Kapitulo 88

Ang Manggaranon kag si Lazaro

SI Jesus nakigsugilanon sa iya mga disipulo nahanungod sa nagakaigo nga paggamit sa materyal nga manggad, nagapaathag nga indi kita mahimo nga mangin ulipon sini kag sa amo man nga tion mangin ulipon sang Dios. Ang mga Fariseo nagapamati man, kag gin-uligyat nila si Jesus bangod mga mahigugmaon sila sa kuwarta. Gani siling niya sa ila: “Kamo amo ang mga nagapakamatarong sang inyo kaugalingon sa atubangan sang mga tawo, apang ang Dios nakakilala sang inyo mga tagipusuon; kay ang ginapakamataas sa tunga sang mga tawo kangil-aran sa itululok sang Dios.”

Nag-abot na ang tion agod baliskaron ang lamesa sa mga tawo nga manggaranon sa kalibutanon nga mga pagkabutang, sa politikanhon nga gahom, kag sa relihioso nga kontrol kag impluensia. Paubson sila. Apang ang mga nagakilala sang ila espirituwal nga kinahanglanon pakataason. Ginpakita ni Jesus ina nga pagbalhin sang padayon sia nga nagsiling sa mga Fariseo:

“Ang Kasuguan kag ang mga Manalagna tubtob kay Juan [Bautista]. Kutob sadtong tion ginawali ang maayong balita sang ginharian sang Dios, kag ang tagsa ka tawo nagasulod sing palugos sa sini. Apang, mahapos pa nga magtaliwan ang langit kag duta sang sa mangin wala sing pulos ang isa ka kudlit sang kasuguan.”

Ang mga escriba kag mga Fariseo nagapabugal sang ila ginaangkon nga pagsunod sa Kasuguan ni Moises. Dumduma nga sang milagruso nga ginhatagan sing itululok ni Jesus ang isa ka tawo sa Jerusalem, sila nagpabugal: “Mga disipulo kami ni Moises. Nahibaluan namon nga ang Dios nagpamulong kay Moises.” Apang gintuman karon sang Kasuguan ni Moises ang tuyo sini nga pagtuytoy sa mga kubos sa gintangdo sang Dios nga Hari, si Jesucristo. Gani sang ginsugdan ang ministeryo ni Juan, ang tanan nga sahi sang katawhan, labi na ang mga kubos kag mga imol, nagpanikasog nga mangin mga sakop sang Ginharian sang Dios.

Sanglit ang Mosaikong Kasuguan natuman karon, ang obligasyon nga tumanon ini dapat nga dulaon. Ang Kasuguan nagatugot sang diborsio sa lainlain nga kabangdanan, apang sa karon si Jesus nagsiling: “Ang tagsatagsa nga nagabulag sa iya asawa kag nagapangasawa sing lain nagapanglahi, kag ang nagapangasawa sa isa nga binulagan sang iya bana nagapanglahi.” Ina nga pahibalo pat-od gid nga nagpaakig sa mga Fariseo, labi na kay ginatugutan nila ang diborsio sa madamong kabangdanan!

Nagapadayon sang iya ginasiling sa mga Fariseo, si Jesus nagsaysay sang isa ka ilustrasyon nahanungod sa duha ka lalaki nga ang tindog, ukon kahimtangan, nagbalhin sing dramatiko sang ulihi. Mamutikan mo bala kon sin-o ang ginalaragway sang mga lalaki kag kon ano ang kahulugan sang pagbaliskad sang ila kahimtangan?

“May isa ka tawo nga manggaranon,” paathag ni Jesus, “nga napanaptan sing purpura kag lino nga manipis, kag nagakabuhi sa lakas nga kadayawan adlaw-adlaw. Apang sa iya gawang nahal-id ang isa ka imol nga tawo nga ginhingalanan si Lazaro, puno sang katol kag naghandum nga pakan-on sang mga usik nga nagakadagdag sa lamisa sang manggaranon. Huo, bisan pa ang mga ido nagpalapit kag nagdilap sang iya mga katol.”

Gingamit diri ni Jesus ang tawo nga manggaranon sa paglaragway sa Judiyong relihiosong mga lider, lakip indi lamang ang mga Fariseo kag mga escriba kundi ang mga Saduceo kag puno nga mga saserdote man. Manggaranon sila sa espirituwal nga mga pribilehiyo kag mga kahigayunan, kag naggawi sila subong sang paggawi sang manggaranon. Ang ila pagsuksok sing harianon nga purpura nagalaragway sang ila maayo nga posisyon, kag ang puti nga lino nagalaragway sang ila pagpakamatarong sa kaugalingon.

Ginasimusimo sining bugalon nga manggaranon nga klase ang imol kag kubos nga mga tawo, nagatawag sa ila nga ‘am ha·’aʹrets, ukon mga tawo sang duta. Sa amo ginalaragway sang imol nga si Lazaro ining mga tawo nga gindingutan sang relihiosong mga lider sing nagakaigo nga espirituwal nga pagkaon kag mga pribilehiyo. Busa, kaangay kay Lazaro nga puno sang mga katol, ang kubos nga mga tawo ginpakanubo subong balatianon sa espirituwal kag nagakaigo lamang nga ibuylog sa mga ido. Apang, yadtong yara sa Lazaro nga klase ginagutom kag ginauhaw sa espirituwal nga pagkaon kag gani yara sila sa gawang, nga nagatinguha nga makabaton sing bisan anong usik sang espirituwal nga pagkaon nga mahimo nga mahulog gikan sa lamisa sang tawo nga manggaranon.

Ginalaragway karon ni Jesus ang pagbaliskad sang kahimtangan sang tawo nga manggaranon kag ni Lazaro. Ano ining mga pagbalhin, kag ano ang ginalaragway sini?

Ang Tawo nga Manggaranon kag si Lazaro Nakaeksperiensia sing Pagbalhin

Ang tawo nga manggaranon nagalaragway sa relihioso nga mga lider nga napaboran sing espirituwal nga mga pribilehiyo kag mga kahigayunan, kag si Lazaro nagalaragway sa kinaandan nga mga tawo nga gutom sa espirituwal nga pagkaon. Ginpadayon ni Jesus ang iya sugilanon, nga ginalaragway ang hinali nga pagbalhin sa mga kahimtangan sang mga lalaki.

“Sa pagligad sang tion,” siling ni Jesus, “napatay ang imol nga tawo kag gindala sia sang mga anghel sa sabak ni Abraham. Ang tawo nga manggaranon napatay man kag ginlubong. Kag sa Hades, sang nagaantos sia, ginbayaw niya ang iya mga mata, kag nakita niya si Abraham sa malayo kag si Lazaro sa iya sabak.”

Sanglit ang tawo nga manggaranon kag si Lazaro indi literal nga mga tawo kundi nagasimbulo sa mga klase sang mga tawo, sing lohiko ang ila kamatayon simbuliko man. Ano ang ginasimbulo, ukon ginalaragway sang ila pagkapatay?

Bag-o lang mapatuhuyan ni Jesus ang pagbalhin sa mga kahimtangan sa pagsiling nga ‘ang Kasuguan kag ang mga Manalagna tubtob lamang kay Juan Bautista, apang kutob sadto ang ginharian sang Dios ginawali.’ Busa, may kaangtanan sa pagbantala ni Juan kag ni Jesucristo nga ang tawo nga manggaranon kag si Lazaro napatay sa ila anay mga kahimtangan.

Ang yara sa ma­painubuson kag mahinulsulon nga Lazaro nga klase napatay sa ila anay kubos sa espirituwal nga kahimtangan kag nagsaylo sa kahimtangan nga nahamut-an sang Dios. Samtang sang una nagahulat lamang sila sa relihioso nga mga lider sa mga mumho nga nagakahulog gikan sa espirituwal nga lamesa, karon ang Makasulatanhon nga mga kamatuoran nga ginapaambit ni Jesus nagabusog sa ila. Sa amo gindala sila sa sabak, ukon nahamut-an nga kahimtangan, sang Daku Pa nga Abraham, si Jehova nga Dios.

Sa pihak nga bahin, ang mga nagahuman sa tawo nga manggaranon nga klase nagdangat sa kahimtangan nga wala nahamut-an sang Dios bangod wala nila pagbatuna ang mensahe sang Ginharian nga gintudlo ni Jesus. Paagi sa sini napatay sila sa kahimtangan nila anay nga daw napaboran. Sa kamatuoran, ginasiling nga sila yara sa malaragwayon nga pag-antos. Pamatii karon, samtang nagahambal ang tawo nga manggaranon:

“Amay nga Abraham, kaluuyi ako, kag ipadala si Lazaro agod nga itum-oy niya ang ukbong sang iya tudlo sa tubig kag mapabugnawan ang akon dila, kay nagakasakit ako sa sining dabdab.” Ang kalayuhon nga mga mensahe sang paghukom nga ginwali sang mga disipulo ni Jesus amo ang nagpaantos sa mga indibiduwal sang tawo nga manggaranon nga klase. Luyag nila nga untatan sang mga disipulo ang ila pagwali sining mga mensahe, sa amo mapaumpawan diutay ang ila pag-antos.

“Apang si Abraham nagsiling, ‘Anak, dumduma nga ikaw sang nagakabuhi pa nagbaton sang imo maayong mga butang, kag si Lazaro sa amo nga bagay sang malaut nga mga butang. Apang karon diri ginalipay sia, kag ikaw yara sa kasakit. Kag dugang pa sini tanan, sa ulot namon kag ninyo may ginbutang nga daku nga kadadalman, agod nga ang mga luyag maglaton gikan diri pakadto sa inyo indi makasarang, kag wala sing makatabok gikan dira pakari sa amon.’ ”

Daw ano ka makatarunganon kag nagakaigo inang hinali nga pagbaliskad sang kahimtangan sa ulot sang Lazaro nga klase kag sang tawo nga manggaranon nga klase! Ang pagbalhin sang mga kahimtangan natuman pila ka bulan sang ulihi sang Pentecostes 33 C.⁠E., sang ang daan nga Kasuguan nga katipan ginbuslan sang bag-ong katipan. Nangin maathag gid nga ang mga disipulo nahamut-an sang Dios, indi ang mga Fariseo kag iban pa nga relihioso nga mga lider. Ang “dakung kadadalman” nga nagapain sa simbuliko nga tawo nga manggaranon gikan sa mga disipulo ni Jesus nagalaragway busa sa indi mabalhin kag matarong nga paghukom sang Dios.

Pagkatapos ginpangabay sang tawo nga manggaranon ang “amay nga si Abraham”: “Pakadtua [si Lazaro] sa balay sang akon amay, kay may lima ako ka utod nga lalaki.” Sa amo nagtu-ad ang tawo nga manggaranon nga may yara sia suod nga kaangtanan sa isa pa ka amay, nga sa kamatuoran amo si Satanas nga Yawa. Nangabay ang tawo nga manggaranon nga pamag-anon ang mga mensahe sang paghukom sang Dios agod nga ang iya “lima ka utod nga lalaki,” ang iya relihioso nga mga alyado, indi mabutang sa “sining duog sang pag-antos.”

“Apang si Abraham nagsiling, ‘Sila may Moises kag mga manalagna; papamatia sila sa ila.’ ” Huo, agod ang “lima ka utod nga lalaki” makalikaw sa pag-antos, ang lamang nga himuon nila amo nga pamatian ang mga sinulatan ni Moises kag sang mga Manalagna nga nagapakilala kay Jesus subong ang Mesias kag dayon mangin iya mga disipulo. Apang ang tawo nga manggaranon nagpamatok: “Indi, amay nga Abraham, apang kon may isa gikan sa mga minatay nga magkadto sa ila, magahinulsol sila.”

Apang, ginsilingan sia: “Kon indi sila magpamati kay Moises kag sa mga Manalagna, indi man sila mabuyok bisan may isa nga mabanhaw.” Ang Dios indi magaaman sing pinasahi nga mga tanda ukon mga milagro sa pagkombinse sa mga tawo. Dapat nila basahon kag iaplikar ang Kasulatan kon luyag nila matigayon ang iya kahamuot. Lucas 16:​14-31; Juan 9:​28, 29; Mateo 19:​3-9; Galacia 3:​24; Colosas 2:​14; Juan 8:44.

▪ Ngaa simbuliko ang pagkapatay sang tawo nga manggaranon kag ni Lazaro, kag ano ang ginalaragway sang ila pagkapatay?

▪ Sa umpisa sang ministeryo ni Juan, ano nga pagbalhin ang ginpakita ni Jesus nga matabo?

▪ Ano ang dulaon sa kamatayon ni Jesus, kag paano ini magaapektar sa diborsio?

▪ Sa ilustrasyon ni Jesus, sin-o ang ginalaragway sang tawo nga manggaranon kag ni Lazaro?

▪ Ano ang mga pag-antos nga gin-antos sang tawo nga manggaranon, kag sa anong paagi ginapangabay niya nga mapabugnawan sia?

▪ Ano ang ginalaragway sang “dakung kadadalman”?

▪ Sin-o ang matuod nga amay sang tawo nga manggaranon, kag sin-o ang iya lima ka utod nga lalaki?