Kapitulo 71

Ang Matig-a nga Dipagpati sang mga Fariseo

ANG mga ginikanan sang bulag anay nga manugpakilimos hinadlukan sang ginpatawag sila sa atubangan sang mga ­Fariseo. Nahibal-an nila ang desisyon nga ang bisan sin-o nga nagatuo kay Jesus pagatabugon sa sinagoga. Mabudlay gid kon mautod ang pagpakig-upod sa iban sa komunidad, labi na para sa imol nga pamilya. Gani mahalungon ang mga gini­ka­nan.

“Amo bala ini ang inyo anak nga ginasiling ninyo nga natawo nga bulag?” pamangkot sang Fariseo. “Paano nian nga sia karon makakita?”

“Kami nakahibalo nga ini anak namon kag nga natawo sia nga bulag,” sabat sang mga ginikanan. “Apang kon paano nga sia karon nakakita wala kami makahibalo, ukon sin-o ang nagpamuklat sang iya mga mata wala kami makahibalo.” Pat-od nga ginsugiran sila sang ila anak sang tanan nga natabo, apang ang mga ginikanan mahalungon nga nagsiling: “Pamangkuta sia. Sia may edad na. Magahambal sia nahanungod sa iya kaugalingon.”

Busa, ginpatawag liwat sang mga Fariseo ang tawo. Sini nga tion ginpahog nila sia nga nakatipon kuno sila sing mga pamatuod batok kay Jesus. “Maghatag ka sing himaya sa Dios,” siling nila. “Nakahibalo kami nga ining tawo makasasala.”

Wala ginpanghiwala sang bulag anay nga tawo ang ila panumbungon, sa pagsiling: “Kon sia makasasala wala ako makahibalo.” Apang nagdugang sia: “Isa ka butang ang nahibaluan ko, nga sadto bulag ako, apang karon makakita ako.”

Sa pagtinguha nga makakita sing sayop sa iya testimonya, namangkot liwat ang mga Fariseo: “Ano bala ang ginhimo niya sa imo? Paano bala ang pagpamuklat niya sang imo mga mata?”

“Nasugid ko na sa inyo,” yamo sang tawo, “kag wala kamo magpamati. Ngaa bala buot kamo mamati liwat?” Sing mayagutaon, namangkot sia: “Luyag man bala ninyo nga mangin mga disipulo niya?”

Naakig ang mga Fariseo sa sini nga sabat. “Disipulo ka sadto nga tawo,” panumbungon nila, “apang kami mga disipulo ni Moises. Nakahibalo kami nga ang Dios nagpakighambal kay Moises; apang nahanungod sining tawo, kami wala makahibalo kon tagadiin sia.”

Sa kakibot, ang kubos nga manugpakilimos nagsabat: “Kalatingalahan ini, wala ninyo mahibaluan kon tagadiin sia, apang sia nagpamuklat sang akon mga mata.” Ano nga konklusion ang dapat naton matigayon gikan sa sini? Gintudlo sang manugpakilimos ang ginabaton nga argumento: “Kita nakahibalo nga ang Dios wala nagapamati sa mga makasasala, apang kon ang bisan sin-o nga nagakahadlok sa Dios kag nagahimo sang iya kabubut-on, sia ginapamatian niya. Kutob sa pagsugod sang kalibutan wala pa gid mabatii nga may isa nga nagpamuklat sang mga mata sang tawo nga natawo nga bulag.” Busa, maathag ang konklusion: “Kon ining tawo indi nagikan sa Dios, indi sia makahimo sing bisan ano.”

Wala sing masabat ang mga Fariseo sa sining prangka kag maathag nga pangatarungan. Indi nila mabaton ang kamatuoran, kag gani gin-uligyat nila ang tawo: “Ikaw natawo sing bug-os sa sala, kag tudluan mo bala kami?” Sa sini, ginsubol nila ang tawo, sing maathag ginsikway sia gikan sa sinagoga.

Sang mabatian ni Jesus ang nahanungod sa ginhimo nila, nakita niya ang tawo kag nagsiling: “Nagatuo ka bala sa Anak sang tawo?”

Bilang sabat, ang bulag anay nga manugpakilimos namangkot: “Sin-o bala sia, ginuo, agod nga magtuo ako sa iya?”

“Amo sia ang nagapakighambal sa imo,” sabat ni Jesus.

Sa gilayon, ang tawo nagyaub kay Jesus kag nagsiling: “Ginuo, nagatuo ako.”

Nian si Jesus nagpaathag: “Ako nagkari sa sining kalibutan sa paghukom: agod nga ang mga indi makakita makakita kag ang mga makakita mangin bulag.”

Sa sina, ang mga Fariseo nga nagapamati namangkot: “Bulag man bala kami?” Kon batunon nila nga sila bulag sa kaisipan, mahimo nga may balibad ang ila pagpamatok kay Jesus. Subong sang ginsiling sa ila ni Jesus: “Kon kamo bulag, wala kamo kuntani sing sala.” Apang, matig-a sila nga nag-insister nga indi sila bulag kag indi nila kinahanglan ang espirituwal nga pagpalig-on. Gani si Jesus nagsiling: “Apang karon nagasiling kamo, ‘Makakita kami.’ Ang inyo sala nagapabilin.” Juan 9:​19-41.

▪ Ngaa hinadlukan ang mga ginikanan sang bulag anay nga manugpakilimos sang ginpatawag sila sa atubangan sang mga Fariseo, kag gani paano sila mahalungon nga nagsabat?

▪ Paano gintinguhaan sang mga Fariseo nga pahugon ang bulag anay nga tawo?

▪ Anong makatarunganon nga argumento sang tawo ang nagpaakig sa mga Fariseo?

▪ Ngaa wala sing balibad ang mga Fariseo sa ila pagpamatok kay Jesus?