-11, 14-17; Marcos 11:​1-11; Lucas 19:​29-44; Juan 12:​12-19; Zacarias 9:⁠9.

▪ San-o kag sa anong paagi nagsulod si Jesus sa Jerusalem subong Hari?

▪ Daw ano ka importante ang pagdayaw sang kadam-an kay Jesus?

▪ Ano ang ginbatyag ni Jesus sang makita niya ang Jerusalem, kag anong tagna ang ginpamulong niya?

▪ Ano ang natabo sang magkadto si Jesus sa templo?